Barita Yohanes Pamaptis
(Mat. 3:1-12; Mrk. 1:1-8; Yoh. 1:19-28)
3
Takaꞌ lima balas tahutn Tiberius marentah jaji Kaisar kaꞌ nagari karajaan Roma,
Pontius Pilatus jaji gubernur kaꞌ wilayah Yudea,
man Herodes marentah kaꞌ wilayah Galilea.
Pilipus abang Herodes marentah kaꞌ wilayah Iturea man wilayah Trakhonitis,
Lisanias marentah kaꞌ wilayah Abilene.
2 Nang mangkoꞌ Imam Agunga Hanas man Kayapas.
Kaꞌ tahutn koalah Tuhan Allah bapasatn kaꞌ Yohanes anak Sakaria kaꞌ padang paser.
3 Tagal koa Yohanes ampus kaꞌ sigana abut nang kaꞌ sungeꞌ Yordan man nyampeatn barita mpat kaꞌ Tuhan Allah.
Yohanes nyampeatn lea nian,
“Kitaꞌ arus badiapm babuat dosa man ugaꞌ dibaptis,
jaji tandahatn kadeꞌ kitaꞌ dah mulakng kaꞌ Tuhan Allah.
Supaya Tuhan Allah ngamponiaꞌ tabiat kitaꞌ nang jahat.”
4 Nang Yohanes koa panjawat pas man ahe nang taconteng kaꞌ kitap nabi Yesaya:
“Ada urakng nang nyimpadoatn lea nian kaꞌ padang paser,
‘Siapatn maraga untuꞌ Tuhan Allah,
parata maraga untuꞌ Ia.
5 Sigana arokng ditimbusaꞌ,
sigana panamukng man bukit dirataatnnaꞌ.
Maraga nang babeloꞌ-beloꞌ dipalocor
man maraga nang timul tingalapm dirataatn.
6 Sigana urakng neleꞌaꞌ lemae
Tuhan Allah nyalamatatnnaꞌ talino!’”b
7 Manyak urakng atakng kaꞌ Yohanes untuꞌ dibaptis.
Yohanes bakata kaꞌ ia kaꞌ koa,
“Kitaꞌ urakng nang batabiat jahat lea ular babisa!
Sae nang bakata kadeꞌ kitaꞌ lapasaꞌ dari ukuman Tuhan Allah nang atakngaꞌ?
8 Tojokatn boh man kalakuan kitaꞌ,
kadeꞌ kitaꞌ dah mulakng kaꞌ Tuhan Allah!
Ame kitaꞌ bapikir tagal Abraham eneꞌ uyut kitaꞌ,
kitaꞌ lapasaꞌ dari ukuman.
Dangar boh:
Man batu-batu nian ugaꞌ Tuhan Allah baya manjawat katurunan untuꞌ Abraham!c
9 Ukuman Tuhan Allah dah siap dinyataatnnaꞌ lea kapak nang dah siap untuꞌ nabakngaꞌ puhutn sampe kaꞌ akar-akarnya.
Sigana puhutn nang inaꞌ mabuahatn buah nang edoꞌ,
ditabakngaꞌ man dibuakngaꞌ kaꞌ dalapm api.”
10 Urakng kaꞌ koa batanyaꞌ kaꞌ Yohanes,
“Jaji ahe nang arus kami panjawat?”
11 Yohanes nyahut,
“Urakng nang ngampuꞌ dua balah baju,
arus mareꞌatn sabalah kaꞌ urakng nang nanaꞌ babaju;
man urakng nang ada bapamakanan arus maginya ugaꞌ.”
12 Panagih-panagih pajak ugaꞌ atakng kaꞌ Yohanes untuꞌ dibaptis.
Ia kaꞌ koa batanyaꞌ.
“Paꞌ Guru,
ahe nang arus kami panjawat?”
13 Yohanes nyahut,
“Ame nagih balabih dari ahe nang dah dinatapatn.”
14 Ada ugaꞌ tantara nang batanyaꞌ,
“Lemae man kami?
Ahe nang arus kami panjawat?”
Yohanes nyahut,
“Ame maras saepun man ame ngarampas duit dangan man tuduhatn nang alok-alok.
Pacukup diriꞌnyu man gajinyu!”
15 Ari koa urakng-urakng mulaiꞌ batanyaꞌ-tanyaꞌ ahe geꞌ Yohanes koa Raja nang di Tuhan Allah ngutus,
nang di nya kaꞌ koa ngantiatn man nang di nya kaꞌ koa ngarapatn.
16 Koa tagalnya Yohanes bakata kaꞌ ia kaꞌ koa,
“Aku maptis kitaꞌ man aiꞌ,
tapi ana atakngaꞌ Urakng nang miah bakuasa daripada aku.
Mukaꞌ tali sipatu-Nya pun aku inaꞌ pantas.
Ia maptisaꞌ kitaꞌ man Roh Tuhan Allah man api.
17 Kaꞌ kokot-Nya ada nyeroꞌ yak nampiaꞌ sigana gandum-Nya sampe baraseh.
Gandum,
Nya-komoanaꞌ kaꞌ dalapm baluh tapi sigana sakapm,
Nya-tunuaꞌ kaꞌ dalapm api nang inaꞌ pane padapm!”
18 Lekoa ugaꞌ Yohanes ngajaratn manyak pituah-pituah nang lain takaꞌ ia ngesahatn Kabar nang Gagas kaꞌ urakng manyak.
19 Kahe mpakoa Herodes nang marentah kaꞌ wilayah Galilea di Yohanes nagur,
tagal Herodes manganteniꞌ Herodias bini Pilipus abangnya babaro,
man manyak kajahatatn lain nang dah di Herodes manjawat.
20 Kahe mpakoa Herodes siaꞌ namah kajahatatnnya,
ia namaꞌan Yohanes kaꞌ dalapm pinjara.
Yesus Dibaptis
(Mat. 3:13-17; Mrk. 1:9-11)
21 Sanapeꞌ Yohanes diminjara,
ia maptis manyak urakng.
Yesus ugaꞌ dibaptis,
man takaꞌ Ia giꞌ badoa,
langit tabukaꞌ.
22 Roh Tuhan Allah turutn kaꞌ atas-Nya lea burukng dara,
man ugaꞌ kadangaratn suara Tuhan Allah mpat kaꞌ langit ngataatn,
“Kao ihan Anak-Ku nang Ku ngasihiꞌ.
Kao nang marepo ati-Ku.”
Tuturatn eneꞌ uyut Yesus
(Mat. 1:1-17)
23 Waꞌtu Yesus mulaiꞌ pakarajatn-Nya,
Ia baumur kurang labih talu puluh tahutn.
Jakata urakng,
Ia anak Yusup.
Yusup anak Eli,
24 Eli anak Matat,
Matat anak Lewi,
Lewi anak Malkhi,
Malkhi anak Yanai,
Yanai anak Yusup,
25 Yusup anak Matica,
Matica anak Amos,
Amos anak Nahum,
Nahum anak Hesli,
Hesli anak Nagai,
26 Nagai anak Maat,
Maat anak Matica,
Matica anak Simei,
Simei anak Yosekh,
Yosekh anak Yoda,
27 Yoda anak Yohanan,
Yohanan anak Resa,
Resa anak Serubabel,
Serubabel anak Sealtiel,
Sealtiel anak Neri,
28 Neri anak Malki,
Malki anak Adi,
Adi anak Kosam,
Kosam anak Elmadam,
Elmadam anak Er,
29 Er anak Yesua,
Yesua anak Elieser,
Elieser anak Yorim,
Yorim anak Matat,
Matat anak Lewi,
30 Lewi anak Simeon,
Simeon anak Yehuda,
Yehuda anak Yusup,
Yusup anak Yonam,
Yonam anak Elyakim,
31 Elyakim anak Melea,
Melea anak Mina,
Mina anak Matata,
Matata anak Natan,
Natan anak Daut,
32 Daut anak Isai,
Isai anak Obet,
Obet anak Boas,
Boas anak Salmon,
Salmon anak Nahason,
33 Nahason anak Aminadap,
Aminadap anak Atmin,
Atmin anak Arni,
Arni anak Hesron,
Hesron anak Peres,
Peres anak Yehuda,
34 Yehuda anak Yakub,
Yakub anak Ishak,
Ishak anak Abraham,
Abraham anak Terah,
Terah anak Nahor,
35 Nahor anak Seruk,
Seruk anak Rehu,
Rehu anak Pelek,
Pelek anak Eber,
Eber anak Salmon,
36 Salmon anak Kenan,
Kenan anak Arpakhsad,
Arpakhsad anak Sem,
Sem anak Nuh,
Nuh anak Lamekh,
37 Lamekh anak Metusalah,
Metusalah anak Henokh,
Henokh anak Yared,
Yared anak Mahalaleel,
Mahalaleel anak Kenan,
38 Kenan anak Enos,
Enos anak Set,
Set anak Adam,
Adam anak Tuhan Allah.d