Yesus dimaranakatn
(Mat. 1:18-25)
2
Inaꞌ lama lakaꞌ Yohanes Pamaptis dimaranakatn,
Kaisar Agustusa mareꞌ parentah kaꞌ sigana urakng nang kaꞌ nagari karajaan Roma,
arus naptaratn diriꞌnya untuꞌ sensus.
2 Sensus nang pamulaatn nian dinyalanan waꞌtu Kirenius jaji gubernur kaꞌ propinsi Siria.
3 Tagal koa sigana urakng pulakng kaꞌ kampokng asal eneꞌ uyutnya untuꞌ naptaratn diriꞌnya.
4 Lekoa ugaꞌ Yusup,
ia badiapm kaꞌ kota Nasaret kaꞌ wilayah Galilea,
mpat kaꞌ Nasaret ia barangkat kaꞌ wilayah Yudea.
Ia ampus kaꞌ kota Betlehem,
tampat Raja Daut dimaranakatn,
barang Yusup koa katurunan Raja Daut ugaꞌ.
5 Yusup ampus untuꞌ naptaratn diriꞌnya barage man Maria tunangannya nang giꞌ tagah babuntikng.
6 Takaꞌ nyadua kaꞌ Betlehem dah namus arinya Maria baranakaꞌ.
7 Ia maranakatn kamudaꞌ nanglaki anaknya nang tuha.
Kamudaꞌ koa nya mungkus man pacaꞌ.
Dah koa nya nguringan kaꞌ dalapm dulakng nang baisiꞌ aruman,
barang nyadua koa nanaꞌ namu tampat untuꞌ badiapm.
Malaekat Tuhan Man Panyaga Domba
8 Malam koa ada panyaga-panyaga domba nang giꞌ tagah nyaga domba-domba piharaꞌatnnya kaꞌ padang barumput nang kaꞌ samak Betlehem.
9 Tiba-tiba malaekat Tuhan Allah neleꞌatn diriꞌnya kanaꞌ panyaga-panyaga domba kaꞌ koa,
man saho nang tarakng mpat kaꞌ Tuhan Allah narakngiꞌ ia kaꞌ koa,
ia kaꞌ koa sidi kagaliꞌanan.
10 Kahe mpakoa,
malaekat Tuhan Allah koa daꞌ bakata,
“Ame galiꞌ!
Jukut aku atakng nyampeatn Kabar nang Gagas untuꞌ kitaꞌ,
kabar nang sidi miah ngarepoatn sigana urakng.
11 Ari nian kaꞌ kota Raja Daut dah dimaranakatn Raja nang nyalamatatnnaꞌ kitaꞌ Ia koa Karistus,
Tuhan.
12 Nianboh tandanya:
Kitaꞌ namuiaꞌ Kamudaꞌ nang dimungkus man pacaꞌ,
nang dinguringan kaꞌ dalapm dulakng.”
13 Tiba-tiba daꞌ kateleꞌatn sidi miah manyak malaekat nang lain barage man malaekat koa muji Tuhan Allah.
Jakatanya,
14 “Dipujilah Tuhan Allah nang kaꞌ saruga!
Kiraꞌnya baati nang dame sigana talino nang kaꞌ aiꞌ tanah,
nang di Tuhan Allah nyukaiꞌ!”
15 Lakaꞌ malaekat-malaekat Tuhan ningalatn ia kaꞌ koa pulakng kaꞌ saruga,
panyaga domba kaꞌ koa bakata kaꞌ sabayaatnnya,
“Injeꞌ diriꞌ kaꞌ Betlehem neleꞌ ahe nang dah jaji koa nang di Tuhan Allah madahatn kaꞌ diriꞌ.”
16 Ia kaꞌ koa daꞌ ampus kaꞌ Betlehem,
ngagoꞌiaꞌ Kamudaꞌ koa.
Baruꞌ ia kaꞌ koa batamu Maria man Yusup,
man ugaꞌ Kamudaꞌ nang dinguringan kaꞌ dalapm dulakng koa.
17 Takaꞌ naꞌ panyaga domba neleꞌ Kamudaꞌ koa,
ia kaꞌ koa ngesahatn ahe nang di malaekat Tuhan Allah matakatn nganaiꞌ Kamudaꞌ koa.
18 Man sigana urakng nang ada diꞌkoa,
jaji kaheranan nangar gesah naꞌ panyaga domba kaꞌ koa.
19 Tapi Maria norohiꞌ sigana ahe nang dah jaji koa kaꞌ dalapm atinya lantas mikiriꞌnya.
20 Panyaga-panyaga domba kaꞌ koa mulakng kaꞌ padang rumput sirage muji kaꞌ Tuhan Allah,
barang sigana nang dah nya neleꞌ man nya nangar koa pas lea nang di malaekat Tuhan Allah madahatn kaꞌ ia kaꞌ koa.
Kamudaꞌ koa dinalah
21 Dah baumur lapan ari,
Kamudaꞌ koa dimalak man dinalah Yesus.
Dama koa nang dimareꞌ malaekat kaꞌ Ia sanapeꞌ Ia kaꞌ buntikng uweꞌ-Nya.
Yesus dinyarahatn kaꞌ Tuhan Allah kaꞌ Rumah Kudus Tuhan Allah
22 Dah sampe arinya Maria man Yusup nyalanan adat panyuciatnb biar Maria baraseh nurutiꞌ parentah Tuhan Allah.
Nyadua ngincakng Kamudaꞌ koa kaꞌ Yerusalem yak disarahatnnaꞌ kaꞌ Tuhan Allah.
23 Barang kaꞌ dalapm parentah Tuhan Allah taconteng lea nian,
“Sigana kamudaꞌ laki nang tuha,
arus disarahatn kaꞌ Tuhan Allah.”c
24 Nyadua koa ugaꞌ mareꞌatnnaꞌ persembahan kaꞌ Tuhan Allah:
dua ekoꞌ burukng pakukur ato geꞌ dua ekoꞌ burukng dara nang giꞌ mudaꞌ,
lea nang dinatapatn parentah Tuhan Allah.d
25 Ari koa kaꞌ Yerusalem ada sekoꞌ urakng badama Simeon.
Ia koa urakng nang batabiat edoꞌ man ugaꞌ taat kaꞌ Tuhan Allah,
nang tagah ngantiatn arinya Tuhan Allah nyalamatatnnaꞌ bangsa Israel.
Roh Tuhan Allah nyarataiꞌ ia.
26 Man ugaꞌ Roh Tuhan Allah dah mareꞌ nauꞌan kaꞌ ia kadeꞌ ia giꞌ napeꞌ matiaꞌ sanapeꞌ neleꞌ Raja Panyalamat nang di Tuhan Allah nyanjiatn.
27 Jaji Roh Tuhan Allah mimpin Simeon tamaꞌ kaꞌ Rumah Kudus Tuhan Allah.
Waꞌtu koa Maria man Yusup ngincakng Yesus nang giꞌ miah enek tamaꞌ kaꞌ Rumah Kudus,
yak nyarahatnnaꞌ-Nya kaꞌ Tuhan Allah nurutiꞌ parentah Tuhan Allah.
28 Takaꞌ koa ugaꞌ Simeon naap Kamudaꞌ koa nya ngampekng lantas muji Tuhan Allah jakatanya,
29 “Ampeatn Tuhan,
Kitaꞌ dah napatiꞌ janji Kitaꞌ,
jaji ampeatn aku amba ulutn Kitaꞌ nian dah siap mati baati nang dame.
30 Barang mataku dah neleꞌ Kamudaꞌ nian,
Panyalamat nang mpat kaꞌ Kitaꞌ.
31 Panyalamat nian dah Kitaꞌ nyiapatn
yak sigana bangsa:
32 Lea tarakng nang narakngiꞌ maraga untuꞌ bangsa-bangsa nang lain
yak atakng kaꞌ Kitaꞌ,
Ia koa tarakng nang nyajiatn dama nang edoꞌ
untuꞌ umat Kitaꞌ Israel.”
33 Apaꞌ man uweꞌ Kamudaꞌ koa heran nangar pakataatn Simeon nganaiꞌ Kamudaꞌnya.
34 Simeon badoa kiraꞌnya Tuhan Allah mareꞌ tuah kaꞌ ia kaꞌ koa,
man bakata kaꞌ Maria,
uweꞌ Kamudaꞌ koa,
“Sasidinya Kamudaꞌ nian dah di Tuhan Allah natapatn yak ngukumaꞌ man ugaꞌ nyalamatatnnaꞌ manyak urakng Israel.
Ia jajiaꞌ tandahatn mpat kaꞌ Tuhan Allah tapi nang dinolak manyak urakng,
35 tagal koa kateleꞌatnnaꞌ sigana isiꞌ ati urakng kaꞌ koa.
Man kao ugaꞌ Maria,
kasusahatn lea isoꞌ nang tajapm nusukaꞌ atinyu.”
36 Ada ugaꞌ sekoꞌ urakng nabi nangbini nang dah tuha sidi.
Damanya Hana anak Panuel,
ia nian suku Asyer.
Dah lakaꞌ tujuh tahutn panganten,
37 Hana nian jaji janda,
man ampeatn dah baumur lapan puluh ampat tahutn.
Ia nian naꞌ kalaꞌ ningalatn Rumah Kudus.
Diꞌkoa siakng malaman ia badoa man bapuasa yak nyambah Tuhan Allah.
38 Pas waꞌtu koa ugaꞌ Hana nyamakiꞌ Yusup man Maria sirage basukur man batarimaꞌkasih kaꞌ Tuhan Allah,
man madahatn sae Kamudaꞌ koa kaꞌ sigana urakng nang ngantiatn arinya Tuhan Allah nyalamatatnnaꞌ Yerusalem.
39 Lakaꞌ Yusup man Maria manjawat sigana ahe nang dinantuatn parentah Tuhan Allah,
ia kaꞌ koa pulakng kaꞌ kotanya Nasaret nang kaꞌ wilayah Galilea.
40 Kamudaꞌ koa siaꞌ ayaꞌ man kuat.
Kamudaꞌ koa sidi bijaksana,
man Tuhan Allah sidi miah kasih kaꞌ Kamudaꞌ koa.
Yesus kaꞌ Rumah Kudus Tuhan Allah
41 Tiap tahutn urakng tuha Yesus ampus kaꞌ Yerusalem untuꞌ ngaramian Gawe Paska,
ngingatatn diꞌmae Tuhan Allah mebasatn bangsa Israel,
nang dinguliatn kaꞌ tanah nagari Mesir.
42 Takaꞌ Yesus dah baumur dua balas tahutn,
ia kaꞌ koa ampus kaꞌ gawe koa lemae biasanya.
43 Lakaꞌ gawe koa Maria man Yusup manaꞌ ayukngannya bapulangan,
kahe mpakoa Yesus masih badiapm kaꞌ Yerusalem,
man apaꞌ uweꞌ-Nya inaꞌ nauꞌan.
44 Apaꞌ man uweꞌ-Nya nyangka kadeꞌ Yesus barage man kabatnnya nang dah bapulangan.
Dah bajalatn saꞌarianan baruꞌ nyadua ngagoꞌiꞌ Yesus kaꞌ pagewarisnya man kaꞌ ayukng-ayukngnya.
45 Kahe mpakoa nyadua nanaꞌ batamu man Yesus,
jaji nyadua mulakng agiꞌ kaꞌ Yerusalem ngagoꞌiꞌ Yesus.
46 Lakaꞌ talu ari,
nyadua namuan Yesus kaꞌ Rumah Kudus Tuhan Allah.
Yesus giꞌ tagah duduk nangaratn guru-guru agama Yahudi man batanyaꞌ kaꞌ ia kaꞌ koa.
47 Sigana urakng nang nangaratn Yesus jaji kaheranan,
barang Ia sidi miah pane man ugaꞌ kapanean-Nya bajawab.
48 Urakng tuha-Nya ugaꞌ kaheranan neleꞌ-Nya.
Uweꞌ-Nya bakata kaꞌ Ia,
“Nak,
ngahe geꞌ Kao lea nian kaꞌ kami?
Apaꞌ uweꞌ-Nyu sidi susah parasa ngagoꞌiꞌ Kao!”
49 Yesus nyahut,
“Ngahe geꞌ apaꞌ man uweꞌ ngagoꞌiꞌ Aku?
Arusnya kitaꞌ nauꞌan kadeꞌ aku arus kaꞌ rumah Apaꞌ-Ku.”
50 Tapi nyadua inaꞌ ngarati kaꞌ sahut Yesus koa.