Maca á moa á Yéso
( Ɔna phɔtɔ Mat 26.1-5; Lóka 22.1-2; Yoáni 11.45-53)
14
1 Cɔ, dájigi ye tɔ esa ibɛ mosá á maseye á m'bondɔ kanga á cacua, nnde baYúdha dábaɔɔphana Pasáka. Batobei-phɛa bangbóngbó na baphangigi-ɛɔphi, dábaokaba aphe sina nde bándhungande Yéso ka maibhe na moa akɛ. 2 Báoianaga gea te, kákeni dhunga akɛ ka mbenɔ á maseye. Bakpa bákayombokɛmbɛ.Nke moci aduki nkóki ka mɔ̌ á Yéso
( Ɔna phɔtɔ Mat 26.6-13; Yoáni 12.1-8)
3 Wandɔ, Yéso dátú na Bhɛtanía, k'endu ndea Simɔ́ni, mmbe dáami na kukwa á sǔ. Mbenɔ nde dábatú oeaga, nke moci áongia kubii báiki. Dátú na nkoki á nadɔb, nnde bábɔngisigi ánja na esombi i dátú akpɛ phɛ̂. Áɔpɛpa ngbandac á nkoki ndɔ, áodukia ka mɔ̌ á Yéso. 4 Ka bakpa nde dábatú wa, báɔbɛa, báousiana gea: «Nkoki nde atukani jǎi nde! Cɔ, a na kantítí sina? 5 Bátú ndiu osombisa ka bangɔa mia isaɔ (300)d, bágabhɛ u ka baúki. » Ka bondɔ unge, dábam'phekeigi nke ndɔ phɛ̂. 6 Mpɔ, Yéso áǒngodea te: «Nkambani nke ndɔ, phiɔ! Boma ontambisaga ka bo? Amogii anja phɛ̂. 7 Nga, esa bhui, bobande na batɔa-buyɛnɛe. Bǒgeeande anja bíndɔ bokondi. Eme gǎkɛ, kébɛku ye na benu esa bhui. 8 Nke nde agi nnde atɔki. Amosǐ nkoki ka bɔngisiaga á nyamani mosá á úmba anif. 9 Nenongodi doni, ka mokonda bhui, ɔma nde bátɔmiagande Mbino Anja, bátɔ̌miande phɔtɔ nyɔngɔ á ekuma ndea nke nde ka kanisiakɛ. »
Maca ndea Yúdha
( Ɔna phɔtɔ Mat 26.14-16; Lóka 22.3-6)
10 Mbusa á wa, Yúdha Isikaliɔ́ta, mmbe dátú sɔsɔbɛ á bagoigi nkama na babɛ (12), áoga ǒdhonda baamɛ á batobei-phɛa ka phangia abɔ aphe á dhunga á Yéso. 11 Baamɛ ndɔ báoba na maseye phɛ̂ ka ɔka á nyɔngɔ ndea Yúdha. Báongodea te, bámophande bangɔa. Mpɔ, Yúdha áokaba mbenɔ ánja ka dhungisa Yéso.
Bɔngisiaga á maseye á mbondɔ kanga á cacu
12 Dábi ye esa imoci á maseye á m'bondɔ kanga á cacu, esa ndɔ dátú esa á tena á bana-bamɔgɔgɔ á Pasakag. Cɔ, bagoigi báomuisia Yéso te: «Okondi begɛ bɔngisiɛgɛ k'akɔ eea á Pasaka wa?» 13 Mpɔ, Yéso áǒteka bagoigi babɛ áǒgea: « Gǎni ka kenombe. Mǒko moci adhondanande kó n'akumbi mbungu á ibo. Cɔ, m'beani. 14 Angiande k'endu. Ɔma nde angi, ngodeani mɛnɛ á endu ndɔ te, ‹ Mphangigi aoúsia gea, ɔma sina nde aeagande Pasáka na bagoigi nɛkɛ? › 15 Mpɔ, anóphangiande k'ɔma á gǔ k'endu, n'ande ɔma ángbó phɛ̂, kema bhui n'a ye tɔ bei. Oa unge bɔbɔngisagande k'asu eea. » 16 Bagoigi báoga, báokidia ka kenombe, báodhonda kema bhui bíndɔ Yéso dɛ́tɔ̌mi. Baɔbɔngisia eea á Pasáka kó.
17 Abi ye ɔgɔgɔ, Yéso na bagoigi nɛkɛ nkama na babɛ (12) báokidia. 18 Bii dábaiki ye k'ɔma á eea, Yéso áǒgea: «Nenongodi doni, ka benu moci mmbe beoeaga kimoci na yɛ, amɔtɔngandeh. » 19 Bagoigi báoba na bɔmbɛ phɛ̂. Báomúsiaga Yéso moci-moci gea te: «Ande eme?» 20 Yéso áǒsikisia te: « Moci sɔsɔbɛ anu nkama na babɛ (12), mmbe beoeaga na yɛ kimoci, aámbé ageande bo. 21 Doni, eme Muna-Nkpa, nekuande bíndɔ buku á Mokonga atɔ̌mii. Ngomi ka nkpa nde amɔtɔngande. Atúoba bonjánja ka yɛ, ámbé kábɔkɔtɛani. »
Yéso aoega eea á sungiaga kimoci na bagoigi nɛkɛ
( Ɔna phɔtɔ Mat 26.26-30; Lóka 22.14-20; 1 baKɔlítɔ 11.23-25)
22 Bii dábatú phɔ́tɔ oeaga, Yéso áɔbhɛda m'bondɔ, áonsega Mokonga k'ɛmɛmi, áobunaga m'bondɔ ndɔ, áǒgabhea bagoigi nɛkɛ, áǒngodea te: «Bhɛdani, bóe, nnde ande nyama ani. » 23 Â phɔtɔ ɔbhɛda kibɛ á makana anjɛ, áonsega Mokonga k'ɛmɛmi, áǒbopha, báonoa bɔbhu. 24 Yéso áǒgea: «Makana anjɛ nde, ande magia ani, magia nde aduukani kapɔa bakpa básii ka digimisa á konsamba ndea Mokongaj. 25 Nenongodi doni, kénoɛeka ye tanda makana anjɛ, na ka bii nenoaeka nnde á kɛ̌kɛ ka koboamɛ ndea Mokonga.» 26 Mbusa, báoembak, mpɔ, báoga gǔ á mamba Mijɛitúni.
Yéso aɔtu ónganɔ ndea Pɛ́tɛɛ
(Ɔna phɔtɔ Mat 26.31-35; Lóka 22.31-34; Yoáni 13.36-38)
27 Kó, Yéso áǒngodea bagoigi nɛkɛ te: «Benu bɔbhu, bomodeketande. Bindɔ beotanga subi á buku á Mokonga te,
Nemmoande m'bɔndigi-bamɔgɔgɔ,
bamɔgɔgɔ báophanjekanal.
28 Mbusa, nejujukande ka kukwa, neoga onobondea na Galiláia.» 29 Pɛ́tɛɛ â gǎkɛ ongodea te: «Nanga bakpa nde bɔbhu bákodeketa, eme, kékodeketɛku.» 30 Yéso áonsikisia te: «Nekongodi doni, kǐpha á k'esa nde, mosá á ɔsa á kɔkɔ mɔngɔ á ko ibɛ, omonganande mɔngɔ isaɔ.» 31 Pɛ́tɛɛ â gǎkɛ otetemisa akpɛ te: «Kéonganɛku. Nanga ába kukwa, besíande kimoci.» Bagoigi bɔbhu bâ phɔtɔ ɔyɔnga bo.
Yéso aɔmɛma ka Gɛtɛsɛmáni
( Ɔna phɔtɔ Mat 26.36-46; Lóka 22.39-46)
32 Bákidi ye kɔ́ma nde báɔɔphana Gɛtɛsɛmánim, Yéso áǒngodea bagoigi nɛkɛ te: «Ikani wani. Negeɔmɛma Mokonga.» 33 Ǎ gǎkɛ oga kimoci na Pɛ́tɛɛ, Yakɔ́bɔ, na Yoáni. Áoba na bɔmbɛ phɛ̂. 34 Aǒngodea te: «Měma ani atumi na bɔmbɛ á kukwa. Ikani wani. bókódɛmbɛ.» 35 Áɔsɛkɛda mosá abhɔa, áogua ka odo, áɔmɛma Mokonga gea, aobá́ n'atɔtɔkɛani, kangiɛmbɛ ka mbenɔ á tambaga ndɔ. 36 Áɔmɛma be: «Abhɛ, nna na kema nde nn'aɔtɔtɔkɛana mɔtɛkɔ. Tokisa phɔ k'ani kibɛ á tambaga ndee. Nna gǎkɛ gea, eme nekondi, a ndiu ka gea, ɔbɛ aámbé okondi.» 37 Áosikianaga kubii bagoigi basaɔ ndɔ báɔ, áǒdhonda na bá ka tɔ̌. Áongodea Pɛ́tɛɛ: «Simɔ́ni ca, o ndiu ka tɔ̌? Kɔ́tɔki phiphia á tɔ̌ ka mbenɔ moci? 38 Cɔ, bókódɛmbɛ, mɛmani Mokonga gea te, bókoguɛmbɛ ka mbenɔ á tombaga. Měma ana bukpɛkpɛ, nyama gǎkɛ aunge aɔlɔmani»
39 Yéso áotoka bhíbhí abɔ, â goto ɔmɛma ɛmɛmi ndɔ tɔ moci . 40 Aji ye, â goto ǒdhonda na bá ka tɔ̌. Bákabɛ na bukpɛkpɛ á koda iso abɔ. Ka bondɔ, dábákaoúbha nyɔngɔ á sikisia á Yéso . 41 Bii abhiki ye mɔngɔ á ko isaɔ, áǒngodea te: «Bo phɔ ma tɔ ka tɔ̌ na umbia? Cɔ, así. Mbenɔ akidi ye tɔ. Bámɔtɔngande eme, Muna-Nakpa, mosá á batɔa-bojede. 42 Cɔ, mani, bégɛ! Mmbe amɔtɔngi, a ye kidi!»
Dhunga á Yéso
( Ɔna phɔtɔ Mat 26.47-56; Lóka 22.47-53; Yoáni 18.3-12)
43 Yéso n'aphɔ́tɔ ɔyɔnga, Yúdha, mmbe dátú ka bagoigi nkama na babɛ (12), áɔsɛnɛka. Dábhiki na bakpa básii bunde dábatú na m'bɛngɛ na gbutu. Bakɔta á batobei-phɛa ndea Mokonga, baphangigi-ɛɔphi, na bagbɛga ndea baYúdha, báunge dáběteki. 44 Cɔ, ntɔngi ndɔ Yúdha, déúbhisi bakpa mphangiɔ ndee: «Nkpa nde nemumbiagande ka sesea akɛ, aámbɔ! Ndhungani. Bongɛ ně. Bónambɛ ánja!» 45 Ka kidia á Yúdha tɔ, áombhiimisia Yéso, áongea: «Mphangigi!» Mpɔ, áomumbiaga. 46 Bakpa bunɛngbo báondhunga Yéso. 47 Kabunde dátú wa, â gǎkɛ ophuia m'bɛngɛ, áotena kecue á mbhɛdanigi ndea ntobei-phɛ́a angbóngbó cɛ! 48 Yéso áǒngodea te: «Bokidi na m'bɛngɛ na gbutu ka dhunga ani bea moege-bakpa? 49 Cɔ, esa bhui, netúma sɔsɔbɛ anu ka phɛa anu k'endu á Mokonga. Dóbókómodhungi. Nnde bogi gǎkɛ, a tɔ tɔtɔkisa bíndɔ dábadundu subi á buku á Mokonga.» 50 Mpɔ, bagoigi bɔbhu báonkamba, báotea. 51 Moganda moci, mmbe dátú phɔtɔ om'bea Yéso, dáɔli tɔ ngɔmbɛ á gbae. Cɔ, báogea, bándhungɛ. 52 Yɛ, áodoa ngɔmbɛ ndɔ, â gǎkɛ otea ndumbu.
Yéso a mosá á bateni-nyɔngɔ
53 Cɔ, báonga na Yéso motɛa Ntobei-phɛ́a angbónbgó. Kó, bakɔta á batobei-phɛa, bagbɛga ndea baYúdha, na baphangigi-ɛɔphi, bɔbhu dábadhondanigi. 54 Pɛ́tɛɛ dátúom'bea Yéso ka danga. Áongia ka ntanga á endu ndea Ntobei-phɛa angbóngbó. Áoika ka odo n'aɔɔta nsa, bhíbhí á babhɛdanigi.
55 Cɔ, bakɔta á batobei-phɛa, na batɔa-ntua á tena á nyɔngɔ ndea baYúdha, dábatú okaba nyɔngɔ danga-danga ka kusisa á Yéso, Bákaɔnɛ. 56 Bakpa básii báɔn'yɔngɛa mbɛan, nyɔngɔ nɛbɔ kabɛ kimoci. 57 Mpɔ, bunɛngbo sɔsɔbɛ abɔ báɔntɔnga na kitɔngi á mbɛa. 58 Báogea: «Nkpa nde, ayɔngima be: Nɛngbɔande endu á Mokonga, nnde bakpa dábaphɛki. Néomesa k'esa isaɔ. Mɔphɛkɔ á kau kábɛku á njaga á bakpa.» 59 Ka nyɔngɔ ndɔ phɔtɔ, boabhi nɛbɔ â goto oba danga-danga. 60 Mpɔ, ntobei-phɛ́a angbóngbó áoma, phǒi! Aomuisia Yéso: «Cɔ, kósikisɛku ka nyɔngɔ k'inde báɔyɔnga kaphɔa akɔ?» 61 Yéso áɔphɔnga, phioo! Kasikisɛ ka kema. Ntobei-phɛa angbóngbó â goto omuisia: «Obɛ, onde Kiísito, Muna-Mokonga Mɛnɛa obhebhɔ?» 62 Yéso áosikisia: «Eya! Eme yɛ. Benu phɔtɔ, bɔmɔɔnande, eme Muna-Nkpa, na neiki ka njaga á mǔku á Mokonga Mɛna-bukpɛkpɛ, na neobhika k'egugu á na kobhao.» 63 Ntobei-phɛa anbgónbgó aɔki ye bó, áobhoma ngɔmbɛ nɛkɛ cuɛ! Áogea: « Cɔ, benkabande goto mmamei sina! 64 Nga, bɛɔki sasasu nyɔngɔ nɛkɛ bii ěkengeanisi na Mokonga. Bogi gǎkɛ bo?» Bakpa bɔbhu báongea: «Ákuɛp.» 65 Mpɔ, buangbo sɔsɔbɛ abɔ báonsúia Yéso soki, báodaka iso akɛ, báɔm'bɛta, báongea: «Ngoda phɔ́ nkpa nde aɔbɛti. » Mbusa, babondigi báɔmbhɛda Yéso, báɔm'bɛtaq.
Pɛ́tɛɛ angani Yéso
66 Wandɔ, Pɛ́tɛɛ dátú kusi ka ntanga. Nke moci, ka babhɛdanigi ndea Ntobei-phɛa angbóngbó áokidia. 67 Áɔmɔ̌na Pɛ́tɛɛ n'aɔɔta nsa. Áonenga jaa! Áongodea te, ‹‹ Obɛ, dótú phɔtɔ kimoci na Yéso mmbɔ ba Najalɛ́ti. » 68 Pɛ́tɛɛ áongana, áongea te: « Kéoúbha, kéodigimisa nyɔngɔ nde oogea ɔyɔngɛ! ›› Mpɔ, áojuana áoga bhíbhí á aphe á iso á endu nde a na ntanga. [wandɔ, kɔkɔ áɔɔsar.] 69 Bii nke ndɔ amɔɔni Pɛ́tɛɛ kó, áǒngodea bakpa nde dábatú wa te, ‹‹ Mmbe dátú kimoci na bɔ. ›› 70 Pɛ́tɛɛ â goto ongana. Mbusa ábhɔa, bakpa nde dábátú oa, bâ goto ongodea Pɛ́tɛɛ te: « Doni! Obɛ phɔtɔ, onde ka bakpa ndɔ, ka nyɔngɔ nde, onde ntɔa ka Galiláia. ›› 71 Mpɔ, Pɛ́tɛɛ â ye tɔ ɔɔphá be: « Idhɔngɔ ani! Kéomǔbha mmbe bɔɔyɔnga nyɔngɔ akɛ. » 72 Kɛ̌kɛ ndɔ, kɔkɔ áɔɔsa ka mɔngɔ á ko ibɛ. Pɛ́tɛɛ áokanisia nyɔngɔ nde Yéso dángodi te,‹‹ Mosá á kɔkɔ ɔsa mɔngɔ á ko ibɛ, omonganande mɔngɔ isaɔ. » Ka bondɔ, Pɛ́tɛɛ áotobokea ngamɔ.