Mbono Ánjá bíndɔ
Lóka
dádundu
Ngia ka nyɔngɔ nde a subi á buku
1
1 Mɔkɔta Tɛɔphílɔa,Bakpa danga-danga dábakengi dundua nyɔngɔ á Mɔkɔta, nnde dágeani sɔsɔbɛ asu. 2 Dábaúsiigi nyɔngɔ ndɔ ka bamamei bundɔ dábaɔni kema bhui ka nkpangeɔ i, báoba babhɛdanigi á tɔmiaga nyɔngɔ á Mokonga. 3 Cɔ! Eme nebhɛdi phɔtɔ mɔangɔ á cɔca á cina á nyɔngɔ bhui ka gea, néubhɛ, mpɔ néodunduiɛ u ánjá mɔkɔta Tɛɔphílɔ. 4 Netogi bo, ka gea, ódigimisɛ kodoni á nyɔngɔ nde bátóophangigi.
Éme á ketangaɔ ndea Ɛlijabɛ́ti
5 Ka matu á Ɛlɔ́dhɛ, moamɛ á ka Yudhɛ́ab, nkpa moci dátú ntobei-phɛa ndea Mokonga ina akɛ Jakaía. Yɛ, dátú ka ketoto ndea Abhíac. Nkakɛ Ɛlijabɛ́ti dátú k'ékombo ndea Alɔ́nid 6 Bɔbhu babɛ dábatú batɔa-doni k'iso á Mokonga. Dábaotambea bíndɔ ɛɔphi bhui ndea Mɔkɔta ayɔngi, na tɔtɔkisa á kema bhui nde Mokonga dáososea kanga kisɛki. 7 Dábákátú gǎkɛ na miki nga, Ɛlijabɛ́ti dátú ngomba. Bâ phɔtɔ oba bɔbhu babɛ baphomi phɛ̂.
8 Cɔ, esa moci, Jakaía dáɔbhɛdanaga ekuma nɛkɛ á ntobei-phɛa mosá á Mokonga. Nga, dátú esa á ketoto nɛkɛ ka toboa á phɛa. 9 Bindɔ dátú asii á batobei-phɛa, iboki dángui tɔ yɛ gea te, ángiɛ sub'endue ndea Mokonga ka toboa á ngaɛf ésomba. 10 Bii dáɔbhɛdanaga ekuma á toboa á ngaɛ, bakpa básii dábatú ɔmɛma Mokonga ka nsɛngɛ.
11 Wa, malaeka nde ba Mɔkɔta, áɔnsɛnɛkɛa Jakaía, áomama ka njaga á mǔku á ɛtɛ-ɔphɛɔ á toboa á ngaɛg. 12 Bii Jakaía amɔɔni malaeka, áoyayama, áoba na kɔbɔbɔkɔ.
13 Malaeka áongea te: «Jakaía, kobangɛmbɛ nga, Mokonga abeeki ɛmɛmi nɛkɔ. Nkakɔ Ɛlijabɛ́ti, am'bɔkɔtande k'akɔ miki-mǒko. Onsuande Yoáni. 14 Abhikande k'akɔ na maseye phɛ̂, bakpa básii báguande jaí ka bɔkɔtɛana akɛ. 15 Nga, abande ntɔa-boombia k'iso á Mɔkɔta. Kánoaeka tanda k'etete á makanah. Atumande na Měma á Mokonga n'aphɔ́tɔ subi á sɔphɔ á amakɛ. 16 Ějisande baIsilaɛ́li básii ka Mokonga, Mɔkɔta nɛbɔi. 17 Ammɛande Mɔkɔta mosá, atámbande na měma á bukpɛkpɛ bíndɔ mɔ̌tu-nyɔngɔ Ɛlía dátú ně. Abhikande k'aphe á ɔnganisa á babɔkɔti na bǎn'abɔ, badaki-kecue báubhaphande bea batɔa-donij. Abhisande měma ánjá subi á bakpa ka bondea á Mɔkɔta nɛbɔk.»
18 Mpɔ Jakaía áongodea malaeka: «Kema sina nde amoúbhisande nyɔngɔ ndɔ nga, eme na nkani be ye tɔ baphomi?»
19 Malaeka áonsikisia: «Eme nende Gabiiɛ́lil, neomamaga mosá á Mokonga ka bhɛdaneaga akɛ. Yɛ, aámbé amoteki ka ngodea akɔ nyɔngɔ ánjá ndee. 20 Cɔ, obande kauma. Ɔyɔngaeka tɔ esa nde nyɔngɔ ndɔ bhui atɔtɔkɛanaeka nga, kóbeeki nyɔngɔ nɛmɔ. Nyɔngɔ ndɔ bhui atɔtɔkeanande ka mbenɔ nde Mokonga aangí.»
21 Wa, bakpa bunde dábatú om'bondea Jakaía, báotangaaga ka nyɔngɔ sina nde dáiphi k'endu á Mokonga. 22 Â gǎkɛ ojuana na ka ye ɔyɔnga n'abɔ. Mpɔ, báoúbha gea, aɔni mphaniɔ k'endu ndea Mokonga. Â tɔ ɔyɔnga n'abɔ na njaga, áojiga kauma.
23 Matu ékuma nɛkɛ así ye, áoja mɔtɛakɛ. 24 Mbusa á esa abhɔa, nkakɛ Ɛlijabɛ́ti áokumba éme, áǒbhunianaga ně ka basonge bɔku. Aɔyɔnga ka yɛ sasakɛ,
25 «Cɔ, ɔna kema nde Mɔkɔta agi ka phɔani kesande, amophui soni ka nkindi á bakpa.»
Ábɛ k'eme bíndɔ ɔyɔngi
26 Ka songe á ko ngia á njaga (6) á éme ndea Ɛlijabɛ́ti, Mokonga áonteka malaeka Gabiiɛ́li ka kenombe Najalɛ́ti nnde á ka Galiláia. 27 Áoga mɔtɛ á nseka moci ina akɛ Malía, mmbe mǒko moci k'ekombo ndea moamɛ Dhaúdhi, ina akɛ Yɔsɛ́phu aámbé dántɔ́mi. 28 Malaeka ndɔ áongia mɔtɛ á Malía, áonsesea: «Samba! Obɛ aámbé Mɔkɔta nɛmɔ akobhisii měma. Yɛ, a kimoci n'obɛ.»
29 Malía áoyayama na nyɔngɔ ndɔ, áoianaga, kantíti á nsesɔ ndɔ.
30 Mpɔ Malaeka áongodea be: «Malía, kobɛmbɛ na kɔbɔbɔkɔ nga, Mokonga aobhisii měma. 31 Cɔ, okumbande éme, ɔm'bɔkɔtande miki-mǒko, onsuande Yéso. 32 Abande na boombia. Bámɔphanande phɔtɔ Muna-Mokonga Mmbe a na kɔkɔta bhui. Mɔkɔta Mokonga amophande phɔtɔ koboamɛ ndea tatakɛ Dhaúdhi. 33 Abande moamɛ ndea baIsilaɛ́li esa bhubhui, koboamɛ nɛkɛ kábɛku na sungiagam.»
34 Malía áomúsia malaeka: «Nyɔngɔ ndɔ atɔtɔkɛanande bo, bii kédhondanimbɛ mɔnɔ na mǒko?»
35 Malaeka áonsikisia te: «Měma á Mokonga adhidhande, áoika gǔ akɔ. Mokonga, Mmbe a na kɔkɔta bhui, aogbukumiande n'iimbiɔ á bukpɛkpɛ nɛkɛ. Kabondɔ unge mmbe ɔm'bɔkɔtande abande ntɔa-bonjánjá, bámɔphanande phɔtɔ Muna-Mokonga. 36 Nga, Ɛlijabɛ́ti, m'bɔkɔti akɔ, a phɔtɔ na éme á miki-mǒko ka kophomi akɛ. Mmbɔ bátúma ɔmɔphana ngomba, ana éme á basonge ngia á njaga (6). 37 A tɔ bo, ka nyɔngɔ nde, kema bhubhui a tɔ ɔtɔtɔkɛana ka Mokongan.»
38 Mpɔ Malía áobeekea: «Nende mbhɛdanigi nde ba Mɔkɔta. Átɔtɔkɛanɛ k'eme bíndɔ ɔyɔngi.» Wa, malaeka áoga.
Njokoa á miki ka sɔphɔ á amakɛ
39 Ka besa ndɔ tɔ, Malía áoma, áokamisaga gǎ ka kenombe á mamba-mamba á Yudhɛ́a. 40 Áongia k'endu ndea Jakaía, áonsesea Ɛlijabɛ́ti. 41 Bii Ɛlijabɛ́ti aɔki nsesɔ ndea Malía, miki ímbɛkɛ áonjokoa akpɛ ka sɔphɔ akɛ. Ka bondɔ, Ɛlijabɛ́ti áotuma na Měma á Mokonga, 42 áɔyɔnga akpɛ gea: «Mokonga akophi bosegi kɔnyɛ́nya bake bɔbhu. Bosegi ndɔ a phɔtɔ ka miki ndɔ a ka sɔphɔ akɔ. 43 Cɔ, nende ani ka gea, ama-Mɔkɔta nɛmɔ abhiki mɔtɛamɔ? 44 A bondɔ nga, kɛ̌kɛ nde, bíndɔ nɛɔki nsesɔ ndeakɔ, miki anjoku na maseye ka sɔphɔ ani. 45 Maseye phɔtɔ k'obɛ ímbɔ obeeki nyɔngɔ bhui nde Mɔkɔta akongodi, nga, atɔtɔkɛanande.»
Embɔ ndea Malía
46 Cɔ, Malía áɔɔtɔa geao,
«Nen'dokomisi Mɔkɔta ka měma,
47 měma ani ana jaí ka Namisi nɛmɔ Mokonga,
48 nga, amɔɛnji na ngomi, eme mbhɛdanigi nɛkɛ á jǎi-jǎip.
Eya, kpanga á kesande ɛbɔkɔti n'ɛbɔkɔti bámɔɔphanande Ama-bosegi,
49 ka nyɔngɔ nde, Mɛna-Bukpɛkpɛ amogii kema ángbó.
Ina akɛ atɔ Mɛna-Bonjánja,
50 ngomi nɛkɛ aendande ka saga na saga ka bundɔ báom'banga.
51 Amesi njaga akɛ, á bukpɛkpɛ,
ěphanji batɔa-édokomisa ka měma.
52 Ětokisi baamɛ ka kankaanga á kɔkɔta, áǒsambɔa bakusiq.
53 Ěkutisi batɔa-nja na kema ánjá,
â gǎkɛ ǒjisa batɔi kanga á kema.
54 Ěengi baIsilaɛ́li, babhɛdanigi nɛkɛ,
kanga bosea bonjánjá nɛkɛ,
55 ka Abhalaámu, k'ɛbɔkɔti n'ɛbɔkɔti nɛkɛ esa bhubhui,
bíndɔ dɛ̌ɔku batatasu.»
56 Cɔ, Malía áoika mɔtɛ á Ɛlijabɛ́ti bɛa basonge basaɔ. Mbusa, áoja mɔtɛ ákɛ.
Miki ndɔ Yoáni abande bo?
57 Ka mbenɔ á boaé nɛkɛ, Ɛlijabɛ́ti áɔm'bɔkɔta miki-mǒko. 58 Bamasambe akɛ na babɔkɔti akɛ, báɔki ye bíndɔ Mɔkɔta ankui ngomi phɛ̂, báogua jaí kimoci na yɛ. 59 Mbusa ésa ngia á njaga isaɔ (8), báoga ongusa ganjar. Dábaogea, bánsuɛ ina ábhakɛ Jakaía. 60 Wa, amakɛ áǒngodea te: «Gbati! Ina akɛ ábɛ tɔ Yoáni.»
61 Báonsikisia gea te: «Nna na nkpa nde ina akɛ a gǎkɛ bo, k'ekombo nɛnu.» 62 Mpɔ, báomúsia abhakɛ na njaga gea te: «Bánsuande ina sina?»
63 Jakaía áɔmɛma miki á gáo, áodundua kau be: «Ina akɛ ande Yoáni.» Bakpa bɔbhu báotangaaga. 64 Kɛ̌kɛ ndɔ, aphɛ nɔkɔ n'ɛsɔ á Jakaía áoukukana, áokpanga bhebha á Mokonga k'ɛsɔ akpɛ.
65 Bakpa bɔbhu á ka mpɛphɛ abɔ báoba na kɔbɔbɔkɔ. Nyɔngɔ ndɔ áondanda ka nji á mamba-mamba á ka Yudhɛ́a bhui. 66 Cɔ, bundɔ dábaɔki nyɔngɔ ndɔ, báoianaga phɛ̂, báoúsianaga: «Miki ndɔ abande gǎkɛ bo?»
Njaga á bukpɛkpɛ ndea Mɔkɔta áoba ka miki.
Embɔ ndea Jakaía ka ɔtɔa akɛ nyɔngɔ
67 Mpɔ Jakaía, abha-miki, áotuma na Měma á Mokonga subi akɛ. Áɔɔtɔa nyɔngɔ be,
68 « Bosegi ka Mɔkɔta, Mokonga á ba Isilaɛ́li,
Nga, akidi ka enga bakpa nɛkɛ na tokisa abɔ ka kɔkɔbɛ.
69 Asophi Namisi angbóngbó k'ekombo ndea mbhɛdanigi nɛkɛ Dhaúdhi.
70 A tɔ bíndɔ dátɔ̌mi kala k'aphɛnɔkɔ á baɔtu-nyɔngɔ nɛkɛ.
71 Asoamisande na babíbia nɛsu,
phɔtɔ ka njaga á bundɔ básokangi.
72 Ka gea ékuiɛ batatasu ngomi,
kanga bosea iɔnga nɛkɛ á bonjánja.
73 N'ande bíndɔ dáɔphi ka tatasu Abhalaámus,
74 gea, asóphuiande ka njaga á babíbia nɛsu ka gea,
bɛ́mbhɛdaneɛgɛ kanga á kɔbɔbɔkɔ,
75 bébɛ na bonjánjá na kodoni mosá akɛ ka enda asu bhui.
76 Obɛ gǎkɛ miki, bákɔɔphanande mɔtu-nyɔngɔ ndea Mmbe a na kɔkɔta bhui,
nga, ɔmmɛɛande Mɔkɔta mosá ka bɔngisiaga aphe nɛkɛt,
77 na ubhisa á bakpa nɛkɛ nyɔngɔ á boamia á ka měma,
n'aphe á ima bojede nɛbɔ.
78 Nga, Mokonga nɛsu asókondi ka měma akɛ phɛ̂.
Asoengi bea maní á kam'bimba ka toka na kobha.
79 Ka bhɛna gǔ asu, besu ibunde be ka keiphe na kusi á iimbiɔ á kukua.
na ka ubhisa asu aphe á bɔjɛjɛ.u»
80 Cɔ, Yoáni áɔmɔta, áokakamana ka měma. Mpɔ, áoika ka nkanda, na ka bii agaeka ǒphanisia bhase ka baIsilaɛ́li.