<<    <     Malíkɔ     16     >    >> 
Yéso ajujuki ka kukwa
(Ɔna phɔtɔ Mat 28.1-8; Lóka 24.1-12; Yoáni 20.1-10)
16
1 Sabatɔ asi ye, Salɔ́mɛ, Malía Magadhála, na Malía ama-Yakɔ́bɔ, dábásombi nkɔki ka gǎ á sabisa na mǒnda á Yéso. 2 Abi ye kambimba esa ekuma imoci, ka juana mani, báoga ka bhota. 3 Báousianaga te: «Cɔ, ani mmbe atingisiande k'asu etae k'aph'isɔ á bhota? » 4 Bii bákidi ye, báoenga, báɔɔna gea te, etae angbongbo ndɔ dábatibi u ka mpɛphɛ. 5 Mpɔ, báongia subi á bhota, báɔmɔɔna moganda moci n'aiki ka njaga á mǔku, n'aɔli ngɔmbɛ abhu. Báoyayama. 6 Mpɔ, moganda ndɔ áǒngodea te: « Bókóbɛmbɛ na kɔbɔbɔkɔ. Yéso baNajalɛ́ti, mmbɔ dábankɔkɛigi gǔ á me á nkpatɔ, aámbé boonkaba. Ajujuki gǎkɛ ka kukwa. Ɔma nde dábabhisi mǒnda akɛ a ungee. Nna ye wa. 7 Gǎni ndiu bóongodeɛ bagoigi nɛkɛ, phɔtɔ Pɛ́tɛɛ, gea te age mosá abɔ na Galiláia. Kó unge bɔmɔɔnande bíndɔ Yéso dánongodi.» 8 Bake ndɔ báojuana ka bhota, báoga mbangɔ. Dábáɔkpɔkpɔma, báoyayama. Dábákámǔbhisi nkpa nyɔngɔ ndɔ nga, dábana kɔbɔbɔkɔ.
Yéso ěphangisi ka Malía Magadhala
(Ɔna phɔtɔ Mat 28.9-10; Yoáni 20.11-18)
[ 9 a Yéso dájujuki ye ka kukwa, kam'bimba esa á yenga, ǎ phɔ ǒphangisia ka Malía Magadhala, mmbɔ dámphui bansombo. 10 Yɛ áoga ɔ̌tɔ̌mia bunde dábatú na Yéso, kubii dábatú ogama ka kekusa. 11 Bii báɔki ye Malía n'ěngodi gea, amɔ̌ni Yéso n'aoenda, bɔ dábákábeeki yɔnga nɛkɛ.
Yéso ěphangisi ka bagoigi babɛ
(Ɔna phɔtɔ Lóka 24.13-35)
12 Mbusa á wa, bagoigi babɛ dábatú otoka ka kenombe, Yéso áǒkidianea ka keongi nɛngbo. 13 Báoja, báɔ̌tɔmia badhabɔ. Bákěbeekeɛ phɔtɔ bundɔ.
Yéso ěphangisi ka bagoigi nkama na moci (11)
(Ɔna phɔtɔ Mat 28.16-20; Lóka 24.36-49; Yoáni 20.19-23; Ekuma á bateki 1.6-8)
14 Ka sungiaga, Yéso áǒphangisia ka bagoigi nɛkɛ nkama na moci (11) na báoeaga. Yéso áǒkeea ka nyɔngɔ á kanga beekea nɛbɔ. Měma abɔ dágbagi phɔtɔ nga, dábákábeeki bii badhabɔ dáběngodi gea, bámɔɔni Yéso mbusa á jujuka akɛ ka kukwa. 15 Mpɔ, Yéso áǒngodea: «Gǎni ka mokonda bhui, bɔ́tɔ̌miɛ bakpa bɔbhu Mbino Anja ndea Mokongab. 16 Nkpa nde abeekeande, báom'batisa, yɛ aámbe Mokonga anamisande. Cɔ, mmbe kábeekeɛku, Mokonga atenande nyɔngɔ nɛkɛ akpɛ. 17 Bageande ketangaɔ ndee: Ka ina ani, báphuiande bansombo subi á bakpa. báyɔngande ka yɔngɛa á kɛ̌kɛ. 18 Bédhungande banjɔka. Aoba na bánu kema nde nkpa aokua ně, kéegeɛku kema. Babhisande njaga abɔ gǔ á basambi, bundɔ báoama.»
Yéso atai na kobha
(Ɔna phɔtɔ Lóka 24.50-53; Ekuma á bateki 1.9-11)
19 Bii Mɔkɔta Yéso agɔbi ye ngodea abɔ bó, Mokonga áontaisa na kobha. Yɛ, áoika ka njaga á mǔku á Mokongac. 20 Bagoigi gǎkɛ, báoga ɔtɔmiaga Mbino Anja k'ɔma bhui. Mɔkɔta Yéso áoba n'abɔ k'ekuma bhui. Áodokomisa bɔphɛi nɛbɔ ka ketangaɔ nde dábatú ɔtɔtɔkisa.]