Yéso ajujuki ka kukua
(Ɔna phɔtɔ Mat 28.1-8; Malíkɔ 16.1-8; Lóka 24.1-12)
20
1 Esa á yenga, ka kodokanaga á esa na kaiphiɔ n'aphɔtɔ bei, Malía nseka á ka Magadhála dáge ka bhota. Kó, dáɔni gea báphui ɛtɛ nde dábágbukumi na kubhu á bhota. 2 Wa, áoja mbangɔ mɔtɛ á Simɔ́ni-Pɛ́tɛɛ na ngoigi bangbo mmbɔ Yéso dánkondi, áǒngodea be: « Báphui mǒnda á Mɔkɔta ka bhota, békéoúbha ɔma nde bábhisi mǒnda akɛ. »3 Mpɔ, Pɛ́tɛɛ na ngoigi mmbɔ bangbo báoga ka bhota. 4 Bɔbhu babɛ báoga mbangɔ kimoci. Mmbɔ ngoigi bangbo dányɛ́nyi gǎkɛ Pɛtɛ́ɛ ka mbangɔ. Áokidia ka bhota mosá á Pɛ́tɛɛ. 5 Bii akidi kó, áogbuta, áɔɔna sanda ka odo. Yɛ, kangiɛ gǎkɛ subi í. 6 Bii Simɔ́ni Pɛ́tɛɛ dáom'bea, â phɔtɔ okidia ka bhota, áongia subi í. Áɔɔna sanda ka odo. 7 Â phɔtɔ ɔɔna edhiǐi á bhɔngɔ nde dábákombei na mɔ̌ á Yéso. Ediǐi á bhɔngɔ ndɔ na báikitikigi báobhisa ɔma nɛngbo danga na sanda. 8 Mpɔ ngoigi ndɔ dákidi mosá ka bhota â phɔtɔ ongia. Aɔni ye áobeekea. 9 Nga bagoigi dábákádigimisimbɛ phɔ́ nyɔngɔ nde buku á Mokonga dáyɔngi gea, Ambe Yéso ajujukɛ ka kukuaa. 10 Mbusa, bagoigi babɛ ndɔ báoja mɔtɛbɔ.
Yéso ansɛnɛkɛi Malía nseka á ka Magadhála
(Ɔna phɔtɔ Mat 28.9-10; Malíkɔ 16.9-11)
11 Malía dáiki ka nsɛngɛ bhíbhí á bhota n'aogama. Bii dáogama, áogbuta, áokɛngɛdia subi á bhota. 12 Kó, áɔbɔna balímɛ babɛ na báɔli ngɔmbɛ ábhu na báiki ka odo ɔmande dábábhisi mǒnda á Yéso. Moci dáiki nci á na mɔ̌, bangbo gǎkɛ â koika nci á n'ecinji. 13 Balímɛ ndɔ báomúsia Malía: «Nke nde ca! Ekende oogamea ?» áǒsikisia: «Neogama nga bamphui Mɔkɔta nɛmɔ. Cɔ, kéoúbha ɔma nde bambisi.» 14 Mbusa á yɔnga akɛ bó, áǒphaia mbusa. Mpɔ áɔmɔɔna Yéso n'amame. Dákáúbhi gǎkɛ gea yɛ ámbɔ. 15 Yéso áomúsia: «Nkende ca, ekende oogamea? Ani mmbe oonkaba?›› Malía dá gǎkɛ okanisia te ande mbhɛdanigi á ka ciko. Ka bondɔ, áongodea gea: «Moko, aobá́ n'ɔbɛ ambe onkumbi, omongodea ɔmande ombisi. Eme negande gǎke ɔmbhɛda. » 16 Yéso áongodea: «Malía!» Malía áǒphaia kubii Yéso aɔ́, áongodea ka kiƐbhulania: « Labhuni!» Ande gea te: Mphangigi. 17 Mpɔ, Yéso áongodea: « Kómodhungembɛ! Nga, kétaimbɛ mɔtɛ á Abhɛ. Gǎ ndiu óngodeɛ bana-ayi gea, netai mɔtɛa Abhɛ, mmbe aphɔtɔ Abhanu, mɔtɛ á Mokonga nɛmɔ, mmbe aphɔtɔ Mokonga nɛnu. » 18 Mpɔ, Malía nseka á Magadhála áoga ǒngodea bagoigi gea: «Nemɔɔni Mɔkɔta. » Aɔ̌tɔmiaga nyɔngɔ nde Yéso dángodi.
Yéso ɛ̌sɛnɛkɛi bagoigi nɛkɛ
(Ɔna phɔtɔ Mat 28.16-20; Malíkɔ 16.14-18; Lóka 24.36-49)
19 Cɔ, ɔgɔgɔ á esa á yenga ndɔ tɔ, bagoigi báophatia kǐɔ á k'ɔmande dábaiki ka nyɔngɔ á banga bakɔta á baYúdha.Yéso â gǎke obhika omama sɔsɔbɛ abɔ, áǒngodea: « Báni na bɔjɛjɛ! » 20 Mbusa á yɔnga akɛ nndɔ, áǒphangia bagoigi njaga akɛ na mpambá akɛ. Mpɔ bagoigi báotuma na maseye ka ɔna Mɔkɔta. 21 Yéso â goto ǒngodea: « Báni na bɔjɛjɛ! Eme neno teki phɔtɔ bíndɔ Abhɛ dámoteki. » 22 Mbusa á yɔnga akɛ nndɔ, áǒophia mpophɛ na ngodea abɔ: «Cɔ, tɔani Měma á Mokonga. 23 Nkpa bhuakɛ mmbe boimande bojede ndeakɛ, bojede ndɔ áoimika. Nkpa bhuakɛ mmbe bókóimɛku gǎkɛ bojede ndeakɛ, bojede ndɔ káimikɛku. »
Yéso ansɛnɛkɛi Tɔma
24 Cɔ, Tɔma mmbe báɔmɔphana Mphase, ka bagoigi nkama na babɛ (12), dákatu kimoci na badhakɛ mbɛnɔ nde Yéso děkidianei bagoigi. 25 Bagoigi ndɔ báongodea gea: « Bɛmɔɔni Mɔkɔta. » Tɔma ǎ gǎkɛ ǒsikisia te: « Kabɛ nɛkɛɔni epe á musumali ka njaga akɛ, na bhisa mǐki á njaga ani k'epe á musumali, na nekebhisi njagani ka mpambá akɛ kébeekeɛ ku. »
26 Mbusa á esa ngia á njaga isaɔ (8), bagoigi ndea Yéso bâ goto odhondanaga subi á endu, Tɔma â ye tɔ oba n' abɔ. Bii dábaphati endu, Yéso áɔbhika omama sɔsɔbɛ abɔ, áǒngodea: « Báni na bɔjɛjɛ! » 27 Mpɔ, áɔngodea Tɔmási be: « Bhisa miki á njaga akɔ wani na ɔ́ɔnjiɛ njaga ani. Bhisa phɔtɔ njaga akɔ ka mpambá ani. Tokisa ngǎka óbɛ ndiu m'beeki! 28 Tɔma áonsikisia gea: « Hoo! Mɔkɔta nɛmɔ na Mokonga nɛmɔ!» 29 Yéso áongodea: « Ka nyɔngɔ nde ɔmɔɔni aunge obeeki? Maseye ka bunde báobeekea nyɔngɔ na bákáɔni! »
Cina á dundua búku ndee