Yéso ɛ̌sɛnɛkɛi bagoigi nɛkɛ ngia á njaga ibɛ (7)
21
1 Mbusa indɔ, Yéso â goto ɔ̌sɛnɛkɛa bagoigi ndɛakɛ ka mpɛphɛ á etuú Tibhɛlía. Cɔ, ɛ̌sɛnɛkɛi be: 2 Simɔ Pɛ́tɛɛ, Tɔma mmbe dábáɔmɔphana Mphase, Natanaɛ́li ntɔa ka Kana á ka Galiláia, bana Jɛbhɛdháiɔ na bagoigi ndea Yéso buangbo babɛ, dábatu kimoci. 3 Simɔ Pɛ́tɛɛ áǒngodea: «Nege k'aphe á ɛɔpha. » Báonsikisia te: « Besu bege phɔtɔ n'obɛ. » Báojuana, báokambea ka koko. Kǐpha ndɔ, â tɔ oba tamba á keuka. 4 Ka kodokanaga esa, Yéso áomama k'ɔbɛɛ á ibo. Bagoigi dábakaúbhi gǎkɛ gea ande yɛ. 5 Mpɔ Yéso, áǒngodea gea: « Baniki nde ca! Bona kema á koea?» Báonsikisia: « Bɛɛndɔ. » 6 Yɛ, áǒngodea gea: «Makani mɔabɔ nci á njaga á mǔku á koko, bokambande. » Bâ gǎkɛ omaka u, dábákátú ye na bukpɛkpɛ á bôta i ka nyɔngɔ á bika á basú kau. 7 Mpɔ, ngoigi nde Yéso dánkondi áongodea Pɛtɛ́ɛ: « Mɔkɔta aámbé! » Bii Simɔ Pɛ́tɛɛ aɔki gea: «Mɔkɔta aámbé», â goto ɔ̌la bhɔngɔ nɛkɛ á gǔ nga, dáphui u. Áoguia k'ibo. 8 Bagoigi bundɔ buangbo bâ ndiu obhika ka koko na báobota moabɔ n'atumi na basú. Bɔ, dábákátu danga n'ɔbɛ̌, bea mɛtɛ́ɛ mia moci (100 m). 9 Bii bájabi kubhi, báɔɔna mokati na basú na bábhisi gǔ á eká n'aotoboaga. 10 Wa, Yéso áǒngodea gea: « Óbhikani na ka basú nde bo ye na bɔ̌ɔphi. »11 Cɔ, Simɔ Pɛ́tɛɛ áokambea ka koko, áobota moabɔ kubhi n'atumi na basú ángbóngbó mia moci na nkama bɔku na isaɔ (153). Nanga basú dábabiki, moabɔ dákábhomoki gǎkɛ. 12 Yéso áǒngodea te: « Bhikani boeɛgɛ.» Nna na ka bagoigi nde dákini usia akɛ te: « Omande ani?» Nga, dábaúbhi gea ande Mɔkɔta. 13 Mpɔ Yéso áɔsɛkɛda bhíbhí abɔ, áɔbhɛda mokati, áǒgabhɛa. Â phɔtɔ ɔbhɛda basú áǒgabhea. 14 Ndɔ dátu ye mɔngɔ á koísaɔ ka Yéso sɛnɛkɛa á bagoigi mbusa á jujuka akɛ sɔsɔbɛ á basí.
Yéso aɔyɔngaga na Pɛ́tɛɛ
15 Mbusa á eaga, Yéso áomúsia Simɔ Pɛ́tɛɛ gea: « Simɔ, muna Yoáni, omokondi kɔ̌nyɛ́nya bunde?» Pɛtɛ́ɛ áonsikisia: « Eya Mɔkɔta oúbha gea nekokondi. » Yéso áongodea: « Amba baniki á mɔgɔgɔ nɛmɔ. » 16 Mpɔ, â goto omúsia mɔngɔ á ko ibɛ: « Simɔ muna Yoáni, omokondi?» Áonsikisia: « Eya Mɔkɔta oúbha gea nekokondi.» Yéso áongodea: « Amba bamɔgɔgɔ ndɛamɔ. » 17 Áomúsia mɔngɔ á ko isaɔ: « Simɔ muna Yoáni, omokondi? » Pɛ́tɛɛ áɔbɛa nga, Yéso dámúsi ka mɔngɔ á ko isaɔ : « Omokondi?» Mpɔ áonsikisia gea: «Mɔkɔta, oúbha kema bhui. O tɔ oúbha gea nekokondi. » Yéso áongodea: « Amba bamɔgɔgɔ ndɛamɔ. 18 Nekokondi doni gea, mbenɔ nde dótú moganda, dótú ɔ̌bɔɛa aégba ndeakɔ sasakɔ. Dótúoga ɔma nde dótúokonda. Cɔ, mbenɔ nde obande gǎkɛ phomi, onanoagande njaga akɔ, nkpa bangbo akɔbɔɛande aégba nɛkɔ na gǎ akɔ ně ɔma nde kókondɛku gǎ. » 19 Yéso dáyɔngi bo ka phangia nkókó á kukua nde Pɛ́tɛɛ akuande, ka ombisa á Mokonga. Mpɔ Yéso áongodea Pɛ́tɛɛ: « Ómobea. »
Yéso na ngoigi nde dánkondi
20 Bii Pɛtɛ́ɛ aɔnji mbusa, áɔmɔɔna ngoigi nde Yéso dánkondi n'aobhika mbusa. Ngoigi nde dátúomúsiaga Yéso něgimisi ka bokuba akɛ mbɛnɔ nde dábatúoeaga gea: «Mɔkɔta, ani mmbe aɔtɔngaeka? » 21 Mbenɔ nde Pɛ́tɛɛ amɔɔni, áongodea Yéso te: «Mɔkɔta! Cɔ, mmbe abaeka bo?» 22 Yéso áonsikisia: ‹‹ Kabɛ na nekondi gea áendɛ na ka bii nebhikande, nɛkɔ kau ande eke ? Ɔbɛ, ómobea! » 23 Nyɔngɔ ndɔ áɔɛmba ka kecue á badhakɛ babeeki gea, ngoigi ndɔ kákuɛku. Cɔ Yéso dákángondi gea: « Kákuɛku. » Dáyɔngi ndiu: « Kabɛ na nekondi gea áende na ka bii nebhikande, nɛkɔ kau ande eke? »