Ekuma ndea bateki ndea Yéso
Mɔkɔ á tekisia á batɛki ndea Kiísito, Měma á Mokonga
1
1 Moko Tɛɔphílɔ, Subi á bukua nɛmɔ á ka mosá-mosá, dédundu nyɔngɔ bhui nde Yéso dákpangi gea i na goisaga i, 2 na ka bii age osungiaga k'esa ndɔ Mokonga antaisi na kobha. Mosá á taia akɛ, dáɛsɔmbu bateki nɛkɛ, áɔ̌ɔkusaga ka bukpɛkpɛ á Měma á Mokonga. 3 Mbusa á kukua akɛ, yɛ sasakɛ áɔ̌sɛnɛkɛa na mphangiɔ danga-danga ka engekisa te a phɔ́tɔ oenda. Dáɛsɛnɛkɛi k'esa nkama gena (40), áǒngodeaga nyɔngɔ á koboamɛ ndea Mokonga. 4 Esa moci, bii dáoeaga kimoci na bɔ, áɔ̌ɔkusagab be: «Bókotokɛmbɛ ka Yɛusalɛ́ma, bondeagani ndiu mɔkɔ nde abhɛ anɔ́ɔku, nndɔ dénongodi. 5 Nga, Yoáni débatisi babeeki n'ibo, benu gǎkɛ mbusa á esa abhɔa, Mokonga anóbatisande na Měma akɛc. »Yéso atai na kobha
6 Cɔ, bii bateki dábadhondanigi na Yéso, báomúsia gea: « Mɔkɔta, ka mbenɔ nde unge ǒsikisiande baIsilaɛ́lid koboamɛ nɛbɔ? »
7 Yéso áǒsikisia te: «Nna nyɔngɔ nɛnu úbha á esa na matu nde Abhɛ dáangi ka kɔkɔta nɛkɛe sasakɛ. 8 Bobande ndiu na bukpɛkpɛ mbenɔ nde Měma á Mokonga akiande gǔ anu. Bobande phɔtɔ bamamei nyɔngɔ nɛmɔ ka Yɛusalɛ́ma, Yudhɛ́a bhui, Samalía na ka sungiaga á mokondaf. » 9 Mbusa á yɔnga akɛ bó, Mokonga áontaisisa Yéso na kobha. Bateki na bá phɔ́tɔ ɔɔnjia na kobha, egugu áom'bomba, bákamɔ̌nɛ yeg. 10 Na báphɔ́tɔ otumia iso abɔ na kobha, kubii Yéso dáotaia, mɔngɔ moci, bǒko babɛ na báɔli bhɔngɔ abhu, báɔ̌sɛnɛkɛa, cɛdɛ! 11 Báǒngodea te: «Batɔa ka Galiláia, nyɔngɔ sina nde bomamei oani, na bɔɔnjia na kobha? Yéso, mmbe Mokonga dántokisi ka nkindi anu, áontaisa na kobha, ajande goto tɔ bíndɔ bɔmɔ̌ni n'aotaia na kobha. »
Bateki bansɔmbu mpɛnɛ á Yúdha Isikaliɔ́ta
12 Cɔ, bateki ndea Yéso báotoka ka mamba Mijɛitúni báoja na Yɛusalɛ́ma. Mamba ndɔ dátú bhibhi na Yɛusalɛ́ma bea kilɔmɛtɛ́ɛ mocih . Cɔ, bateki báodhidha mamba, báoja na Yɛusalɛ́ma. 13 Bii báju ye ka Yɛusalɛ́ma, báodapha subi á endu á gǔ ɔma nde dábaodhondanaga. Bunde dábatú oa, báunge: « Pɛ́tɛɛ, Yoáni, Yakɔ́bɔ na Andeé. Philípɔ na Tɔmá. Batɔlɔmáiɔ na Matáiɔ. Yakɔ́bɔ muna-Alpháiɔ, Simɔ́ni mmbe dáokaba tokisa á nji nɛbɔ ka kɔkɔbɛ, na Yúdha muna-Yakɔ́bɔi. » 14 Bɔbhu, na měma moci, dábana moingi á dhondanaga k'ɛmɛmi. Dábaɔmɛma kimoci na Malía amakɛ na Yéso, bamunamakɛ na Yéso, na bake buangbo.
15 K'esa ndɔ, babeeki nde dábadhondanigi, dábatu bea bakpa mia moci nkama ibɛ (120). Mpɔ, Pɛ́tɛɛ áoma sɔsɔbɛ abɔ, áǒgeae, 16 « Baya, atókeni nyɔngɔ nde Měma á Mokonga dáyɔngi subi á buku á Mokonga átɔtɔkɛanɛ. Měma ndɔ dáyɔngi phɔ́ mosá subi á moamɛ Dhaúdhi kaphoa Yúdhaj. Yúdha dátú nsɔndɔi ndea bakpa ndɔ dábandhungi Yéso. 17 Cɔ, Yúdha dátú ka besu, dájukani phɔtɔ na besu k'ekuma. » 18 Yɛ, dátɔi odo ka somba i na bangɔa nde dátɔi ka bojede. Áogua oa n'atumanigi, sɔphɔ akɛ áobhomoka, suba akɛ bhui áokpuukana. 19 Batɔa ka Yɛusalɛ́ma bɔbhu dábaúbhi nyɔngɔ ndɔ. Ka bondɔ, báosua ina á odo ndɔ ka yɔngɛa nɛbɔ ‹Akɛɛ-dhámu›. Ande gea te, ‹Odo á magiak.›
20 Nga bádundu subi á Jabhúi be,
‹Ambe endu nɛkɛ abɛ esimɔ,
nkpa kaikɛmbɛ kau. ›
Bádundu phɔtɔ,
‹Ambe nkpa bangbo ájigɛ n'ekuma nɛkɛl. ›
21 Cɔ, ka bondɔ, akeni bensɔmbɔɛ ka bakpa moci, mmbe dátú na besu mbenɔ bhui nde débeotamba na Mɔkɔta Yéso, 22 kpanga ka óbatisɔ ndea Yoáni, na ka sungiaga bii Mokonga dántaisi Yéso na kobham. Nga, akeni ábɛ mamei á nyɔngɔ á jujuka á Yéso ka kukua. »
23 Oa, báǒbhisa bakpa babɛ. Ina á moci ande Yɔsɛ́phu mmbe báɔmɔphana Bhalisábha Yúsitɔ. Mmbe ba a ko babɛ áoba Matía. 24 Mpɔ, báɔmɛma Mokonga be: « Obɛ Mɔkɔta, múbhi-měma á bakpa bɔbhu, ósophangia phɔ, ani mmbe ɔnsɔmbu sɔsɔbɛ á bakpa nde ba á babɛ. 25 Yɛ, ábɛ nteki nɛkɔ, phɔtɔ mpɛnɛ á Yúdha mmbe age k'ɔma nɛkɛ nnde ankeni. » 26 Mpɔ, báɔbɛta bana-mɛlɔɛ ka úbha ani mmbe, Mɔkɔta ansɔmbu. Bana-mɛlɔɛ báonguia Matía, áoba sɔsɔbɛ a bateki buangbo nkama na moci (11).