Balɔma 1

Baoba ndea Pɔ́lɔ ka

BaLɔ́ma

Nsesɔ

1 Ka babeeki ndea ka Lɔ́ma, sambani. Cɔ, eme Pɔ́lɔ mbhɛdanigi ndea Kiísito Yéso aámbé nedundu baobá́ ndee. Mokonga dámɔɔphani ka gea nébɛ nteki, dámɔsɔmbu ka tɔ̌miaga Mbino Anja nɛkɛ. 2 Mbino Anja ndɔ, Mokonga dáɔku u kala subi á buku ndea baɔtu-nyɔngɔ nɛkɛ+ \fr 1.2 \ft Ɔna Isaía 52.7;61.1.. 3 Mbino ndɔ a ka phɔa anakɛ mmbe ka kokpa akɛ dábɔkɔtɛani k'ekombo ndea moame Dhaúdi; 4 báombisa na bukpɛkpɛ ka bá Muna-Mokonga+ \fr 1.4 \ft Ɔna Jabhúi 2.7, mbenɔ nde Měma á Mokonga dánjujukisi Yéso Kiísito Mɔkɔta nɛsu ka kukua. 5 Ka nyɔngɔ á Yéso unge Mokonga dámopi bonjanja á ekondi na ekuma á ba nteki, ka ubhisa á batɔa ekuna bhui gea te, ka ina akɛ bam'beekeɛ na bám'bangɛ. 6 Bo phɔtɔ sɔsɔbɛ á bakpa ndɔ, benu ibunde Mokonga dánɔɔphani ka ba bakpa ndea Yéso Kiísito.

7 Cɔ, nenodundui benu bɔbhu subi á Lɔ́ma bunde Mokonga aekondi na bunde dáɛbɔphani ka bá bakpa nɛkɛ batɔa-kanga á bojede, bonjánja á ekondi na bɔjɛjɛ ndea Abhasu Mokonga na Mɔkɔta nɛsu Yéso Kiísito ábɛ na benu.

Pɔ́lɔ ana mɔphɛ á gǎɔnana na babeeki á ka Lɔ́ma

8 Mosá á kema bhui, neonsega Mokonga nɛmɔ ka Yéso Kiísito ka phɔa anu benu bɔbhu ka nyɔngɔ nde, báɔtɔmiaga mbino á beekea nɛnu ka mokonda bhui. 9 Cɔ, Mokonga mmbe nɛɔmbhɛdanɛaga na měma ani bhui ka tɔ̌miaga Mbino Anja ndea Anakɛ, aoúbha gea nnde nɛɔyɔnga ande doni. Yɛ, áoúbha gea neonokanisia esa bhui. 10 Mbenɔ bhui nde nɛɔmmɛma Mokonga, neongodea gea kabɛ n'akondi, ákodɛ kani aphe négɛ mɔtɛ anu. 11 Eya, nena mɔphɛ phɛ̂ áɔna anu ka gea, nénophɛ ebhigɔ á ka měma ka kpagisaga měma anu. 12 Ndɔ ande gea te, békpagisanɛgɛni ka beekea nde be ně.

13 Baya, nekondi bóubhɛ gea mɔngɔ ásii déobhisa mɔangɔ á gǎ mɔtɛnu+ \fr 1.13 \ft Ɔna Ekuma á Bateki ndea Yéso 19.21, na ka k'esande kɛ́tɔtɔkisimbɛ. Cɔ, nekondi nédunguɛ phɔtɔ mbuka á ka měma mɔtɛnu, bíndɔ ne phɔtɔ ogea ka batɔa á k'ekuna nɛngbo. 14 Nende mbhɛdanigi ka enga bakpa bɔbhu. Enga baGiíki na enga á bunde báná baGiíki. Enga á bamɔɔngɛ na enga á babhobho. 15 Ka nyɔngɔ indɔ unge ne phɔtɔ na mɔphɛ á tɔ̌miaga Mbino Anja ka benu íbunde boiki ka Lɔ́ma.

Mbino Anja ana bukpɛkpɛ

16 Cɔ, kéokua na soni katɔ̌mia Mbino Anja nga, ande bukpɛkpɛ nde Mokonga áɔbhɛdanɛaga ka amisa nkpa bhuakɛ mmbe áombeekea Yéso. Á phɔ́ k'ǒamisa baYúdha, mbusa í, â phɔtɔ ǒamisa bunde báná baYúdha. 17 Ka nyɔngɔ nde, Mbino Anja aoúbhisa aphe sina nnde Mokonga aǒtanga bakpa batɔa doni mosá akɛ. Tanga á bakpa bondɔ a tɔndɔ ɔtɔtɔkɛana ka beekea á Yéso. A tɔ bíndɔ bádundu subi á buku á Mokonga gea: «Ntɔa doni aendande ka nyɔngɔ á beekea+ \fr 1.17 \ft Ɔna Abhakuki 2.4..»

Bakpa bande batɔa bojede mosá á Mokonga

18 Cɔ, na kobha, Mokonga aúbhisi bhase gea, abɛí ka nyɔngɔ á bojede bhui nde bakpa báogea, phɔtɔ bii bákáom'banga. Bakpa ndɔ baunge bádaki gea, kodoni á Mokonga kabɛ bhase. 19 Kema bhui nde akeni gǎkɛ áubhikanɛ ka phɔa Mokonga, ande bhase mosá abɔ, ka nyɔngɔ nde Mokonga áambé dáeúbhisi u. 20 Nga, kpanga á bii Mokonga dáconji mokonda, bukpɛkpɛ nɛkɛ á mɛyɔ na ebhigɔ nɛkɛ á bá Mokonga nnde nna kɔɔnɛkana, aɔɔnɛkana k'ekuma nde dábhedanigi. Ka ianaga nyɔngɔ ndɔ, bakpa báká n'aphe énganea. 21 Nanga dábaomúbha Mokonga, bákábɛon'dokomisa na sega akɛ bíndɔ akeni gea i ka Mokonga. Bâ ndiu óbá na kanisia á kanga kantíti, měma abɔ á kanga úbhapha áoba na kaiphiɔ. 22 Báǒbhebha gea bande batɔa kɔbɔngɛ, na bándiu babhobho. 23 Ɔma á bhebha Mokonga mɛnɛ á boombia, mmbe ande mɛyɔ, bâ ndiu obhebha iii nde akengeani na nkpa ímbe aokua, bambǔ, banyama á ecinji gena na bunde báodaa+ \fr 1.23 \ft Ɔna Tɔláti 4.16-18.

24 Ka nyɔngɔ índɔ unge Mokonga dědeketi bábeɛ mɔphɛ ájede á ka měma abɔ, ka jɔɔkisa nyama abɔ sasabɔ, nguungu abɔ. 25 Bɔ, báoanganisa kodoni ndea Mokonga ka mbɛa. Dábaobhebha na bhɛdanɛaga kema nde Mokonga aconji, kɔma á bhɛdanɛaga á Mokonga mmbe akeni n'obhebhɔ ka saga na saga, ábɛ bó!

26 Ka bondɔ unge Mokonga dáedeketi bábeɛ mɔphɛ nɛbɔ á soni. Bake nɛbɔ bâ koanganisa moangɔ á dhondana nke na mǒko ka dhondana ndiu bakɛ ka bakɛ. 27 A phɔtɔ bo ka bǒko. Bádeketi dhondana na bake, měma abɔ áobhomoka ka mɔphɛ á soni á dhondanaga bǒko ka bǒko. Bii abo, bákeni bátenɛ nyɔngɔ nɛbɔ akpɛ bíndɔ akeni na tambea nɛbɔ ájede.

28 Cɔ, bii dábaye úbha á Mokonga, Mokonga áǒdeketa ka úbhapha abɔ ajede. Ka gea bágeɛ kema nde bákátokeni gea í. 29 Bátumi n'etéte á kanga kodoni bhui, bojede, kokae, mɔphɛ ajede, kuma, bátumi na nsengɔ, moaga á bakpa, sani, maibhe, bɔ bande batɔ á tɔngana. 30 Báɔyɔngaga ajede ka phɔa badhabɔ, babibia á Mokonga, batɔa bɛí, batɔa ébhebha, měma ájede, ntɔa-bemboko, batɔa phɔtanaga, batɔa maibhe ka tɔa á kema á ajede, bakpa nde bákáɔɔbɔka babɔkɔtiabɔ. 31 Babhobho, batɔa kanga kodoni, batɔa kanga ekondi, batɔa kanga ngomi. 32 Bɔ baoúbha gea ɛɔphi ndea Mokonga asosi gea te, bunde báotambea bó, akeni bákuɛ. Cɔ, bɔ, nanga baúbha nndɔ, baotutuisa gea í na gamana phɔtɔ na bakpa nde báogea bó.