Balɔma 2

Mokonga aotena nyɔngɔ á bakpa kanga egami

1 Cɔ, ɔbɛ ímbe ootena nyɔngɔ á bakpa bunɛngbo akpɛ, nanga óba áni, bákáúkɛku phɔtɔ tena á nyɔngɔ ínɛkɔ akpɛ nga, ootena nyɔngɔ ndea badhakɔ akpɛ n'ophɔtɔ otambea bea bɔ. Ka bondɔ, ɔtɔ ootena nyɔngɔ nɛkɔ akpɛ ɔbɛ sasakɔ. 2 Cɔ, beoúbha gea Mokonga aobea doni mbenɔ nde aotena nyɔngɔ á bakpa nde báogea kema bíndɔ. 3 Cɔ, ɔbɛ ímbe ootena nyɔngɔ ndea badhakɔ akpɛ, n'obɛ sasakɔ otoogea kema nde bɔ báogea. Ooúbha te ɔbɛ aámbé oókande ka tena nyɔngɔ ndea Mokonga? 4 Goto, obɛ oom'bɛnjiaga Mokonga ímbe aanjánjá phɛ̂ mmbe ana měma áphɔngɔ na měma á phiphia. Kóoúbha gea ngomi ndea Mokonga aokotutuisa ka kětia á tambea akɔ ajede? 5 Cɔ, obɛ ona měma akpɛ na kóokonda kětia á měma akɔ. Ka bondɔ unge ǒbhisii tambaga ángbó esa nde Mokonga aphangeaeka esuia nɛkɛ na tena á nyɔngɔ nɛkɛ ka kodoni. 6 Nga, Mokonga amphendaeka nkpa bhuakɛ bíndɔ akeni ka bhɛdanaga nde abhɛdanagi. 7 Mokonga aebophande enda á mɛyɔ, bakpa nde básui bhɛdanɛaga akɛ na kaba obhebhɔ, bokutu na enda á kanga sungiaga. 8 Aphangiande gǎkɛ bɛí na esuia nɛkɛ ka bakpa nde bande babibia akɛ na bunde báoya kodoni na bea á bojede. 9 Nkpa bhuakɛ mmbe aogea bojede, atambagande na ea á minyɔ. Tambaga ndɔ akpangande phɔ́ ka baYudha, mpɔ áobá ka bunde báná baYudha. 10 Nkpa bhuakɛ mmbe agǎkɛ ogea anja, abande na bokutu, bojɛjɛ na boombia. Akpangande phɔ́ ka baYudha, mpɔ áobá ka bunde báná baYudha. 11 Nga, Mokonga nna n'egami ka tena á nyɔngɔ.

12 Bakpa bɔbhu bunde báogea bojede kanga á úbha ɛɔphi ndea Mósa, bábungagande nanga bákáúbhi ɛɔphi ndea Mósa. Bunde bá gǎkɛ ogea bojede na báoúbha ɛɔphi ndea Mósa, bátenande nyɔngɔ nɛbɔ n'ɛɔphi nndɔ. 13 Cɔ, nna gǎkɛ bakpa nde bá tɔ ɔɔka ɛɔphi báunge Mokonga aǒtanga batɔa-kodoni. Andiu bakpande báotambea bíndɔ ɛɔphi asosi. 14 Bii bakpa nde báná baYudha měma abɔ aǒteka ka tɔtɔkisa á kema nde ɛɔphi asosi nanga bánaoúbha ɛɔphi ndea Mósa, bɔ, bána ɛɔphi ndɔ subi abɔ; nanga báka ně. 15 Ka bondɔ báophangia gea, kema nde bádundu subi á ɛɔphi aɔbhɛdanaga ka měma abɔ. Ianaga á ka měma abɔ aodigimisa nyɔngɔ ndɔ na kanisiabɔ a phɔtɔ ɔ̌tɔnga gea, mbenɔ nɛngbo bagi anja, mbenɔ nɛngbo bagi ájede. 16 Bondɔ unge abande esa nde Mokonga atenande akpɛ nyɔngɔ á bɔsɔmɛa ndea bakpa k'aphe ndea Kiísito. A tɔ bíndɔ Mbino Anja nde nɛɔtɔ̌miaga ayɔngi.

BaYudha bátingiigi ɛɔphi ndea Mósa

17 Cɔ, ɔbɛ ímbe ogi te onde moYúdha, osebei ɛɔphi ndea Mósa, na ébhebha na Mokonga. 18 Oúbha mɔphɛ ndea Mokonga. Ɛɔphi a phɔtɔ okogoisaga ka sɔmbɔa kema nde aánja. 19 Obeeki doni gea onde nsɔndɔi á bakeímeíme, na owanga ka bunde básubi á kaiphiɔ. 20 Onde phɔtɔ mphangigi á babhobho na ngoisigi á baniki nga, oúbha doni gea, ɛɔphi aokophangia aphe á úbhapha phɛ̂ na kodoni. 21 Cɔ, ɔbɛ ngoisigi á bakpa bunɛngbo, kó ǒgoisaga sasakɔ ee? Ɔɔphɛa bakpa bunɛngbo gea, bákáúbɛmbɛ n'ɔbɛ ogoto oúba! 22 Ɔɔyɔnga gea bakpa bákátunganɛmbɛ, n'ogǎkɛ otungana! Ɔbɛ okangei iii á bakɔta bɛa bunde á na kobha, n'ogǎkɛ oúba nkumba á k'endu nɛbɔ. 23 Ɔbɛ imbe ǒbhebha na úbha ɛɔphi ndea Mósa, ɔnjɔɔkisa Mokonga ka tingiaga ɛɔphi! 24 Ka bondɔ unge a tɔ bíndɔ bádundu subi á buku á Mokonga: « Ka nyɔngɔ anu aunge bakpa nde báná baYudha baobhóma ína á Mokonga.»

25 Eya, gua á ganja a tɔ na kantíti aobá́ n'oamba ɛɔphi. A gǎkɛ oba n'ootingiaga ɛɔphi, nanga ógua ganja, gua á ganja nɛkɔ a tɔ kowó. 26 Cɔ, aobá́ mowó n'aoamba ɛɔphi ndea Mósa, Mokonga kántangɛku tɔ bea nguganja? 27 Nkpa nde kágu ganja á ka nyama, n'aoamba ɛɔphi ndea Mósa, atenande nyɔngɔ nɛkɔ akpɛ ɔbɛ ímbɔ ootingiaga ɛɔphi n'ona buku á Mokonga n'onde nguganja. 28 Cɔ, moYudha á doni nna tɔ mbe aoúbhikana ka keongi na mmbe agu tɔ ganja á ka nyama. 29 MoYudha á doni andiu mmbe ayeúbhikani subiakɛ na gua á ganja subia á měma akɛ. Gua á ganja ndɔ áɔtɔtɔkɛana ka bukpɛkpɛ á Měma á Mokonga, nna ka nyɔngɔ á ɛɔphi ndea Mósa. MoYúdha á doni ndɔ, nna bakpa baunge báombhebha, Mokonga aámbé andiu ombhebha.