Baobá́ á mosa-mosa ndea Pɔ́lɔ ka BaKɔlítɔ
Mɔ á Nyɔngɔ
Animbe dádundu baobá́ nde? Dátú Nteki Pɔ́lɔ.
Dádundu ka saga sina? Dádundu ka saga bea 56, mbusa á bɔkɔtɛana á Yéso.
Dádundu ka nyɔngɔ eke? Ka nyɔngɔ nde, babeeki á ka Kɔlítɔ, dábakatanigi, báǒbea basɔndɔi danga-danga. Tambea á bakpa ba ási sɔsɔbɛ abɔ, dátú bea batɔa-kaiso, ka nyɔngɔ nde, dábauubha te, dábáká ye kusi ɛɔphi.
Buangbo dábaóbhebha phɛ̂ ka nyɔngɔ égabhɔ ndea Měma á Mokonga, nnde dábatú ne. Buangbo dábákáobeekea gea, basí bájujukande ka kukua.
Bɔphɛi nɛkɛ dátú eke? Pɔ́lɔ dɛ́phɛi babeeki á ka Kɔlítɔ gea te, Kiísito a tɔ mo. Kákatanigi. Dɛ́phɛi phɔtɔ gea te, egabhɔ ndea Měma á Mokonga kányɛ́nyanigi. Ekondi a gǎkɛ ángbó phɛ̂, kɔnyɛ́nya egabhɔ. Déphenigi ka nyɔngɔ á bɔjɔɔkiɔ, n'iɛbɛ, phɔtɔ kuma mbenɔ á dhondanaga ka mɛsa á Mɔkɔta. Ka sungiaga, áogea te, jujuka ka kukua, ande cina á beekea a Kiísito.
Nsesɔ
1
1-2 Ka batɔa-kanisa ndea Mokonga, nnde a ka Kɔlítɔ, sambani.Eme Nteki Pɔ́lɔ a ámbé nedundu kasa ndee. Yéso Kiísito a ámbé amoteki bíndɔ Mokonga dákondi.
Munamasu Sɔsitɛ́ni ǎnosambei phɔtɔ.
Kiísito dánɔɔphani gea, bóbɛ bakpa nɛkɛ. Bo goto tɔ k'ekombo nde báɔmɛma Mɔkɔta nɛsu Kiísito Yéso k'ɔma bhui. Yɛ ande mɔkɔta nɛsu na mɔkɔta ndea babeeki bɔbhu.
3 Abhasu Mokonga, na Mɔkɔta Yéso Kiísito, ánophɛ bonjánja na bɔjɛjɛ nɛkɛ.
Obhebhɔ ka Mokonga
4 Neombhebha Mokonga esa bhui ka nyɔngɔ á bonjánja nɛkɛ ási, nnde ǎnoophi ka nyɔngɔ á dhondana anu na Yéso Kiísito. 5 Nga, Kiísito ǎnotumisi na bukpɛkpɛ á tɔtɔkisa á kema bhubhui. Nga, bo na bukpɛkpɛ á tɔ̌mia á nyɔngɔ á Mokonga, nobo na kɔbɔngɛ phɛ̂. 6 Neuubha gea te, nyɔngɔ á Mokonga a na bukpɛkpɛ subi anu. 7 Ka bondɔ, bókúuki k'egabhɔ á ka měma bii boobondea esa nde Mɔkɔta nɛsu Yéso Kiísito ajaeka. 8 Ne phɔtɔ uubha gea, yɛ a ámbé ǎnoophande bukpɛkpɛ esa bhui ka měma anu, ka geae, bókobɛ mɔnɔ na bojede moti mbenɔ nde Mɔkɔta nɛsu Yéso Kiísito ajuande goto. 9 Mokonga ageande bó ka nyɔngɔ nde, nnaobosea mɔkɔ nɛkɛ. Anɔɔphani gea, bɔ́ɛmbanɛ n'ɛnakɛ Yéso Kiísito, Mɔkɔta nɛsu.
Ɔkanani
10 Baya, něnodengemisigi k'ina á Mɔkɔta nɛsu Yéso Kiísito gea, ɔkanani. Bókokatanɛgɛ mɔnɔ. Bani ndiu na měma mo, na ubhapha mo. 11 Ai! baya, nɛyɔngi bo ka nyɔngɔ nde, batɔa-k'ekombo ndea Kɔlɔ́ɛ bábhiki omongodea gea, boosanaga phɛ̂. 12 Negie, sɔsɔbɛ anu, buangbo báogea: «Nende nkpa nde ba a Pɔ́lɔ.» Buangbo: «Eme ba a Apɔ́lɔ.» Buangbo: «Eme ba a Pɛ́tɛɛ.» Buangbo «Eme gǎkɛ, nende ba a Kiísito.» 13 Cɔ, Kiísito ěkatisani? Nna bo. Cɔ, ka bunde boomobea, eme Pɔ́lɔ a ámbé něnokui ka mosaaba? Bɛɛndɔ. Bánobatisi phɔtɔ k'ina ani? Bɛɛndɔ.
14 Nembhebhi Mokonga nga, déněbatisi tɔ bakpa babɛ sɔsɔbɛ anu, Kiísipɔ na Gaíɔ. Dékébatisi ye bakpa buangbo. a 15 Ka bondɔ, kákeni nkpa áyɔngɛ gea, bámbatisi k'ina ani. 16 Oo! ande doni, netóbosei. Déněbatisi phɔtɔ batɔa-k'ekombo ndea Sɛtɛphánɔ. Kéuubha gea, déněbatisi ye goto bakpa buangbo. 17 Kiísito dákámoteki gǎkɛ k'aphe á batisa á bakpa. Dámoteki ndiu ka ɛmbisa á nyɔngɔ anja nɛkɛ. Kɛ́ɔ̌phɛa bakpa na kɔbɔngɛ nɛbɔ á kokpa, ka dokomisa ani. Aoba nǎna bo, nyɔngɔ á kukua á Yéso ka mosaaba áoba jǎi.
Kukua á Yéso ka mosaaba, ande kobhobho k'iso á bakpa
18 Nyɔngɔ á kukua á Yéso ka mosaaba ande kobhobho ka bakpa nde báokua ka měma. Nyɔngɔ ndɔ a gǎkɛ bukpɛkpɛ á Mokonga ka besu ibundɔ be k'aphe á boamia ka měma. 19 Buku á Mokonga aengekisi nyɔngɔ ndɔ be: «Netukatukande kɔbɔngɛ ndea batɔa-kɔbɔngɛ. Neyande phɔtɔ ubhapha ndea baubhaphi.» b 20 Cɔ, mosa á Mokonga, batɔa-kɔbɔngɛ ndea mokonda bá oa? Bagoisigi-ɛɔphi ndea baYúdha bá oa? Babhómi- nyɔngɔ ba oa? Mokonga kábhɛdi phɔ kɔbɔngɛ ndea ka mokonda nde, áoba kobhobho?
21 Kɔbɔngɛ ndea Mokonga a ndiu be: Batɔa- kɔbɔngɛ ndea ka mokonda bánaomǔbha. Ka bondɔ, báuubha te, bɔphɛi nɛsu ande á kobhobho. Bɔphɛi á kobhobho ndɔ a tɔ unge Mokonga ěamisande bakpa nde bámbeeki. 22 Nga, baYúdha báokaba ketangaɔ ka phangia abɔ bukpɛkpɛ ndea Mokonga. BaGiíki bákondi gǎkɛ tɔ kɔbɔngɛ. 23 Cɔ, besu gǎkɛ, bɛɔ́phɛa bakpa nyɔngɔ á kukua á Kiísito, mmbe dábankɔkigi ka mosaaba. Ka baYúdha, ɔka á nyɔngɔ ndɔ, ande ephiphi ajede. c Ka baGiíki, búubha te, bakpa nde bábeeki nyɔngɔ ndɔ, á Kiísito, bá na ganja. 24 Ka bunde Mokonga dɛ́ɔphani gǎkɛ, kabɛ baYúdha, kabɛ baGiíki, Kiísito ande cina á bukpɛkpɛ na kɔbɔngɛ á Mokonga. 25 Ande gea te, kobhobho ndea Mokonga anyɛ́nyi kɔbɔngɛ ndea bakpa. Bɔɔlɔ ndea Mokonga anyɛ́nyi bukpɛkpɛ bhui ndea bakpa. d
26 Baya, k'iso á bakpa, batɔa-kɔbɔngɛ, bauka, batɔa-bophombia, dábákábiki sɔsɔbɛ anu bii Mokonga dánɔɔphani. 27 Mokonga dɛ́sɔmbu ndiu bunde bakpa báǒgea te, bánde babhobho ka kusa a batɔa-kɔbɔngɛ na soni. Dɛ́sɔmbu phɔtɔ bána na kɔkɔta ka kusa a bakɔta na soni. 28 Mokonga dɛ́sɔmbu bakpa jǎi-jǎi, bunde bána na kantiti, bá bea bampapha, ka uja a kema nde bakpa báɔɔmbisa. 29 Ka bondɔ, nna na nkpa nde aɔtɔka nědokomisi mosa á Mokonga. 30 Nga, Mokonga a ámbé ǎnodhondanisi na Kiísito Yéso. Dhondanisa ndɔ ande cina á kɔbɔngɛ nɛsu. Ande phɔtɔ cina á doni, bonjánja, na boamia asu ka měma. 31 Ka bondɔ, beani phɔ kema nde bádundu subi á buku á Mokonga gea: «Mmbe aokaba édokomisa, édokomisɛ ka kema nde Mɔkɔta Mokonga agi ka yɛ.» +1.31 Yɛɛmía 9.24