Pɔlɔ́ aǒsambea bakpa danga-danga
16
1 Nenteki kanu nsae nɛsu Phoibe, mbhɛdanigi ajanja ka kanisa á kenkuéa. 2 Nsɛsɛani yɛ bíndɔ bakiísito bámôogeaga k'ina á Mokonga. Nengani ka kema bhui nde ana siki í nga, yɛ dáeéngi bakpa básii n'eme phɔtɔ.3 Nensambei Pisila na Akila, badhani babhɛdanigi ndea Yéso. 4 Bɔ, dábaooki ka kukua ka nyɔngɔ á amisa ani. Eme na kanisa bhui nde nna á baYudha, beésegi bɔ. 5 Neésambei phɔtɔ batɔa ka kanisa bunde báodhondanaga k'endu mɔtɛ á bɔ. Nensambei dhani ékondi Epeneto, mmbe dátú m'beeki á ka ma mosá-mosá ndea Kiísito ka Asía. 6 Nensambei Malía mmbe dátambigi phɛ̂ ka nyɔngɔ anu. 7 Neésambei baciabhɛ na badhani Andonikɔ na Yúnia bunde detu na bɔ subi á mɛkakɔ. Bɔ, bána boombia phɛ̂ sɔsɔbɛ á bateki, bɔ, dábam'beeki Kiísito mosá ani. 8 Nensambei Ampuliatɔ dhani á ekondi subi á Mɔkɔta. 9 Nensambei Uubhánɔ dhani mbhɛdanigi subi á Kiísito na dhani ékondi Stáki. 10 Nensambei Apele mmbe aúbhisi bhase beekea nɛkɛ ka Kiísito. Neésambei batɔa k'endu ndea Aistobúlo. 11 Nensambei Heodía ntɔa k'ekombo nɛmɔ. Neésambei batɔa k'endu á Nakiso bundɔ babeeki ndea Mɔkɔta. 12 Neésambei Tiíphɛna na Tiíphosa bunde bábeeki tambaga ka nyɔngɔ á Mɔkɔta. Nensambei dhani á ekondi Pɛ́ɛsi mmbe aǒtambisa ka nyɔngɔ á Mɔkɔta. 13 Nensambei Úphu, mmbe Mɔkɔta dánsombu, amakɛ aphɔtɔ ayí. 14 Neésambei Asinkiísto, Phulego, Hɛ́me, Patɔ́ba, Hɛ́ma na badhani bunde báiki na bɔ. 15 Neésambei Philologo na Yulía, Neɛ́ɔ na awakɛ, Olimpa na babeeki ndea Mokonga bɔbhu bunde báiki na bɔ. 16 Seseanani amakombeana bea bakiísito. Batɔa kanisa bhui ndea kiísito bánosambei.
Bɔphɛi á ka sungiaga ndea Pɔ́lɔ
17 Kadenge-denge baya! Óengani na bunde báosoea ka katanaga á bakiísito na bungaga ka nyɔngɔ á bɛnjɛaga bɔphɛi nde botóɔki. Ikani danga na bɔ. 18 Nga, bakpa bea bundɔ, bánaom'bɛdaneaga Mɔkɔta nɛsu Kiísito, bandiu tɔ ɔbhɛdanɛaga sɔphɔ abɔa! Goto, báǒdhema bakpa jǎi-jǎi ka bɔnga abɔ na yɔnga ékondisaga nde báɔbɔngisiaga. 19 Bakpa bɔbhu báoúbha gea boɔmɔɔka Mokonga. Nena maseye ka nyɔngɔ anu. Mɔphɛ ani gakɛ ande gea te bóbɛ bamɔngɛ ka gea anja na ya á bojede. 20 Mokonga mɛnɛ á bujɛjɛ ankpotande Sɛtáni kɛ̌kɛ nde kusi á ecinji anu. Ambe bonjanja ékondi ndea Mɔkɔta Yéso Kiísito ábɛ kimoci na benu!
21 Dhani mbhɛdanigi Timɔtɛ́ɔb anosesi, babɔkɔtɛamɔ: Lukíɔ, Yasɔ́ni na Sosipatɛ́i bánosambei phɔtɔ. 22 Eme Tɛtíɔ, n'dundu á baobá nnde, nenosambei k'ina á Mɔkɔta. 23 Gáyo mmbe ne mɔtɛkɛ ɔma nde madhondanɔ á koni bhui amɔnɔonjiaga anosesi. Ɛlástɔ, nambigi bangɔa á ka nji na muna-amasu Kwátɔ bánosambeic.[ 24 Bonjanja ékondi ndea Mɔkɔta nesu Yéso Kiísito abɛ ka benu bɔbhu! Abɛ bó.]
Obhebhɔ ka Mokonga
25 Bémbhebheni Mokonga! Yɛ, anabukpɛkpɛ á opha anu etende subi á beekea, ka beana na Mbino Anja nde nɛɔtɔmɛaga k'ina á Yéso Kiísito, nndɔ ungɔ aojuanisa bhase nyɔngɔ á bɔsɔmɛa á kala. 26 Kɛ̌kɛ nde gǎkɛ, bákidianisi nyɔngɔ á bɔsɔmɛa bhui bhase, kabeana na moangɔ ndea Mokonga Mɛyɔ bíndɔ bádundu subi á buku á baɔtu-nyɔngɔ, áǒteka gea bátɔ̌miɛgɛ u ka batɔ á ekuna bhui, ka gea bábeekeɛ u, na bámɔɔkɛ. 27 Bémbhebheni Mokonga, Yɛ tɔndɔ aámbé ande mɔngɛ! Abɛ n'obhebhɔ ka Yéso Kiísito ka saga na saga! Abɛ bo!