Bébeni n'ekondi ka bakpa bunɛngbo nna tɔndɔ ka besu sisasu
15
1 Ambe besu ibunde bemɔti ka beekea, békumbɛ bodoko á bunde bákámɔtimbɛ ka beekea. Kákeni békabɛ nnde asɔbɔngɛi. 2 Ambe nkpa na nkpa ka besu ágeɛ ánjá ka dhakɛ n'índe am'bɔgɛande ka gea, beekea nɛkɛ ámɔtɛ. 3 Nga, Kiísito dákákabi kema nde dáɔm'bɔngɛa sisakɛ. Bindɔ buku á Mokonga ayɔngi gakɛ: «Yɔnga bhui á mbóma nde báɔyɔnga ka phɔakɔ amoguia.» 4 Nyɔngɔ bhui nde dábadundu kala subi á buku ndea Mokonga, dábadundu u ka phɛa asu ně ka opha asu etende na měma á phiphia ka gea bébɛ na nsebeɔ bíndɔ báosogoisaga subi á buku á Mɔkɔnga. 5 Ambe Mokonga mmbe aosophiphisa měma na kpagisaga asu ásɔɔ́nganisɛ ánjá bíndɔ Yéso akondi. 6 Cɔ, benu bɔbhu na měma mo, n'ɛsɔ moci, bombhebhande Mokonga abhakɛ na Mɔkɔta nɛsu Yéso Kiísito.Mbino Anja a ka nkpa bhuakɛ
7 Cɔ, sɛsɛanani na maseye bíndɔ Kiísito dánosesi phɔtɔ ka gea Mokonga ábɛ n'obhebho. 8 Nenongodi gea Kiísito děbhisi ka bhɛdaneaga baYudha ka úbhisa bhase gea, Mokonga ande ntɔa-doni na átɔtɔkisɛ mɔkɔ nɛkɛ ka batatabɔ, 9 bunde báná baYudha báombhebha Mokonga ka nyɔngɔ á bonjánja nɛkɛ bíndɔ bádundu subi á buku ndea Mokonga gea:
«Ka bondɔ unge nekobhɛbhande sɔsɔbɛ á bakpa bɔbhu
na neémbande ka dokomisa ina akɔ.
10 Buku á Mokonga agi goto:
«Benu íbunde bókó baYudha báni na maseye kimoci na bunde Mokonga désombu.
11 Goto:
« Mbhebhani Mɔkɔta benu bɔbhu íbunde bókó baYúdha!»
Bakpa bɔbhu bámbhebhɛ yɛ.
12 Isaía ayɔngi phɔtɔ gea:
«Ka bakpa k'ekombo ndea Yɛ́sɛ
akidianande na motumbɔ á kɔkɔta gǔ á bunde báná baYudha. Bɔ,
bábhisande nsɛbɛɔ nɛbɔ ka yɛ. 13 Ambe Mokonga mɛnɛ á nsɛbɛɔ ánotumisɛ na maseye na bɔjɛjɛ phɛ̂ subi á beekea ka gea bótumɛ na nsɛbɛɔ ka bukpɛkpɛ ndea Měma á Mokongab.
Ekuma ndea Pɔ́lɔ
14 Baya, eme ne engekisi ka phɔanu gea benu sisanu botumi na mɔphɛ anja na ubhapha ásii na bɔtɔki phɛana ngǔngu anu. 15 Dénodundui baoba nde na bukpɛkpɛ ka kanisianu nyɔngɔ nde bo ye úbhi u. Dégi u ka bonjanja ékondi nde Mokonga dámopi, 16 ka bá mbhɛdanigi ndea Yéso Kiísito ka phɔa bakpa bunde báná baYudha. Nɛɔbhɛdanaga ekuma á ntobei-phɛa ka tɔ̌miaga Mbino Anja ndea Mokonga ka gea, bunde báná baYudha bábɛ bea ɛkɔmi nde Měma á Mokonga asokosei. 17 Mpɔ etɔ nɛɔtɔka na něbhebhi ka jukana na Yéso Kiísito ka nyɔngɔ á ekuma ndea Mokonga. 18 Aobá na neogea nɛ́yɔngɛ ká kema, nɛyɔnga tɔ nnde Kiísito dátɔtɔkisi k'ekuma nɛmɔ ka yɔnga na ka tambea ani ka ebotea bunde báná baYudha ka gea bám'bangɛ Mokonga. 19 Nga, mphangiɔ na ketangaɔ danga-danga nde dátɔtɔkisi ka njaga ani, dáphangi bukpɛkpɛ ndea Měma á Mokonga. Na bukpɛkpɛ ndɔ tɔ dénetɔ̌migi Mbino Anja ndea Kiísito ɔma bhui kpanga ka Yeusalɛ́ma súa kenombe Iliíko. 20 Mɔphɛ ani dátu tɔ ka tɔ̌miaga Mbino Anja ɔma nde bákáɔkimbɛmɔnɔ nyɔngɔ á Kiísito. Ka gea te, kɛphɛ̌kɛmbɛ ɔma nde nkpa bangbo dákpangi phɛ̌ka. 21 Bondɔ unge dénetɔtɔkisi bíndɔ buku á Mokonga agi gea:
«Bunde dábakáetɔ̌mimbɛ baɔnande u,
bunde gakɛ dábakaɔkimbɛ u bádigimisandec.»
Pɔlɔ́ akábongisiaga tamba á ga na Lɔ́ma
22 Ndɔ ungɔ dáomoimisia mɔngɔ ásii ka gǎ mɔtɛnu. 23 Cɔ, kɛ̌kɛ nde nɛgɔbi ye ekuma nɛmɔ ka nji ndɔ na ka nyɔngɔ índɔ unge mɔphɛ ani subi á basaga ásii amɔ̂ á gǎ mɔtɛnu. 24 Mbenɔ nde negande na Spanía, nesebei gea nenɔɔnande ka nyɛ́nyani na bomotabɛande ka tamba ndɔ. Nebande na maseye á ika na benu ka mbenɔ abhɔa. 25 Kɛ̌kɛ nde gakɛ nege na Yɛusalɛ́ma ka bhɛdanɛaga babeeki. 26 Kanisa á ka Makedhonía na nnde á ka Akáya dábaɔni ánja bákɔngɔɛ bangɔa kaétabea babeeki á ka Yɛusalɛ́ma bunde dábatu ka buyɛnɛ. 27 Báosuia enga abɔ nga, dákeni na bó ka enga abɔ. Nga, baYudha babeeki dábaegabhɛi bunde báná baYudha kema ánjá á enga bɔ ka měma. Atókeni bunde báná baYúdha báégabeɛ phɔtɔ baYúdha nkumba nde bá na siki íd. 28 Mbenɔ nde nɛgɔbande ekuma nde, na neéjisii kema nde batódhondanisigi, nɛnyɛ́nyɛande mɔtɛanu ka gǎ ani na Spanía. 29 Na neoúbha gea bii negande mɔtɛanu, nebhikande Kiísito n'amobhisii njaga phɛ̂.
30 Baya, nenodengemisigi k'ina á Mɔkɔta nɛsu Yéso Kiísito na k'ekondi nde Měma á Mokonga aobhikisa, béjukaneni ka mɛma á Mokonga na moingi ka phɔani. 31 Ɛmɛmi ndɔ ande ka gea bunde bákám'beeki Yéso ka Yudhɛa bákámogeɛmbɛ ájede na nnde nebhiki ně ka enga bɔ ka Yɛusalɛ́ma, babeeki bábeekeɛ u. 32 Ka bondɔ, nekidiande mɔtɛanu na netumi na maseye, ka mɔphɛ ndea Mokonga na úmbia kimoci na benu. 33 Ambe Mokonga mɛnɛ á bujɛjɛ ábɛ kimoci na bɛnu bɔbhu. Abɛ bó!