Kótɛnɛmbɛ nyɔngɔ ndea dhakɔ
14
1 Nseseani mmbe kámɔtimbɛ ka beekea, kanga á iyanaga kanisia akɛa. 2 Nkpa nde amɔti ka beekea, aɔtɔka n'ai kema bhui, mmbe kámɔtimbɛ ka beekea a gǎkɛ tɔ oeaga nɛkɛ mbuti. 3 Mmbé aoea kema bhui, kam'bɛnjiɛgɛmbɛ mmbe nn'aoea kema bhui. Mmbe nn'aoea kema bhui, kátenɛmbɛ nyɔngɔ á nkpa nde aoea kema bhui nga, Mokonga am'beeki. 4 Obɛ, onde ani ka tena á nyɔngɔ ndea mbhɛdanigi ndea nkpa bangbo? Átetemisa ekuma nɛkɛ, kátetemisi nndɔ a tɔ ɔnɛnjia mɔkɔta á ekuma nɛkɛ. Atetemisande ekuma nga, Mɔkɔta ana bukpɛkpɛ á sukia akɛ.5 Bakpa moci-moci báokanisia gea, a na esa nde anyɛ́nyi esa nɛngbo ka kantítib, buangbo gǎkɛ a tɔ kimoci. Ambe nkpa na nkpa áengekisɛ ánjá nkanisiɔ nɛkɛ. 6 Mmbe atinganisi esa, atinganisi u ka dokomisa á Mɔkɔta. Mmbe aoea kema bhui, aoea u ka dokomisa á Mɔkɔta nga, ambhebhi Mokonga k'eea nɛkɛ. Mmbe nn' aoea eea bhui, a phɔtɔ ogea bo ka dokomisa á Mɔkɔta na bhebha á Mokonga. 7 Nna na nkpa sɔsɔbɛ asu mmbe aoenda ka yɛ sasakɛ, Nna na nkpa sɔsɔbɛ asu mmbe aokua ka yɛ sasakɛ. 8 Nga, aobá́ na beoenda beoenda ka Mɔkɔta, kabɛ na beokua, beokua ka Mɔkɔta. Kabɛ békua, béenda, bende bakpa ndea Mɔkɔta. 9 Ka nyɔngɔ índɔ unge, Kiísito dáku na jujuka ka kukua ka gea, ábɛ Mɔkɔta á basí na bunde báoenda. 10 Obɛ gǎkɛ ka nyɔngɔ sina nde ootena nyɔngɔ ndea munamakɔ? Obɛ ɔɔm'bɛnjiaga munamakɔ ka bó? Nga, besu bɔbhu bemamande mosá á ntua á tena á nyɔngɔ ndea Mokonga. 11 Ka nyɔngɔ nde bádundu subi á buku á Mokonga gea:
«Eme Mɔkɔta mmbe neoenda nɛyɔngi gea,
nkpa na nkpa agbukande muanku akɛ mosá ani
na bɔbhu bámbhebhande Mokongac.»
12 Ka bondɔ, nkpa na nkpa sɔsɔbɛ asu aɛ̌yɔngɛande sisakɛ mosá á Mokonga.
Kɔm'bɛtɛkisɛmbɛ dhakɔ n'ephiphi ájede
13 Bédeketeni teneanaga á nyɔngɔ besu ka besu. Beekeanani ndiu ka gea kóm'bɛtɛkisɛmbɛ munamakɔ n'ephiphi ájede kabɛ ngisisakɛ ka bojede. 14 Ka ɔngana ani na Mɔkɔta Yéso, neúbhi na nedigimisi ánjá gea nna na kema nde ajɔɔkanid. A jɔɔkani ndiu ka nkpa nde aɔni gea ande ájɔɔkana. 15 Aobá n'om'beisi dhakɔ ka nyɔngɔ á eea nde ooea, o ye tɔ ótambea kanga ekondi. Nna ka nyɔngɔ á eea unge ɔɔtɔka n'om'bungisi nkpa nde Yéso dánkui. 16 Cɔ, kema nde aánjá ka benu kabɛmbɛ ye aphe ka bakpa bunɛngbo yɔnga ájede ka phɔanu. 17 Nga, koboame ndea Mokonga nna ka nyɔngɔ á kema á koea na kema á noa. Andiu á kodoni, bɔjɛjɛ na maseye nde Měma á Mokonga aobhikisa. 18 Mmbe aombhɛdanɛaga Kiísito bó, am'bɔngɛi Mokonga na bakpa báom'beekea.
19 Békabeni kema nde aobhisa bɔjɛjɛ na kaba á kema nde aɔphɛka beekea á bakpa. 20 Kóujɛmbɛ ekuma ndea Mokonga ka nyɔngɔ á eea. Doni, eea bhui nna n'ɔtaɔ andiu ajede ea eea nde aongisisa nkpa ka gea bojede. 21 Kema nde aánjá ande gina á nyama, makana na kema bhui nde aɔtɔka n'angisisi muna-amakɔ ka bojede. 22 Amba kakɔ mosá á Mokonga nnde obeeki sisakɔ ka nyɔngɔ nnde. Maseye ka mmbe nn'aɔɔna bojede k'inde asɔmbu. 23 Mmbe gǎkɛ aoeaga n'ana ngaka Mokonga atenande nyɔngɔ nɛkɛ akpɛ ka nyɔngɔ nde tambea akɛ nn'aɔɔnisa mɔphɛ á beekea na nndɔ bhui ande bojede.