Ambe nkpa na nkpa áɛbɔkɛ bakɔta á nji
13
1 Ambe nkpa na nkpa áɛbɔkɛ bunde bá na kɔkɔta gǔ asu. Nga, kɔkɔta bhui a tɔ otoka ka Mokonga na yɛ aámbé démamisi bunde báoea nji. 2 Cɔ, mmbe nn'aokonda ika kusi á kɔkɔta á bakɔta á nji, aye mɔangɔ nde Mokonga akondi. Bunde báoya ɔka á bakɔta, báobotea gǔ abɔ sasabɔ tena á nyɔngɔ akpɛ. 3 Nga, bunde baogea anja bánaɔtɔka na b'ebangi bateni-nyɔngɔ, tɔndɔ bunde bá ndiu ogea bojede. Kóokonda banga á mɔkɔta á nji? Cɔ, gea ánja na akobhebhande. 4 Ka nyɔngɔ nde, yɛ aɔmbhɛdanɛaga Mokonga ka opha akɔ bukpɛkpɛ á ka měma ka gea á kema anja. A gǎkɛ oba n'ogi bojede, óm'banga nde nga, ana bukpɛkpɛ á tambisaga á nkpa, nna gǎkɛ ogea nndɔ jǎi. Mbenɔ nde báontambisaga nkpa, bá k'ekuma ndea Mokonga ka ɔnisa esuia ndeakɛ gǔ á nkpa nde agi ajede. 5 Ka bondɔ unge aánjá ka benu édhidhisa mosá á bakɔta, nna tɔndɔ ka nyɔngɔ á banga esuia ndea Mokonga, andiu goto ka nyɔngɔ nde booúbha subi á měma te, akeni gea bó.6 Ka nyɔngɔ indɔ unge bo phɔtɔ ophenda manjanja kau nga, bunde báophendisa, Mokonga aámbé aebhisi k'ekuma ndɔ. 7 Mophani nkpa na nkpa kema nde ankeni ně. Aoba n'ande mphendisigi manjanja, mphendani, Aobá n'ande mphendisigi baóba, phendani. N'dokomisani mmbe akeni na dokomisa akɛ, mbebhani mmbe akeni na bhebha akɛa.
Ɛɔphi asosi ekondani
8 Kákeni bá na nyɔngɔ na ká bakpa na nna tɔndɔ ekondani nga, mmbe ankondi nkpa bangbo, atɔtɔkisi ɛɔphi. 9 Cɔ, ɛɔphi kau ú: «Kótunganɛmbɛ, kómmoɛmbɛ nkpa, kóubɛmbɛ, kókondembɛ kema nde nna akɔ.» Nyɔngɔ nde angbiimisi ndɔ n'ɛɔphi nɛngbo bhui ande: Nkonda dhakɔ bíndɔ ǒkondi sisakɔb. 10 Aobá n'onkondi dhakɔ, kóotɔka n'ongi ájede. Bá n'ekondi ande tɔtɔkisa ɛɔphi.
Béjujukeni ka tɔ̌
11 Mbenɔ nde bokau booúbha gea a ye tɔ mbenɔ á jujuka ka tɔ̌ nde bo subi í. Cɔ mbenɔ nde débem'beeki Yéso, boamia á ka měma n'aphɔ́ danga aunge aye sodhondi ye tɔ. 12 Esa angendi dakɛc. Akeni bédeketeni tambea ajede á kaiphio. Bébhedeni ndiu nkumba á emani nde báobhedaneaga n'esa. 13 Bébeni na tambea ánjá nde akeni n'esa, békébembɛ n'osa ka eaga na noa, békébembɛ n'otungo, n'iɛbɛ, sani na nsengɔ. 14 Békengeanɛ ndiu na Mɔkɔta Yéso kiísito. Bókódeketembɛ mɔphɛ ájede á nyama anu ánongisɛ ka bojede.