Balɔma 3

1 Cɔ, moYúdha anyɛ́nyi nkpa nde nna moYúdha ka kema sina? Gua á ganja ana kantíti sina? 2 Anyɛ́nyi ka kema ásii danga-danga. Ka nyɔngɔ nde baYúdha báunge Mokonga débophi phɔ́ nyɔngɔ nɛkɛ. 3 Eya, baYúdha bunɛngbo dábákábeeki nyɔngɔ á Mokonga! Bii abo, ande gea te, ka nyɔngɔ índɔ aunge Mokonga adeketande kodoni nɛkɛ? 4 Tanda phɔ! Ambe Mokonga aubhikanɛ gea a tɔ ɔyɔnga doni, bakpa baunge bá ndiu ɔyɔnga mbɛa. A tɔ bíndɔ badundu subi á buku á Mokonga gea:

«Ambe óubhikanɛ gea, ɔ tɔ ɔyɔnga doni.

Mbenɔ nde báɔkɔtɔnga, ka nyɔngɔ ajede kabɛmbɛ gǔ akɔ.»

5 Cɔ, kabɛ ka nyɔngɔ á bojede nde beogea aunge Mokonga aubhikani gea ande ntɔa-doni. Bɛyɔngande Mokonga nna ntɔa-doni ka nyɔngɔ nde aosotambisaga? (Nɛyɔngi wa yɔngɛa á kokpa.) 6 Tanda phɔ! Atúoba Mokonga na nna ntɔa-doni atótenande nyɔngɔ ndea batɔa ka mokonda?

7 Cɔ, a gǎkɛ obá doni á Mokonga na n'aɔɔnɛkana ka mbɛa nɛmɔ, na báobhebha ina akɛ, bá goto ɔtɔka tena nyɔngɔ nɛmɔ akpɛ gea nende ntɔa bojede ka bó? 8 Aobá bó, bɛ́yɔngɛni pɛ: «Bégeɛni kema ájede ka gea kema anja átɔtɔkɛanɛ?» Eya ana bakpa nde báɔyɔnga mbɛa kaphɔani gea eme nɛɔyɔnga bó. Bapka ndɔ bákenande na tena á nyɔngɔ nɛbɔ akpɛ!

Nna na nkpa nde ande ntɔa-doni mosá á Mokonga

9 Cɔ, abo. Besu baYúdha bɛɛ́nyɛ́nyi bakpa bunɛngbo? Tanda phɔ! Be ye phangi bhase gea baYúdha na bunde báná baYúdha, besu bɔbhu betɔ kusi á kɔkɔta á bojede. 10 Atɔ bíndɔ dábadundu subi á buku á Mokonga gea:

«Nna tanda na nkpa moci mmbe ande ntɔa-doni. 11 Nna na nkpa nde aoengekisa,

nna na mmbe aonkaba Mokonga. 12 Bɔbhu bábungigi,

bɔbhu bájɔɔkani kimoci. Nna tanda na ká nkpa moci mmbe aogea ánja.

13 Kema nde aotoka k'aphɛnɔkɔ abɔ aokusisa,

edaka abɔ aǒenga ka dhema á bakpa,

ɛsɔ abɔ ana cengu bínde á njɔka. 14 Aphɛnɔkɔ abɔ atumi na nyɔngɔ á sɛmɛaga na nyɔngɔ á kae-kae. 15 Ecinji abɔ ǎphoo ka duka á magia. 16 Báotukatuka na deketa á tambaga k'ɔma bhui nde báɔnyɛ́nya. 17 Dábákáoúbha aphe á bɔjɛjɛ. 18 Báoenda kanga tanda kɔbɔbɔkɔ á Mokonga.»

19 Cɔ, beoúbha gea nyɔngɔ bhubhui nde ɛɔphi ayɔngi a tɔ kaphɔa bakpa nde ba kusi á ɛɔphi. Ka gea te nkpa bhuakɛ adhakanɛ, na úbha gea batɔ á ka mokonda bɔbhu bánde batɔ á bojede mosá á Mokonga. 20 Ka nyɔngɔ índɔ unge, nna na nkpa nde bántangande ntɔa-doni mosá á Mokonga ka nyɔngɔ á amba ɛɔphi. Ɛɔphi a tɔ omphangia nkpa gea agi bojede.

Mokonga aámbé aóamisa bakpa ka měma ka nyɔngɔ á beekea

21 Cɔ, kɛ̌kɛ nde, Mokonga dásɔɔnisi aphe sina nde aontanga nkpa ntɔa-doni mosá akɛ. Aphe ndɔ, nna gǎkɛ obea nyɔngɔ á ɛɔphi. Nga dábadigimisi subi á buku á ɛɔphi na buku á baɔtu-nyɔngɔ be: 22 Bakpa bɔbhu bunde bám'beeki Yéso Kiísito baunge Mokonga aótanga batɔa-doni mosá akɛ kanga obayɔ. 23 Nga, bakpa bɔbhu bagi tɔ bojede, báoúka boombia ndea Mokonga. 24 Cɔ, ka nyɔngɔ á bonjanja ékondi ndea Mokonga, Mokonga aétangi batɔa-doni kanga ophendɔ ka nyɔngɔ nde Yéso Kiísito aámbé aékodigi. 25 Nga, Mokonga dámbisi Yéso ka nyama á phɛa ka nyɔngɔ á ima á bojede nde bakpa dábagi mosá. Ka bakpa nde babeeki, magia á phɛa ndɔ aphangisi gea Mokonga ande ntɔa-doni ka nyɔngɔ nde aími bojede nde bakpa dábagi. 26 Ka nyɔngɔ á ngomi nde Mokonga á ně, yɛ dákondi phangia kodoni nɛkɛ ka matu nnde. Ka gea akɛ bó, aunge aontanga ntɔa-doni nkpa bhuakɛ mmbe am'beeki Yéso.

27 Cɔ, bena kema nde beǒbhebha ně? Tanda phɔ́. Ka bó? Ka nyɔngɔ nde kema nde ana kantíti nna ɛɔphi, andiu beekea. 28 Nga, bɛɔni gea, Mokonga a tɔ ontanga nkpa, ntɔa-doni ka nyɔngɔ á beekea. Nna ka nyɔngɔ á amba ɛɔphi. 29 Ande gea te Mokonga a tɔ Mokonga ndea baYúdha? Nna phɔtɔ Mokonga ndea bunde báná baYúdha? Eya! A phɔtɔ Mokonga ndea bunde báná baYúdha 30 nga, Mokonga a tɔ mo. Yɛ tɔ aámbé aétangande baYúdha na bunde báná baYúdha batɔa-doni ka beana na beekea á nkpa na nkpa. 31 Ande gea te, bɛɔbɛnjiaga ɛɔphi ka nyɔngɔ á beekea ndɔ? Tanda phɔ! Bendiu otetemisa ɛɔphi.