Abhalaámu ande ntɔa-beekea
4
1 Cɔ, bɛyɔngande ka phɔa tatasu Abhalaámu bó? Ekende dátɔi ka kokpa akɛ? 2 Akoba Mokonga na dántangi Abhalaámu ntɔa-kodoni ka nyɔngɔ ékuma nɛkɛ, ana kema nde aǒbhebha kau. Nna gǎkɛ ɔtɔka n'ěbhebhi mosá á Mokonga. 3 Nga, buku á Mokonga ayɔngi be: «Abhalaámu dám'beeki Mokonga. Ka nyɔngɔ á beekea ndɔ unge Mokonga dántangi ntɔa-kodonia.» 4 Nkpa aɔbhɛdanaga ekuma, akeni n'ophendɔ nɛkɛ. Ophendɔ ndɔ nna á jǎi, ankeni ně. 5 Cɔ, andiu oba nkpa na kági ka kema, na am'beeki Mokonga mmbe áǒtanga batɔa-bojede ka batɔa-kodoni, beekea nɛkɛ aunge bántangi kau ntɔa-kodoni. 6 A phɔtɔ bo unge Dhaúdhi ayɔngi nyɔngɔ á maseye ka phɔa bakpa nde Mokonga aéangi batɔa-kodoni kanga ɔnjia ekuma nɛbɔ. 7 Dáyɔngi be: «Maseye ka bunde Mokonga agbukumi bɔjɔɔkiɔ nɛbɔna íma á bojede nɛbɔ!
8 Maseye ka nkpa nde Mɔkɔta nna tanda ontangea bojede nɛkɛb!»
9 Cɔ, maseye nde a tɔ ka bagu-ganja, nna phɔtɔ ka bawó ee? Be ye yɔngi gea: «Mokonga dántangi Abhalaámu ntɔa-doni ka nyɔngɔ á beekea nɛkɛ.» 10 Dábantangi ntɔa-doni ka mbenɔ sina? Ka mbenɔ á gua akɛ ganja, ka mbenɔ á kowó akɛ? Nna ka mbenɔ á gua akɛ ganja, andiu ka kowó akɛ. 11 Mbusa á wa, dábangusi ganja, gua akɛ ganja aobá́ mphangiɔc ka engekisa doni nde Mokonga dántangi ntɔa-kodoni kanyɔngɔ á beekea nɛkɛ. Kabondɔ unge Abhalaámu dánde abha bakpa bɔbhu bunde babeeki, nanga bakagu ganja, kagea bétangɛ phɔtɔ bɔ batɔa-kodoni. 12 Abhalaámu aphɔtɔ abha bakpa nde bágu ganja. Nna tɔndɔ bakpa nde bá na epe á gua á ganja ka nyama abɔ andiu bakpa nde bana beekea bíndɔ tatasu Abhalaámu dátu ně mosá á gua akɛ ganja.
Mokonga aɔtɔtɔkisa mɔkɔ nɛkɛ ka bunde bam'beeki
13 Cɔ, Mokonga dámɔku Abhalaámu na basuko akɛ gea aébophande mokondad. Mɔkɔ ndɔ nna gǎkɛ ka nyɔngɔ nde Abhalaámu dáoamba ɛɔphi ndea Mósa. Andiu ka nyɔngɔ nde Mokonga dántangi ntɔa-doni ka nyɔngɔ á beekea nɛkɛ. 14 Aobá na báɔtɔa kema nde dáɛ̌ɔku ka nyɔngɔ á amba ɛɔphi ndea Mósa, ande gea beekea nna na kantíti, na mɔkɔ nde Mokonga aɔku a tɔ jǎi-jǎi. 15 Nga, ɛɔphi aobhikisa esuia ndea Mokonga. Atu gǎkɛ oba ɛɔphi na nna bei, ambé nyɔngɔ á tingiaga í nna bei.
16 Ka bondɔ betɔi gǎkɛ tɔ botukɔ ndɔ ka nyɔngɔ á beekea, kagea te, mɔkɔ ndea Mokonga abɛ ka nyɔngɔ á bonjanja á ekondi nɛkɛ. Mpɔ, áoúbhikana doni gea, mɔkɔ ndɔ ande ka phɔa á batɔa-k'ebɔkɔti bhui ndea Abhalaámu. Ande gea te, nna tɔndɔ ka bunde báoamba ɛɔpphi, andiu phɔtɔ ka bunde bá na beekea bea Abhaláamu, mmbe ande abhasu besu bɔbhu. 17 Cɔ, a tɔ bíndɔ bádundu subi á buku á Mokonga gea: «Dékobhisi abha ɛbɔkɔti ásii+ \fr 4.17 \ft Ɔna Nkpangeɔ 17.5..» Yɛ, ande abhasu mosá á Mokonga ímbe am'beeki. Mokonga ndɔ, ande mmbe aóendisa basí ka kukua na sosea á kema nde kábimbɛ mɔnɔ bei gea te ábɛ ye tɔ bei. 18 Abhaláamu dábeeki sebea kema nde dákákeni ye sebea í. Ka nyɔngɔ á beekea ndɔ unge a ye «abha ɛbɔkɔti ásii.» Bindɔ dába dundu subi á buku á Mokonga gea: «Bende unge ɛbɔkɔti nɛkɔ abikande+ \fr 4.18 \ft Ɔna Nkpangeɔ 15.5..» 19 Abhalaámu dátú na basaga bhíbhí á mia moci, beekea nɛkɛ dákádhɔndɔbɔki nanga bii dáɔkania ka phɔa nyama akɛ n'a ye bhíbhí á kua na ka phɔa nkakɛ Sála bii dátú ngomba+ \fr 4.19 \ft Ɔna Nkpangeɔ 17.1,15-22.. 20 Ka phɔa mɔkɔ ndea Mokonga, dábeeki kanga ngǎka. Beekea nɛkɛ â ndiu omopha bukpɛkpɛ áombhebha Mokonga. 21 Dáúbhi doni gea, Mokonga ana bukpɛkpɛ á tɔtɔkisa phɔtɔ kema nde dáɔku. 22 Ka nyɔngɔ índɔ unge Mokonga dántangi ntɔa-kodoni. 23 Cɔ, nna tɔ ka phɔa Abhalaámu sasakɛ aunge bádundu subi á buku á Mokonga gea: «Mokonga dántangi ntɔa-kodoni.» 24 Andiu phɔtɔ ka phɔasu íbunde Mokonga asotangande batɔa-kodoni, besu íbunde bem'beeki Mokonga gea, dánjujukisi Mɔkɔta nɛsu Yéso ka kukua sɔsɔbɛ á basí. 25 Mmbe Mokonga dánkusisi ka nyɔngɔ á bojede nɛsu â gǎkɛ onjujukisa ka kukua ka gea te bébɛ batɔa-kondoni mosá á Mokonga.