Kiísito asɔɔnganisi na Mokonga
5
1 Cɔ bii Mokonga asotangi ye batɔa-doni ka nyɔngɔ á beekea nɛsu, bena bɔjɛjɛ na Mokonga ka nyɔngɔ á Mɔkɔta nɛsu Yéso-Kiísito. 2 Ka nyɔngɔ akɛ phɔtɔ unge bena beekea gea, bebhiimisi bonjanja ékondi ndea Mokonga nnde ande cina á beekea nde beikii. Bena maseye ka nyɔngɔ nde nsebeɔ nɛsu ande bá na boombia ndea Mokonga. 3 Nanga beotambaga, bena maseye nga, beoúbha gea tambaga aobhikisa moingi, 4 moingi aobhikisa phiphía ka tombaga, phiphía aobhikisa nsebeɔ. 5 Nsebeɔ ndɔ nna okusa na soni ka nyɔngɔ nde, Mokonga aɛmbisi ekondi nɛkɛ subi á měma asu ka nyɔngɔ á Měma á Mokonga nnde dásophi.6 Cɔ bii débekétú phɔ́ na ka bukpɛkpɛ, Kiísito dáku ka phɔa batɔa á bojede ka mbenɔ anja nde Mokonga dáangi. 7 Aákpɛ ka nkpa beekea akuɛ ka phɔa á ntɔa-doni. Nkpa aenei beekea kukua ka nyɔnga á nkpa anjánja. 8 Cɔ, Mokonga aphangi gǎkɛ ekondi nɛkɛ ángbó ka besu, ka nyɔngɔ nde Kiísito dáku ka phɔa asu mbenɔ nde débetú phɔ́tɔ batɔa bojede. 9 Kɛ̌kɛ nde, Mokonga asotangi ye batɔa kodoni ka nyɔngɔ á magia ndea Yéso, nndɔ aúbhisi bhase gea, yɛ asoamisande k'esuia ndea Mokonga. 10 Nga, mbenɔ nde débetú babibia ndea Mokonga, dásɔɔnganisi na yɛ ka nyɔngɔ á kukua á anakɛ. Nndɔ aphangisi bhase gea, ɔngana asu na yɛ, beamande ka nyɔngɔ á enda á Kiísito. 11 Nna tɔndɔ nndɔ, bendiu na maseye ka Mokonga ka nyɔngɔ á Mɔkɔta nɛsu Yéso Kiísito mmbe asɔɔnganisi kɛ̌kɛ nde na Mokonga.
Adhámu na Yéso Kiísito
12 Cɔ, ka nyɔngɔ á nkpa moci tɔ, Adhámu aunge bojede dángi ka mokonda, bojede ndɔ áobhikisa kukua. Ka bondɔ unge kukua andandi ka bakpa bɔbhu, nga bɔbhu dábági bojede+ \fr 5.12 \ft Ɔna Nkpangeɔ 2.17; 3.6, 17-19.. 13 Cɔ, mosá á Mokonga opha á Mosá ɛɔphi, bojede dátú tɔ ka mokonda. Ɔmande ɛɔphi nna bei, bákáotanga bojedea. 14 Bii a bó, kukua dátú na kɔkɔta kpanga ka matu ndea Adhámu na ka gǎ jua ka matu ndea Mósa. Kɔkɔta á kukua dátú gǔ á bakpa nde nanga dábákagi bojede bea Adhámu, mmbe dátingiigi ɛɔphi ndea Mokonga. Adhámu akengeani na nkpa nde dábaobondeaga bhika akɛ.
15 Cɔ, bojede ndea Adhámu atingani phɛ̂ n'egabhɔ á bonjanja ekondi ndea Mokonga. Eya, aobá́́ ka nyɔngɔ á bojede á nkpa moci tɔ bakpa básii báokuia, cɔ, Mokonga ayami gǎkɛ bonjanja ékondi nɛkɛ phɛ̂ ka phɔa bakpa básii na egabhɔ a tɔ ɔtɔɔkɛana ka nkpa moci mmbe báomɔphana Yéso Kiísito. 16 Goto, egabhɔ ndea Mokonga atingani na kema nde dátɔɔkɛani ka nyɔngɔ á bojede ndea Adhámu. Ka nyɔngɔ á bojede ndea nkpa ndɔ tɔ moci, aunge Mokonga dáteni nyɔngɔ ndea bakpa akpɛ. Cɔ, ka nyɔngɔ á egabhɔ á bonjanja ekondi ndea Mokonga mbusa á bojede ásii ndea bakpa aunge, yɛ aótanga bakpa batɔa-bonjanja mosá akɛ. 17 Ande doni, kukua dátú na kɔkɔta ka nyɔngɔ á bojede ndea nkpa moci, nkpa moci ndɔ tɔ. Cɔ, ka nyɔngɔ á Yéso Kiísito tɔ unge be gǎkɛ ɔtɔa kema ásii á bonjanja ékondi ndea Mokonga na egabhɔ á kodoni ndea Mokonga. Bakpa nde bá na bonjanja ékondi ndea Mokonga na egabhɔ nɛkɛ, báendande na bábande na kɔkɔta ka nyɔngɔ á Yéso Kiísito sasakɛ.
18 Cɔ, ka nyɔgɔ nde bojede ndea nkpa moci aunge Mokonga ateni nyɔngɔ á bakpa bɔbhu akpɛ, a phɔtɔ bó ka nyɔngɔ á ntɔa á kanga bojede moci tɔ, Yéso Kiísito, ekuma nɛkɛ aekodigi bakpa bɔbhu ka tena á nyɔngɔ na opha á bɔ enda. 19 Cɔ, bii ka nyɔngɔ á bojede ndea nkpa moci tɔ unge bakpa básii bángi ka bojede, aphɔtɔ bó unge ka nyɔngɔ á ɔkapha á nkpa moci tɔ, Mokonga aetangande bakpa básii batɔa-kodoni mosá akɛ.
20 Ka nyɔngɔ á kidiana á ɛɔphi, aunge bojede abiki. Cɔ ɔmande bojede dábiki, bonjanja ékondi ndea Mokonga dábiki phɛ̂. 21 Ka bondɔ, bii bojede dátú na kɔkɔta áɔtɔɔkisa kukua, bondɔ phɔtɔ unge bonjanja ekondi ndea Mokonga ábɛ na kɔkɔta ka kodoni na tɔɔkisa enda á mɛyɔ ka Yéso Kiísito Mɔkɔta nɛsu.