Balɔma 6

Obatisɔ ande bea kukwa na jujuka ka kukwa kimoci na Kiísito

1 Cɔ bɛyɔngande bo? Betutuisande ika subi á bojede ka gea te bonjanja ékondi ndea Mokonga ábikɛ? 2 Tanda phɔ́! Besu ibunde beku ka nyɔngɔ á deketa asu bojede, betɔkande goto na beendi subi á bojede ka bó? 3 Boobosa te, besu bɔbhu ibunde dábasobatisi ka nyɔngɔ á jukana asu na Yéso Kiísito, obatiso ndɔ asojukanisi na yɛ ka kukwa akɛ? 4 Ka phɔa obatisɔ ndɔ débejukani na yɛ ka kukwa akɛ na ka umba akɛ gea te, bíndɔ Kiísito dájujúki ka kukwa sɔsɔbɛ á basí ka boombia ndea abhɛ, besu phɔtɔ bébɛ na tambea á enda á kɛ̌kɛ.

5 Cɔ, aobá́ na débéjukani na yɛ ka kukwa nde akengeani n'indɛkɛ, bejujukande gǎkɛ phɔtɔ na yɛ ka jujúka ka kukwa bɛa yɛ. 6 Béubhɛni gea, kokpa á kala nde débetú ně mosá, dábá kɔkɛigi u gǔ á me á nkpatɔ kimoci na Kiísito, ka gea, bátukɛtukɛ kokpa asu á bojede. Ka gea békébɛku ye bakɔbɛ á bojede. 7 Ka nyɔngɔ nde nkpa nde aku, nna ye tanda nkɔbɛ á bojede. 8 Cɔ, kabɛ na beku kimoci na Kiísito, bebeeki phɔtɔ gea beendande kimoci na yɛ. 9 Nga, beoúbha gea Kiísito dájujúki ka kukwa, yɛ kákuɛka ye, ka nyɔngɔ nde kukwa nna ye na kɔkɔta gǔ akɛ. 10 Nga, ka kukwa akɛ bó, dáku tɔ mɔngɔ imoci ka phɔa bojede. Cɔ, kɛ̌kɛ nde a ye gǎkɛ tɔ koenda ka nyɔngɔ á Mokonga. 11 A phɔtɔ bó kabenu. Beekeani gea kukwa ndɔ anokatanisi na bojede bhubhui, bo ye gǎkɛ koenda ka nyɔngɔ á Mokonga ka jukana anu na Yéso Kiísito.

12 Cɔ, bojede kabɛmbɛ ye na kɔkɔta subi á nyama ndɔ á kukwa na bókobeekeɛmbɛ ye tɔtɔkisa á mɔphɛ ájede á nyama anu. 13 Bókóbhisɛmbɛ gbutuka á nyama anu ka tɔtɔkisa á bojede, ka bhɛdanisaga i bea ka kema á tɔtɔkisa na kema ajede. Óbhisani ndiu bhuanu ka Mokonga bea bakpa nde bájujúki ka kukwa. Bhisani phɔtɔ nyama anu bhui ka bhɛnaneaga á Mokonga ka tɔtɔkisa á kodoni. 14 Bojede kábɛku ye na kɔkɔta gǔ anu nga, bókó ye kusi á ɛɔphi, bondiu kusi á bonjanja ekondi ndea Mokonga.

Katana na bojede ka nyɔngɔ á bhɛdanɛaga á Mokonga

15 Cɔ, abó? Begeɛ bojede ka nyɔngɔ nde békékusi á ɛɔphi, be ndiu kusi á bonjanja á ekondi ndea Mokonga? Tanda phɔ́. 16 Bodigimisi gea, boye obá bakɔbɛ ndea nkpa na ɔka á nyɔngɔ nɛkɛ bhui, bo ye tɔ bakɔbɛ nɛkɛ. A kobá kɔkɔbɛ á bojede, sungiaga í ande kukwa. A kobá n'ande banga á Mokonga, sungiaga í ande enda á bonjanja. 17 Cɔ, bosegi gǎkɛ ka Mokonga nga, benu íbunde dóbotú kala bakɔbɛ á bojede, dóbobi na měma anu bhui, aphe á bɔphɛi nde dábanɔphɛi. 18 Kabondɔ, bókó ye bakɔbɛ á bojede, bo ye ndiu bakɔbɛ á gea á kema á kodoni. 19 Nɛyɔngi wani k'etéte á kokpa, ka nyɔngɔ á kanga ɔkapha anu anja. A tɔ bíndɔ dóbobhisi nyama anu bhui kala ka bhɛdanɛaga á bojede na enda ka bojede, a phɔtɔ bó unge bóbhisɛ u kɛ̌kɛ nde ka bhɛdanɛaga Mokonga na bá na enda anja.

20 Mbenɔ nde dóbotú bakɔbɛ á bojede, dóbókótú na kɔkɔta á tɔtɔkisa á kodoni. 21 Cɔ, dóbotɔi kema sina ka tambea ajede nde dóbootambea kala, nde bookua na soni í kesande? Sungiaga í a tɔ kukwa! 22 Kɛ̌kɛ nde bókó ye bakɔbɛ á bojede, boye ndiu babhɛdanigi ndea Mokonga. Bɔɔtɔtɔkisa kema nde aɔm'bɔngɛa Mokonga. Sungiaga anu ande enda á mɛyɔ kimoci na Mokonga. 23 Nga, ophendɔ á bojede ande kukwa, egabɔ á bonjanja ékondi ndea Mokonga andiu enda á mɛyɔ kimoci na Kiísito Yéso Mɔkɔta nɛsu.