Ekuma Ndea Bateki 28

Pɔ́lɔ aɔbhɛdanaga ka kesanga á Mɛlíta

1 Bii beoloki ye ka kukua k'obenge, mpɔ béoúbha gea, ina á kesanga ndɔ ande Mɛlíta. 2 Batɔa ka kesanga ndɔ, dábasógi anja phɛ̂. Bɔ, báotoboa nsa, báosódhondanisa besu bɔbhu ka mpɛphɛ i nga, mbua dáɔɔka, phiɔ áoba phɛ̂. 3 Pɔ́lɔ áɔbhɛda ophakɔ á sake, áɔsɔsɔmɛa ka nsa. Njɔka áojuana k'ophakɔ ndɔ, ka nyɔngɔ á bojo á nsa, áɔngɔta na ɛgɔɛa ka njaga akɛ. 4 Bii batɔa ka kesanga ndɔ bámɔni mpapha n'aoyangataga ka njaga á Pɔ́lɔ, báɔyɔngaga sɔsɔbɛ abɔ te: «Nkpa nde ande ntɔa-kaiso doni nga, aoloki phɔ́ kukua k'obenge. Ka beana na mɔkɔta nɛsu á na kobha mmbé báomophana kodoni, kátokeni gǎkɛ yɛ, áendɛ. » 5 Pɔ́lɔ â ndiu oncicia njɔka ndɔ ka nsa, kɛ̌yɔkɛ cengu akɛ. 6 Bakpa ndɔ báoba na mɔphɛ te, nyama á Pɔ́lɔ abimbande. Kabɛ n'a bo, ambé aguande na kua akɛ tɔ sua bei. Báobondea ka mbenɔ enda, bákaɔnɛ gǎkɛ gea akambekani na ka kema. Mpɔ, báoketia kanisia abɔ, báogea te: « Yɛ, ande ka bakɔta á na kobha. »

7 Cɔ, bhíbhí á ɔma ndɔ, ciko ndea mɔkɔta angbóngbó á kesanga, mmbe báɔmɔphana Pubhlíɔ, dátú oa. Yɛ, dásosesi na měma á ekondi, áosóikisa mɔtɛkɛ k'esa isaɔ. 8 Abhakɛ na Pubhlíɔ dáde gǎkɛ k'eka ka nyɔngɔ nde, dátú na jonga, na ephóa á magia. Pɔ́lɔ áoga ɔmɔɔna ka yɛ, áobhisa njaga gǔ akɛ, áɔmɛma Mokonga, áonamisa. 9 Mbusa índɔ, basambi buangbo á ka kesanga ndɔ bâ phɔtɔ ombhikia Pɔ́lɔ, yɛ áǒamisa. 10 Bakpa báosódokomisa phɛ̂. Ka mɛɛa asu, báosótumbanɛa na kema nde débenasiki i ka tamba.

Pɔ́lɔ akidi na Lɔ́ma

11 Mbusa á basonge basaɔ, béoga ka koko á Alɛsanduía nnde dányɛnyisi mbenɔ á phiɔ ka kesanga ndɔ. Koko kau, ina á i dátú « Bakɔta á na kobha bá baphase. » 12 Béojua ka Siakúsɛ, béoika oa k'esa isaɔ. 13 Ka toka á oa, béokpangbaga k'ɔbɛɛ, béojua ka Lɛgíɔ. Mama i, maphopho áotoka kusi. Mbusa á b'esa babɛ, béojua ka Putɛɔ́li. 14 Ka nji ndɔ, béǒdhonda badhasu babeeki, báosódengemisaga gea, bédɛ na bɔ pɔsɔ moci. Bondɔ unge tamba nɛsu á na Lɔ́ma dátú. 15 Oa, badhasu babeeki bundɔ ba ka Lɔ́ma báɔɔka mbino asu, báobhika k'aphe á dhondanisa asu. Béodhondana na bɔ ka mosomba á Apíɔ, buangbo goto ka nji moci nnde báɔɔphana Tiɛtabhɛ́nɛ. Bii Pɔ́lɔ ɛ̌bɔni ye, áombhebha Mokonga, áotuma na bukpɛkpɛ ka měma. 16 Bii beju ye ka Lɔ́ma, báonsosea Pɔ́lɔ, áikɛ k'ɔma inɛkɛ sasa akɛ na ntɔa-emani nde dáonamba.

Pɔ́lɔ aɔphɛa nyɔngɔ á Mokonga ka Lɔ́ma

17 Mbusa á b'esa basaɔ, Pɔ́lɔ ákɔ̌ɔphana bakɔta á baYúdha bunde dábatú ka Lɔ́ma. Bii bádhondanigi ye, áǒngodea: «Baya, nanga bii kégi ka bojede k'ekuna nɛsu, na ka asii ndea batatasu, dábamodhungi ka Yɛusalɛ́ma, báomobhisa ka njaga á baLɔ́ma. 18 BaLɔ́ma bámoúisigi ye gǎkɛ, bákaɔnɛ ka nyɔngɔ ajede kaphɔ ani, nnde akeni nékuiɛ. Ka bondɔ, báɔphanga deketa ani. 19 Bii baYúdha dábákákondi gǎkɛ bámodeketɛ, néosuia gea ambe Moamɛ á baLɔ́ma aámbé átenɛ nyɔngɔ nɛmɔ. Kɛ́ɛtɔngi gǎkɛ batɔa-k'ekuna nɛsu. 20 Ka bondɔ unge nɛnɔ́ɔphani gea nɛ́nɔɔnɛ, nɛ́yɔngɛgɛ na benu. Nga, bámobɔi ngoi á ngɔa nde, ka nyɔngɔ á nsebeɔ nde baIsilaɛ́li bá ne. » 21 Báonsikisia te: «Bɛ́kɛ́ɔni baobá́ n'atoki na Yudhɛ́a ka phɔakɔ. Ka bamunamasu kátoki gǎkɛ kó, ka ngodea asu nyɔngɔ ájede ka phɔakɔ. 22 Cɔ, bekondi phɔ́ bɛ́ɔkɛ ianaga akɔ. Nga, beoúbha gea, bakpa báɔyɔnga ájede k'ɔma bhui gǔ á esomba nde okau. »

23 Bakɔta á baYúdha bunde dábatú ka Lɔ́ma báɔɔkana na Pɔ́lɔ esa á dhondana goto na bɔ. Esa kau, báodhondanaga bakpa básii k'ɔma ndɔ dáɔikaga. Kpanga á ka m'bimba na ka bii age ojua ɔgɔgɔ, Pɔ́lɔ n'aɔ́tɔmiaga, na úbhisa abɔ nyɔngɔ á koboamɛ ndea Mokonga. Aokaba gea, bám'beekeɛ Yéso n'aokumia ɛɔphi ndea Mósa na bɔphɛi ndea baɔtu-nyɔngɔ. 24 Buangbo báobeekea nyɔngɔ nde dáɔyɔnga, buangbo bákábeekeɛ gǎkɛ. 25 Bii dábaotoka oa kanga á ɔkana sɔsɔbɛ abɔ, Pɔ́lɔ â tɔ ɔyɔnga ka ɔkɔa abɔ te: « Měma á Mokonga dági tɔ ánja ka tɔ̌mia batatanu k'aphe ndea mɔtu-nyɔngɔ Isáia. 26 Áongea te,

‹ Gǎ, óngodeɛ bakpa ndɔ te,

bobande ɔɔ́ka ánja, bókódigimisɛ tanda nnde bɔɔ́ki.

Bɔbande ɔɔ́na, bókóengekisɛ gǎkɛ nnde bɔɔ́ni.

27 Nga, měma á bakpa nde a ye tɔ akpɛ,

bádaki kecue abɔ,

báoima iso abɔ atukoba nǎnabo, ámbe

báɔnaphi,

báɔkaphi,

bádigimisi na měma abɔ.

Bátúǒphaea k'eme ámbé néeamisi. ›

28 Cɔ, ubhani gea, Mokonga ateki boamia nɛkɛ k'ekuna nɛngbo, báɔkande. » [ 29 Ka yɔnga á Pɔ́lɔ bó, baYúdha báoga na báopua sɔsɔbɛ abɔ phɛ̂.]

30 Cɔ, Pɔ́lɔ áoika basaga babɛ k'endu nde yɛ dáǒphendea. Áǒsesea bakpa bɔbhu bunde dábaobhika motɛkɛ, 31 n'aɔ́phɛa nyɔngɔ á koboamɛ ndea Mokonga, na phangiaga á nyɔngɔ ndea Mɔkɔta Yéso Kiísito. Â phɔtɔ ɔphɛa kanga kɔbɔbɔkɔ na kanga á kema nde aonimisia.