Ekuma Ndea Bateki 27

Bánteki Pɔ́lɔ na Lɔ́ma

1 Bii dábáphángi gea beoga ka koko na Italía, báombhisa Pɔ́lɔ na batɔa-mɛkakɔ bunɛngbo ka njaga á ka bakɔta moci á baLɔ́ma, ina akɛ Yulío mmbe dátú mɔkɔta á ekombo á batɔa-emani nde báɔɔphana « Ekombo á batɔa-emani ndea moamɛ á baLɔ́ma. » 2 Oa, béokambea ka koko nde dátoki na Adhaamíti, n'aoga ka ikɔ danga-danga á nji á Asía. Mpɔ, béoga. Aisitákɔ ntɔa-ka kenombe á Makɛdhɔnía, ka nji á Tɛsalɔníka, dátú phɔtɔ kimoci na besu. 3 Mama i, béojua ka Sidhɔ́na. Oa, Yulíɔ áongea Pɔ́lɔ anja. Áonsosea gea, ágɛ ɛ́sɔnɛ badhakɛ, ka gea bámophɛ kema nde ana siki i. 4 Ka mɛa asu oa, béokpangbaga ka kesanga á Kipúɔ ka banga sumbu nde dáosinda mosá asu. 5 Béokaia obenge nkɛkɛɔ á Kilikía na Pamphilía, béojua ka Míla á ka nji Likía. 6 Oa, mɔkɔta á batɔa-emani ndɔ áodhonda koko n'aotoka na Alɛsanduía, n'aoga na Italía, áosokambisa kau. 7 Débegi esa ásii bii koko dáotamba bokɛ-bokɛ, béojua ka kenombe Kinídhɔ k'akpɛ phɛ̂. Bii sumbu dákáosopha aphe ka tutuisa tamba nci ndɔ, béɔnyɛ́nyɛa ka Salmɔ́nɛ nci á kusi á kesanga á Kɛɛ́tɛ ɔma nde sumbu dákaosinda akpɛ. 8 Béokpangbaga ka ɔbɛɛ k'akpɛ phɛ̂, béojua ɔma ndɔ báɔɔphana Ikɔ-Anja bhíbhí á kenombe á Lasɛ́a.

9 Mbusa á esa ásii, tamba ka koko áoba na kɔbɔbɔkɔ á kukua nga, mbenɔ á ika kanga á eaga ka nyɔngɔ á mɛma á Mokonga dányɛ́nyi ye. Ka bondɔ unge Pɔ́lɔ áɔ̌phɛa batambisigi-koko te, 10 « Baya, nɛɔni gea tamba nde abande ájede, besu beolokande gǎkɛ ka kukua, koko na nkumba nde asubi í aujukanande phɛ̂. » 11 Cɔ, mokɔta á batɔa-emani â gǎkɛ ɔmɔɔka ntambisi-koko na mɛnɛ á koko, kanga ɔka nyɔngɔ nde Pɔ́lɔ dáyɔngi. 12 Cɔ, bii ikɔ ndɔ dákátú anja ka ika á bei ka matu á phiɔ, bakpa básii á subi á koko báobeekeana toka á kó ka gea, kabɛ n'atɔtɔkɛani bákidiɛ na Phɔiníkɛ, ka bondeaga á sia á matu á phiɔ kó. Phɔiníkɛ ande ikɔ moci ka kesanga á ka Kɛɛ́tɛ, dátú kɔɔnjia nkɛkɛɔ á kusi á oyonga na gǔ á oyonga.

Sumbu aosinda gǔ á obenge

13 Cɔ, bii maphopho dáosinda ka toka á kusi, báokanisia te, moangɔ nɛbɔ atɔtɔkɛanande. Ka bondɔ, báophuia etae á kigisa á koko, báokpangbaga ka mpɛphɛ á Kɛɛ́tɛ. 14 Mbusa abhɔa, sumbu akpɛ nnde báɔɔphana « Sumbu á gǔ á okomo » â gǎkɛ osinda, n'aodhidha ka toka ka mamba-mamba á kesanga. 15 Sumbu áobotea koko. Békétɔkɛ ye unia á koko na sumbu. Kabondɔ, béodeketa sumbu ásógɛ̌ ně. 16 Bɛ́ɔnyɛ́nya kusi á kesanga abhɔa nnde báɔɔphana Kaúdha, ɔma ndɔ sumbu dáphɔngi abhɔa. Oa, béounia k'akpɛ miki á koko á amisa. 17 Bii batambisigi-koko bákǎmbisi ye miki á koko ndɔ gǔ á koko ángbó mpɔ, báoboaga koko ángbó na ngoi ka bangisa i na sumbu. Báomaka gbutuka á me nde aophoba ka ɔnisa bɔ kubii báoga. Ka nyɔngɔ nde, dábaobá́nga kiga gǔ á mbume á ka Libhía. Cɔ, báodeketa sumbu unge átambisɛ koko. 18 Sumbu â goto osósuga akpɛ phɛ̂, na ka bii batambisigi-koko dábamakigi ka nkumba k'obenge, mama í. 19 Esa á ko isaɔ, batambisigi-koko báomaka bɔ sasa bɔ nkumba á tambisa á koko. 20 Bɛ́kɛɔnɛ ye mani na basɛɛngɔa k'esa ásii. Bii sumbu dákádhendemani, békébɛ ye na mosenda á ama.

21 Bakpa nde dábatú subi á koko, dábakáigi ka mbenɔ ásii. Cɔ, Pɔ́lɔ áoma sɔsɔbɛ abɔ, áǒngodea te: «Baya, dóbokéni ɔka ani gea, békétokɛmbɛ ka Kɛɛ́tɛ. Dátúoba n'abɔ, ámbe nkumba ka kɔndɔkani na ngia anu ka buyɛnɛ ndee. 22 Cɔ, kɛ̌kɛ nde, bhisani měma anu nga, ka benu moci kákuɛku. Koko unge abhomokande ndiu tɔ. 23 Kǐpha á k'esande, malaeka ndea Mokonga mmbe nende nkpa nɛkɛ phɔtɔ nɛɔmbhɛdaneaga, amokidianei, 24 áomongodea te, ‹ Pɔ́lɔ, kɔbɛmbɛ na kɔbɔbɔkɔ! Akeni bágɛ yɔngisɛ nyɔngɔ nɛkɔ mosá á Moamɛ á baLɔ́ma. Bii Mokonga akondi gama akɔ, yɛ ěamisande bakpa bɔbhu bunde otambi na bɔ. › 25 Cɔ baya, bhisani měma anu! Nensebei Mokonga, atɔtɔkɛanande bíndɔ malaeka dámongodi. 26 Cɔ, betugbanagande gǎkɛ ka ɔbɛɛ á ka kesanga moci. »

27 Cɔ, dáju ye esa á ko nkama moci na gena (14) kǐpha, na sumbu n'aphɔ́tɔ ɔsɔkɔbisa k'obenge Adhilía. K'esa angedi dhakɛ, batambisigi-koko báokanisia te, bábhiimisi ɔbɛɛ. 28 Báomaka ngoi á úbha á dhumana á ibo, báoúbha gea dhumana á ibo abea mɛtɛɛ nkama isaɔ na ngia á njaga ibɛ (37). Báɔsɛkɛdɛa mosá abhɔa, báomaka goto, báɔɔna gea dhumana i abea mɛtɛɛ nkama ibɛ na ngia njaga isaɔ (28). 29 Ka bondɔ, báomaka b'etae gena á kigisa á koko ka bɔba, ka banga gea, koko kagbondoɛmbɛ mɛphɛ. Báobondeaga gea, somambi esa n'akodokani. 30 Batambisi-koko bâ gǎkɛ okaba tea subi á miki á koko á boamia ka toka subi á koko ángbó. Báodhidhisa miki á koko ndɔ k'obenge, báodhema gea, báomakea etae á kigisa koko mosá á koko. 31 Pɔ́lɔ â gǎkɛ ongodea mɔkɔta á batɔa-emani na batɔa-emani te: «Aoba bagaa nde na bákáiki subi á koko, bókóamɛku. » 32 Mpɔ, batɔa-emani báotena ngoi nde asukii miki á koko, miki á koko ndɔ áoyoka.

33 Ka sa á esa, Pɔ́lɔ áǒdengemisaga bakpa bɔbhu gea, báeɛgɛ. Áǒgea te: «K'esande ande esa á nkama na gena (14) nnde boiki kanga ea ká kema. 34 Cɔ, nenódengemisigi, eagani ka gea, bokokuɛmbɛ. Nna tanda na ka benu moci mmbé agotokanande. » 35 Mbusa á yɔnga á Pɔ́lɔ bó, áɔbhɛda mokati, áombhebha Mokonga mosá á bakpa bɔbhu. Mpɔ, áobunaga u, áokpanga eaga. 36 Bakpa bɔbhu báǒkpagisaga ka měma, bâ phɔtɔ okpanga eaga. 37 Subi á koko, débetú ka besu bɔbhu, bakpa mia ibɛ nkama ngia á njaga ibɛ na ngia á njaga (276) . 38 Bii bákuti ye, báomakaga nganɔ k'ibo, ka phoomisa á koko.

Koko aini

39 Esa ase ye, bátambisigi-koko bákáúbhɛ gea bá bhíbhí á ɔbɛɛ. Bii gǎkɛ báɔni isɛ́gɛ, báɔbhɛda moangɔ á gǎ kengea á dhunduisa á koko oa, kabɛ n'atɔtɔkɛanande. 40 Báokódaga ngoi á etae á kigisa á koko, báosaga ú ándiɛ k'ibo, bâ phɔtɔ okoda nkai á ketia á koko ka tambisa á koko anja. Báɔbɔɛa gbutuka me á phoba nnde aotambisa koko ka me á mosá k'ego. Báokaba dhunduisa á koko. 41 Mpɔ, bâ gǎkɛ ogbondoa mamba á mbume subi á ibo, bɔba á koko nci á mosá áɔkpatekana. Nnde á nci á mbusa áokpanga bunuka ka nyɔngɔ á kɛtɛmbɔ akpɛ. 42 Batɔa-emani dábaogea, báemoɛ batɔa-mɛkakɔ ka nyɔngɔ nde, dábákákondi gea, ka bɔ moci kateɛmbɛ n'aɔɔ́ga. 43 Bii mɔkɔta á batɔa-emani ndea baLɔ́ma dákondi ndiu amisa á Pɔ́lɔ, ka bondɔ, áoimisia moangɔ nɛbɔ. Mbusa, áǒsosea bundɔ báoúbha ɔga gea, báguiɛ phɔ́ k'ibo, bájabhɛ. 44 Buangbo báokambea ka phaeka á koko ndɔ abunuki, na ka kema nɛngbo a ka koko ka bea badhabɔ. Mpɔ, báojabha bɔbhu ka bɔjɛjɛ.