Pɔ́lɔ aɔ̌yɔngɛa mosá á Agiípa
26
1 Agiípa áongodea Pɔ́lɔ te: «Beososi ye tɔ ɔ́yɔngɛ nyɔngɔ nɛkɔ. » Mpɔ, Pɔ́lɔ áomesa njaga akɛ, áokpanga ɛ̌yɔngɛa be, 2 « Moamɛ Agiípa, nena maseye k'esa nde k'ɛ̌yɔngɛa mosá akɔ gǔ á nyɔngɔ bhui nde baYúdha bámɔtɔngi kau. 3 Nga, obɛ sasakɔ oúbha asíi bhui ndea baYúdha ánja na nyɔngɔ bhui nde báɔpuaga kau. Ka bondɔ unge, neodengemisigi gea ɔ́mɔɔka phɔ́ na měma á phiphiani. »4 « BaYúdha bɔbhu báoúbha enda ani, kpanga koganda ani. Báoúbha phɔtɔ bii dékpangi tambea sɔsɔbɛ á batɔa ka nji nɛmɔ na ka Yɛusalɛ́ma. 5 Dábaomúbha kpanga á kala. Aoba na bákondi, báɔtɔka na bámamɛi nyɔngɔ nɛmɔ gea nende ka batɔa nɛsu á baPhaisáiɔ, bundɔ báoamba phɛ̂ ɛɔphi ndea baYúdhaa. 6 Cɔ, kɛ̌kɛ nde nemame oani ka ntua á tena á nyɔngɔ nga, nena nsebeɔ ka mɔkɔ nde Mokonga dɛ́ɔku batatasu. 7 Batɔa-k'ekuna nɛsu nkama na ibɛ (12), básebei ɔna á tɔtɔkɛana á mɔkɔ kau. Ka bondɔ unge, báɔmɛma Mokonga na moingi keiphe n'esa. Moamɛ Agiípa, nyɔngɔ ndɔ ungɔ baYúdha bámɔtɔngi kau! 8 Ka nyɔngɔ sina nde benu baYúdhaba bɔɔni gea te nna tanda ɔtɔtɔkɛna ka Mokonga jujukisa á basí ka kukua? 9 Doni, eme sasa ani dékanisi phɔtɔ manisa á ina á Yéso ba a Najalɛ́ti ka kema bhui. 10 Dégi ndɔ ka Yɛusalɛ́ma. Eme sisani déngisisi babeeki básii ka mɛkakɔ na kɔkɔta nde détɔi ka bakɔta á batobei-phɛa. Cɔ, bii dábaotena nyɔngɔ á kukua abɔ, eme débeeki. 11 Mɔngɔ ásii, subi á endu á bɔphɛi bhui ndea baYúdha, déǒtambisaga babeeki na sosea abɔ gea bánganɛ beekea nɛbɔ. Dɛ́ɔ̌bɛɛa phɛ̂ na ka bii dé phɔtɔ oga ǒtambisaga ka kenombe á bakɛni. »
Pɔ́lɔ aɔtɔ̌miaga mbino á boamia akɛ ka měma
12 « Cɔ, détú oga na Dhamasíki ka bhɛdanaga ekuma na kɔkɔta nde bakɔta á batobei-phɛa ndea Mokonga dábamopi. 13 Moamɛ Agiípa, na ne phɔ́tɔ k'aphe, ka kantende, dɛ́ɔni oanga angbó n'atoki na kobha. Oanga ndɔ dányɛ́nyi nnde á mani, jegia á i áomotimba kimoci na bunde détambi na bɔ. 14 Besu bɔbhu béogua ka odo, nɛ́ɔɔka ɛsɔ n'aomongodea ka KiƐbhulanía te, ‹ Saúlɔ, Saúlɔ, ekende ona mɔ̌ akpɛ bɛa ngɔmbɛ nde nn'aotea gbutu á nambi akɛ? › 15 Eme néongea, ‹ Mɔkɔta, onde ani? › Mɔkɔta áomosikisia te, ‹Eme, nende Yéso mmbɔ obɛ oontambisaga. 16 Cɔ, ómesia gǎkɛ, ómamegɛ dhɛ! Neokidianei kagea, óbɛ mbhɛdanigi nɛmɔ, óbɛ phɔtɔ mamei nɛmɔ ka tɔ̌mia á bakpa nengbo kema nde otoki ka ɔna í kesande, na kema nde nekophangiande mbusa. 17 Nekoamisande ka njaga á bakpa nde neoteki mutɛ abɔ, baYúdha na bunde báná baYúdha. 18 Neoteki ka gea ókodɛ iso abɔ, ka tokisa abɔ ka keiphe, ka gea báephaiɛ nci á oanga, phɔtɔ bátokɛ kusi á kɔkɔta ndea Sɛtáni, bábɛ ndiu batɔa-Mokonga. Ka nyɔngɔ nde bámobeeki, mpɔ Mokonga aimande bojede nɛbɔ, bátɔande botukɔ nnde Mokonga abhisi ka bakpa nɛkɛ. ›»
Pɔ́lɔ aɔtɔ̌miaga mbino á ekuma nɛkɛ
19 « Moamɛ Agiípa, ka nyɔngɔ índɔ unge kɛ́bɛnjigi mphaniɔ nde dátoki na kobha. 20 Cɔ, déɛ̌phɛi phɔ gǎkɛ batɔa ka Dhamasíki, mpɔ batɔa ka Yɛusalɛ́ma, na batɔa ka nji á Yudhɛ́a bɔbhu, na bakpa nde báná baYúdha. Bɔphɛi ndɔ dátú ka gea, bákětiɛ tambea abɔ ajede, béphaiɛ ka Mokonga, mpɔ báúbhisɛ gea, bá yé ěketib. 21 Ka phɔa nyɔngɔ ndɔ unge baYúdha dábamodhungi na ne subi á endu á Mokonga, báogea bámomoɛ. 22 Na ka k'esa nde, nemame oani nga, Mokonga dámoambi ka gea te, nébɛ mamei á nyɔngɔ nɛkɛ mosá á bundɔ bá na boombia, na bundɔ báná na boombia. Kéɔyɔnga nyɔngɔ nde atingani n'índe á baɔtu-nyɔngɔ na Mósa dábaɔtu gea, 23 atókeni Kiísito átambɛgɛ, ábɛ ntɔa ka ama mosá-mosá á jujuka ka kukua sɔsɔbɛ á basí. Yɛ, aetɔmiande baYúdha na bunde báná baYúdha nyɔngɔ á boamia kagea báendɛ subi á oangac. »
Pɔ́lɔ aokaba Agiípa á beekeɛ
24 Mbenɔ nde Pɔ́lɔ dáɔ̌yɔngea bó, Phɛ́sitɔ áonkogea te: « Pɔ́lɔ ca! O na ganja ee? Goaga akɔ ásii aunge aoyaísi? » 25 Pɔ́lɔ â gǎkɛ onsikisia te: « Mɔkɔta Phɛ́sitɔ, ké na ganja. Nyɔngɔ nde nɛɔyɔnga andiu á doni na á kɔbɔngɛ. 26 Moamɛ Agiípa a tɔ úbha nyɔngɔ ndɔ, ka bondɔ unge, nɛɔyɔnga kanga á kɔbɔbɔkɔ mosá akɛ. Neoúbha doni gea, nna na kema nde aobosa nga, ka kema kátɔtɔkɛani ka bɔsɔmɛa. 27 Cɔ, Moamɛ Agiípa, obeeki nyɔngɔ nde baɔtu-nyɔngɔ dábáyɔngi? Neoúbha gea, obeeki u. » 28 Mpɔ Agiípa áonsikisia Pɔ́lɔ te: « Oúbha te, ɔɔtɔka n'ɔmɔbɔngi ka mbenɔ abhɔa néoba moKiísito? » 29 Pɔ́lɔ áonsikisia te: « Aoba ka mbenɔ abhɔa, kabɛ ka mbenɔ ásii, nɛɔmɛma Mokonga. Ɛmemi ndɔ nna tɔ ka phɔa akɔ sasakɔ, a ndiu phɔtɔ ka phɔa bakpa bɔbhu bunde báɔmɔɔka kesande, bábɛ bea eme. Bákanómakeɛmbɛ ndiu ka mekakɔ bea eme. »
30 Mpɔ Moamɛ Agiípa, mɔkɔta Phɛ́sitɔ na Bhɛɛníkɛ na bakpa buangbó bunde dábaiki oa, bɔbhu báoma. 31 Bájuani ye, báɔyɔngaga sɔsɔbɛ abɔ te: «Nkpa nde kági bojede moci nde akeni akuiɛ u, kabɛ makea akɛ ka mɛkakɔ. » 32 Agiípa áongodea Phɛ́sitɔ te: « Atú oba nkpa nde na kámɛmi gea Moamɛ á baLɔ́ma aámbé atenɛ nyɔngɔ nɛkɛ, ámbé atokeni bánkodɛ. »