Pɔ́lɔ akondi bátenɛ nyɔngɔ nɛkɛ mɔtɛ á moamɛ ndea baLɔ́ma
25
1 Esa isaɔ mbusa á Phɛ́sitɔ bá mɔkɔta á nji, áɔmɛa ka Kaisalía, áoga na Yɛusalɛ́ma. 2 Kó, bakɔta á batobei-phɛa na bagbɛga ndea baYúdha, báoga ɔntɔnga á Pɔ́lɔ mosá á Phɛ́sitɔ 3 gea, báɔni ánja bámbhikisɛ ka bɔ Pɔ́lɔ na Yɛusalɛ́ma. Nga, dábaɔkani na bhisa á bakpa k'aphe ka gea, bámoɛ Pɔ́lɔ. 4 Mpɔ, Phɛ́sitɔ áǒsikisia te: «Báonamba Pɔ́lɔ na Kaisalía. Eme gǎkɛ, neoga kó sasa ani kɛ̌kɛ nde. 5 Cɔ, négɛ na ka bagbɛga nɛnu buangbo na Kaisalía. Bántɔngɛ kó, aobá́ mogaa ndɔ n'agi ájede. » 6 Cɔ, Phɛ́sitɔ dáoika kó besa ngia á njaga isaɔ (8), kabɛ nkama (10), áoja na Kaisalía. Aju ye na Kaisalía, mama i, áoika ka ntua á tena a nyɔngɔ. Áososea gea, bámbhikɛ na Pɔ́lɔ. 7 Bii Pɔ́lɔ aju, baYúdha bunde bátoki na Yɛusalɛ́ma, báontimba, báɔntɔnga akpɛ phɛ̂. Bákatɔkɛ gǎkɛ engekisa á kodoni á bojede nde bántɔngi kau. 8 Mpɔ, Pɔ́lɔ áǒnganea mosá abɔ sasa akɛ gea: « Kébuni tanda ɛɔphi moci ndea baYúdha. Kébhómi gǎkɛ endu á Mokonga. Kémbhómi gǎkɛ Moamɛ á baLɔ́ma. »9 Phɛ́sitɔ, bii dákondi ékondisaga na baYúdha, áomǔsia Pɔ́lɔ te: « Okondi gǎ na Yɛusalɛ́ma, nétenɛ nyɔngɔ nɛkɔ bhui kó? » 10 Pɔ́lɔ áonsikisia te: «Negi te, bii ne oani ka ntua á tena a nyɔngɔ ndea Moamɛ á baLɔ́ma, atókeni bátenɛ nyɔngɔ nɛmɔ oani. Kégii baYúdha bojede bíndɔ obɛ sasakɔ oúbha ánja. 11 Aoba na negi ájede, na negi kema nde akeni nékuiɛ u, kéotea kukua. A gǎkɛ oba bakpa ndɔ na bámɔtɔngi kanga kodoni, nkpa nn'aɔtɔka n'amomaki ka njaga abɔ. Nɛɔni ánja Moamɛ á baLɔ́ma aámbé átenɛ nyɔngɔ nɛmɔ. » 12 Bii Phɛ́sitɔ ayɔngingi ye na batɔa ka ntua nɛkɛ, áonsikisia Pɔ́lɔ te: « Cɔ, bii okumi ina á Moamɛ á baLɔ́ma, ogande mosá akɛ. »
Phɛ́sitɔ n'Agiípa báoabha ka phɔa Pɔ́lɔ
13 Mbusa á esa abhɔa, Moamɛ Agiípaa n'aoakɛ Bhɛɛníkɛ, báojua ka Kaisalía, k'aphe á sesea á Phɛ́sitɔ. 14 Bii dábade kó esa ásii, Phɛ́sitɔ áongodeaga Moamɛ Agiípa nyɔngɔ gǔ á Pɔ́lɔ te: «Nkpa moci a oani, Phɛlíki dándeketi ka mɛkakɔ. 15 Mbenɔ nde dége na Yɛusalɛ́ma, batobei-phɛa bangbóngbó ndea baYúdha na bagbɛga nɛbɔ, dábantɔngi ka gea nétenɛ nyɔngɔ nɛkɛ akpɛ. 16 Néǒsikisia te: «BaLɔ́ma bákáotenaga nyɔngɔ á nkpa akpɛ na nkpa ndɔ kádhondanimbɛ phɔ́ na batɔngi nɛkɛ na áɛyɔngɛɛ sasakɛ ka ntua nɛsu á tena nyɔngɔ ka nyɔngɔ nde bántɔngi kau. » 17 Cɔ, bii débebhiki na bɔ oani kimoci, kanga iphia, mama i tɔ néoika ka ntua á tena a nyɔngɔ. Mpɔ, néososea gea, bámbhikɛ na mogaa ndɔ. 18 Mbenɔ nde batɔngi nɛkɛ bákidi, báɔntɔnga, kabɛ gǎkɛ na ka nyɔngɔ ájede subi i bíndɔ déokanisia. 19 Dábatú tɔndɔ opua na yɛ ka nyɔngɔ á esomba nɛbɔ sasabɔ, na ka nyɔngɔ á nkpa moci ina akɛ Yéso, mmbe dáku. Pɔ́lɔ dági gǎkɛ te, a phɔ́tɔ oenda. 20 Ka nyɔngɔ nde, dékéoúbha nétene nyɔngɔ kau bo. Néomúsia Pɔ́lɔ, aobá́ n'akondi gǎ na Yɛusalɛ́ma ka yɔngisa á nyɔngɔ nɛkɛ kó. 21 Oa ndɔ gǎkɛ, Pɔ́lɔ áokumia ina á Moamɛ á baLɔ́ma gea, yɛ ámbé áyɔngisɛ nyɔngɔ nɛkɛ. Nê gǎkɛ ososea bánambɛ na ka bii nentekande mɔtɛkɛ. » 22 Agiípa áongodea Phɛ́sitɔ gea: «Nɛ́ɔkɛ phɔ́ mosá boabhi á nkpa nde eme sasa ani. » Mpɔ Phɛ́sitɔ áonsikisia te: « Ɔɔkande k'ɛsɔ akɛ mama. »
Agiípa aɔɔka nyɔngɔ ndea Pɔ́lɔ
23 Cɔ mama i gǎkɛ, Agiípa na Bhɛɛníkɛ, báobhika, báongia na boombia phɛ̂ k'endu á madhondanɔ kimoci na batɔa-emani, na bagbɛga á ka k'enombe. Phɛ́sitɔ áǒsosea batɔa-emani gea, bámbhikɛ na Pɔ́lɔ. 24 Phɛ́sitɔ áɔyɔnga te: « Moamɛ Agiípa na benu bɔbhu bunde bo oani, mɔ̌nani nkpa nde. Nyɔngɔ nɛkɛ unge baYúdha bɔbhu á ka Yɛusalɛ́ma na oani, bádhondanigi ka tɔnga akɛ mɔtɛmɔ. Báokoga gea kaendɛmbɛ. 25 Eme gǎkɛ, nɛɔni gea, nna na kema nde akeni ákuiɛ. Yɛ, akumi gǎkɛ ina á Moamɛ Kaisáa. Ka nyɔngɔ indɔ unge désui teka akɛ kó. 26 Ké gǎkɛ na nyɔngɔ adoko á dunduia Moamɛ Kaisála ka phɔa akɛ. Ka bondɔ unge, nembhiki ně mosá anu, phɛ̂ mosá akɔ obɛ moamɛ Agiípa. Bii bomúsiagande, ambe nébɛ na nyɔngɔ á dundua gǔ akɛ. 27 Nga, nna na kantíti á teka á ntɔa ka mɛkakɔ mosá á moamɛ Kaisáa kanga dundua á nyɔngɔ á kitɔngi nɛkɛ bhase. »