Nyɔngɔ Anja bíndɔ
Yoáni
dádundu
Yéso ande oanga na enda á batɔa á ka mokonda
1
1 Ka nkpangeɔ, Moyo dátú bei. Moyo ndɔ, dátú kimoci na Mokonga, Moyo dátú Mokonga. 2 Moyo nde dátú kimoci na Mokonga ka nkpangeɔa. 3 Mokonga dáconji kema bhui ka Moyo. Nna tanda na kema moci nde dágeani kanga yɛb. 4 Yɛ, dátú cina á enda, enda ndɔ áoba oanga ka bakpa. 5 Oanga ndɔ áɔbhɛnya ka keiphe, keiphe dákáimi gǎkɛ u.6 Cɔ, dátú na nkpa moci, mmbe Mokonga dánteki, ina akɛ Yoánic. 7 Yɛ, dábhiki ka bá mmamei, ka mamea á oanga ndɔ. Ka tɔ̌mia akɛ nyɔngɔ á oanga ndɔ, aunge bakpa bɔbhu bábeekeɛ. 8 Yɛ sasakɛ, dákátú oanga ndɔ. Dábhiki ndiu ka mamea á oanga ndɔ. 9 Oanga ndɔ unge dátú tɔ á doni, nnde abhiki ka mokonda, n'aɔbhɛnya ka bakpa bɔbhu.
10 Moyo dátú ka mokonda. Mokonga dáconji mokonda ka Moyo, batɔa á ka mokonda dábákán'digimisi gǎkɛ. 11 Moyo dábhiki mɔtɛbɔ, bakpa nɛbɔ dábákánsesi. 12 Buangbo gǎkɛ bunde dábansesi na beekea akɛ, áǒbopha kɔkɔta á ba bana-Mokongad. 13 Bakpa ndɔ, bánaobá́ bana-Mokonga ka nyɔngɔ á bɔkɔtɛana bea nkpa bhuakɛ á ka mokonda ndee, nndɔ á kokpa, babɔkɔtɛani ndiu k'ekondi ndea Mokonga.
14 Moyo áoba nkpa, áoika sɔsɔbɛ asu. Áotuma na bonjánja ekondi na kodoni. Dɛ́bɛɔni boombiae akɛ, boombia nde ngɔmu atɔi ka á Abhakɛ. 15 Yoáni dámamei nyɔngɔ nɛkɛ, áoabha gea: « Yɛ aámbé dɛ́yɔngi nyɔngɔ nɛkɛ gea, ‹Mmbe aobhika mbusa ani, amɔnyɛ́nyi nga, dáendi mosá á bɔkɔtɛana ani. › » 16 Eya, bii Moyo atumi na bonjánja, osógabhea besu bhɔbhu ka bonjánja akau, bonjánja ndɔ, áobika subi asu phɛ̂. 17 Nga, Mokonga dásophi ɛɔphi ka njaga á Mósaf, Yéso aámbé asobhikii ndiu na bonjánja na kodoni. 18 Nna na nkpa nde ámɔ̌nimbɛ mɔnɔ Mokongag, nǎna tɔndɔ ngɔmu nɛkɛ mmbe akengeani na yɛ phɛ̂, áoikisana na Abhakɛ. Yɛ aámbe asóúbhisi Mokonga bhase.
Boabhi ndea Yoáni M'batisi
19 Cɔ, nnde ande boabhi ndea Yoáni. Mbenɔ nde bakɔta á baYúdha nde ba ka Yɛusalɛ́ma dáběteki batobei-phɛ́a na baLáui ka uisia akɛ te: « Onde ani? » 20 Yoáni ka nganɛ. Áǒsikisia bhase gea: « Ké Kiísito. » 21 Bakpa ndɔ bâ goto omúsia: « Cɔ, onde gǎkɛ ani? Onde Ɛlía? » Áǒsikisia: «Bɛɛndɔ. Ké Ɛlía. » Bâ goto omúisia: « Onde Mɔtu-nyɔngɔ? » Yɛ áǒsikisia: «Bɛɛndɔh. » 22 Ka bondɔ báomúisia: « Onde gǎkɛ ani? Nga, benasiki á sikisia á boabhi ka baamɛ nde básoteki. Cɔ, ogi ka phɔakɔ sasakɔ bo? » 23 Yoáni áǒsikisia bíndɔ mɔtu-nyɔngɔ Isáia dádundu: «Nende ɛsɔ á nkpa n'aoabha ka nkanda be, ‹Bɔngisiani ka Mɔkɔta apheidhɛ! » 24 Cɔ, sɔsɔbɛ á bateki ndɔ, bunɛngbo dábatú baPhaisáiɔ. 25 Báomúisia Yoáni te: « Akoba n'okó Kiísito, n'okó Ɛlía, n'okó Mɔtu-nyɔngɔ, cɔ, oobatisa ka bo? » 26 Joáni áǒsikisia te: « Eme, nenóbatisi k'ibo, nkpa a gǎkɛ sɔsɔbɛ anu, mmbe bókómúbhimbɛ. 27 Aobhika mbusa ani, kékeni tanda koda á ngoi á biato nɛkɛ. » 28 Cɔ, nyɔngɔ ndɔ bhui dágeani ka Bhɛtanía, kubhi á Yɔɔdháni, ɔma nde Yoáni dátú obatisa.
Yéso ande Muna-Mɔgɔgɔ ndea Mokonga
29 Mama i, Yoáni áɔmɔ̌na Yéso n'ambhikii áogea: « Mmbe ande Muna-Mɔgɔgɔj ndea Mokonga. Yɛ aámbé aophuia bojede á ka mokondak. 30 Yɛ aámbe dɛ́ɔyɔnga kaphɔakɛ gea, ‹ Mmbe aobhika mbusa ani, amɔnyɛnyi nga, dáendi mosá á bɔkɔtɛana ani. › 31 Cɔ, eme dékéomúbha. Nebhiki gǎkɛ obatisa k'ibo gea te, baIsilaɛ́li bán'digimisɛ yɛ ka nyɔngɔ á obatisɔ ndɔ. »
32 Mpɔ, Yoáni áɔtɔmia nnde dáɔni gea: «Dɛ́ɔni Měma á Mokonga n'atoki na kobha, n'aodhidha bea mboe, áoika na yɛl. 33 Cɔ, dékémǔbhi mosá á dhidha á Měma ndɔ. Nga, Mokonga mmbe amoteki nébatisɛ k'ibo, dámongodi, ‹ nɛmɔ̌nande nkpa, Měma á Mokonga n'aodhidha, áoika na yɛ. Nkpa ndɔ aámbé abatisande ka Měma á Mokonga. › 34 Cɔ, eme Yoáni dɛ́ɛɔni nndɔ, néodigimisa gea, nkpa ndɔ ande Muna-Mokonga. »
Yéso ɛ̌bɔphani bagoigi á mosá-mosá
35 Mama i, Yoáni dátú goto oa, áoika na ka bagoigi nɛkɛ babɛ. 36 Dámɔ̌ni ye Yéso n'aɔnyɛ́nya áogea: « Cɔ, Muna-Mɔgɔgɔ ndea Mokonga aámbé. » 37 Bii bagoigi babɛ ndɔ báɔki ye bo, bâ ye tɔ om'bea Yéso. 38 Mpɔ, Yéso áǒphaia, áɔ̌bɔna bagoigi ndɔ na báom'bea. Áǒbuisia: « Cɔ, bookaba eke? » Báonsikisia: « Lábhi, ande gea te, mphangigi. » ɔma á boiki nɛkɔ a oa? » 39 Yéso áǒsikisia: «Bhikani, bɔ́ɔnɛ. » Mpɔ, báoga na yɛ, báɔɔna bii yɛ aiki. Báoosa na bɔ k'esa ndɔ. Cɔ, dátú gǎkɛ ka yɛga á mani bɛa mbenɔ á Abh'osee.
40 Sɔsɔbɛ á bagoigi babɛ bunde dábaɔki nyɔngɔ ndea Yoáni na bea á Yéso dátú: Andeé, muna-amakɛ na Simɔ́ni-Pɛ́tɛɛ. 41 Yɛ, â phɔ́ ondhonda muna-amakɛ Simɔ́ni, áongea be: «Bɛmɔ̌ni Namisi Masía, ande gea, Kiísito ». 42 Mpɔ, Andeé, áonga ně mosá á Yéso. Yéso â gǎkɛ ontumia n'iso, áongea: « Onde Simɔ́ni, muna-Yoáni. Bákɔɔphanande Kɛ́pham, ande gea, Ɛtɛ.»
Yéso ɛ̌bɔphani Philípɔ na Natanaɛ́li
43 Mama i, Yéso dákondi gǎ ka kenombe á Galiláia, áondhonda Philípɔ, áongodea: « Ómobea! » 44 Cɔ, Philípɔ dátú gǎkɛ ntɔa á ka Bhɛtɛsaídha, kenombe ndea Pɛ́tɛɛ na Andeé. 45 Philípɔ â gǎkɛ oga ondhonda Natanaɛ́li, áongea be: «Bɛmɔ̌ni Nkpa nde Mósa dádundu nyɔngɔ akɛ subi á buku á ɛɔphi. Baɔtu-nyɔngɔ dábadundu phɔtɔ nyɔngɔ akɛn. Yɛ, ande Yéso Muna-Yɔsɛ́phu, mmbe Ba ka Najalɛ́ti. » 46 Mpɔ, Natanaɛ́li áomuisia: « Kema anja aɔtɔka n'atoki ka Najalɛ́ti? » Philípɔ áonsikisia: « Bhika ɔ́ɔnɛ.»
47 Mbusa, Yéso áɔmɔ̌na Natanaɛ́li n'aobhika mɔtɛkɛ. Áɔyɔnga ka phɔakɛ te: « Mɔnani moIsilaɛ́li á doni, mmbe nna n'odhemayɔ subi akɛ. » 48 Ka bondɔ, Natanaɛ́li áomúisia Yéso: « Omúbhi bo?» Yéso áonsikisia gea: « Mosá á Philípɔ ɔphana akɔ, nɛkɔɔnima n'okusi á me. » 49 Ka bondɔ, Natanaɛ́li áongodea: « Mphangigi, onde Muna-Mokonga, Moamɛ ndea baIsilaɛ́lio. » 50 Yéso áonsikisia gea: « Omobeeki ka nyɔngɔ nde nekongodi gea, dɛ́kɔɔni kusi á me? Cɔ, ɔɔnande kema ángbó kɔnyɛ́nya nnde. » 51 Mbusa i, â phɔtɔ ongodea: « Eya, nenongodi doni gea, bɔɔnande kobha n'akodokani, bamalaeka ndea Mokonga na báotaia na dhidha gǔ ani eme Muna-Nkpap. »