Ekuma ndea Yoáni M'batisi
3
1 Nyɔngɔ nde dátú ka saga á ko nkama na bɔku (15) á koboamɛ ndea moamɛ angbóngbó Tibɛíɔa Kaisáa, Pɔntíɔ Pilátɔ dátú mɔkɔta ka Yudhɛ́a. Galiláia dátú kusi á kɔkɔta á Ɛlɔ́dhɛ. Ituɛ́a na Taakɔníti dátu kusi á kɔkɔta á Philípɔ, muna-amakɛ na Ɛlɔ́dhɛ. Abhilɛ́nɛ dátú kusi á kɔkɔta á Lisanía. 2 Anási na Kayápha dábatú bakɔta á batobei-phɛa ndea Mokonga.Ka saga ndɔ, nyɔngɔ á Mokonga áongona Yoáni muna-Jakaía ka nkanda, áoba mɔtu-nyɔngɔ. 3 Áotamba ka nji bhui á ka mpɛphɛ á Yɔɔdháni n'aɔ̌phɛa bakpa be: «Kětiani tambea anu, bánobatisɛ, mpɔ Mokonga áimɛ bojede nɛnu.» 4 Cɔ, nnde ande tɔtɔkɛana á nyɔngɔ nde mɔtu-nyɔngɔ Isáia dádundu gea,
«Ɛsɔ á nkpa aokoga ka nkanda gea,
Bɔngisiagani aphe ndea Mɔkɔta!
Mamisani kakɛ aphe kau, dhɛ!
5 Eembe bhui bátumisande.
Mamba, n'etondoo bhui básɛngɛande.
Ɔma nde aphe ěgbúki bámamisande dhɛ!
Ɔma á etia-etia bábɔngisande.
6 Ka bondɔ, bakpa bɔbhu báɔnande gǎkɛ boamia ndea Mokongab.»
7 Cɔ, usɛsɛ á bakpa báobhika mɔtɛ á Yoáni ka batisa abɔ. Yɛ â gǎkɛ ǒngodea be: «Ɛbɔkɔti á njɔka nde ca! Ani mmbe anúubhisi tea esuia ndea Mokonga nnde abhiki? 8 Tɔtɔkisani pɛ kema ánjá ka ubhisa gea bokěti ye tambea anu ájede. Bókóphangɛmbɛ égea sasanu te, tatasu ande Abhalaámuc. Cɔ, nennongodi gea, Mokonga ana bukpɛkpɛ á gaia á b'ɛtɛ nde, áomesia ɛbɔkɔti ndea Abhalaámu. 9 Babhisi ye tɔ eoka ka bokuu á me. Mě bhuakɛ mmbe nn'aɔgɔmba na mbuka ánjá, bámbhiande, báommaka ka nsa.»
10 Usɛsɛ á bakpa báomúsia: «Bégeɛ gǎkɛ bo?»
11 Yoáni áǒsikisia: «Nkpa nde a na ngɔmbɛ ibɛ, ámophɛ mmbe nna na kau. Mmbe a gǎkɛ n'eea, ágeɛ phɔtɔ bo.»
12 Baphendisigi-manjanja, bâ phɔtɔ obhika k'aphe á obatisɔ. Báongea Yoáni: «Mphangigi, begeɛ nɛsu bo?»
13 Yoáni áǒsikisia: «Bókophendisɛmbɛ bangɔa kɔnyɛ́nya nnde bánósosi phendisa i.»
14 Batɔa-emani bâ phɔtɔ omúsia: «Besu gǎkɛ begeɛ bo?»
Áǒsikisia bundɔ te: «Bókǒphendisɛmbɛ bakpa bangɔa ka mbɛa. Bókomutɛmbɛ nkpa kema na tɔnga phɔtɔ nkpa kitɔngi á mbɛa. Endani tɔndɔ k'ophendɔ nɛnu.»
15 Mpɔ bakpa bɔbhu bunde dábaobondeaga kema nde atɔtɔkɛanande, báoúsianaga ka měma abɔ ka phɔa Yoáni: «Ayo, Yoáni nna phɔ Kiísito?»
16 Yoáni â gǎkɛ ǒsikisia bakpa bɔbhu gea: « Eme neonobatisa nɛmɔ k'ibo. Nkpa moci a gǎkɛ obhika mbusa ani n'amɔnyɛ́nyi ka bukpɛkpɛ. Kékeni koda á ngoi á biato nɛkɛ. Yɛ aámbé anóbatisande ka Měma á Mokonga na ka nsa.
17 A bhɛdi ungɔ ka njaga akɛ ka pɛca mponga. Â gǎkɛ obhisa mponga ka tɛta, â ndiu otoboa tɔnɛ i ka nsa nde nn'aoimika.»
18 Bondɔ unge Yoáni dátú ɔ̌phɛaga bakpa mɔngɔ ásii Nyɔngɔ Ánjá ndea Mokonga.
19 Mbusa, Yoáni áomphekeaga Moamɛ Ɛlɔ́dhɛ ka nyɔngɔ nde dámuki Ɛlɔdhía, nka-munamakɛ phɔtɔ na ka nyɔngɔ ájede-jede nde dági. 20 Gǔ indɔ, Ɛlɔ́dhɛ â goto ogea bojede, áomakea Yoáni ka mekakɔ.
Batisa á Yéso
(Ɔna phɔtɔ Mat 3.13-17; Malíkɔ 1.9-11)
21 Mbusa á Yoáni batisa á bakpa bɔbhu bunde dábatú oa, â phɔtɔ om'batisa Yéso. Cɔ, bii Yéso dáɔmɛma, kobha áokodokana, 22 Měma á Mokonga áodhidha gǔ akɛ n'aǒphangisia bea mboe. Ɛsɔ áɔɔkɛkana n'atoki na kobha, áogea: «Onde miki nɛmɔ ékondi. Ne na maseye k'obɛd.»
Ina á batɔa k'ekombɔ ndea Yéso
(Ɔna phɔtɔ Mat 1. 1-17)
23 Yéso dátú na basaga bea nkama isaɔ bii akpangi ekuma nɛkɛ. Bakpa dábaoúbha te, ande Muna-Yɔsɛ́phu, mmbɔ muna-Ɛlí, 24 mmbɔ muna-Matáti, mmbɔ muna-Láwi, mmbɔ muna-Mɛ́lki, mmbɔ muna-Yana, mmbɔ muna-Yɔsɛ́phu, 25 mmbɔ muna-Matatía, mmbɔ muna-Amɔ́si, mmbɔ muna-Naúmu, mmbɔ muna-Ɛsíli, mmbɔ muna-Nágɛ, 26 mmbɔ muna-Máti, mmbɔ muna-Matatía, mmbɔ muna-Simɛ́i, mmbɔ muna-Yɔsɛ́ki, mmbɔ muna-Yɔ́dha, 27 mmbɔ muna-Yɔána, mmbɔ muna-Lɛ́sa, mmbɔ muna-Jɛubhabhɛ́li, mmbɔ muna-Saltiɛ́li, mmbɔ muna-Nɛ́i, 28 mmbɔ muna-Mɛ́lki, mmbɔ muna-Adhi, mmbɔ muna-Kɔsámu, mmbɔ muna-Ɛlmadhámu, mmbɔ muna-Ɛi, 29 mmbɔ muna-Yɔsúa, mmbɔ muna-Ɛliɛjɛ́ɛ, mmbɔ muna-Yɔímu, mmbɔ muna-Matáti, mmbɔ muna-Láwi, 30 mmbɔ muna-Simɛɔ́ni, mmbɔ muna-Yúdha, mmbɔ muna-Yɔsɛ́phu, mmbɔ muna-Yɔnámu, mmbɔ muna-Ɛliakímu, 31 mmbɔ muna-Mɛlɛ́a, mmbɔ muna-Mɛ́na, mmbɔ muna-Matáta, mmbɔ muna-Natáni, mmbɔ muna-Dhaúdhi, 32 mmbɔ muna-Yɛ́sɛ, mmbɔ muna-Ɔbhɛ́dhi, mmbɔ muna-Bhoáji, mmbɔ muna-Salmɔ́ni, mmbɔ muna-Nasɔ́ni, 33 mmbɔ muna-Aminadhábhu, mmbɔ muna-Adhimíni, mmbɔ muna-Aani, mmbɔ muna-Ɛsilɔ́ni, mmbɔ muna-Pɛlɛ́si, mmbɔ muna-Yúdha, 34 mmbɔ muna-Yakɔ́bɔ, mmbɔ muna-Isáka, mmbɔ muna-Abhalaámu, mmbɔ muna-Tɛ́la, mmbɔ muna-Naɔ́li, 35 mmbɔ muna-Sɛlúgu, mmbɔ muna-Lɛ́u, mmbɔ muna-Pɛlɛ́gi, mmbɔ muna-Ɛbhɛ́li, mmbɔ muna-Sɛ́la, 36 mmbɔ muna-Kainána, mmbɔ muna-Aluphakisádi, mmbɔ muna-Sɛ́mu, mmbɔ muna-Nɔ́a, mmbɔ muna-Lamɛ́ki, 37 mmbɔ muna-Mɛtusɛ́la, mmbɔ muna-Ɛnɔ́ki, mmbɔ muna-Yaɛɛ́dhi, mmbɔ muna-Maalɛ́li, mmbɔ muna-Kainána, 38 mmbɔ muna-Ɛnɔ́si, mmbɔ muna-Sɛ́ti, mmbɔ muna-Adhámu, mmbe ba á Mokonga.