Mbino Anja bíndɔ
Malíkɔ
dádundu
Bɔphɛi ndea Yoáni M'batisi
1
1 Oani ande nkpangeɔ á Mbino Anja á Yéso Kiísito, Muna-Mokonga. 2 Cɔ, Mokonga dán'yɔngisi mɔtu-nyɔngɔ Isáia be:«Cɔ, nenteki ntɔmi-mbino nɛmɔ mosá akɔ,
mmbe abɔngisiagande aphe nɛkɔ. a
3 Nkpa moci aokoga ka nkanda:
‹Bɔngisiagani aphe ndea Mɔkɔta!
Mamisani k'akɛ aphe kau dhɛ!›» b
4 Ka bondɔ, Yoáni M'batisi dásɛnɛki ka nkanda n'aɔ̌tɔmia bakpa be: «Kětiani tambea anu ajede, bánobatisɛ, mpɔ Mokonga áimɛ bojede nɛnu.» 5 Bakpa bɔbhu á ka nji á Yudhɛ́a na bunde á kenombe á Yɛusalɛ́ma, báondhonda, báɔyɔnga nyɔngɔ á bojede nɛbɔ. Mpɔ, Yoáni áǒbatisa ka ibo Yɔɔdháni.
6 Yoáni dáɔli ngɔmbɛ ndɔ dábaoki na saa á ngamia, angede á ka cina á kuju akɛ dábabongisigi na mpoko á nyama. Eea nɛkɛ dátú banyɔnyɔ na boki á k'osaa. c 7 Cɔ, Yoáni déngodi bakpa áɔyɔnga be: «Nkpa moci aobhika mbusa ani, amɔnyɛ́nyi ka bukpɛkpɛ, mmbe kékeni gbuta ka koda á ngoi á biato nɛkɛ. 8 Eme dénóbatisi k'ibo. Yɛ gǎkɛ, anóbatisande ka Měma á Mokonga.»
Batisa á Yéso na tombaga akɛ
( Ɔna phɔtɔ Mat 3.13-4.11; Lóka 3.21-22; 4.1-13)
9 Mbenɔ ndɔ, Yéso áotoka na Najalɛ́ti á ka Galiláia, ká gǎ mɔtɛaYoáni. Yoáni áom'batisa ka Yɔɔdháni. 10 Mɔngɔ moci, bii Yéso ajuani k'ibo, áɔɔna kobha n'aukukani, Měma á Mokonga áodhidha gǔ akɛ bea mboe. 11 Ɛsɔ áotoka na kobha: «Obɛ, onde miki nɛmɔ á ekondi. Ne na maseye ka phɔakɔ.»
12 Kɛ̌kɛ ndɔ, Měma á Mokonga áɔnsɔndɔɛa ka nkanda. 13 Aoika ka nkanda esa nkama gena (40). Kó, Sɛtáni áontombaga. Yéso dátú kimoci na banyama na bamalaeka na báɔmbhɛdaneaga.
Ekuma ndea Yéso ka nji Galiláia
( Ɔna phɔtɔ Mat 4.12-22; Lóka 4.14-15; 5.1-11)
14 Esa moci Yéso áoga na Galiláia ka mbenɔ nde dábandungisiYoani. Aɔtɔmia Nyɔngɔ anja ndea Mokonga. 15 Áogea te: «Cɔ, mbenɔ aju nga, koboamɛ ndea Mokonga a ye tɔ bhíbhí. Kambani tambea anu ajede, bóbeekeɛ Nyɔngɔ Anja.»
Yéso ěɔphani bagoigi nɛkɛ á ka mosá-mosá
16 Mbusa á oa, Yéso dátúɔnyɛ́nya ka mocii á etuu á Galilaía. Kondɔ, áɔ̌bɔna baɔphigi babɛ, Simɔ́ni na muna-makɛ Andɛɛ́, na báomaka moabɔ k'ibo ndɔ. 17 Yéso áǒngodea: «Ómobeani, nenóbhisande baɔphigi á bakpa.» 18 Kěkɛ ndɔ, báodoa moabɔ, báom'bea.
19 Yéso áɔsɛkɛda mosá abhɔa, áɔ̌bɔna bana-Jɛbhɛdháiɔ: Yakɔ́bɔ na muna-makɛ Yoáni. Dábatu subi á koko na báɔbɔngisiaga moabɔ nɛbɔ. 20 Kɛ̌kɛ ndɔ, Yéso áɔ̌bɔphana. Bɔ, báon'deketa abhabɔ Jɛbhɛdháiɔ na babhɛdanigi subi á koko, báom'bea Yɛso.
Yéso anamisi ntɔa-kukwa á bansombo
( Ɔna phɔtɔ Lóka 4.31-37)
21 Mbusa á oa, Yéso na bagoigi nɛkɛ báoga na Kapɛɛnaúmu. Esa á sabato, kěkɛ ndɔ áongia subi á endu á bɔphɛi ndea baYúdha, áɔ̌phɛa bakpa. 22 Bundɔ dábatúɔɔka bɔphɛi ndɔ báotangaaga phɛ̂. Nkókó á bophɛi kau dátingani n'inde á baphangigi-ɛɔphi nga, dáogoisaga u na kɔkɔta. 23 Cɔ, subi á endu ndɔ, nkpa moci dátú na kukwa á bansombo, áokoga, 24 áogea: «Ɔɔ! Eke nde beogi ně, Yéso ba Najalɛ́ti? Obhiki kosótindisa? Neokuubha: Onde Ntɔa-bonjánja ndea Mokonga.» 25 Yéso áǒkea bansombo: «Kɔbani! Juanani ka nkpa nde!» 26 Bansombo ndɔ báonsuga akpɛ. Báonjuana na baokoga. 27 Bakpa bɔbhu báoyayama, na kabii dábáousianaga: «Eke nde? Bɔphɛi nde akidi kɛ̌kɛ ana bukpɛkpɛ. Mogaa nde aǒsosea bansombo, bɔ báɔmɔ̌ka.» 28 Kɛ̌kɛ ndɔ tɔ, boombia á Yéso áɔɛmba ɔma bhui ka nji Galiláia.
Yéso ěamisi batɔa-esambɔ básii
29 Ka juana abɔ k'endu á bɔphɛi ndɔ, Yéso, Yakɔ́bɔ na Yoáni báoga mɔtɛ á Simɔ́ni na Andɛɛ́. 30 Kó, báondhonda nyamɔtɔ akɛ na Simɔ́ni mmbe nke, n'abondi k'eka nga dátú na jonga akpɛ. Ka kidia á Yéso tɔ, báongodea nyɔngɔ akɛ. 31 Yéso áɔsɛkɛda bhíbhí akɛ, áondunga ka njaga, áommesia. Mɔngɔ moci, jonga áonsía. Mpɔ, nke ndɔ, áoúnanaga ka bɔ.
32 Cɔ, aju ye ɔgɔgɔ, ka gǎ á mani, báombhikia na basambi bɔbhu na batɔa-kukwa á bansombo. 33 Ka kenombe ndɔ bakpa bɔbhu báodhondanaga k'iso á mpume. 34 Yéso áǒamisa batɔa-esambɔ danga-danga básii. Â phɔtɔ ǒjuanisa bansombo básii. Áǒimisia bansombo gea, bákayɔngɛ nga, bansombo dábamǔbhi. d
Yéso aɔtɔmba Galiláia
( Ɔna phɔtɔ Lóka 4.42-44)
35 Mama i, mɔkɛsuɛ esa n'aphɔ́tɔ na kaiphiɔ, Yéso áojuana, áoga ka nkanda. Kó, áɔmɛma Mokonga. 36 Simɔ́ni na badhakɛ báoga ka nkabɔ akɛ. 37 Bii bándhondi ye, báongodea te: «Bakpa bɔbhu báokokaba.» 38 Yéso áǒgea: «Bégɛni ka nji angbo, nnde a bhǐbhíbhí, nɛ́phɛ̂́ phɔtɔ bakpa kó nga, nndɔ ungɔ nebhiki i.» 39 Áoga n'aɔtɔmba nji bhui nde á ka Galiláia. Áɔ̌phɛa bakpa subi á endu á bɔphɛi nɛbɔ, â phɔtɔ ǒjuanisa bansombo kó.
Yéso anamisi ntɔa-kukwa á sǔ
(Ɔna phɔtɔ Mat 8.1-4; Lóka 5.12-16)
40 Ntɔa-kukwa á sǔ moci áobhika bhíbhí á Yéso, áogbuka muanku mosá á akɛ, áon'dengemisaga te: «Ómosokosea! Ona bukpɛkpɛ á sokosea ani aobá́ n'okondi.» 41 Yéso áonkuia ngomi, áonanoa njaga, áondhunga, áongea te: «Cɔ nekondi, nekosokosi.» 42 Kɛ̌kɛ ndɔ sǔ áontoka, nyama akɛ áoama. 43 Mosá á Yéso ukuia akɛ aphe, â gǎkɛ ɔmphɛa akpɛ te: 44 «Kɔntɔmiɛ mɔnɔ nkpa. Gǎ ndiu, óphangisiɛ mosá á ntobei-phɛa ndea Mokonga, óphuiɛ phɛ́a nɛkɔ bíndɔ Mósa dásosi ka ubhisa á bakpa gea oami.» 45 Ntɔa-kukwa á sǔ ndɔ â ndiu oga okpanga tɔmiaga á nyɔngɔ nɛkɛ ka ntanga mosá á bakpa bɔbhu. Ka bondɔ, Yéso kátɔkɛ ye ngia ka kenombe k'iso á bakpa, â ndiu oga oika ka nkanda. Bakpa bâ gǎkɛ otoka ɔma bhui, báobhika ondhonda.