Yéso aeɔphani bagoigi á ka mosá-mosá
(Ɔna phɔtɔ Mat 4.18-22; Malíkɔ1.16-20)
5
1 Esa imoci Yéso dáiki ka mocii á etǔ Gɛnɛjaɛ́tia. Usɛsɛ á bakpa báɔm'bɔkanisa nga, dábatúokonda ɔka nyɔngɔ á Mokonga. 2 Wa, Yéso áɔɔna koko ibɛ ka mocii íbo, nndɔ baɔphigi dábatoki subi i. Bɔ gǎkɛ, dábatú ɔbɔngisia moabɔ nɛbɔ. 3 Mpɔ Yéso áokambea ka koko ndɔ moci nnde á Simɔ́ni, áɔmmɛma yɛ, átutuisɛ koko danga ábhɔa n'ɔbɛɛ. Yéso áoika ka koko, áǒgoisaga usɛsɛ á bakpa.4 Agɔbi ye yɔnga, áongodea Simɔ́ni: « Cɔ, tutuisa phɔ koko ka kibha, bómakɛ moabɔ nɛnu k'ephenga. »
5 Simɔ́ni áongea: « Mphangigi, bekisima tambaga kala na kabii esa age osa, békekambɛ tanda. Cɔ, ka nyɔngɔ nde omososi, nemakande moabɔ. »
6 Bii bámaki ye u, basu básii phɛ̂ báotá. Moabɔ nɛbɔ áokpanga kakokanagab. 7 Mpɔ, báɔ̌ɔphana badhabhɔ na njaga gea, bábhikɛ na koko nɛbɔ ka enga abɔ. Bábhiki ye, báotumisa koko bhui, puu! Koko ibɛ ndɔ n'akpangi ye tɔta.
8 Simɔ́ni Pɛ́tɛɛ aɔni ye bo, áogbuka moanku akɛ mosá á Yéso, áongea: « Mɔkɔta, toka ka mpɛphɛ ani nga, nende ntɔa-bojede. » 9 Nga, kɔbɔbɔkɔ dámbhɛdi yɛ na badhakɛ bɔbhu ka nyɔngɔ á basu básii ndɔ dábaté ka moabɔ.
10 Yakɔ́bɔ na Yoáni, bana-Jɛbhɛdháiɔ badakɛ na Simɔ́ni, bɔ phɔtɔ dábatú na kɔbɔbɔkɔ kimoci na yɛ.
Cɔ, Yéso áongodea Simɔ́ni: « Kobɛmbɛ na kɔbɔbɔkɔ. Kpanga á kɛ̌kɛ nde, obande mɔphigi á bakpa. »
11 Mpɔ, báodhunduisa koko kubhi, báodeketa bhui, báom'bea Yéso.
Yéso an'amisi ntɔa-sǔ
(Ɔna phɔtɔ Mat 8.1-4; Malíkɔ 1.40-45)
12 Mbenɔ nde Yéso dátú ka nji moci, nsambi áombhikia. Nsambi ndɔ dátú na sǔ nde dáɛmbí nyama akɛ bhui! Amɔ̌ni ye Yéso, áɔgɔtɔma na kabii endɔndɔ akɛ age ogbondoa odo, áondengemisaga be: « Mɔkɔta, ómosokosea! Neoúbha gea ona bukpɛkpɛ á sokosa ani aobá́ n'okondi. »
13 Yéso áonanoa njaga, áɔndhunga, áongodea te: « Cɔ nekondi, neosókoɛi. » Kɛ̌kɛ ndɔ tɔ, sǔ áontoka.
14 Mpɔ, Yéso áongodea te: « Kɔntɔmiɛ mɔnɔ nkpa. Gǎ ndiu óphangisiɛ mosá á ntobei-phɛa ndea Mokonga na opha akɛ ɔphɛɔ bíndɔ Mósa asosi ka nyɔngɔ á sókosea ntɔa-sǔ. Nndɔ ábɛ mphangiɔ ka bɔ gea oami. »
15 Boombia ndea Yéso â gǎkɛ ondanda phɛ̂. Usɛsɛ á bakpa básii báombhikia k'aphe á ɔka nyɔngɔ nɛkɛ na amisa á kukua nɛbɔ. 16 Yéso dá gǎkɛ ogaga ka nkanda ka mɛma á Mokonga.
Amisa á nd'ɔti
(Ɔna phɔtɔ Mat 9.1-8; Malíkɔ 2.1-12)
17 Esa imoci, bii Yéso dáophangiaga, baPhaisáiɔ na baphangigi-ɛɔphi dábaiki ka mpɛphɛ akɛ. Dábatoki ka nji danga-danga á ka Galiláia n'inde á ka Yudhɛ́a n'inde á kenombe á Yɛusalɛ́ma. Bukpɛkpɛ á Mɔkɔta Mokonga dátú subi akɛ ka amisa á basambi.
18 Wa, bakpa báobhika na bánkumbi n'dɔti k'eka. Ande gea, nyama akɛ bhui na nn'aoemana. Báokaba, bángisɛ mosá á Yéso sub'endu. 19 Ɔma á nyɛ́nya dákátú gǎkɛ bei, ka nyɔngɔ á usɛsɛ á bakpa. Ka bondɔ, báon'dapha ně bhakijɔ c. Báophoa ɔma moci, báondhidhisa n'dɔti ndɔ n'atɔ k'eka ka nkindi á bakpa mosá á Yéso sub'endu. Báonkisa ka nkindi á bakpa, mosá á Yéso.
20 Aɔni ye beekea nɛbɔ, Yéso áongea n'dɔti te: « Moko, bojede nɛkɔ aimiki. »
21 Mpɔ, baphangigi-ɛɔphi na baPhaisáiɔ báoianaga: « Mogaa nde ande ani ka yɛ bhóma á Mokonga bende? Ani mmbe aɔtɔka n'aimi bojede na nna tɔndɔ Mokonga sasa akɛd? »
22 Bii Yéso, dáubhi ianaga abɔ, áǒngodea be: « Ka nyɔngɔ sina nde bona nkoko á ianaga nde subi á měma anu? 23 Kema sina nde aáphoo ka yɔnga i, ‹ Bojede nɛkɔ aimiki›, na yɔnga, ‹Ma! Ótambɛ! ›? 24 Cɔ, nekondi bóúbhɛ gea, eme Muna-Nkpa, nena kɔkɔta á ima á bojede ka mokonda. » Mpɔ, áǒphaia, áongodea n'dɔti te: « Ma! Bhɛda eka nɛkɔ, ósikianɛgɛ mɔtɛakɔ. » 25 Kɛ̌kɛ ndɔ, áoma mosá á bakpa bɔbhu, áɔbhɛda eka nde atódé kau, áosikianaga mɔtɛa akɛ n'aombhebha Mokonga.
26 Bakpa bɔbhu báotangaaga, báoba na kɔbɔbɔkɔ, bâ gǎkɛ ombhebha Mokonga, báogea: « Ai! Bɛɔni ketangaɔ k'esande. »
Yéso amophani Láwi
(Ɔna phɔtɔ Mat 9.9-13; Malíkɔ 2.13-17)
27 Mbusa á wa, Yéso áojuana, áɔmɔ̌na mphendisigi-manjanja, ina akɛ nde Láwi, n'aiki ka ntua á phendisaga á manjanja. Yéso áongodea: « Ómobea. » 28 Wa, Láwi áodeketa bhui, áoma, áom'bea. 29 Mbusa, Láwi áɔbɔngisiaga jaí mɔtɛakɛ ka phɔa Yéso. Áǒdhondanisa bakpa básii na badhakɛ baphendisigi-manjanja. Báoika k'ɔma á eaga. 30 Mpɔ, baPhaisáiɔ na badhabɔ baphangigi-ɛɔphi, báɔ̌ngɔngɔnɛaga bagoigi ndea Yéso: « Ka nyɔngɔ sina nde booeaga na noa kimoci na baphendisigi-manjanja na batɔa-bojede bunɛngbo? »
31 Yéso â gǎkɛ ǒsikisia te: «Basambi báunge bána siki á nsaku. Nna bunde bánaosamba. 32 Kebhiki k'aphe á ɔphana á batɔa-bonjánja. Nebhiki ndiu ka ɔphana á batɔa-bojede gea, bákětiɛ tambea abɔ.»
Moangɔ á Yéso ka kema á kala
(Ɔna phɔtɔ Mat 9.14-17; Malíkɔ 2.18-22)
33 BaPhaisáiɔ báomúsia Yéso: «Bagoigi ndea Yoáni na bundeasu báoikaga kanga á eaga ka nyɔngɔ á mɛma á Mokonga. Cɔ, ekende bundeakɔ, bá gǎkɛ oeaga na noa? »
34 Yéso áǒsikisia: «Batɔa-ɛkɛka báikimbɛ mɔnɔ kanga á eaga na mǒko á ɛkɛka a kimoci n'abɔ? Bɛɛndɔ. 35 Esa kájumbɛ bii bándhungaeka mǒko-ɛkɛka. Wandɔ unge, báikaeka kanga á eaga.
36 Yéso â phɔtɔ ǒngodea mɛní ndee: «Nna na nkpa nde aonyua phaeka á bhɔngɔ á kɛ̌kɛ ka jukanisa i na bhɔngɔ á kala. Aogea bo, áotukatuka nndɔ á kɛ̌kɛ. Nndɔ á kala kágamanɛku na phaeka indɔ á kɛ̌kɛ. »
37 « Ka asii ndeasu bánaodukia moseba subi á ntuka á kala nde bábɔngisigi na mpoko á nyama. oogea bó, mbenɔ nde makana aɔɛma áobhóma ntuka. Makana na ntuka bhui áoújukana. 38 Akeni ndiu dukia á moseba subi á ntuka á kɛ̌kɛ. »
39 « Nkpa aye onoa mocenja, kakondɛ ye nnde moseba. Â ye tɔ ogea, mocenja unge aánja. »