Nketi antombigi Yéso
(Ɔna phɔtɔ Mat 4.1-11; Malíkɔ 1.12-13)
4
1 Mbusa indɔ Yéso áotoka na Yɔɔdháni n'atumi na Měma á Mokonga. Měma ndɔ áɔnsɔndɔɛa ka nkanda. 2 Kó, Nketi áontombaga ka b'esa nkama gena (40).Cɔ, ka b'esa ndɔ bhui, Yéso n'ǎna tanda oeaga. Mbusa indɔ, nja áɔmbhɛda. 3 Nketi áongea: «Aoba n'onde Muna-Mokonga, sosea phɔ ɛtɛ nde ábɛ mokati.»
4 Yéso â gǎkɛ onsikisia te: «Buku á Mokonga agie, nkpa nna tɔ oenda k'eeaa.»
5 Nketi áɔmɛɛa mosá, áon'daphisa gǔ á mamba, mɔngɔ imoci, áɔmɔɔnisa koboamɛ bhui á ka mokonda. 6 Aongeae: «Nekophande kɔkɔta á koboamɛ nde bhubhui, na boombia i bhui. Nga, nndɔ bhui dábamopi. Eme aámbé ne tɔ ogabha ka nkpa nde nekondi. 7 Cɔ, aobá n'ogbuki muanku mosá ani, bhubhui ába tɔ akɔ.»
8 Yéso â gǎkɛ onsikisia: «Buku á Mokonga agie, ‹Gbuka tɔ muanku akɔ mosá á Mɔkɔta nɛkɔ Mokonga. Ɔ́mbhɛdaneɛgɛ tɔ yɛ sasakɛb.›››
9 Nketi â goto ɔmɛɛa mosá na Yɛusalɛ́ma, áon'daphisa gǔ endu á Mokonga. Aongea: «Aoba n'onde Muna-Mokonga doni, ómaka phɔ ka odo. 10 Nga, buku á Mokonga agi, ‹Ěsoseande bamalaeka nɛkɛ, bákoambɛ. 11 Bákoambande ka njaga abɔ gea te, ecinji akɔ kabɛtɛkanɛmbɛ k'ɛtɛc.›››
12 Yéso áonsikisia te: «Buku á Mokonga agi phɔtɔ, ‹ Kontombɛgɛ mɔnɔ Mɔkɔta nɛkɔ Mokongad.›»
13 Bii Nketi agɔbi ye tombaga ndɔ bhui, â ye tɔ on'deketa, áoga obondea esa nɛngbo.
Yéso akpangi bhɛdanaga ekuma nɛkɛ ka Galilaía
( Ɔna phɔtɔ Mat 4.12-17; Malíkɔ 1.14-15)
14 Yéso áoja na Galiláia, bukpɛkpɛ á Měma á Mokonga n'atumi ka měma akɛ, mbino akɛ áɔɛmba ka nji bhui á ka mpɛphɛ. 15 Áophangiaga k'endu á bɔphɛi nɛbɔ, bakpa bɔbhu báon'dokomisa.
Yaga á Yéso ka Najalɛ́ti
(Ɔna phɔtɔ Mat 13.53-58; Malíkɔ 6.1-6)
16 Mbusa á wa, áoga na Najalɛ́ti ɔma nde dábamɔtisi. Esa á sabato, áongia k'endu á bɔphɛi bíndɔ dátú ogeaga. Mpɔ, áoma ka tanga. 17 Báomopha buku ndea Isáia. Aoukua u, áodhonda ɔma nde bádundu,
18 «Měma á Mɔkɔta amɔgɔni,
ámɔsɔ̌mbu ka tɔ̌miaga á batɔa-buyɛnɛ Mbino Anja.
 phɔtɔ omoteka ka ubhisa á batɔa-mekakɔ esa á juana abɔ
na koda íso á bakeíme-íme,
na phuia á bakusi ka kɔkɔbɛ,
19 na tɔ̌mia á saga á ngomi ndea Mɔkɔtae.»
20 Wa, áoikita buku ndɔ, áomopha mbhɛdanigi á k'endu á bɔphɛi, áoika ka phɛa abɔ. Bakpa bɔbhu báontumia n'iso, 21 Yéso áǒngodea be: «K'esande nyɔngɔ ndɔ bɔɔki atɔtɔkɛani.»
22 Nyɔngɔ nɛkɛ áɔ̌bɔngɛa bakpa bɔbhu bunde dábaɔmɔ̌ka nga, boabhi ndɔ dátú á ketangaɔ. Báoúsianaga: «Nna phɔ muna-Yɔsɛ́phu aámbé?»
23 Mpɔ Yéso áǒsikisia boabhi: «Doni, ómongodeani phɔ mɛní ndee, ‹Nsaku, ósakoa sasa akɔ.› Cɔ, gea phɔ wani nyɔngɔ ndɔ bɛtɔɔki n'ogi na Kapɛɛnaúmu nga, wani ande nji nɛkɔ.
24 Nenongodi doni gea: Nna na mɔtu-nyɔngɔ nde bánsɛsimbe mɔnɔ ánjá ka nji nɛkɛ á bɔkɔtɛana. 25 Eya, ka saga ndea Ɛlía, bake á kekusa dábabiki phɛ̂ ka Isilaɛ́li. Mbua dákaɔɔka ka basaga isaɔ na gbutuka. Monganya áogua ka mokonda bhuif. 26 Nna na k'abɔ nde Mokonga dánteki Ɛlía mɔtɛkɛ, â tɔ onteka mɔtɛ á nke á kekusa ba ka Jaɛpáta, nji á Sidhɔ́nag. 27 Ka saga á mɔtu-nyɔngɔ Ɛlisa, batɔa-sǔ dábabiki subi á baIsilaɛ́li. Nna na kabɔ mmbe dáami, nǎna tɔndɔ Namáni, ntɔa ka Sulíah.»
28 Bii báɔki ye bo, bɔbhu báɔbɛa phɛ̂ subi á endu á bɔphɛi. 29 Báǒmesia, báonjuanisa Yéso ka ngba á kenombe, báontaisa gǔ á mamba nde dábaphɛki Najalɛ́ti kau, ka gea bántingisiɛ k'eembe. 30 Yɛ â gǎkɛ ǒsodokana, áoga nɛkɛ.
Amisa á ntɔa-kukua á bansombo
(Ɔna phɔtɔ Malíkɔ 1.21-28)
31 Mpɔ, Yéso áodhidha ka kenombe moci á ka Galiláia nnde báɔɔphana Kapɛɛnaúmu. Áǒgoisaga bakpa k'esa á sabato. 32 Bɔ, báotangaaga phɛ̂, nga bɔphɛi nɛkɛ dátú na kɔkɔta kau.
33 Cɔ, nkpa moci dátú k'endu á bɔphɛi, bansombo na bámbhɛdi. Aokoga akpɛ. 34 «Ho! Yéso ba Najalɛ́ti ekende beogi ně? Obhiki kosótindisa? Neokoúbha: Onde Ntɔa-bonjánja ndea Mokonga.»
35 Yéso áǒkeea bansombo: «Kɔbani! Juanani ka nkpa nde!» Mpɔ, bansombo báontenea nkpa ndɔ ka odo gbu! Mosá á bakpa bɔbhu. Bansombo báontoka. Kema kangeɛ nkpa ndɔɔ.
36 Bakpa bɔbhu báoyayama, báoúsianaga: «Ogi bóo! Nyɔngɔ sina nde? Mogaa nde ěbiigi bansombo? Nna kɔkɔta akpɛ unge? Bansombo bátoki ka nyama á nkpa bende?» 37 Bondɔ unge boombia á Yéso, áondanda ka nji ndɔ bhui.
Yéso aǒamisa batɔa-esambɔ
(Ɔna phɔtɔ Mat 8.14-17; Malíkɔ 1.29-34)
38 Yéso ajuani ye k'endu á bɔphɛi , áoga k'endu ndea Simɔ́ni. Ama-nkakɛ na Simɔ́ni dátú na jonga akpɛ. Báɔmmɛma Yéso, ágeɛ ka kema ka phɔakɛ. 39 Cɔ, Yéso áɔgɔtɔma gǔ akɛ, áokeea jonga, jonga ndɔ áosia. Kɛ̌kɛ ndɔ, nke ndɔ áoama, áoúnanaga ka bɔ.
40 Ka gǎ á mani, bakpa báombhikia Yéso na basambi danga-danga. Áǒbhisia njaga moci-moci, áǒamisa. 41 Bansombo bâ phɔtɔ ojuana básii na báokoga: «Onde Muna-Mokonga!» Yɛ, â ndiu ǒkeea, áǒdhakanisa, ka nyɔngɔ nde, dábaubhi gea, Yéso ande Kiísito.
Yéso aophɛa subi á ntua á bɔphɛi ndea baYúdha.
(Ɔna phɔtɔ Malíkɔ 1.35-39)
42 Ka kodokana á esa, Yéso áoga ka nkanda. Bakpa básii bâ gǎkɛ onkaba, báondhonda, báongea: «Kosódeketɛmbɛ.» 43 Â gǎkɛ ǒgea: «Mokonga amoteki gea, nɛ́tɔ̌miɛgɛ phɔtɔ Mbino Anja á koboamɛ nɛkɛ ka nji nɛngbo.»
44 Mpɔ, Yéso áotutuisa bɔphɛi á mbino ánjá k'endu á bɔphɛi bhui ndea Yudhɛ́a.