Yéso Mɔkɔta á sabato
6
1 K'esa á sabato moci, Yéso na bagoigi nɛkɛ, dábaɔnyɛ́nya ka ciko. Bagoigi nɛkɛ báokɔɔa mbuka, báotikima na njaga, báoea ua. 2 BaPhaisáiɔ bunɛngbo báǒngodea: «Bɔɔbhɛdanaga ekuma k'esa á sabato na báimisii kabob? »3 Yéso áǒsikisia: «Ai! Bókótangi bíndɔ Dhaúdhi na badhakɛ dábagi nja n'ɛ̌bhɛdi? 4 Dhaúdhi dángi k'endu á Mokonga, áɔbhɛda mokati á ɔphɛɔ áoea, â phɔtɔ ǒpha badhakɛ. Mokati ndɔ dátú ndiu tɔ ka batobei-phɛa bíndɔ ɛɔphi nɛsu děsosi tɔ bɔ ka ea i.»c. 5 Mpɔ, Yéso â phɔtɔ ǒngodea: « Eme Muna-Nkpa aámbé nende Mɔkɔta á sabato. »
Amisa á nkpa njaga akɛ na káoemana
( Ɔna phɔtɔ Mat 12.9-14; Malíkɔ 3.1-6)
6 Dátú ye esa nɛngbo á sabato, Yéso áongia k'endu á bɔphɛi, áogoisaga. Nkpa moci dátú kubei, njaga akɛ á mǔku n'aphɛphi. 7 Wa ndɔ, baPhaisáiɔ na baphangigi-ɛɔphi dábáɔmɔnjia Yéso bhǐbhíbhí ka ubha ámbé anamisande ka bakpa esa á sabato, ka gea bábɛ na nyɔngɔ nde bántɔnga nde kau.
8 Wa, bii Yéso dáubhi kanisia nɛbɔ á bɔsɔmɛa, áongodea ntɔa-kidɔti á njaga ndɔ: « Ómesia, ómɛ mosá á bakpa. » Áǒmesia, áoma mosá abɔ.
9 Mpɔ Yéso áǒngodea: «Nenúusi be: Kema sina ɛɔphi nɛsu asosi gea i k'esa á sabato? Kabɛ gea kema ánjá, kabɛ kema ájede? Kabɛ amisa á nkpa, kabɛ kusa akɛ? » 10 Áɔ̌ɔnjia bakpa bɔbhu bunde dábantimbi, áongodea n'dɔti: « Cɔ, nanoa njaga akɔ! » Áonanoa njaga akɛ, áoama.
11 Mpɔ, esuia akpɛ â ye tɔ ɔ̌bhɛda baPhaisáiɔ na baphangigi-ɛɔphi. Báokpanga usianaga: «Bengeande Yéso bo? »
Sɔmbɔa á bateki nkama na babɛ (12)
( Ɔna phɔtɔ Mat 10.1-4; Malíkɔ 3.13-19)
12 Ka matu ndɔ, Yéso áoga ka mamba k'aphe á mɛma á Mokonga. Áɔkɛisa esa k'ɛmɛmi.
13 Ka m'bimba, áɔ̌ɔphana bagoigi nɛkɛ, áɔ̌sɔmbɔa ka bɔ nkama na babɛ (12), â phɔtɔ ǒsua bateki. 14 Ina abɔ aunge: Simɔ́ni, mmbɔ Yéso dánsuu Pɛ́tɛɛ, munamakɛ Andeé, Yakɔ́bɔ, Yoáni, Philípɔ, Batɔlɔmáiɔ, 15 Matáiɔ, Tɔmá, Yakɔ́bɔ muna-Alpháiɔ, Simɔ́ni mmbe dáokaba tokisa á nji nɛbɔ ka kɔkɔbɛ, 16 Yúdha muna-Yakɔ́bɔ, na Yúdha Isikaliɔ́ta, mmbɔ dántɔngi Yéso.
Yéso aogoisaga na amisa á batɔa-esambɔ
( Ɔna phɔtɔ Mat 4.23-25)
17 Cɔ, Yéso áodhidha na bɔ, áomamaga ka ntanda. Wa, bagoigi dábadhondani básii. Usɛsɛ ángbó á bakpa na bátoki na Yɛusalɛ́ma na nji nɛngbo ndea Yudhɛ́ad, dábatú phɔtɔ wa, kimoci na batɔa na Tílɔ na Sidhɔ́na. 18 Bɔbhu dábabhiki ɔmɔɔka Yéso na ka amisa á kukua nɛbɔ.
Batɔa-kukua á bansombo dábaami phɔtɔ. 19 Bakpa bɔbhu dábaokaba bhooa akɛ nga, bukpɛkpɛ á boamia dáotoka ka yɛ na amisa abɔ bɔbhu.
Bɔjɛmɛ na tambaga
(Ɔna phɔtɔ Mat 5.1-12)
20 Yéso áɔ̌ɔnjia bagoigi nɛkɛ áǒngodea,
« Maseye ka benu batɔa-buyɛnɛ nga, koboamɛ ndea Mokonga ande anu.
21 Maseye ka benu íbundɔ bookua na nja kɛ̌kɛ nde nga, bokutande.
Maseye ka benu íbunde boogama kɛ̌kɛ nde nga, bɔtɛbhande.
22 Maseye ka benu bii bakpa báonókangea, báonóphaphea, báonóbhóma,
báonóyága ka nyɔngɔ ani, eme Muna-Nkpa. 23 Guani jaí k'esa ndɔ, bɛkagani na maseye nga, bobande n'ophendɔ ángbó na kobha.
Nga, bondɔ unge batatabɔ dáběsoni baɔtu-nyɔngɔe.
24 « Ngomi ka benu batɔi! Nga, bo ye tɔi bonjánjá ínɛnu bhui.
25 Ngomi ka benu íbunde bona eea ásii kɛ̌kɛ nde nga, nja anóguiande.
Ngomi ka benu íbundɔ bootɛbha kɛ̌kɛ nde nga, bobande ka kekusa na ngamɔ.
26 Ngomi ka benu íbundɔ báonógama,
ka nyɔngɔ á kema ánjá nde boogea nga, bondɔ unge batatabɔ dábaǒgeea baɔtu-nyɔngɔ á mbɛa. »
Ekondi ka babíbia
(Ɔna phɔtɔ Mat 5.38-48; 7.12a)
27 Nenongodi benu íbunde bɔmɔɔka: Ókondani babíbia anu, geani ánjá ka bunde bánokangei. 28 Bhisani njaga gǔ á bunde báɔnɔsɛmɛaga, mɛmani Mokonga ka phɔa bakpa nde báɔnokpetekea na nyɔngɔ ka mbɛa. 29 Báɔkɔbɛta ka ngaga moci, mpháia phɔtɔ ngaga ímbɔ ajigi. Kabɛ nkpa n'abhɛdi ngɔmbɛ nɛkɔ á phiɔ, n'deketea phɔtɔ ngɔmbɛ á k'egogo.
30 Nkpa nde aɔkɔmɛma kema, mopha u. Aoba nkpa n'akuuti kema nɛkɔ, kogeɛmbɛ ye áosikisiɛ. 31 Nnde bokondi bakpa bágeɛ ka phɔa anu, geani phɔtɔ bó ka phɔa abɔ.
32 Akoba na bǒkondi tɔ bunde bánokondi, obhebhɔ sina bosebeande? Kanyɔngɔ nde batɔa-bojede bá phɔtɔ ǒkonda bunde békondi. 33 Akoba na bo tɔ ogea ánjá ka bunde báonógeea ánjá obhebhɔ sina bosebeande? Kanyɔngɔ nde batɔa-bojede bá phɔtɔ ogea bo. 34 Akoba na bɔ̌ɛkisi tɔ bundɔ bosebei gea bánojisiande, obhebhɔ sina bosebeande? Nga, batɔa-bojede bá phɔtɔ ɔ̌ɛkisa badhabɔ batɔa-bojede ka gea bésikisiɛ tɔndɔ nndɔ bátɔɛkisi.
35 Nna bo. Ókondani ndiu babíbia anu. Ógeeani ánjá. Ɔɛkisani kanga á sebea á jisia anu. Mpɔ, ophendɔ nɛnu áoba ángbo. Bóoba bana-Mokonga Mmbe a na kɔkɔta bhui. Nga, yɛ, a anjánjá ka bundɔ bána n'obhebhɔ na bunde ba ájede. 36 Cɔ, ókuiani bakpa ngomi bíndɔ Abhanu aǒkuia bakpa ngomi.
Báni na inyamɛ sɔsɔbɛ anu
(Ɔna phɔtɔ Mat 7.1-5)
37 Bókotenɛmbɛ nyɔngɔ á nkpa ka gea, bákatenɛmbɛ nyɔngɔ ínɛnu. Bókotenembɛ nyɔngɔ á bakpa ka gea, bákatenembe nyɔngɔ ínɛnu akpɛ. Imani bojede nde bakpa bágii ka phɔanu ka gea, báimɛ bojede ínɛnu.
38 Ógabheani bakpa, bánógabheande, báotumisa njɔmbi nɛnu púu! Báophikidia, áoduukanaga. Caá nde ǒgabhea bakpa ně, a tɔ unge Mokonga aogabheande ně.
39 Cɔ, Yéso â phɔtɔ ǒngodea mɛní ndee: « Keíme-íme aɔtɔka n'amphangi dhakɛ keíme-íme aphe? Bákaguiɛ phɔ bɔbhu babɛ k'ejimba? 40 Nga, ngoigi nn'aonyɛ́nya mphangigi nɛkɛ. Aoba ka bagoigi n'agoigi ánjá, abande bea mphangigi nɛkɛ.
41 Cɔ, eke nde ɔɔni gbɛɛkɛsɛ k'iso á dhakɔ na kó gǎkɛ ɔɔna gbutuka á me nde a k'iso akɔ? 42 Ɔɔtɔka n'ongodi muna-amakɔ, ‹ Muna-ayí, gea nɛ́ophuiɛ gbɛɛkɛsɛ nde a k'iso akɔ. › Ɔbɛ gǎkɛ, kɔ́ɔɔna gbutuka á me ndɔ a k'iso akɔ? Ntɔa-maibhe nde ca! Tokisa phɔ gbutuka á me nde a k'iso akɔ. Mpɔ, ɔ́ɔɔnapha ánjá, ka gea ótokisɛ ye tɔ gbɛɛkɛsɛ nde a k'iso á muna-amakɔ.
Báengekisande měma ánjá, na měma ajede, bo?
(Ɔna phɔtɔ Mat 7.16-20; 12.33-35)
43 Me anjánjá nn'aɔgɔmbisa mbuka ájede na me ájede nn'aɔgɔmbisa mbuka ánjá. 44 Bátomǔbha me ka mbuka akɛ. Bánaɔkɔda ebombi ka cía. Bana phɔtɔ ɔkɔda moyamba ka tómbá. 45 Nga, nkpa anjánjá aophuia nyɔngɔ ánjá subi á kema ánjá á ka měma akɛ. Nkpa ajede aophuia nyɔngɔ ajede subi á kema ajede á ka měma akɛ. Nga, aphɛnɔkɔ atɔ ɔyɔnga nyɔngɔ nde atúmi ka měma á nkpa.
Gea á kema nde Mɔkɔta asosi
(Ɔna phɔtɔ Mat 7.24-27)
46 Eke nde bómɔɔphanea: « Mɔkɔta, Mɔkɔta! » Na bókóogea kema nde nenóngodi? 47 Nkpa nde aobhika mosá ani, na aɔmɔɔka, áogea kema nde nensosi, nenóphangiande nkpa nde akengiani na yɛ. 48 A bɛa nkpa moci dáphɛki endu, áotongea odo, áondisa, áocuma baetimo, cu! Tuma abhiki, mǔku-ibo áɔbɛta endu, kadengisɛ tanda, ka nyɔngɔ nde, dáphɛki u ánjá gǔ á ɛtɛ. 49 Cɔ, mmbɔ aɔmɔɔka, na nn'aogea bíndɔ nensosi, akengeani na nkpa moci na aphɛki endu, na kándisi etimo anja. Mǔku-ibo abɛti ye endu ndɔ, mɔngɔ imoci áɔngbɔɔkana! Áoújukana bhubhui.