Yéso anamisi mbhɛdanigi ndea mɔkɔta á batɔa-emani ndea baLɔ́ma
( Ɔna phɔtɔ Mat 8.5-13)
7
1 Bii Yéso dágɔbi ye boabhi ndɔ bhui mosá á bakpa nde dábaɔmɔɔka, áoga na Kapɛɛnaúmu. 2 Wa, mɔkɔta á batɔa-emani ndea baLɔ́ma, dátú na mbhɛdanigi nɛkɛ mǒko n'ankondi phɛ̂. Mbhɛdanigi ndɔ dáodusukanaga na kukua. 3 Bii mɔkɔta aɔki ye nyɔngɔ á Yéso, áontekisia bagbɛga á baYúdha ka mɛma akɛ gea, ábhikɛ ánamisɛ mbhɛdanigi ndɔ.4 Cɔ, bagbɛga ndɔ báojua bhíbhí á Yéso, báon'dengemisaga phɛ̂ gea: «Akeni ónamisɛ mbhɛdanigi ndea mɔkɔta ndɔ. 5 Nga, akondi ekuna nɛsu.Yɛ tɔndɔ aámbé dáphɛki endu á bɔphɛi nɛsu.»
6 Mpɔ Yéso áoga na bɔ. N'asóojua mɔtɛ á mɔkɔta, yɛ â goto ǒteka badhakɛ ka tɔ̌mia á Yéso te: «Mɔkɔta, kǒtambisɛgɛmbɛ. Kékeni óngiɛ k'endu nɛmɔ. 7 Ka nyɔngɔ índɔ unge kékini phɔ tanda jua á mosá akɔ. Yɔnga tɔ nyɔngɔ moci ka gea te, mbhɛdanigi nɛmɔ áamɛ. 8 Eme, ne phɔtɔ nkpa nde nɛiki kusi á kɔkɔta á baamɛ nɛmɔ. Ne phɔtɔ na batɔa-emani kusi á kɔkɔta nɛmɔ. Neongodea moci: «Gǎ!» Áoga. Neongodea dhakɛ: «Bhika!» Áobhika. Nê phɔtɔ ongodea mbhɛdanigi: «Gea be!» Áogea bo.»
9 Bii Yéso aɔki ye bo, áontangaaga. Áǒphaia, áǒgea bakpa básii bundɔ dábaom'bea: «Nenógie, kɛɔnimbɛ mɔnɔ beekea ángbó binde á nkpa nde ka baIsilaɛ́li.» 10 Mpɔ, bunde mɔkɔta á batɔa-emani déteki báosikianaga. Báondhonda nsambi ndɔ n'aami.
Jujukisa á nku: muna-nke á kekusa
11 Mbusa abhɔaa, Yéso áoga ka kenombe nde báɔɔphana Naína. Dáotamba na bagoigi nɛkɛ. Usɛsɛ á bakpa básii báoga na yɛ. 12 Aju ka ngba á nji, áodhondana na bakpa na bákumbi mǒnda á moganda moci, ngɔmu nde ba nke á k'ekusa. Bátɔa ka nji básii dábage kimoci na nke ndɔ. 13 Mɔkɔta Yéso áɔmɔ̌na nke ndɔ, áonkuia ngomi, áongodea te: «Kogamɛmbɛ!»
14 Wa, áɔsɛkɛda, áǒdhungia k'eka á mǒnda. Bakumbi báomama. Yéso â goto ogea: «Moganda, nekongodi ómesia!» 15 Mpɔ nku ndɔ áoika ntengi, áokpanga yɔnga. Yéso áonsikisia amakɛ.
16 Mpɔ, kɔbɔbɔkɔ áɔ̌bhɛda bakpa bɔbhu, báombhebha Mokonga, báogea: «Mɔtu-nyɔngɔ angbóngbó asókidianei. Mokonga abhiki ǒenga bakpa nɛkɛ.»
17 Mpɔ, nyɔngɔ á Yéso áondanda ka Yudhɛ́a bhui na nji bhui á ka mpɛphɛ i.
Muisiɔ ndea Yoáni-M'batisi ka phɔa Yéso
(Ɔna phɔtɔ Mat 11.2-19)
18 Mbusa índɔ, bagoigi ndea Yoáni-M'batisi báɔntɔmiaga nyɔngɔ ndea Yéso bhui. Mpɔ, Yoáni áɔ̌ɔphana babɛ sɔsɔbɛ abɔ, 19 áǒteka mɔtɛ á Mɔkɔta, bámuisiɛ te: «Onde Masía, mmbɔ abhikande ndɔ? Kabɛ na nna bo, akeni bém'bondeɛ ba angbo?»
20 Mbenɔ nde dábaju mosá á Yéso, báongodea be: «Yoáni-M'batisi asóteki mɔtɛakɔ gea te békoúisiɛ be, ‹ Onde Masía, mmbɔ abhikande ndɔ? Kabɛ na nna bo, akeni bém'bondeɛ ba angbo?›»
21 Ka mbenɔ ndɔ tɔ, Yéso dátú ǒamisa basambi básii, badɔti, â phɔtɔ ǒjuanisa bansombo na ɔnaphisa á bakeíme-íme básii.
22 Cɔ, Yéso áǒsikisia bateki ndea Yoáni áǒgea: «Gǎni, bógongodeɛ Yoáni nnde bɔɔni na ɔka i: ‹Bakeíme-íme báɔnaphi, badɔti báotamba dhɛ! dhɛ! Batɔa-sǔ bésokosei, badakekanigi-kecuɛ báɔkaphi, basí bájujuki ka kukua, batɔa-buyɛnɛ báɔki Mbino Ánjáb. 23 Maseye ka nkpa nde ka deketɛku beekea ani.›»
24 Bii bateki ndea Yoáni básikianigi ye, Yéso áɔ̌tɔmiaga bakpa básii nyɔngɔ á Yoáni: «Cɔ, eke nde botóge ɔɔna ka nkanda? Ɔphɔ bii maiphianɔ aodengisaga? 25 Eke nde botóge ɔɔna? Nkpa n'aɔli bhɔngɔ ánjá? Nenógie, bunde báɔɔla bhɔngɔ ánjá, na tɔa á nkumba ásii, bá tɔ oika k'endu á baamɛ. 26 Cɔ, eke nde botóge ɔɔna? Mɔtu-nyɔngɔ? Eya, negie, anyɛ́nyi mɔtu-nyɔngɔ. 27 Nga, Yoáni aámbɔ dábádundu nyɔngɔ nɛkɛ mosá ka buku á Mokonga,
‹Nentekande ntɔmi-nyɔngɔ nɛmɔ.
Aɔmɛande mosá ka bɔngisiaga k'akɔ aphe.›
28 Nenógie, nkpa kábɔkɔtɛanimbɛ mɔnɔ n'ana boombia kɔnyɛ́nya Yoáni. Cɔ, mmbe a gǎkɛ miki á bhɔbhɔa ka koboamɛ ndea Mokonga aámbé anyɛ́nyi yɛ.»
29 Bii bakpa bɔbhu, na baphendisigi-manjanja phɔtɔ, dábamɔ̌ki, báoúbha gea Mokonga ande ntɔa kodoni. Mpɔ báobeekea gea, Yoáni ébatisɛ. 30 Wa, baPhaisáiɔ, na baphangigi-ɛɔphi, dábayé ndiu moangɔ á Mokonga ka bɔ, ka nyɔngɔ nde, dábakákondi gea te Yoáni ébatisɛ.
31 Cɔ, Yéso áɔsɛkisia boabhi be: «Někengeanisande batɔa-k'ɛbɔkɔti nde n'ani? Bɔ, bákengeani gǎkɛ n'ani? 32 Bá bea baniki na báiki ka ntanga, báotobeanaga be: «Bɛnɔbɛtɛi ende, bókobinɛ. Beoemba embɔ á kekusa, bókogamɛ.»
33 Cɔ, Yoáni-M'batisi abhiki. Bii nn'aoea mokati na nn'aonoa makana, bô gea a na bansombo. 34 Eme Muna-Nkpa neju gǎkɛ, néoeaga na néonoa. Bô ndiu ogea, nena ophooku á eaga na noa á makana. Baphendisigi-manjanja na batɔa-bojede bunɛngbo bande badhakɛ. 35 Kɔbɔngɛ ndea Mokonga aubhikani gea ande doni ka bakpa nde bám'beeki.
Íma á bojede á nke á mambɔ
36 Esa moci moPhaisáiɔ dámɔphani Yéso gea, báeɛgɛ na yɛ. Yéso áoga mɔtɛakɛ áoika ka mɛja.
37 Ka kenombe ndɔ, nke moci mmbe tambea akɛ dátú ájede, áɔɔka gea te Yéso aiki ka mɛja k'endu ndea moPhaisáiɔ. Ka bondɔ, áobhika na ngbanda ánjá n'atumi na nkɔkic. 38 Áoika mbusa á Yéso nci á n'ecinji akɛ áogama. Ibo á ngamɔ akɛ áophosa ecinji á Yéso, áɔkɔmbɛa u na sekamɔ akɛ. Mpɔ, áoumbia ecinji á Yéso, áosabisa u na nkoki.
39 Bii moPhaisáiɔ mmbɔ dámɔphani Yéso aɔni ye bo, áǒgea sasakɛ te: «Atúoba nkpa nde n'ande mɔtu-nyɔngɔ doni, ámbé aubhi etete á nke nde aondhungaga nga, ana tambea ájede.»
40 Yéso â gǎkɛ ongodea: «Simɔ́ni, neogea néongodeɛ mɛní moci.»
Simɔ́ni áogea: «Mphangigi, yɔnga pɛ!»
41 Yéso áongea: «Nkpa moci dɛ́ɛkisi bakpa babɛ bangɔa nɛkɛ. Moci dátú na nyɔngɔ á bangɔa mia bɔku (500). Ba angbo áoba na nyɔngɔ á bangɔa nkama bɔku (50). 42 Nna na ka bɔ nde dáɔtɔka n'amphendi. Ka bondɔ, áǒdeketea. Cɔ, ka bakpa babɛ ndɔ, ani mmbe ankondande phɛ̂?»
43 Simɔ́ni áonsikisia: «Neoúbha te, mmbɔ dándeketei bangɔa básii phɛ̂.»
Yéso áongea: «Cɔ, ɔyɔngi ánjá.»
44 Mpɔ, Yéso áǒphaia bii nke ndɔ aɔ, áongodea Simɔ́ni: «Ɔmɔɔna nke nde? Nengi k'endu nɛkɔ, kómopi ibo esokosa ně k'ecinjid. Nke nde aámbé amosokosi ndiu u n'ibo á ngamɔ, áɔmɔkɔmbɛaga na sekamɔ akɛ. 45 Kómoumbigi tanda ka kidia ani. Cɔ Yɛ, a phɔ tɔ n'aomuumbiaga k'ecinji kpanga á bii nékidiɛ. 46 Kómosábi tanda na gamba ka mɔe. Yɛ aámbé amosabi ndiu na nkɔki k'ecinji. 47 Negie, kema ángbó nde amogi ně, aúbhisi gea te, bojede nɛkɛ ásí, Mokonga aimi u. Mmbe Mokonga aími gǎkɛ bojede nɛkɛ abhɔa, yɛ ankondi phɔtɔ Mokonga ábhɔa.»
48 Mpɔ, Yéso áongodea nke ndɔ te: «Bojede nɛkɔ aimiki.»
49 Bundɔ dábatú na Yéso ka mɛja báoyɔngaga sɔsɔbɛ abɔ: «Mmbe amande nkpa sina ka ima á bojede?»
50 Yéso â ye tɔ ongodea nke ndɔ: «Gǎ ka bɔjɛjɛ. Beekea nɛkɔ akoamisi.»