Lóka 2

Bɔkɔtɛana á Yéso

( Ɔna phɔtɔ Mat 1.18-25 )

1 Ka matu ndɔ, moamɛ angbóngbó á baLɔ́ma Kaisáa Ogústɔ , áososea gea, bétangɛ bakpa bɔbhu bunde ba ka nji bhui nnde a kusi á kɔkɔta nɛkɛ. 2 Nndɔ dátú tanga á bakpa á ka mosá-mosá nnde dátɔtɔkɛani ka saga nde Kuɛníɔ dátú mɔkɔta á ka nji bhui á Sulía. 3 Ka bondɔ, nkpa bhuakɛ dáge ka nji nɛkɛ á bɔkɔtɛana k'aphe á dundusa ina akɛ.

4 Yɔsɛ́phu â phɔtɔ ɔmɛɛa ka kenombe á Najalɛ́ti nnde á ka Galiláia, áoga ojua ka Bhɛtɛlɛɛ́mu á ka Yudhɛ́a, kenombe á Moamɛ Dhaúdhi. Nga, Yɔsɛ́phu dátú ntɔa-k'ekombo nɛkɛ. 5 Áoga odundusa ina akɛ n'inde á Malía nke á mbanje nɛkɛ n'ana éme. 6 Bii dábatú phɔ́tɔ kó, boae áondhonda Malía, 7 áɔm'bɔkɔta ange nɛkɛ, miki-mǒko, áonkombea na ngɔmbɛ, áɔmɔyia subi á ɔma á isa á banyama. Nga, dábákátú n'ɔma, k'endu á bakɛni.

Malaeka na babondigi-bamɔgɔgɔ

8 Ka nji ndɔ, babondigi-bamɔgɔgɔ dábatú bei. Kǐpha, dábaobondeaga etuge nɛbɔ k'ɔma á isa abɔ. 9 Cɔ, malaeka nde ba Mɔkɔta áomama mosá abɔ dhɛ! Ɔanga á bophombia ndea Mɔkɔta áǒkomba. Kɔbɔbɔkɔ ángbó áɔ̌bhɛda.

10 Malaeka â ndiu ǒgea: «Caa! Bókobɛmbɛ na kɔbɔbɔkɔ. Nga, nenóngodi nyɔngɔ ánjá, á maseye phɛ̂, n'abande ka bakpa bɔbhu. 11 Kesande, Namisi abɔkɔtɛani kanu ka nji ndea Dhaúdhi. Ande Mɔkɔta Kiísito. 12 Bomǔbhande yɛ ka mphangiɔ ndee. Bondhondande mɔɛmba na bánkombei na ngɔmbɛ, na bámɔyi subi á ɔma á isa á banyama.»

13 Kɛ̌kɛ ndɔ, bamalaeka básii ka toka na kobha báɔnsɛnɛkɛa dhabɔ malaeka, báombhebha Mokonga be:

14 Boombia ka Mokonga, mmbe á na kobha ee!

Bɔjɛjɛ ka bakpa nɛkɛ, bundɔ ěkondi ee!

15 Cɔ, bii bamalaeka bédeketi ye babondigi ka ja abɔ na kobha, mpɔ babondigi báɔyɔngaga sɔsɔbɛ abɔ: «Bégɛni na Bhɛtɛlɛɛ́mu, bɛ́ɔnɛ ka kema nde ageani ko, nnde Mɔkɔta asophangi.» 16 Cɔ, báokamisaga gǎ, báǒdhonda Malía, Yɔsɛ́phu na bámɔyi mɔɛmba subi á ɔma á isa banyama. 17 Mbusa á ɔna a miki, báɔɛmbisa mbino nde malaeka déngodi ka phɔa mɔɛmba ndee. 18 Bakpa bɔbhu bundɔ dábaɔki nyɔngɔ nde babondigi dábaɔtɔmiaga, báoyayama. 19 Malía â gǎkɛ kobhisa nyɔngɔ ndɔ ka měma akɛ, áoianaga gǔ i.

20 Cɔ, babondigi-bamɔgɔgɔ báoja, báombhebha na dokomisa á Mokonga ka kema bhui nde dábaɔki na ɔna i. Nga, dátɔtɔkɛani bíndɔ malaeka děngodi.

Suá á Yéso ina

21 Esa á ko ngia njaga isaɔ (8) mbusa á bɔkɔtɛana akɛ, báongusa ganja. Báonsua ina akɛ Yéso, bíndɔ malaeka dáyɔngi, mosá á kumba á éme akɛ.

Bhisa á miki Yéso ka Mokonga

22 Esa á tokisa a ndiga ésomba, n'asóosia, ka beana n'ɛɔphi ndea Mósa, Yɔsɛ́phu na Malía, báonga na miki na Yɛusalɛ́ma, k'aphe á gɔba á nyɔngɔ nɛkɛ mosá á Mɔkɔta. 23 Nga, a tɔ bíndɔ dábadundu k'ɛɔphi ndea Mɔkɔta: «Ange-mǒko bhuakɛ, bámbhisɛ ka mpɛphɛ ka phɔa á Mɔkɔta.» 24 Ka bondɔ, báophuia ka phɔa á miki ɔphɛɔ nde ɛɔphi ndea Mɔkɔta asosi: «Kabɛ baniki á bamboe babɛ kabɛ baetítí babɛ .»

Simɛɔ́ni ambhebhi Mokonga ka phɔa á Yéso

25 Cɔ, nkpa moci dátú ka Yɛusalɛ́ma, ina akɛ Simɛɔ́ni. Dátú ntɔa-doni na ntɔa-konda á Mokonga phɛ̂. Dáom'bondeaga Namisi á baIsilaɛ́li. Měma á Mokonga dá kímoci na yɛ. 26 Měma á Mokonga dámǔbhisi gea, kákuɛku mosá á ɔna ka Kiísito mmbe Mɔkɔta anteki. 27 Měma á Mokonga áonteka, ágɛ k'endu á Mokonga.

Wa, babɔkɔti báɔmbhika na miki Yéso ka gɔba á nyɔngɔ nɛkɛ bíndɔ ɛɔphi ndea Mósa ayɔngi ka phɔa akɛ. 28 Simɛɔ́ni áɔmbhɛda miki ka njaga, áombhebha Mokonga n'embɔ ndee,

29 «Mɔkɔta! Mpɔ ye tɔ eme mbhɛdanigi nɛkɔ ómodeketa négɛ ka bɔjɛjɛ.

Nga, mɔkɔ nɛkɔ atɔtɔkɛani.

30 Ka nyɔngɔ nde iso ani aɔni boamia nɛkɔ,

31 nnde dɔ́bɔngisigi k'iso á bakpa bɔbhu:

32 ande gea owanga ka phangisia á batɔa ka mokonda bɔbhu,

n'ande phɔtɔ boombia ka batɔa-ekuna nɛkɔ, baIsilaɛ́li.»

33 Babɔkɔti á Yéso báotangaaga ka kema nde Simɛɔ́ni dáɔyɔnga ka phɔa Yéso. 34 Mpɔ, Simɛɔ́ni áobhisa njaga gǔ abɔ, áongodea amakɛ Malía be: «Eya, miki nde abhiki gea, baIsilaɛ́li básii báguande, buangbo bâ gǎkɛ ǒmesia ka nyɔngɔ akɛ. Abande gǎkɛ mphangiɔ nde bakpa báyande. 35 Ande gea, kanisia á ka bɔsɔmɛa ndea subi á měma á bakpa aubhikanande. K'ɔbɛ Malía, kokae á nyɔngɔ ndɔ aokiande ka měma bea ngɔa.»

Mɔɔtu-nyɔngɔ nke ina akɛ Ana

36 Mɔtu-nyɔngɔ nke dátú phɔtɔ k'ɔma ndɔ, ina akɛ Ana, muna-Phanuɛ́lɛ, k'ekuna ndea Asɛ́i. Dátú phomi phɛ̂. Dábaiki na munyaakɛ basaga ngia njaga ibɛ (7) k'eyamani á ka koseka akɛ. 37 Mbusa indɔ, áojiga nke á kekusa na kabii dájusi basaga nkama ngia njaga isaɔ na gena (84), n'atɔɔbhɛdanaga k'endu á Mokonga keiphe n'esa. Dáoikaga kanga á eaga ka nyɔngɔ á mɛma á Mokonga. 38 Ka mbenɔ ndɔ tɔ, áɔsɛkɛda mosá abɔ. Aombhebha Mokonga, áɔtɔmiaga nyɔngɔ á miki Yéso ka bakpa bɔbhu íbundɔ dábaobondeaga gea Mokonga áamisɛ Yɛusalɛ́ma.

39 Bágɔbi ye moangɔ á ɛɔphi ndea Mɔkɔta, nnde dábhisi ka nyɔngɔ á baniki, Yɔsɛ́phu na Malía báosikianaga ka nji nɛbɔ Najalɛ́ti á ka Galiláia.

40 Cɔ, miki ndɔ áɔmɔta, áokakamana ka měma, áotuma na kɔbɔngɛ. Bonjánja ékondi ndea Mokonga áoba ka yɛ.

Moganda Yéso k'endu ndea Mokonga

41 Cɔ, babɔkɔti á Yéso dábaogaga na Yɛusalɛ́ma ka saga bhui ka jaí á Pasáka. 42 Ka jaí moci, bii Yéso dátú na basaga nkama na babɛ (12), babɔkɔti akɛ báonga ně na Yɛusalɛ́ma bíndɔ dátú asii nɛbɔ.

43 Bii jaí ndɔ asi ye, báoja. Miki Yéso â tɔ ojiga na Yɛusalɛ́ma, abhakɛ n'amakɛ bákaubhɛ. 44 Báokanisia te aotamba na badhakɛ. Bâ goto otamba esa moci, mpɔ, báokpanga kaba akɛ ka nkindi á badhabɔ na bakpa nde báoúbhanaga na bɔ, 45 bákamɔɔnɛ. Ka bondɔ, bâ goto oja na Yɛusalɛ́ma na báonkabaga. 46 Bánkabi ye esa isaɔ, báondhonda k'endu á Mokonga n'aiki sɔsɔbɛ á baphangigi, n'aɔbɔka na úsianaga n'abɔ. 47 Bundɔ dábaɔmɔ̌ka, bɔbhu báotangaaga ka nyɔngɔ á ubhapha, na boabhi nɛkɛ.

48 Cɔ, bii babɔkɔti akɛ bámɔ̌ni ye, báoianaga! Mpɔ amakɛ áongodea be: «Ho! miki nɛmɔ, ekende ǒsogi ně bende? Nga, eme n'abhakɔ, měma asu atɔ́phɛngɛmani ka nkabɔ akɔ.»

49 Áǒsikisia te: «Eke nde boomokabea? Bókóuúbha gea te, akeni nébɛ sub'endu ndea Abhɛ?» 50 Bákadigimisɛ gǎkɛ cina á boabhi nɛkɛ. 51 Mbusa, â ye tɔ oga na bɔ na Najalɛ́ti, n'aɔbɔka babɔkɔti akɛ. Amakɛ áoamba nyɔngɔ ndɔ bhui anja ka měma akɛ.

52 Mpɔ Yéso áɔmɔta, â goto oba na kɔbɔngɛ phɛ̂, nndɔ áom'bɔngɛa Mokonga na bakpa.