Nyɔngɔ á bɔsɔmɛa angodokanande
(Ɔna phɔtɔ Mat 10.26-27)
12
1 Wa ndɔ, usɛsɛ á bakpa báotundukanaga. Báoba ɛɛphu na ɛɛphu na ka bii dábadɛtɛanigi. Yéso â phɔ kǒngodeaga bagoigi nɛkɛ mosá ka mpɛphɛ gea: «Bangani cacu ájede ndea baPhaisáiɔ. Ande gea te maibhe-maibhe nɛbɔ. 2 Nyɔngɔ bhui nde ɛ̌sɔmɛani, aubhikanande. Nndɔ á ka bɔsɔmɛa, angodokanande bhui. 3 Ka bondɔ, nyɔngɔ bhui nde bɔɔyɔnga ka kaiphiɔ, aɔɔkɛkanande sɔmani. Nnde bɔɔyɔnga ka kɔsɔ-kɔsɔ k'endu na báphati, bátɔmiagande akpɛ ka ntɔndɔ.»Ani mmbe akeni bóm'bangɛ?
(Ɔna phɔtɔ Mat 10.28-31)
4 Nenóngodi benu badhani: «Bókobɛmbɛ na kɔbɔbɔkɔ á bunde báomoa nyama á nkpa. Mbusa, bákageɛ ka kema. 5 Nenóphangiande mmbe akeni bóm'bangɛ. M'bangani ndiu Mokonga mmbe a na bukpɛkpɛ á maka anu ka nji á basía mbusa á kukua. Eya! Nenongodi ambe mmbɔ ambɔ akeni bóm'bangɛ.
6 Bánaǒsombisa bacíɔdɔ bɔku(5) ka miki á bangɔa babɛ(2)? Cɔ, Mokonga nna tanda om'bosea kabɔ moci. 7 A phɔtɔ oúbha sekamɔ angaani bo ně. Ka bondɔ, bókobangɛmbɛ nga, bɔ̌nyɛ́nyi bacíɔdɔ básii.»
8 «Nenogie, mmbe amomamei bhase, mosá á bakpa, eme Muna-Nkpa nemmameaeka phɔtɔ bhase mosá á bamalaeka ndea Mokonga. 9 Mmbe amoyé mosá á bakpa, nen'yaeka phɔtɔ mosá á bamalaeka ndea Mokonga.
10 Nkpa bhuakɛ, mmbe aɔyɔnga nyɔngɔ ájede gǔ á eme Muna-Nkpa, Mokonga aimande bojede nɛkɛ. Mmbe a gǎkɛ obhóma Měma á Mokonga, Mokonga káimɛku ndiu bojede nɛkɛ.
11 Mbenɔ nde báonóga ně k'endu á bɔphɛi na mosá á bakɔta na baamɛ, bókoianɛgɛmbɛ nyɔngɔ nde bǒsikisiande n'inde bɔ̌yɔngɛande sasanu. 12 Nga, Měma á Mokonga anógoisagande ka mbenɔ ndɔ tɔ, nyɔngɔ nde bɔyɔngande.»
Mɛní á ntɔi-mbhobho
13 Nkpa moci ka usɛsɛ á bakpa ndɔ áongodea Yéso te: «Mphangigi, ngodea munayi gea, békatisanɛ botiko nde abhasu dásosagei.» 14 Mpɔ Yéso áonsikisia te: «Moko, ani mmbe amobhisi nteni-nyɔngɔ, kabɛ ngabhi-nkumba nɛnu?»
15 Mpɔ, áǒngodea bɔbhu be: «Ɛngɛphani na nyɔngɔ á ekondi á ɛtɔi nga, enda á nkpa nna ka nyɔngɔ á nkumba nɛkɛ nanga ába ntɔi phɛ̂.»
16 Mpɔ, áɔ̌tɔmiaga mɛní ndee: «Ntɔi moci dátú na ciko nɛkɛ nnde mbo i dáphondi phɛ̂ ka mbenɔ á dungu. 17 Ka bondɔ, ntɔi ndɔ dáokanisia be, ‹ Negeande bo? Ke na ɔma ka bhisa dungu nɛmɔ bhui. › 18 Áogea, ‹ Negeande bendee, nɛngbɔɔande egbongbo. Nɛ́ɔphɛka angbo na ángbó phɛ̂. Mpɔ, néobhisa dungu nɛmɔ bhui na nkumba nɛmɔ bhui kau. 19 Mbusa, néǒsega sasani geae: Moko, o na nkumba ásii phɛ̂ ka saga ásii. Cɔ, umbia phɔ, eaga, ónoɛ, óguɛ jaí. › 20 Mpɔ, Mokonga áongea, ‹ Mbhobho nde ca! Ka keiphe nde tɔ, neutande měma akɔ. Cɔ, ani mmbe ajigande na nkumba ndɔ bii otóbhisi ka phɔakɔ?› » 21 Yéso aogea: «Bondɔ unge abande ka nkpa nde aodhondanisaga nkumba ásii ka phɔakɛ sasakɛ na nna n'ɛtɔi k'iso á Mokonga. »
Kabani phɔ nyɔngɔ á ka koboamɛ ndea Mokonga
(Ɔna phɔtɔ Mat 6.25-34)
22 Mbusa, Yéso â phɔtɔ ǒngodea bagoigi nɛkɛ: « Ka bondɔ unge nenógie, bókotambɛgɛmbɛ ka enda anu, kema sina nde boeande na bhɔngɔ nde bɔɔlande ka nyama anu 23 nga, eea nna na kantíti kɔnyɛ́nya enda anu. Bhɔngɔ nna phɔtɔ na kantíti kɔnyɛ́nya nyama anu. 24 Kanisiani phɔ bakungulu. Bánaokona, bána gǎkɛ odungua. Bána n'egbongbo na mukuumba. Mokonga aámbé aǒisa. Benu gǎkɛ bɔ̌nyɛ́nyi bambǔ! 25 Cɔ, bii bootambaga ka měma anu ndɔ, ka benu sina mmbe aɔtɔka n'atutuisi abhɔa esa á enda akɛ ka nyɔngɔ á tambaga kau? 26 Cɔ kabɛ na bɔ́kɔ́ɔtɔka kema abhɔa bíndɔ, ka nyɔngɔ sina nde bootambaga ka nyɔngɔ á kema nde ajigi?
27 Ɔnjiani phɔ maya á k'osaa. Maya nn'aɔbhɛdanaga, nn'aophopha bhɔngɔ. Negie, nanga moamɛ Sɔlɔmɔ́nɔ dátú n'ɛtɔi bhui, dákátɔi bhɔngɔ ánjá phɛ̂ bea maya. 28 Benu batɔa-beekea abhɔa nde ca! Mokonga aɔɔlisa ɔphɔ bhui á ka ciko nnde aɔtɛa k'esande na mama báomaka ka nsa. Cɔ, Mokonga kánɔɔlisande phɔtɔ ánjá kɔnyɛ́nya u!
29 Bókǒtambisɛgɛmbɛ ka nkabɔ á kema nde boeande n'inde bonoande. 30 Nga, batɔa ka mokonda bunde banaomuúbha Mokonga pɛ bá unge báotambeaga kema ndɔ bhui. Abhanu a gǎkɛ uúbha kema nde bona siki i. 31 Kabani phɔ nyɔngɔ á koboamɛ ndea Mokonga! Mbusa i, Mokonga aámbé anóphande kema nde anójiganei.
Bhisani ɛtɔi nɛnu mɔtɛ á Mokonga
(Ɔna phɔtɔ Mat 6.19-21)
32 Miki á nsamba á bamɔgɔgɔ nɛmɔ, bókobɛmbɛ na kɔbɔbɔkɔ! Nga Abhanu ana siki á opha anu koboamɛ nɛkɛ. 33 Sombisani nkumba nɛnu, bóbophɛ batɔa-buyɛnɛ bangɔa i. Bɔngisiani ndiu kanu njombi á na kobha, nnde nn'aoujukana. Phombeagani kanu ɛtɔi na kobha k'ɔma nde kabungɛeka, bakukuba bákadhondɛeka na bansɛngɛ bákaújɛeka 34 nga, ɔma nde ɛtɔi nɛnu abei, oa unge bobhisi phɔtɔ měma anu.
Ɛbɔngisiagani ka bondeaga Muna-Nkpa
35 Ikani tɔ na bɔɔli bhɔngɔ nɛnu á ekuma na ɔbhɛa nɛnu n'atɔ ǒtoboaga. 36 Báni bea babhɛdanigi na báom'bondeaga mɔkɔta nɛbɔ, mbenɔ nde aoja k'aphe á ɛkɛka, ka gea te bámǔkuiɛ kǐo mbenɔ nde agbondoagande u. 37 Abande maseye ka babhɛdanigi bunde mɔkɔta nɛbɔ ědhondande na bákádé. Nenongodi doni gea, mɔkɔta nɛbɔ aɔlande bhɔngɔ á ekuma, áǒikisa babhɛdanigi ka mɛja, áɔ̌bhɛdaneaga! 38 Aoba n'aju k'esa angedi dhakɛ kabɛ mbusa i na bákádé, abande phɔtɔ maseye ka babhɛdanigi ndɔ!
39 Ubhani phɔtɔ nnde: Nkukuba dábuni endu. Dátúoba mɛnɛ á endu n'aubhi mbenɔ sina nde nkukuba abhikande, ámbé dákábeeki gea, ábunɛ endu nɛkɛ. 40 Benu phɔtɔ, ɛbɔngisagani nga, bókóuúbha mbenɔ nde eme Muna-Nkpa nebhikande. »
41 Mpɔ Pɛ́tɛɛ áongea: « Mɔkɔta, mɛní ndɔ oosóngodeaga a tɔ ka besu, a phɔtɔ ka bakpa bɔbhu? »
42 Mɔkɔta áonsikisia te: « Ani mmbe ande mbhɛdanigi á doni n'ande mubhaphi? Nga mɔkɔta nɛkɛ ambhisi gǔ á badhakɛ ka gabhɛa abɔ eea mbenɔ nde bá na siki i. 43 Abande maseye ka mbhɛdanigi ndɔ, aobá́ mɔkɔta nɛkɛ n'andhondi n'aphɔ́tɔ ɔtɔtɔkisa ekuma ndɔɔ! 44 Nenongodi doni gea, mɔkɔta nɛkɛ amophande kɔkɔta gǔ á nkumba nɛkɛ bhui.
45 A gǎkɛ oba mbhɛdanigi ndɔ n'ěgi sasakɛ: « Oo! Mɔkɔta kábhikɛku soma. » Áokpanga binda á badhakɛ babhɛdanigi, bǒko na bake. Áoikia eaga na noa n'ɛbhɛdi á makana. 46 Mpɔ, mɔkɔta áobhika esa nde na mbenɔ nde mbhɛdanigi kásendi u. Ka bondɔ, mɔkɔta am'beagande na tena á nyɔngɔ nɛkɛ akpɛ bea bakpa nde bákám'beeki.
47 Ande gea te, mbhɛdanigi nde aoúbha mɔphɛ á mɔkɔta nɛkɛ, na nn'aɔtɔtɔkisa u, bám'bindande ásii. 48 Mmbe nna gǎkɛ oúbha mɔphɛ á mɔkɔta nɛkɛ, n'aogea ajede, bám'bindande abhɔa, ande gea te nkpa nde bámophi kema ásii, bámɛmande phɔtɔ kema ásii. Nkpa nde bámophi kɔkɔta ángbó, bámúsiagande ka kema ásii.
Yéso cina á katanaga
(Ɔna phɔtɔ Mat 10.34-36)
49 Cɔ: «Nebhiki ka mokonda k'aphe á makea nsab. Nekondi étoboɛ ye tɔ. 50 Nena obatisɔ nde nengiande gǎkɛ kau. Néotambaga phɛ̂ na ka bii negande ɔtɔtɔkisa u!
51 Bookanisia te nebhiki k'aphe á bhisa á bɔjɛjɛ ka mokonda? Nna bo! Nebhiki ndiu okatanisaga. 52 Kpanga á kɛ̌kɛ nde, bakpa bɔku á k'ekombo moci bákatanagande. Bakpa babɛ bákáɔkanɛku na bakpa basaɔ, bakpa basaɔ bákáɔkanɛku phɔtɔ na bakpa babɛ. 53 Eya, miki á nganja n'abhakɛ bákatanagande, abhɛí akatanagande n'anakɛ. Nseka n'amakɛ, bákatanagande, ameí akatanagande na nseka nɛkɛ. Nka-miki na nyamɔtɔ akɛ bákatanagande, nyamɔtɔ- eyamani na nka-anakɛ bákatanagande phɔtɔc. »
Ubha á matu
(Ɔna phɔtɔ Mat 16.2-3)
54 Yéso áǒngodea usɛsɛ á bakpa: « Mbenɔ nde bɔɔni egugu n'oyonga, bôgea, ‹ Asooɔka. › » Â tɔ ɔɔka. 55 Mbenɔ nde maphopho aotoka kusi bôgea, ‹‹ Mani abɛtande akpɛ. ›› Â tɔ oba bo. 56 Batɔa-maibhe-maibhe nde ca! Booúbha kantíti á mphangiɔ á ka odo n'ego. Cɔ, eke nde bókóoúbha mphangiɔ á ka matu nnde? »
Ɔkanani na m'bibia nɛkɔ mosá á tena á nyɔngɔ
( Ɔna phɔtɔ Mat 5.25-26)
57 « Eke nde bókóoúbha tena á nyɔngɔ sɔsɔbɛ anu ánjá? 58 Aoba na boge na m'bibia nɛkɔ ka ntua á tena nyɔngɔ, akeni ókabɛ aphe á ɔkana na yɛ na bophɔ́tɔ k'aphe ka gea, kakojusɛmbɛ ka ntua á bateni-nyɔngɔ nga, bákobhisande ka njaga á mɔkɔta, yɛ áokomakisa ka mekakɔ. 59 Nekongodi gea, kójuanɛku kó na kophendimbɛ bangɔa bhubhui. »