Mɛmani Mokonga be
(Ɔna phɔtɔ Mat 6.9-13; 7.7-11)
11
1 Esa moci, Yéso dáɔmɛma Mokonga k'ɔma moci. Bii agɔbi ye, ka bagoigi moci áomúsia: «Mɔkɔta, ósogoisaga ɛmɛmi bíndɔ Yoáni- M'batisi dégoisigi bagoigi nɛkɛ.»2 Yéso áǒngodea: «Mbenɔ nde bɔɔmɛma, yɔngani be, ‹
Abhɛ,
Ina akɔ ábɛ n'obhebhɔ.
Koboamɛ nɛkɔ ábhikɛ.
3 Ósopha eea nde akeni ka besu k'esande.
4 Íma bojede nɛsu
nga, besu sasasu be phɔtɔ oíma ka bakpa bɔbhu bojede nde basogii.
Kosódeketɛmbɛ ka mbenɔ á tombaga.›»
5 Â goto ǒngodea be: «Akoba ka benu n'ana dhakɛ, n'age ondhonda k'esa angɛndi dhakɛ áongea, ‹Dhani ɔ́mɔɛkisa phɔ bamokati basaɔ 6 nga, ka badhani moci amodhondi, n'atoki tamba. Cɔ ke na ka kema nde neomopha.›
7 Akoba mmbɔ a sub'endu n'ansikisii te, ‹Kómoagatisɛmbɛ nga, kɛ̌kɛ nde nephembeketi ye kǐo. Eme na baniki nɛmɔ běnanu. Ké ye ɔtɔka na němesi ka opha akɔ mokati.›
8 Cɔ, nenógie, nanga k'emesi ka opha akɛ nga ande dhakɛ, amophande tɔ kema bhui nde a na siki i nga, anagatisi kanga á soni. 9 Ka bondɔ unge nenongodi, mɛmani, bánophande. Kabagani, bɔɔnande. Gbondoagani kǐo, bánuúkuiande. 10 Nga, nkpa bhuakɛ mmbe aɔmɛma bámophande. Mmbe aokabaga, aɔnande. Mmbe aogbondoaga kǐo, bámukuiande.
11 Abha-miki sina sɔsɔbɛ anu aɔtɔka n'amophi anakɛ njɔka n'ammɛmi ndiu súa? 12 Aɔmmɛma eke, amophande nkoto? 13 Benu gǎkɛ, nanga bii bonde batɔa-ajede, bókó tɔndɔ ǒgabhea bananu kema ánjánja? Cɔ, Abhanu mmbe a na kobha, anɔ́nyɛ́nyi doni k'egabhɔ. Eóphande phɔtɔ Měma á Mokonga nɛkɛ bunde báommɛma.»
Yéso nn'aɔɔngana na bansombo
( Ɔna phɔtɔ Mat 12.22-30; Malíkɔ 3.22-27)
14 Yéso dáǒjuanisa bansombo subi á kauma. Bii bansombo ndɔ bájuani ye, kauma ndɔ áokpanga yɔnga. Usɛsɛ á bakpa báotangaaga phɛ̂. 15 Bunɛngbo gǎkɛ, báogea: «Yéso aǒjuanisa bansombo ka bukpɛkpɛ á Bɛljɛbhúlib, mɔkɔta ndea bansombo.» 16 Bunɛngbo báontombaga ka kaba mphangiɔ báubhɛ gea te, Yéso atoki na kobha doni.
17 Yéso aubhi ye kanisia nɛbɔ, áǒgea te: «Aoba batɔa ka koboamɛ moci na bákatanigi, koboamɛ ndɔ áoújukana, endu ndɔ áɔngbɔɔkana. 18 Aoba Sɛtáni n'aǒmanisa sasakɛ, koboamɛ nɛkɛ aendande bo? Negi bo nga, bogi te neǒjuanisaga bansombo ka bukpɛkpɛ á Bɛljɛbhúli. 19 Akoba n'ande doni gea te, neǒjuanisa bansombo ka bukpɛkpɛ á Bɛljɛbhúli, cɔ ani mmbe ěbophi gǎkɛ bakpa nɛnu bukpɛkpɛ á juanisa á bansombo? Ka nyɔngɔ indɔ unge bakpa nɛnu bátenande nyɔngɔ nɛnu. 20 Cɔ, eme gǎkɛ, bii neǒjuanisa bansombo ka bukpɛkpɛ á miki á njaga á Mokongac, ande gea te koboamɛ ndea Mokonga anódhondi.
21 Mbenɔ nde nkpa akpɛkpɛ n'ana nkumba á emani aoamba endu nɛkɛ, ande gea te nkumba nɛkɛ aiki ka bɔjɛjɛ. 22 A gǎkɛ oba ntɔa-bukpɛkpɛ kɔnyɛ́nya yɛ n'ankíndi, áomuta nkumba á emani ndɔ yɛ abhisi i měma, â phɔtɔ ogabha nkumba bhui nde amuti.
23 Nkpa nde káɔngani n'eme, ande m'bibia ani. Mmbe nn'aomoenga ka dhondanisaga, aophanja.
Bansombo bánjii goto nkpa
( Ɔna phɔtɔ Mat 12.43-45)
24 Mbenɔ nde bansombo báojuana ka nkpa, báoga ka nkanda ka kabaga ɔma á buiki. Bii bákaɔni, báǒgea sasabɔ: «Cɔ, bejande mɔtɛsu subi á endu nɛsu nnde betoki kau.» 25 Ka ja abɔ, báodhonda endu na báphǔ na bábɔngisi. 26 Mpɔ, báoga ɔ̌bhɛda badhabɔ bansombo bundɔ ba ajede kɔ̌nyɛ́nya bɔ mɔngɔ ngia njaga ibɛ(7). Bâ ye tɔ oga oika oa. Mbusa i, nkpa ndɔ dátú na bansombo ndɔ, â ye tɔ oba ajede phɛ̂ kɔnyɛ́nya mosá.»
Maseye á doni
27 Mbenɔ nde Yéso dáɔyɔnga nyɔngɔ ndɔ, nke moci n'aka usɛsɛ áɔngodea n'ɛsɔ akpɛ gea: «Maseye ka nke ndɔ dáɔbɔkɔti na ungisa akɔ.»
28 Yéso â gǎkɛ ǒsikisia te: «Maseye a ndiu ka bundɔ báɔɔka nyɔngɔ á Mokonga na tɔtɔkisa i.»
Nyɔngɔ á k'esa nde anyɛ́nyi nnde á kala
( Ɔna phɔtɔ Mat 12.38-42)
29 Bii usɛsɛ á bakpa dábabombotanigi, Yéso áǒgea te: «Ɛbɔkɔti ndea k'esa nde aájede. Báokaba négeɛ ka bɔ ketangaɔ. Báɔnande tɔ ketangaɔ moci, nnde akengeani n'inde á Yɔ́na. 30 Nga, bii Yɔ́na dátú mphangiɔ á ketangaɔ ka batɔa ka Nináwed, bondɔ unge eme Muna-Nkpa nebande k'ɛbɔkɔti ndea k'esa nde.
31 Esa á tena á nyɔngɔ, nke moamɛ ndea Sɛ́bha ɛ̌tɔngaeka batɔa k'ɛbɔkɔti nde, áotena nyɔngɔ nɛbɔ akpɛ nga, dátoki ka nji á danga phɛ̂ kubii mokonda age osungiaga k'aphe á ɔka á nyɔngɔ á kɔbɔngɛ ndea moamɛ Sɔlɔmɔ́nɔe. Kɛ̌kɛ nde gǎkɛ, nyɔngɔ á k'esa nde anyɛ́nyi nnde á Sɔlɔmɔ́nɔ.
32 Esa á tena á nyɔngɔ, batɔa-Nináwe bɛ́tɔngaeka batɔa k'ɛbɔkɔti ndee. Báotena nyɔngɔ nɛbɔ akpɛ nga, dábagai tambea abɔ bii dábaɔki bɔphɛi ndea Yɔ́naf. Kɛ̌kɛ nde gǎkɛ, nyɔngɔ á k'esa nde anyɛ́nyi nnde á Yɔ́na.»
Iso ande ɔbhɛa á ka nyama á nkpa
( Ɔna phɔtɔ Mat 5.15; 6.22-23)
33 «Nna na nkpa nde aotoboa ɔbhɛa ka sɔmɛa i, kabɛ ka gbukumia i na mbekag. Bá ndiu ɔbhɛɛngisa ka ngeɔ ka gea te, bunde báongia báɔnɛ oanga i. 34 Iso akɔ ande ɔbhɛa á ka nyama akɔ. Aoba iso akɔ na ánja, nyama akɔ bhui áoba n'oanga. A gǎkɛ oba n'iso akɔ na ájede, nyama akɔ áoba ka kaiphiɔ. 35 Bii abo, ɛngɛpha ka gea te oanga nde a subi akɔ kěketiɛmbɛ ka kaiphiɔ. 36 Aoba nyama akɔ bhui n'ana oanga na kau nna ka kaiphiɔ, abande k'oanga bea bii ɔbhɛa aokojegisia n'oanga nɛkɛ.»
Kitɔngi ka baPhaisáiɔ na baphangigi-ɛɔphi
( Ɔna phɔtɔ Mat 23.1-36; Malíkɔ 12.38-40)
37 Bii Yéso dágɔbi yɔnga, moPhaisáiɔ moci áɔmɔphanea eea mɔtɛakɛ. Wa, Yéso áongia, áoika ka mɛja. 38 MoPhaisáiɔ ndɔ, bii dáɔni gea te, Yéso dákásokosi njaga mosá á eaga, áotangaaga.
39 Mpɔ Mɔkɔta Yéso áongodea: «Cɔ benu baPhaisáiɔ, bootetemisa sokosa caá n'ɔphɛphɛ ka ngɔngɔ i, měma anu n'atumi gǎkɛ na kokae na bojede. 40 Babhobho nde ca! Nkpa nde abɔngisigi ngɔngɔ á kema nna tɔndɔ yɛ aámbé abɔngisigi subi i? 41 Cɔ, óbophani batɔa-buyɛnɛ kema nde a subi anu. Mpɔ, nyɔngɔ nɛnu bhui â ye tɔ oba ánjá.
42 Ngomi ka benu baPhaisáiɔ! Boongabhea Mokonga phaeka moci á nkama á kema abhɔbhɔbhɔa nde aɔɛkɛmisaga eeah. Bô ndiu ɔbɛnjiaga kodoni n'ekondi ndea Mokonga. Akeni ndiu bótɔtɔkisɛ nndɔ kanga á deketa nndɔ á mosá.
43 Ande ngomi ka benu baPhaisáiɔ, botookonda ika ka kakaanga á mosá subi á endu á bɔphɛi. Bokondi phɔtɔ bánoseseɛ ka ntanga.
44 Ande ngomi ka benu! Bo bea bhota á kaa, nnde bakpa báotámbaga gǔ i na báka ye oúbha.»
45 Wa, ka baphangigi-ɛɔphi moci áongea te: «Mphangigi, ɔɔyɔnga bondɔ, ande gea osóbhomi phɔtɔ.»
46 Yéso áonsikisia: «Ngomi anu phɔtɔ baphangigi-ɛɔphi nga, boókumbisa bakpa nkumba adoko ka kumba i, na benu bókótanda okonda samboa kau na miki á njaga moci. 47 Ngomi anu! Nga, bɔɔphɛkɛa bhota á baɔtu-nyɔngɔ á kala, bundɔ batata anu dáběme. 48 Nndɔ aúbhisi gea te, bobeekeani na batata anu ka kema nde dábagi nga, bɔ baunge dáběme baɔtu-nyɔngɔ. Benu, bɔ̂phɛkɛa bhota abɔ. 49 Nyɔngɔ ndɔ ungɔ Mokonga aengekisi ka kɔbɔngɛ nɛkɛ, ‹Nětekisiande baɔtu-nyɔngɔ na bateki. Bémande ka bɔ na tambisaga á bunɛngbo.› 50 Ka nyɔngɔ indɔ unge magia á baɔtu-nyɔngɔ bɔbhu, bundɔ dáběme ka kpanga á mokonda na k'esa nde, a ka mɔ á batɔa k'ɛbɔkɔti ndea k'esa nde. 51 Nndɔ dákpangi na duukana á magia ndea Abhɛ́li na ka bii magia ndea Jakalía dáduukani. Eya, dábamoe Jakalía sɔsɔbɛ á ɛtɛ-ɔphɛɔ na ɔma á boombia á sub'endu á Mokongai. Eya, nenongodi nyɔngɔ ndɔ bhui a ka mɔ á batɔa k'ɛbɔkɔti ndee.
52 Ngomi anu baphangigi-ɛɔphi! Ka nyɔngɔnde bophembeketi kǐo á ubhapha na benu sisanu bókóongia kau. Bondiu ǒimisia bunde bá na siki á ngia.»