Teka á bateki nkama ngia njaga ibɛ na babɛ (72)
(Ɔna phɔtɔ Mat 10.5-14)
10
1 Mbusa índɔ, Mɔkɔta áɔ̌sɔmbɔa bakpa bunɛngbo nkama ngia njaga ibɛ na babɛ (72), áǒteka babɛ-babɛ mosá akɛ ka nji na ka kenombe bhui nde yɛ sasakɛ dáogea ágɛ kau. 2 Aǒngodea: «Cɔ, dungu á ásii, batɔa-dungu bá gǎkɛ bábhɔa. Ka bondɔ, mɛmani mokoo á dungu étekɛ badungu básii ka dungua i. 3 Cɔ, gǎni! Nenóteki bea baniki á bamɔgɔgɔ ka nkindi á bangbee. 4 Bɔ́kɔbhɛdɛmbɛ bangɔa, maibɔta na biato. Bókobungisɛmbɛ mbenɔ ka seseaga bakpa.5 Akoba na bongi k'endu, geani phɔ, ‹Bɔjɛjɛ ábɛ k'endu ndee.› 6 Akoba ntɔa-bɔjɛjɛ n'abei, nsesɔ á bɔjɛjɛ nɛnu áɔngɔna. A gǎkɛ oba na nna bo, bɔjɛjɛ áonójiia. 7 Ikani k'endu ndɔɔ. Eani, noani kema bhui nde bánophi. Nga, mbhɛdanigi akeni n'ophendɔ nɛkɛa. Bókotoɛgɛmbɛ gǎkɛ endu k'endu.
8 Mbenɔ nde boongia ka kenombe moci na bánosesi, eani eea nde báonópha. 9 Óamisani phɔtɔ basambi á ka nji ndɔ na ngodea bɔ te, ‹Koboamɛ ndea Mokonga a ye tɔ bhíbhí anu.› 10 A gǎkɛ oba na bongi ka kenombe moci na bákánosesi, tokani bei bɔ́yɔngɛ be, 11 ‹ Benócicii kemungɛ á ka kenombe nɛnu nnde asódakati k'ecinjib. Ubhani gǎkɛ gea, koboamɛ ndea Mokonga a ye tɔ bhíbhí.› 12 Nenógie, esa á tena á nyɔngɔ, batɔa ka kenombe ndɔ bátambagaeka phɛ̂ kɔ̌nyɛ́nya batɔa ka Sɔdhɔ́mac.»
Kenombe danga-danga nde bakpa báyé beekea
( Ɔna phɔtɔ Mat 11.20-24)
13 Yéso dági phɔtɔ: «Hoo, ngomi anu batɔa-Koajíni. Hoo, ngomi anu batɔa-Bhɛtɛsaídha nga, atúkoba batɔa ka Tílɔ na Sidhɔ́na dábaɔni ketangaɔ nde ageani mɔtɛanu, ámbé dábaiki k'ebhu na ɔla bhɔngɔ á kekusa ka mbenɔ énda.d 14 Esa á tena á nyɔngɔ, botambagande phɛ̂ kɔ̌nyɛ́nya batɔa ka Tílɔ na Sidhɔ́na. 15 Na benu batɔa na Kapɛɛnaúmu, bookanisia te, Mokonga anótaisande na kobha? Anódhidhisande ndiu ka nji á basíe.»
16 Wa, Yéso áǒngodea bagoigi nɛkɛ: «Nkpa nde aɔnɔɔka, amɔɔki phɔtɔ. Mmbe anóyé gǎkɛ, amoyé. Mmbe amoyé, an'yé ndiu mmbe amoteki.»
17 Mbusa á tamba nɛbɔ, bateki ndɔ nkama ngia njaga ibɛ na babɛ (72), báoja na batumi na maseye phɛ̂, báogea: «Mɔkɔta, bansombo dábatú phɔtɔ ɔsɔ́ɔka k'ina akɔ.»
18 Mpɔ, Yéso áǒgea: «Dɛ́mɔɔni Sɛtáni n'agu ka toka na kobha bea phenua á mbua. 19 Ɔkani phɔ! Dénóphi kɔkɔta á dɛtɛa á banjɔka, bankoto na bukpɛkpɛ bhubhui á m'bibia-Nketi. Ka kema ajede kánogeɛku. 20 Bii abo, bókobɛmbɛ na maseye ka nyɔngɔ á beaga á bansombo. Bani ndiu na maseye ka nyɔngɔ nde bádundu ina anu na kobha.»
Maseye ndea Yéso
( Ɔna phɔtɔ Mat 11.25-27; 13.16-17)
21 Ka mbenɔ ndɔ tɔ, Yéso áotuma na maseye ka bukpɛkpɛ á Měma á Mokonga. Áɔmɛma be: «Hoo! Abhɛ, Mɔkɔta á ka mokonda na kobha, neosikisii bosegi nga, ɔsɔ̌mi moangɔ nɛkɔ ka baubhaphi na batɔa-kɔbɔngɛ, ô ndiu obhisa bhase ka baniki bábhɔbhɔa. Eya, Abhɛ! A bó nga, bondɔ unge dókondi.»
22 Â phɔtɔ ogea: «Abhɛ amopi kɔkɔta á kema bhui. Nna na nkpa nde aomoúbha Miki mǒkof tɔndɔ Abhɛ. Nna na nkpa nde aomuúbha Abhɛg, na nna tɔndɔ Miki mǒko, na mmbe Miki mǒko akondi phangia akɛ.»
23 Mbusa, Yéso áǒphaia nci nde bagoigi nɛkɛ baɔ, áǒngodea bɔ sasabɔ te: «Bosegi ka bakpa bɔbhu bunde báɔɔna nnde bɔɔni. 24 Negie, baɔtu-nyɔngɔ básii na baamɛ, dábatú na siki á ɔna á kema nde bɔɔni, bákaɔnɛ. Na ɔka á kema nde bɔɔki, bákaɔkɛh.»
Mɛní á moSamalía anjanja
25 Mbusa, mphangigi-ɛɔphi moci áoma, áokaba tombaga á Yéso, áomúsia: «Mphangigi, négeɛ bo, nébɛ na enda á mɛyɔi?»
26 Yéso áonsikisia: «Cɔ, kema sina nde bádundu subi á buku á ɛɔphi? Ekende ootanga subi i?»
27 Nkpa ndɔ áonsikisia te: «Ónkondambɛ Mɔkɔta nɛkɔ Mokonga ka měma akɔ bhui, ka enda akɔ bhui, ka bukpɛkpɛ akɔ bhui na ka kanisia akɔ bhui. Nkonda phɔtɔ dhakɔ bíndɔ ǒkondi sasakɔj.»
28 Yéso áongodea: «Osikisi boabhi ánjá. Gea tɔ bo, mpɔ óoba na enda á mɛyɔ.»
29 Mphangigi-ɛɔphi â ndiu okaba úbhisa gea muisiɔ ndɛkɛ atɔ á doni. Wa, â goto omúsia Yéso te: «Ani mmbe ande dhani?»
30 Mpɔ Yéso áonsikisia: «Nkpa moci dátoki na Yɛusalɛ́ma, áodhidha na Yɛíkɔ. Bii dáotamba, bakukuba báondhunga, báomuta kema bhui nde dátú ně, báom'binda, báon'deketa n'asóodɔɛa. Báoga nɛbɔ. 31 Cɔ, ntobei-phɛa ndea Mokonga dáodhidha k'aphe ndɔɔ. Amɔ̌ni tɔ nkpa ndɔ, áom'bamboa. 32 MoLáwi moci â phɔtɔ ojua k'ɔma ndɔ, áɔmɔ̌na, â goto tɔ om'bamboa. 33 Bii moSamalía dátú ɔnyɛ́nya k'aphe ndɔ, áojua bhíbhí akɛ. Áɔmɔ̌na, â gǎkɛ onkuia ngomi phɛ̂. 34 Wa, áɔnsɛkɛdɛa, áon'dukia gamba na makana ánjɛk k'aphɛphɔa, áoboaga na phaeka á bhɔngɔ. Mpɔ, áonkambisa ka mponda nɛkɛ, áonga ně k'endu á bakɛni, áonsakoa kó. 35 Mama i, áomphenda mɛn'endu na bangɔa ibɛ. Aongea be, ‹Namba k'ani nkpa ndee. Kabɛ n'obungisi bangɔa nɛngbo gǔ inde, nekojisiande ka ja ani.›»
36 Yéso áotutuisa yɔnga: «Cɔ, k'obɛ gǎkɛ, ka bakpa basaɔ ndɔ, ani mmbe ande dhakɛ na nkpa ndɔ bakukuba dábam'bindi?»
37 Mphangigi-ɛɔphi áonsikisia: «Mmbɔ dánkui ngomi.»
Yéso áongodea: «Cɔ gǎ! Ogeɛ phɔtɔ bondɔ.»
Yéso mɔtɛa Malía na Maatá
38 Bii Yéso na bagoigi nɛkɛ dábatú otamba, báojua ka nji nde nke moci, ina akɛ Maatá děsesi kau. 39 Nke ndɔ dátú gǎkɛ n'aɔakɛ ina akɛ Malía. Malía áobhika oika bhíbhí á Mɔkɔta, ka ɔka á bɔphɛil.
40 Maatá dâ gǎkɛ n'ekuma ásii phɛ̂ á unanaga i. Ka bondɔ, áombhikia Yéso, áongodea: «Mɔkɔta, kophɔ tanda oianaga bii aɔani amodeketei unanaga sasani? Cɔ, ngodea pɛ ámoengɛ.»