Teka á bateki nkama na babɛ
(Ɔna phɔtɔ Mat 10.5-15; Malíkɔ 6.7-13)
9
1 Mbusa, Yéso áǒdhondanisa bateki nkama na babɛ (12), áǒbopha kɔkɔta na bukpɛkpɛ á beaga á bansombo bɔbhu na amisa á basambi. 2 Mpɔ áǒteka ka tɔ̌miaga á nyɔngɔ á koboamɛ ndea Mokonga na amisa á basambi. 3 Áǒngodea be: «Bɔ́kɔbhɛdɛmbɛ ka kema ka tamba. Kabɛ motumbɔ, maibɔta, mokati, bangɔa. Nkpa na nkpa kabɛmbɛ na ngɔmbɛ á k'egogo ibɛ. 4 Endu nde báonósesea kau, ikani subi i na ka bii bɔmɛande. 5 Cɔ, aobá́ batɔa ka kenombe na báyé sesea anu, tokani ka kenombe ndɔ, bóciciɛ nkaa á k'ecinji anua ka ubhisa abɔ gea te, nyɔngɔ ěguiaeka.» 6 Mpɔ, bateki báoga na báɔtɔmiaga Nyɔngɔ Ánjá ndea Mokonga nji ka nji, bâ phɔtɔ ǒamisa batɔa-esambɔ k'ɔma bhui.Ianaga ndea Ɛlɔ́dɛ kaphɔa Yéso
( Ɔna phɔtɔ Mat 14.1-12; Malíkɔ 6.14-29)
7 Bii Ɛlɔ́dhɛ moamɛ á ka Galiláia dáɔki nyɔngɔ nde dágeani, áoianaga, nga bakpa buangbo dábaogea te: «Yoáni-M'batisi dájujuki ka kukua.» 8 Buangbo báogea: «Ɛlía, aámbɔ asɛnɛki.» Buangbo bâ goto ogea: «Ka baɔtu-nyɔngɔ á kala aámbɔ ajujuki ka kukua.» 9 Mpɔ, Ɛlɔ́dhɛ áoianaga gea: «Eme aámbé détenisi mɔ á Yoáni. Cɔ, ani mmbɔ nɛɔɔka nyɔngɔ ásii ka phɔakɛ bo?» Ka bondɔ, áokaba ɔna akɛ.
Isa á usɛsɛ á bakpa
(Ɔna phɔtɔ Mat 14.13-21; Malíkɔ 6.30-44; Yoáni 6.1-14)
10 Ka ja abɔ, bateki báɔntɔmiaga Yéso kema bhui nde dábagi. Mpɔ Yéso áɔ̌bhɛda, áǒga na bɔ sasa bɔ bha-kenombe nde báɔɔphana Bhɛtɛsaídha. 11 Bii bakpa dábaúbhi gǎkɛ bo, bâ tɔ om'bea kó. Yéso áǒsesea, áɔ̌tɔmiaga nyɔngɔ á koboamɛ ndea Mokonga, â phɔtɔ ǒamisa bundɔ dába na siki á boamia.
12 Bii esa akpangi gɔgɔmana, bagoigi nkama na babɛ (12) báɔsɛkɛda bhíbhí á Yéso, báongodea: «Cɔ, ójisa bakpa, bágɛ ka nji na ka motumbe nde a bhǐbhibhi, ka kabaga eea n'endu, nga oani be ka nkanda.»
13 Yéso â ndiu ǒgea: «Benu sasanu baunge ǒphani kema á koea.»
Báonsikisia te: «Bɛtɔndɔ na mokati bɔku na basu babɛ. Cɔ, okondi bégesombɛ eea ka bakpa nde bɔbhu?»
14 Dábatú oa, bǒko bea ɛɛphu bɔku (5000). Wa, Yéso áǒgea bagoigi nɛkɛ: «Óikisani bakpa etunda moci moci á bapka nkama bɔku bɔku (50).»
15 Bagoigi báobeekea, báǒikisa bakpa ka odo.
16 Bii Yéso abhɛdi mokati bɔku na basu babɛ ndɔ, áɔɛnjia na kobha, áonsega Mokonga ka nyɔngɔ á eea ndɔɔ. Áobunaga u, áǒpha bagoigi ka gabhea usɛsɛ á bakpa. 17 Bɔbhu báoeaga, báokuta. Mbusa i, bagoigi báɔkɔngɔa gbutu-gbutu á dhue i, báotumisa jɔ nkama na ibɛ (12)b.
Pɛ́tɛɛ abeeki gea Yéso ande Kiísito
(Ɔna phɔtɔ Mat 16.13-19; Malíkɔ 8.27-29)
18 Esa moci, Yéso dáɔmɛma Mokonga k'ɔma á bɔsɔmɛa, yɛ na bagoigi nɛkɛ. Wa, áǒbuisia te: «Usɛsɛ á bakpa nde báogea te, nende ani?»
19 Bagoigi báonsikisia te: «Bakpa buangbo báogea, onde Yoáni-M'batisi. Buangbo báogea Ɛlía. Buangbo bâ goto ogea, ka baɔtu-nyɔngɔ á kala aámbé ajujuki ka kukua.»
20 Yéso â goto ǒúsia: «Cɔ, benu gǎkɛ bogi nende ani?»
Mpɔ Pɛ́tɛɛ áonsikia te: «Onde Kiísito mmbe ba Mokonga.»
Yéso atɔ̌mi kukua akɛ na jujuka akɛ
( Ɔna phɔtɔ Mat 16.20-28; Malíkɔ 8.30-9.1)
21 Mpɔ, Yéso áɔ̌ɔkusaga akpɛ gea, bákangodeɛ mɔnɔ ka nkpa nyɔngɔ ndɔ. 22 Â phɔtɔ ǒúbhisa: «Akeni eme Muna-Nkpa nétambɛgɛ phɛ̂, bagbɛga, bakɔta á batobei-phɛa na baphangigi-ɛɔphi bámoyɛgɛ na kusa ani. Mpɔ k'esa á ko isaɔ, ne jujukande ka kukua.»
23 Â phɔtɔ ǒngodea bɔbhu be: «Aoba nkpa n'akondi bea ani, akeni ábɛ na nkanisiɔ á gea te, enda akɛ nna kema. Ákumbɛ me á nkpatɔ nɛkɛ esa bhui, ámobeɛ. 24 Nga, nkpa nde akondi amisa á enda akɛ, abungisande u. Mmbe a gǎkɛ obungisa u ka nyɔngɔ ani, aamisande enda akɛ. 25 Cɔ, ana kantíti sina aobá́ nkpa n'atɔi nkumba bhui á ka mokonda n'abungisi ndiu enda akɛ, kabɛ n'ětukatuki sisakɛ? 26 Aoba nkpa n'aku na soni ka nyɔngɔ ani, kabɛ ka bɔphɛi nɛmɔ, eme Muna-Nkpa, nekuande phɔtɔ na soni ka nyɔngɔ akɛ, esa nde nebhikaeka ka boombia nɛmɔ na nnde á Abhɛ, na nnde á bamalaeka nɛkɛ.
27 Doni! Nenoúbhisi gea, ka bakpa nde bá wani, bákákuɛku na bákáɔni koboamɛ ndea Mokonga.»
Úbhikana á boombia á Yéso
( Ɔna phɔtɔ Mat 17.1-8; Malíkɔ 9.2-8)
28 Esa ngia njaga isaɔ (8) mbusa i, Yéso áɔm'bhɛda Pɛ́tɛɛ, Yoáni na Yakɔ́bɔ, áodapha na bɔ gǔ á mamba k'aphe á mɛma á Mokonga. 29 Bii dáɔmɛma, keongi akɛ áǒketia mosá abɔ, ngɔmbɛ nɛkɛ áoba ábhu, áophenuaga bhiɛ! bhiɛ! 30 Kɛ̌kɛ ndɔ, báɔ̌bɔna bǒko babɛ na báɔyɔngaga na Yéso. Bǒko ndɔ dábatú Mósa na Ɛlía. 31 Dábasɛnɛki subi á boombia á na kobha. Dábaɔyɔngaga na Yéso ka nyɔngɔ á bii Yéso atɔtɔkisande moangɔ nɛkɛ á kukua na Yɛusalɛ́ma. 32 Cɔ, Pɛ́tɛɛ na badhakɛ tɔ̌ dɛ́bhɛdi phɛ̂. Bii dábajujuki, báɔɔna boombia á Yéso na bǒko babɛ ndɔ bii dábamamege na yɛ c. 33 Bii bǒko babɛ ndɔ bákpangi ye deketana na Yéso, Pɛ́tɛɛ áongodea: «Mphangigi, aánjá béikɛ oa. Cɔ, bɛ́phɛkɛ ngbangba isaɔ: moci k'ɔbɛ, moci ka Mósa, moci ka Ɛlía.» Ande gea te, Pɛ́tɛɛ dákáengekisi nyɔngɔ nde dáɔyɔnga.
34 Cɔ, bii dá phɔ́tɔ ɔyɔnga, egugu áobhika, áǒgbukumia. Bagoigi báoba na kɔbɔbɔkɔ bii báɔni iimbiɔ á egugu n'ěgbukumi. 35 Mpɔ, ɛsɔ áɔɔkɛkana k'egugu ndɔ te: «Mmbe ande miki nɛmɔ mmbe dénsɔmbu. Mɔ̌kani yɛd.»
36 Mbusa á ɔka ɛsɔ ndɔ, bâ ye tɔ ɔmɔ̌na Yéso sasakɛ. Mbusa indɔ bagoigi báɔkɔ́ba phio! Kánga á tɔmia á nkpa ka kema ndɔ dábaɔni.
Amisa á ntɔa-kukua á bansombo
( Ɔna phɔtɔ Mat 17.14-18; Malíkɔ 9.14-27)
37 Mama i, bii Yéso na bagoigi nɛkɛ dábadhidhi mamba, báodhondana na usɛsɛ á bakpa básii. 38 Sɔsɔbɛ á usɛsɛ ndɔ, mǒko moci áɔyɔnga akpɛ áogea: «Mphangigi neodengemisigi, mɔ̌na ka miki nɛmɔ, nga a tɔ ngɔmu. 39 Bansombo báontenaga phɛ̂, na bá phɔtɔ onkogisaga, báonsugaga akpɛ na ka bii phuu aophuphutaga k'aphɛnɔkɔ akɛ. Báontambisaga, báon'deketa k'akpɛ. 40 Nědengemisigima bagoigi nɛkɔ gea, bétokisɛ bansombo ndɔ. Bákáɛtɔkɛ.»
41 Mpɔ Yéso áogea: «Oo!, Benu ɛbɔkɔti á kanga beekea nde ca! Ka mbenɔ kungaani nde neikande na benu? Ka mbenɔ kungaani nde nenóphiphiande? Cɔ, mbhika na miki nɛkɔ wani.»
42 Bii miki dáɔsɛkɛda bhíbhí á Yéso, bansombo báommaka ka odo, báonsuga akpɛ phɛ̂. Yéso áǒnkeea, áonamisa miki, áonsikisia abhakɛ. 43 Ka bondɔ, bakpa bɔbhu báotangaaga bukpɛkpɛ á Mokonga.
Yéso atɔ̌mi goto kukua akɛ
(Ɔna phɔtɔ Mat 17.22-23; Malíkɔ 9.30-32)
Bâ phɔtɔ otangaaga kema bhui nde Yéso dági. Mpɔ, Yéso áǒngodea bagoigi nɛkɛ,
44 «Kodani kecue anu ánjá ka nyɔngɔ nde nɛɔnɔtɔmia kɛ̌kɛ nde. Eme Muna-Nkpa, bámobhisande ka njaga á bakpa.»
45 Dábakádigimisi gǎkɛ nyɔngɔ ndɔɔ, nga kantíti i dákátu ka bɔ bhase. Ka bondɔ, bâ phɔtɔ obanga uisia á Yéso.
Ani mmbe ande mɔkɔta?
( Ɔna phɔtɔ Mat 18.1-5; Malíkɔ 9.33-37)
46 Mbusa, bagoigi báopua ka ubha gea, ani mmbe ande mɔkɔta sɔsɔbɛ abɔ. 47 Bii Yéso dáubhi ye gǎkɛ nyɔngɔ nde dábaopua kau, áɔmbhɛda miki, áommesa bhíbhí akɛ. 48 Aǒgea te: «Nkpa nde ansesi miki nde k'ina ani, amosesi phɔtɔ. Nkpa nde amosesi, ansesi phɔtɔ mmbe amoteki. Nga, nkpa nde aǒdhidhisa sɔsɔbɛ anu aámbé ande mɔkɔta.»
Mmbe káɔkangi aogami
( Ɔna phɔtɔ Malíkɔ 9.38-40)
49 Yoáni áongea: «Mphangigi, bɛmɔɔni nkpa n'aǒbeaga bansombo k'ina akɔ. Béogea bénimisiɛ nga, nna ka besu.»
50 Yéso áonsikisia: «Bókonimisiɛmbɛ. Nga, aobá́ nkpa na nna m'bibia nɛnu, ámbé andiu nkpa nɛnu.»
Yaga á Yéso ka Samalía
51 Bii esa á ja á Yéso na kobha dá ye tɔ bhíbhí, Yéso áosuia mesa á tamba ka gǎ na Yɛusalɛ́ma. 52 Wa, áokpanga teka á batɔmi-mbino mosá akɛ. Báge ye, báojua ka nji moci á batɔa ka Samalía, ka gea te bábɔngisiɛgɛ k'akɛ ɔma. 53 Batɔa ka nji ndɔ, bákakondɛ sesea akɛ wa nga, dáoga na Yɛusalɛ́ma. 54 Bii bagoigi, Yakɔ́bɔ na Yoáni báubhi ye bo, báomúsia Yéso: «Mɔkɔta, okondi bɛ́mɛmɛ nsa, átokɛ na kobha, ábhikɛ ɛkɛkisɛgɛ bɔe?» 55 Mpɔ, Yéso áǒphaia kubii báɔ, áǒpheneaga.
56 Mpɔ, bâ ye tɔ oga ka nji nɛngbo.
Bea á Yéso
( Ɔna phɔtɔ Mat 8.19-22)
57 Na bá phɔ́tɔ k'aphe, nkpa moci áongea Yéso: «Nekobeande k'ɔma bhui nde ooga.»
58 Yéso áongodea: «Bakɛnsɛngɛ bá na kubhu. Bambǔ, bá na ibɔ. Eme Muna-Nkpa ké gǎkɛ n'ɔma á maka kamonga.»
59 Â phɔtɔ ongodea nkpa moci: «Ómobea!»
Nkpa ndɔ áongodea: «Mɔkɔta, ómososea phɔ négɛ némǔmbɛ abhɛ.»
60 Yéso áongodea: «Ódeketa bakpa nde báku béumbe bakpa nɛbɔ ibundɔ báku. Obɛ gǎkɛ, gǎ ɔtɔ̌miɛgɛ nyɔngɔ á koboamɛ ndea Mokonga.»
61 Nkpa ba angbó áongodea: «Mɔkɔta, neobeande. Ómososea phɔ, négɛ ɔkɔanɛ n'ekombo nɛmɔ.»
62 Yéso áongodea: «Nkpa nde aokpanga gubha n'aɔɛnjia mbusa, kákeni ábɛ mbhɛdanigi ka koboamɛ ndea Mokonga.»