Yoáni 6

Yéso aǒisa bǒko ɛlɛphu bɔku (5.000)

(Ɔna phɔtɔ Mat 14.13-21; Malíkɔ 6.30-40; Lóka 9.10-17)

1 Mbusa índɔ, Yéso áokaia etuu á Galiláia, nnde bá phɔtɔ ɔɔphana Tibɛlía. 2 Usɛsɛ ángbó á bakpa báombea nga, dábaɔni mphangiɔ á ketangaɔ nde dáɔtɔtɔkisa ka amisa á batɔa-esambɔ. 3 Yéso na bagoigi nɛkɛ, báotaia gǔ á mamba, báoika ko. 4 Maseye á Pasáka ndea baYúdha dátú bhíbhí. 5 Yéso áomesia iso, áɔɔna usɛsɛ á bakpa na báombhikia. Mpɔ, áongea Philípɔ: « Cɔ, besombande eea ka isa á bakpa nde súani? » 6 Dáyɔngi bo ka tomba akɛ nga, dáoúbha kema nde ageande. 7 Philípɔ â gǎkɛ onsikisia te: «Nanga beba na bgutuka á bangɔa mia ibɛ (200), nnaɔtɔka n'asombi mokati nde nkpa na nkpa atɔande mikia gbutuka i. » 8 Ka bagoigi nɛkɛ moci, ina akɛ Andeé, munamakɛ na Simɔ́ni Pɛ́tɛɛ, áongodea Yéso gea, 9 « Moganda moci a oani. A na mokati bɔku na basu babɛ. Cɔ, nndɔ a gǎkɛ kema sina ka bakpa básii bende? » 10 Yéso áogea: « Cɔ, óikisani ka odo. » (Ɔma ndɔ dátú phɔtɔ na manganga ásii.) Mpɔ báoika, bǒko dábatú bea bakpa elɛphu bɔku (5.000). 11 Mpɔ, Yéso áoboa mokati ndɔ, áonsega Mokonga k'ɛmɛmi, áogabha u ka bakpa nde dábatú oa. Â phɔtɔ ogea bo na basú, nkpa na nkpa áoea bíndɔ akondi.

12 Bii bákuti ye, Yéso áǒngodea bagoigi nɛkɛ: « Kɔngɔani dhue ka gea, kau katukanɛ. » 13 Báɔkɔngɔa dhue á mokati bɔku nde bái, báotumisa jɔ nkama na ibɛ. 14 Bii bakpa báɔni ye Yéso n'atɔtɔkisi ketangaɔ ndɔ, báogea: «Doni, mmbe ande Mɔtu-nyɔngɔ mmbe dákeni bhika ka mokonda. » 15 Bii Yéso dáúbhi gea, bakpa dábáogea bábhikɛmbhɛdɛ ka bhisa akɛ moamɛ ka bukpɛkpɛ nɛbɔ, ka bondɔ, â goto otaia mamba yɛ sasakɛ.

Yéso aotamba gǔ á ibo

( Ɔna phɔtɔ Mat 14.22-33; Málikɔ 6.45-52)

16 Cɔ, dábi ye ɔgɔgɔ, bagoigi nɛkɛ báodhidha na motii à etuu. 17 Kó, báokambea ka koko, ka gǎ nci á na Kapɛɛnaúmu. Esa dáge oipha Yéso na k'édhondimbɛ. 18 Kɛtɛmbɔ áodengisa etuu phɛ̂ nga, sumbu dátú akpɛ. 19 Mbusá á tamba á bɔ ka koko bea kilɔmɛtɛɛ bɔku (5), kabɛ ngia a njaga (6), báɔmɔ̌na Yéso n'aotamba gǔ á ibo ka bhiimisa á koko. Mpɔ, báoba na kɔbɔbɔkɔ. 20 Yéso â gǎkɛ ǒngodea te: «Bókobangɛmbɛ, eme aámbɔ! » 21 Bii dábaokonda kambisa akɛ ka koko, kɛ̌kɛ ndɔ tɔ koko â gǎkɛ áodhundhua ɔma nde dábagɛndɛi.

Usɛsɛ á bakpa báonkaba Yéso

22 Mama i, usɛsɛ á bakpa nde dábajigi kubhi á etuu, báodigimisa gea, koko dátú tɔ oa moci. Dábaúbhi gǎkɛ gea, Yéso dákákambi na bagoigi nɛkɛ subi i. Bagoigi sasabɔ tɔndɔ, baunge dábage. 23 Mpɔ, koko nengbo ásii nnde átoki na kenombe á Tibɛlía áokidia bhíbhí á oma nde dábaigi mokati mbusa á Mɔkɔta sega á Mokonga. 24 Mbenɔ nde usɛsɛ á bakpa ndɔ dábadigimisi gea, Yéso kabɛ bagoigi nɛkɛ, dábákátú oa, báokambea ka koko ndɔ, báoga onkaba Yéso na Kapɛɛnaúmu.

Yéso ande mokati á endisa

25 Bii bándhondi ye Yéso kubhi á etuu, báomúisia: «Mphangigi, mbenɔ sina nde okidima koni?» 26 Yéso áǒsikisia gea te: «Eya, nenongodi doni gea, botoomokaba nga, dóboi mokati, bóokuta, nna ndiu gea, bodigimisi kantíti á mphaniɔ á ketangaɔ nde nɛtɔtɔkisi. 27 Bɔ́kɔ́bhɛdanɛgɛmbɛ ka nyɔngɔ á eea nde aoujukana, ábɛ ndiu ka nyɔngɔ á eea nde aoendisa mɛyɔ. Eea ndɔ, eme Muna-Nakpa, aámbé nenóphande nga, Abhɛ Mokonga amophi kɔkɔta i.» 28 Mpɔ, báomúisia: «Ka bhɛdanaga ekuma ndea Mokonga, begeande bo?» 29 Yéso áǒsikisia te: «Ekuma nde Mokonga akondi ka benu, ande beekea á mmbe anteki.» 30 Bâ gǎkɛ ongea: «Cɔ, mphangiɔ á ketangaɔ sina nde ɔtɔtɔkisande ka gea te bɛɔnɛ u na beekea akɔ? Kema sina nde ɔtɔtɔkisande? 31 Batatasu dábai mána ka nkanda, bíndɔ bádundu subi á buku á Mokonga: Débophi mokati, n'atoki na kobha ka ea i.» 32 Mpɔ Yéso áǒgea te: «Neno ngodi doni gea, nna Mósa aámbé dánophi mokati n'atoki na kobha. Abhɛ ndiu aámbé aonópha mokati á doni, nnde á na kobha. 33 Nga, mokati ndea Mokonga aunge aotoka na kobha, áǒbopha batɔa ka mokonda enda á mɛyɔ.» 34 Bâ gǎkɛ ongodea: «Mɔkɔta, ósopha mokati ndɔ esa bhubhui.»

35 Mpɔ, Yéso áɔ̌tɔmia be: «Nende Mokati á endisa. Mmbe amobhikii, kákuɛku tanda na nja na mmbe amobeeki, kákuɛku tanda n'ɛnyɔta. 36 Dénongodi gǎkɛ nndɔ: Nanga bɔmɔɔni ye, bókóomobeekea. 37 Bakpa bɔbhu bunde Abhɛ amopi, bámobhikiande, Mmbe amobhikii kém'beɛgɛku tanda. 38 Nga, bii nedhidhi na kobha, nna ka tɔtɔkisa á mɔphɛ nɛmɔ, andiu ka tɔtɔkisa á mɔphɛ á mmbe dámoteki. 39 Mɔphɛ á mmbe amoteki ande gea te, kém'bungisɛmbɛ mɔnɔ ka bunde dámopi. Nenjujukisɛ ndiu ka kukua k'esa á sungiaga á mokonda. 40 Cɔ, mɔphɛ á Abhɛ á be: Mmbe aɔmɔɔna Muna-Mokonga na beekea akɛ, ábɛ na enda á mɛyɔ na nénjujukisande k'esa á sungiaga á mokonda.»

41 Cɔ, baYúdha báɔngɔngɔneaga Yéso ka nyɔngɔ nde dági: «Nende mokati nde atoki na kobha.» 42 Báɔyɔnga gea: «Nga Yéso ambe, muna-Yɔsɛ́phu na Malía. Cɔ, kɛ̌kɛ nde agi, atoki na kobha ka bo?»

43 Yéso áǒsikisia te: «Bɔ́kɔngɔngɔnɛgɛmbɛ sɔsɔbɛ anu. 44 Nna na nkpa nde aɔtɔka n'abhiki mɔtɛamɔ, Abhɛ mmbe amoteki n'akámɔphani. Na eme, nenjujukisaeka ka kukua esa á sungiaga á mokonda. 45 Cɔ, baɔtu-nyɔngɔ dábadundu be, ‹Mokonga aámbé ěgoisagande bɔbhu.› Nkpa bhuakɛ mmbe aɔki nyɔngɔ ndea Abhɛ na bɔphɛi nɛkɛ, aámbé abhikande mɔtɛamɔ. 46 Ka bakpa kamɔ̌nimbɛ mɔnɔ Abhɛ, na nna tɔndɔ mmbe atoki mɔtɛa á Mokonga, yɛ tɔ aámbé amɔ̌ni Abhɛ. 47 Eya, nenongodi doni gea, mmbe abeeki, ana enda á mɛyɔ. 48 Eme nende mokati á endisa. 49 Batatanu dábai mana ka nkanda, bâ gǎkɛ okua. 50 Cɔ, mokati nde atoki na kobha, nkpa nde aoea u, kákuɛku. 51 Nende mokati á endisa, nnde atoki na kobha. Aoba nkpa n'ai ka mokati ndɔ, aendande mɛyɔ. Mokati ndɔ, ande kesuku ani, nnde něgabheande batɔa ka mokonda ka gea, bábɛ na enda.»

52 Ka bondɔ, baYúdha báokpanga pua ngungu abɔ phɛ̂. Báuusianaga: «Mogaa nde aɔtɔka opha asu kesuku akɛ gea, beeɛ ka bo?» 53 Yéso áǒgea te: «Nenóngodi doni gea, aobá́ na bókói kesuku á Muna-Nkpa na bókónu magia akɛ, bókóbɛku na enda. 54 Mmbe aoea kesuku ani na noa á magia ani, anaenda á mɛyɔ, na nenjujukisande ka kukua esa á sungiaga á mokonda. 55 Nga, kesuku ani ande eea á doni, na magia ani ande kema á onoa á doni. 56 Mmbe aoea kesuku ani na noa á magia ani, eme neiki subi akɛ na yɛ aiki subi ani. 57 Abhɛ mmbe amoteki ana enda na enda ani atoki ka yɛ. A phɔtɔ bo ka mmbe aoea kesuku ani, abande na enda ka nyɔngɔ ani. 58 Cɔ, ɔnani mokati nde dátoki na kobha. Nna bíndɔ batatanu dábai báokua. Mmbe a gǎkɛ oea mokati nde, aendande mɛyɔ.» 59 Dáyɔngi nndɔ bii dátú ogoisaga k'endu á bɔphɛi ndea baYúdha á na Kapɛɛnaúmu.

Nyɔngɔ nde aoendisa mɛyɔ

60 Mbusa á ɔka á nyɔngɔ ndɔ, Ka bagoigi nɛkɛ básii báogea: «Yɔnga nde a akpɛ. Ani mmbe aɔtɔka n'abeeki u?»

61 Bii Yéso aubhi ye gea, bagoigi nɛkɛ báɔngɔngɔnɛaga nyɔngɔ ndɔ, áǒgea: «Nyɔngɔ ndɔ anóphi ngaka? 62 Cɔ, abande bo aobá́ na bɔɔmɔɔna eme, Muna-Nakpa na neotaia ɔma nde détú mosá? 63 Měma á Mokonga a unge aoendisa. Nga, nkpa sasakɛ nn'aɔtɔka ka kema. Nyɔngɔ nde dénongodi, ande Měma na enda. 64 Nyɔngɔ ndɔ gǎkɛ ungɔ bunɛngbo sɔsɔbɛ anu bánaobeekea.» Nga, Yéso déǔbhi kpanga á kala bunde dábákábeeki, na mmbé antɔngande. 65 Mpɔ, Yéso â goto ǒgea: «Ka nyɔngɔ indɔ unge dénóngodi gea, nkpa nn'aɔtɔka n'amobhikii aobá́ Abhɛ n'akámophi aphe.»

66 Kpanga á mbenɔ ndɔ, ka bagoigi nɛkɛ básii báǒjujia na deketa á tamba kimoci na yɛ. 67 Mpɔ, Yéso áǒbusia bagoigi nkama na babɛ: «Benu phɔtɔ, bookonda bógɛ?» 68 Simɔ́ni Pɛ́tɛɛ â gǎkɛ onsikisia: «Cɔ, Mɔkɔta, begande mɔtɛ ani? Nga, ona nyɔngɔ á endisa á mɛyɔ. 69 Bebeeki u na ubha i gea, onde Ntɔa-bonjánja ndea Mokonga.» 70 Yéso áǒsikisia: «Dɛ́kénɔsɔmbu phɔ benu Nkama na babɛ, nanga moci sɔsɔbɛ anu ande nketi?» 71 Dáɔyɔnga ka phɔa á Yúdha muna-Simɔ́na Isikaliɔ́ta. Nanga dátú sɔsɔbɛ a bagoigi nkama na babɛ, yɛ aámbe antɔngaeka.