Yoáni 5

Yéso anamisi nkpa moci esa á Sabáto

1 Mbusa índɔ, Yéso áoga na Yɛusalɛ́ma ka jaí moci ndea baYúdha. 2 Cɔ, na Yɛusalɛ́ma, bhíbhí á kǐo nde báɔɔphana kǐo á baMɔgɔgɔ, dátu na ntogɔ moci nnde dábatúɔɔphana ka kiƐbhulanía Bɛtɛsáidha. Kó, dábaphɛki mɔɛba bɔku, á ngeɔ. 3 Basambi básii, dábade subi á mɔɛba ndɔɔ. Ande gea, bakeíme-íme, badɔti, baphɛphi ecinji na njaga. [Dábaobondeaga gea báemisɛgɛ ibo 4 nga, Malaeka ndea Mɔkɔta dáodhidha ka mbenɔ moci ka ntogɔ ndɔ, áoémisaga ibo. Nsambi nde dáodhidha k'ama mosá-mosá subi á ibo nde aoémanaga, dáoama ka kukua nɛkɛ, nanga ába kukua sina.]

5 Cɔ, nkpa moci dátú oa, n'ade n'esambɔ basaga nkama isaɔ na ngia á njaga isaɔ (38). 6 Bii Yéso amɔ̌ni n'ade, n'adigimisi gea, asambi ka basaga básii, áomuisia: « Cɔ, okondi óamɛ? » 7 Ntɔa-esambɔ áonsikisia gea: « Mɔkɔta, kéna nkpa nde aomoguisa suibi á ntogɔ mbenɔ nde báoemisaga ibo nga, mbenɔ nde eme neobhika, nkpa bangbo áoguia mosá ani. » 8 Yéso â gǎkɛ ongea: « Má, bhɛda kɛsɛ nɛkɔ, ótambɛ! » 9 Mɔngɔ moci, nkpa ndɔ áoama, áobhɛda kɛsɛ nɛkɛ, áotámba. Cɔ, esa kau dátú gǎkɛ esa á Sabáto. 10 Ka bondɔ, bakɔta ndea baYúdha, báongea nkpa ndɔ dábanamisi gea: « Caa! K'esa nde, ande Sabáto. Kokeni kumba á kɛsɛ nɛkɔ. » 11 Yɛ â gǎkɛ ǒsikisia: « Mmbe atómoamisi, yɛ aámbé amogi, ‹ Bhɛda kɛsɛ nɛkɔ, ótambɛ. › » 12 Mpɔ, baYúdha ndɔ báomuisia: « Ani mmbe atoongodi, ‹ Bhɛda kɛsɛ nɛkɔ, ótambɛ?› » 13 Nkpa ndɔ dákámǔbhi gǎkɛ mmbe anamisi nga, Yéso dándǐ k'iso á usɛsɛ á bakpa bunde dábatú oa.

14 Mbusa i, Yéso â goto ondhonda nami ndɔ subi á endu á Mokonga, áongea: « Cɔ, oami, kogeɛmbɛ ye bojede ka banga te, kema ajede phɛ̂ kaokidianeɛmbɛ. » 15 Mpɔ, nkpa ndɔ áoga, áɔ̌tɔmia bakɔta ndea Yúdha gea, Yéso aámbé dánamisi. 16 Ka bondɔ, baYúdha báɔntɔmbisaga Yéso nga, dábhɛdanigi nndɔ esa á Sabáto. 17 Yéso â gǎkɛ ǒsikisia te: « Abhɛ aɔbhɛdanaga esa bhui, n'eme ne phɔtɔ ɔbhɛdanaga. » 18 Ka nyɔngɔ á boabhi ndɔ, bakɔta ndea baYúdha báonkaba phɛ̂ gea bámoɛ nga, dákábuni tɔndɔ ɛɔphi á Sabato, dáyɔngi phɔtɔ gea, Mokonga ande Abhakɛ, áǒkengeanisa na yɛ.

Muna-Mokonga ana kɔkɔta

19 Yéso â goto osikia yɔnga, áǒngodea be: «Nenongodi doni: Miki, nnaɔtɔka n'agi ka kema ka yɛ sasakɛ, a tɔ ogea nnde aɔmɔ̌na Abhakɛ n'aogea nga, kema bhui nde Abhɛ aogea, aunge Miki aphɔtɔ ogea u. 20 Nga, Abhɛ ankondi Miki, aunge aomphangia kema bhui nde yɛ sasa akɛ aogea. Yɛ, amphangiande phɔtɔ kema ángbó kɔnyɛ́nya nnde ka gea te, bótangaɛgɛ. 21 Nga, a tɔ bíndɔ Abhɛ aǒjujukisa básí ka kukua na endisa abɔ goto, aphɔtɔ bó unge Anakɛ aon'endisa nkpa buakɛ mmbé akondi endisa akɛ. 22 Nna ye na ka nkpa nde Abhɛ aotena nyɔngɔ nɛkɛ akpɛ, Yɛ, amophi ndiu Anakɛ kɔkɔta bhui á tena á nyɔngɔ akpɛ, 23 ka gea te bakpa bɔbhu bán'dokomisɛ Miki bíndɔ báon'dokomisa Abhakɛ. Cɔ, mmbe nnaon'dokomisa Miki, nna phɔtɔ ondokomisa Abhakɛ mmbe anteki.

24 Eya, nenongodi doni gea, mmbe aɔɔka nyɔngɔ nɛmɔ na beekea á mmbe amoteki, ana enda á mɛyɔ. Bakátenɛku nyɔngɔ nɛkɛ akpɛ nga, atingi ye kukua, áoba na enda á mɛyɔ. 25 Eya, nenongodi doni gea, mbenɔ aobhika, n'a ye bhiki, básí báɔkande ɛsɔ á Muna-Mokonga, na Bunde báɔkande ɛsɔ ndɔ, báendande. 26 Nga, a tɔ bíndɔ Abhɛ ande cina á enda ákɛ sasa akɛ , amophi phɔtɔ Miki cina á enda ka yɛ sasakɛ. 27 Amophi phɔtɔ Miki kɔkɔta á tena á nyɔngɔ akpɛ, ka nyɔngɔ nde ande Muna-Nkpa. 28 Bókotangaɛgɛmbɛ nyɔngɔ nde: Mbenɔ aobhika, nnde básí bɔbhu bunde bá subi á bhota báɔkande ɛsɔ akɛ, 29 mpɔ, báojuana subi i. Bunde dábagi anja, báojujuka, báoba na enda. Bunde dábagi gǎkɛ ajede, báojujuka, ka tena nyɔngɔ nɛbɔ akpɛ. 30 Kɛ́ɔtɔka na netɔtɔkisi ka kema k'eme sasa ani. Ne tɔ otena nyɔngɔ bíndɔ Mokonga aomososea. Neotena nyɔngɔ doni nga, kéokaba tɔtɔkisa á mɔphɛ nɛmɔ, tɔndɔ mɔphɛ á mmbe amoteki.

Bamamei á kɔkɔta ndea Yéso

31 Aoba na nemamei nyɔngɔ nɛmɔ eme sasani, nyɔngɔ nde nɛɔyɔnga kabɛku á doni. 32 Cɔ, a gǎkɛ na nkpa bangbo mmbe amamei nyɔngɔ nɛmɔ, na eme neoúbha gea, nyɔngɔ nde yɛ amamei ka phɔani ande doni. 33 Nga, dóbǒteki bakpa mɔtɛa á Yoáni-M'batisi, na yɛ, â gǎkɛ omamea nyɔngɔ á doni. 34 Cɔ, eme kéna siki á nkpa á ka mokonda nde ka mamea á nyɔngɔ nɛmɔ. Nɛyɔngi gǎkɛ tɔ nnde ka gea bóamɛ ka měma. 35 Cɔ, Yoáni-M'batisi dátú bea ɔbhɛa nde aoola na bhɛnya. Bô ndiu obeekea ika na maseye ka mbenɔ abhɔa ka oanga ndɔ. 36 Nyɔngɔ nɛmɔ nnde bámamei a gǎkɛ angbó phɛ̂ kɔnyɛ́nya nnde á Yoáni-M'batisi. Ekuma nde Abhɛ Mokonga amopi ka tɔtɔkisa i, ekuma ndɔ tɔ unge aomomamea gea, yɛ aámbé amoteki. 37 Cɔ, Abhɛ, mmbe amoteki, yɛ sasakɛ a phɔtɔ omomamea. Bɔ́kɔ́ɔkimbɛ mɔnɔ tanda ɛsɔ akɛ na ɔna á keongi akɛ. 38 Nyɔngɔ nɛkɛ nnaoika subi anu ka nyɔngɔ nde, bókóom'beekea mmbe anteki. 39 Bɔɔcɔcɔa buku á Mokonga nga, bookanisia te, subi i, ana nyɔngɔ á enda á mɛyɔ. Cɔ, buku ndɔ ungɔ atoomamea nyɔngɔ ani. 40 Nanga ába bó, bókókondi gǎkɛ bhikia ani ka ba na enda á mɛyɔ.

41 Kéokaba boombia ka bakpa. 42 Cɔ, nenoúbhi gǎkɛ. Benu sasanu bókó n'ekondi ndea Mokonga subi anu. 43 Débhiki k'ina á Abhɛ, bókómosesi. Aoba nkpa n'abhiki gǎkɛ k'ina akɛ sasakɛ, bonseseande! 44 Benu íbunde bookonda édokomisa benu ka benu, bókókabɛ ndiu boombia nde atoki ka Mokonga sasakɛ, bɔtɔkande beekea bo? 45 Bókókanisiɛmbɛ gea, nɛnɔ́tɔngaeka mosá á Abhɛ. Mósa, mmbe bosebei ɛɔphi nɛkɛ, aámbé anɔ́tɔngande. 46 Kabɛ na botóm'beeki Mósa, aámbé bomobeeki phɔtɔ nga, yɛ dádundu ka phɔani. 47 Aoba na bókóbeeki nyɔngɔ nde yɛ dádundu, bobeekeande gǎkɛ nyɔngɔ ínɛmɔ bo? »