Yoáni 4

Yéso aɔyɔngaga na nke moSamalía

1 BaPhaisáiɔ dábaɔki gea te, Yéso déphangigi bagoigi básii na batisa abɔ kɔnyɛ́nya Yoáni-M'batisi. 2 (Dákátú gǎkɛ Yéso aámbé aobá́tisa.) Dátú ndiu bagoigi nɛkɛ. 3 Cɔ, Yéso dáɔki ye maca ndea baPhaisáiɔ, áotoka na Yudhɛ́a, â goto oja na Galiláia. 4 Ka jua akɛ kó, dákeni yɛ ányɛ́nyɛ kenombe ndea Samalía. 5 Ka bondɔ unge, Yéso áojua ka nji á ka Samalía moci nde báɔɔphana Sikái. Sikái dátú bhíbhí á odo nde Yakɔ́bɔ dámophi anakɛ Yosɛ́phu+ \fr 4.5 \ft Ɔna Nkpangeɔ 33.19; Yɔsúa 24.32.. 6 Ntogɔ ndea Yakɔ́bɔ dátú gǎkɛ oa. Cɔ, bii Yéso dáɛi ye na tamba, â ye tɔ oika bhíbhí i. Dátú gǎkɛ kantende.

7 Cɔ, nke moci moSamalía, áobhika odhoga ibo. Mpɔ, Yéso áongodea: « Mopa ibo á onoa. » 8 (Nga, bagoigi nɛkɛ dábage na kenombe gea, básombɛ eea.) 9 Nke moSamalía ndɔ, áongodea Yéso: « Ama bo? Obɛ moYúdha, ɔmɔmɛmi eme, nke moSamalía, ibo á onoa? » (Nga, baYúdha, na baSamalía, dábákáɔɔkana+ \fr 4.9 \ft Lóka 9.52-53.) 10 Cɔ, Yéso áonsikisia gea: « Otú uúbha egabhɔ ndea Mokonga, ô phɔtɔ omuúbha mmbe aongodi, ‹ Mopa ibo á onoa. › Obɛ ámbé otú ndiu ɔmmɛma yɛ, atókophande ibo á enda. » 11 Mpɔ, nke ndɔ áongodea: « Mɔkɔta, kóna kema á dhogea n'ibo nga, ntogɔ ka u adhúmani. Otoki gǎkɛ na ibo nde a na enda oa? 12 Ande gea te, o na boombia kɔnyɛ́nya tatasu Yakɔ́bɔ, mmbe dásóphi ntogɔ nde? Nga, yɛ, banakɛ n'etuge nɛkɛ bhui dába phɔtɔ onoa u. » 13 Yéso áonsikisia gea te: «Nkpa bhuakɛ, mmbe aonoa ibo nde, akuande goto n'ɛnyɔta. 14 Mmbe andiu onoa ibo nde neomopha, kákueku ye tanda n'ɛnyɔta. Nga, ibo nde neomopha, abande subi akɛ bea ntoɔ nde aophuphutisa enda á mɛyɔ+ \fr 4.14 \ft Isáia 12.3; Yɛɛmía 2.13;17.13.. » 15 Nke ndɔ áongea: « Mɔkɔta, ómopa ibo ndɔ gea te, kekuɛmbɛ ye n'ɛnyɔta na bhika á dhoga ibo oani. »

16 Mpɔ, Yéso áongodea: « Gǎ, ɔ́mɔphanɛ munyakɔ, bóbhikɛ na yɛ oani. » 17 Yɛ, áonsikisia te: « Kéna mǒko. »

Yéso áongea: « Ɔyɔngi tɔ doni gea, kéna mǒko. 18 Nga, dótú na bǒko bɔku. Mmbe ona yɛ kɛ̌kɛ nde, nna gǎkɛ munyakɔ. Eya, ɔyɔngi tɔ doni. » 19 Nke ndɔ áongodea: « Mɔkɔta, nɛɔni gea te, onde mɔtu-nyɔngɔ. 20 Negie, batatasu dábaon'dokomisa Mokonga ka mamba ndee. Cɔ, benu baYúdha, bogi gea, oma nde akeni ka dokomisa á Mokonga ande Yɛusalɛ́ma+ \fr 4.20 \ft Ka nyɔngɔ á katanaga á baYúdha na baSamalía, baSamalía báɔphɛka endu a Mokonga inɛbɔ ka mamba nde baɔɔphana Gaisímu, mamba nde a bhíbhí a Sikɛ́mu á kala na Yɛusalɛ́ma. Ɔna Jabhúi 122.1-4.. » 21 Yéso áongea: « Ómobeekea, esa aobhika, nnde bókóngbukiɛku Abhɛ Mokonga muanku, kabɛ ka mamba nde, kabɛ ka Yɛusalɛ́ma. 22 Benu baSamalía, bókóuúbha nnde boodokomisa. Besu baYúdha, beuúbha nnde beodokomisa ka nyɔngɔ nde, boamia á ka měma atoki mɔtɛsu+ \fr 4.22 \ft Isáia 2.3; baLɔ́ma 9.3-4.. 23 Cɔ, mbenɔ aobhika n'a ye tɔ bhíbhí, batɔa-dokomisa á doni bándokomisande Abhɛ ka Měma na ka kodoni nga, bundɔ bá unge Abhɛ aǒkaba ka ba batɔa-dokomisa akɛ. 24 Mokonga ande Měma, ka bondo unge bunde báombhebha ambe bámbhebhɛ ka měma na ka kodoni. » 25 Nke ndɔ áongea te: «Neoúbha gea Masía, mmbé báɔmɔphana Kiísito, aobhika. Mbenɔ nde yɛ abhikande, asoúbhisande kema bhui. » 26 Mpɔ, Yéso áongea: « EME NENDE EME, aámbé nɛɔyɔnga n'obɛ. »

27 Oa, bagoigi nɛkɛ báojua, báoyayama bii Yéso aɔyɔngaga na nke. Ka bondɔ, nna na kabɔ moci mmbé dátɔki úsia á nke: « Eke nde ookaba? » na úisia á Yéso « Nyɔngɔ sina nde ɔɔyɔngaga na nke nde? » 28 Cɔ, nke áodeketa mbik'ibo nɛkɛ oa, áosikianaga ka kenombe, kó áǒngodea bakpa, 29 « Cɔ, bhikani, bɔ́mɔ̌nɛ nkpa nde atómongodi kema bhui nde dégi. Cɔ, nna phɔ́ Kiísito aámbɔ? » 30 Ka bondɔ, bakpa báojuana ka kenombe, báoga kubii Yéso aɔ.

31 Ka mbenɔ ndɔ bagoigi báondengemisaga gea te: « Mphangigi cɛɛ, eaga! » 32 Yɛ, áǒgea: «Bókóoúbha eea nde eme ne ně ka ea i. » 33 Mpɔ, bagoigi báoianaga sɔsɔbɛ abɔ: « Ka bakpa atómbhikii na kema á koea? » 34 Yéso áǒgea: « Eea nɛmɔ ande tɔtɔkisa á mɔphɛ á mmbé amoteki na gɔba á ekuma nɛkɛ. 35 Cɔ, benu bókóogea, ‹ Ajigi goto basonge gena, mpɔ bédunguɛ? › Nenógie, bhisani phɔ́ iso anu, bóɛnjiɛ phɔ́ ciko. Mbo atɔɔki ye tɔ ka dungua i. 36 Ntɔa-dungu a ye tɔ n'ophendɔ nɛkɛ, aphɔtɔ odhondanisaga mbo ka nyɔngɔ á enda á mɛyɔ. Cɔ, ntɔa-ekona na ntɔa-dungu bá tɔ na maseye kimoci. 37 Ka bondɔ, mɛní nde, ande doni, ‹ Nkpa moci aokona, bangbo áodungua. › 38 Ka bondɔ unge eme netónoteki ká dungua ka ciko nde bókótambigi ka u. Bakpa buangbo dábátambeigi, benu bǒgani gǎkɛ k'ekuma nɛbɔ. »

39 Cɔ, baSamalía básii á ka kenombe ndɔ báom'beekea Yéso ka nyɔngɔ á boabhi nde nke ndɔ dědigimisii gea: « Atómongodi kema bhui nde dégi. » 40 Bii baSamalía bám'bhiimisi ye, báon'dengemisaga gea, áikɛ na bɔ. Mpɔ, Yéso áoika kó esa ibɛ. 41 Bakpa básii phɛ̂ bâ phɔtɔ obeekea ka nyɔngɔ á boabhi nɛkɛ. 42 Babeeki ndɔ báongodea nke ndɔ te: «Békébeeki tɔ ka nyɔngɔ índe ɔsɔ́tɔ̌mi. A ndiu ka nyɔngɔ nde bɛɔki nɛsu sisasu na beoúbha gea, mmbe ande Namisi á batɔa ka mokonda doni. »

Yéso anamisi anakɛ na ka baamɛ angbóngbó moci

43 Mbusa á b'esa babɛ ndɔ, Yéso áɔmɛa oa, áoga na Galiláia. 44 Cɔ, Yéso yɛ sasakɛ dáyɔngi gea: «Bánáon'dokomisa mɔtu-nyɔngɔ ka nji nɛkɛ á bɔkɔtɛana. » 45 Mbenɔ nde ajú ka Galiláia, batɔa ka Galiláia báonsesea nga, bɔ dábage phɔtɔ ka jaí, báɔɔna kema bhui nde dátɔtɔkɛani na Yɛusalɛ́ma, ka mbenɔ á jaí ndɔ.

46 Yéso â goto oga na Kána á ka Galiláia, k'ɔma ndɔ dágaí ibo ka makana anjɛ. Cɔ, muna-moamɛ moci dátú osamba ka Kapɛɛnaúmu. 47 Bii aɔki ye gea, Yéso aju na Galiláia ka toka akɛ na Yudhɛ́a, moamɛ ndɔ áɔngɛndɛa, áon'dengemisaga gea, ágɛ ánamisɛ anakɛ nga, dátú ye tɔ odusukanaga. 48 Yéso ongodea te: « Kabɛ na bɔ́kɔ́ɔnimbɛ mphangiɔ na ketangaɔ, bókómobeekeɛku tanda. » 49 Moamɛ ndɔ áonsikisia te: « Mɔkɔta, bégɛ miki nɛmɔ na kákumbɛ. » 50 Yéso áongea: « Gǎ tɔ! Miki nɛkɔ a ye ami. » Yɛ, áobeekea nyɔngɔ nde Yéso angodi, áoga. 51 N'aphɔ́tɔ k'aphe, babhɛdanigi nɛkɛ báoga om'bondeaga. Bádhondani ye na yɛ, báongea: « Miki nɛkɔ aami. » 52 Moamɛ ndɔ áǒbusia mbenɔ sina nde miki ɛ̌yɔki bonjánja. Mpɔ, báongea: «Nama ka yɛga á mani unge, kukua atóntoki. » 53 Abhakɛ â gǎkɛ oúbha gea, a tɔ mbenɔ ndɔ, Yéso angodima: « Miki nɛkɔ aami. » Mpɔ, yɛ n'ekombo nɛkɛ, báombeekea Yéso. 54 Nndɔ dátú goto mphangiɔ á ko ibɛ, nnde Yéso dági ka toka akɛ na Yudhɛ́a ka gǎ na Galiláia.