Yéso aoabha na Nikɔdhɛ́mu
3
1 Dátú na nkpa moci sɔsɔbɛ á baPhaisáiɔ ina akɛ Nikɔdhɛ́mu. Dátú ka bakɔta ndea baYúdha. 2 Cɔ, yɛ áombhikia Yéso kipha áongodea: « Mphangigi, beoúbha gea, Mokonga aámbé dáoteki k'aphe á phangiaga asu ka nyɔngɔ nde, nkpa nn'aɔtɔka n'atɔtɔkisi ketangaɔ bíndɔ ɔɔtɔtɔkisa, kabɛ Mokonga nǎna kimoci na yɛ. » 3 Yéso áonsikisia: «Nekongodi doni gea, kabɛ nkpa na kábɔkɔtɛani mɔngɔ á ko ibɛ, nn'aɔtɔka n'aɔni koboamɛ ndea Mokonga. » 4 Nikɔdhɛ́mu â gǎkɛ omúisia: «Ngbɛga abɔkɔtɛanande mɔngɔ á ko ibɛ bo? Aɔtɔka n'angi goto ka sɔphɔ á amakɛ gea, abɔkɔtɛanɛ? » 5 Yéso áonsikisia: «Nekongodi doni gea, nkpa nn'aɔtɔka n'angi ka koboamɛ ndea Mokonga, na kábɔkɔtɛanimbɛ k'ibo na ka bukpɛkpɛ á Měma á Mokonga. 6 Babɔti asu á kokpa, báɔbɔta nyama asu, Měma á Mokonga, aɔbɔta měma subi asu 7 Cɔ, koyayamɛmbɛ bii nekongodi, akeni benu bɔbhu bɔ́bɔkɔtɛanɛ mɔngɔ á ko ibɛ. 8 Nga, sumbu áosinda bii akondi, ɔ̂ tɔ ɔɔka nduu í. Kó gǎkɛ oúbha ɔma nde atoki na ɔma nde aoga. A phɔtɔ bo ka nkpa bhuakɛ mmbe abɔkɔtɛani ka bukpɛkpɛ á Měma á Mokonga. »9 Nikɔdhɛ́mu â gǎkɛ omúisia: «Nyɔngɔ ndɔ aɔtɔka n'atɔtɔkɛani bo? » 10 Yéso áonsikisia: « Obɛ, onde mphangigi angbongbo ka Isilaɛ́li. Cɔ, kó gǎkɛ odigimisa nyɔngɔ nde? » 11 « Nekongodi doni gea, bɛtɔɔtɔmiaga nnde beoúbha, béomamɛa nnde dɛ́bɛɔni. Bókó gǎkɛ óbeekea u. 12 Aoba na bókóomobeekea mbenɔ nde nɛɔnɔtɔmiaga nyɔngɔ á ka mokonda, cɔ, bomobeekeande bo aobá́ na nɛɔnɔtɔ̌miaga nyɔngɔ á na kobha? 13 Nga nna na nkpa nde ataimbɛ mɔnɔ na kobha, tɔndɔ eme Muna-Nkpa, mmbe dédhidhi ka toka na kobha. 14 A tɔ bíndɔ Mósa dádaphisi iii á njɔka nde báconji na ngɔa gǔ á gbutuka á me ka nkandaa, a phɔtɔ bo unge akeni bámodaphisɛ eme Muna-Nkpa, 15 ka gea, nkpa bhuakɛ mmbé amobeeki, abɛ na enda á mɛyɔ. 16 Nga, Mokonga dékondi batɔa ka mokonda phɛ̂. Ka bondɔ, děophi ngɔmu nɛkɛ gea, nkpa bhuakɛ mmbe am'beeki, kakuɛkub, ábɛ ndiu na enda á mɛyɔ. 17 Mokonga dákánteki gǎkɛ Anakɛ ka gea te, atenɛ nyɔngɔ á batɔa ka mokonda akpɛ. A ndiu ka gea, yɛ, éamisɛ batɔa ka mokonda. 18 Mmbe am'beeki Anakɛ, Mokonga kátenɛku nyɔngɔ nɛkɛ akpɛ, cɔ, mmbe kám'beeki gǎkɛ, Mokonga ateni ye tɔ nyɔngɔ nɛkɛ akpɛ. Nga, yɛ kábeeki ina á ngɔmu ndea Mokonga. 19 Cina á tena á nyɔngɔ nɛkɛ akpɛ a be: oanga ndea Mokonga abhiki ka mokonda. Bakpa ba ye gǎkɛ oanga ndɔ, bâ ndiu okonda kaiphiɔ. Nga, tambea abɔ a ajede. 20 Cɔ, nkpa bhuakɛ mmbe aogea ajede, akangei oanga, nna phɔtɔ okonda gǎ kubii oanga aɔ, ka gea, tambea akɛ ajede aubhikianɛ bhase. 21 Mmbe a ndiu otambea ánja ka bea á kodoni ndea Mokonga, áoga kubii oanga aɔ ka gea te, áúbhikanɛ bhase, atambei bíndɔ Mokonga akondi. »
Yoáni na Yéso
22 Mbusa indɔ, Yéso na bagoigi nɛkɛ báoga na Yudhɛ́a. Aoika na bɔ ko ka mbenɔ abhɔa, yɛ, n'aobá́tisa. 23 Yoáni M'batisi dâ phɔtɔ obatisa ka Ainɔ́ni, bhíbhí na Saími nga, ibo ásii dátú ko. Bakpa dábatúombhikia, yɛ áǒbatisa. 24 Nga, dábákámakimbɛ phɔ́ Yoáni ka mekakɔc.
25 Ka matú ndɔ, bagoigi nɛkɛ dábaopua na moYúdha moci ka nyɔngɔ á moangɔ á tokisa á bojede. 26 Ka bondɔ, bagoigi ndɔ báɔngɛndɛa Yoáni, báongodea te: « Mphangigi, mmbɔ dátú n'obɛ kubhi á Yɔɔdháni, mmbɔ dɔ́ɔtɔmiaga nyɔngɔ akɛ, a ye tɔ obatisa. Bakpa bɔbhu bam'bii. » 27 Mpɔ, Yoáni áǒsikisia gea te: «Nkpa nnaɔtɔka n'atɔi kema kabɛ Mokonga n'akamophi. 28 Benu sasanu, bɔɔkima bii nɛyɔngima gea, eme, ké Kiísito. Nendiu mmbe Mokonga anteki mosá akɛd. 29 Munya mpakai, aámbe ande munya kɛ. Dhakɛ na mǒko gǎkɛ a tɔ bhíbhí akɛ, aotuma na maseye bii aɔɔka ɛsɔ á mǒko ndɔ. Ka bondɔ, netumi na maseye phɛ̂. 30 Cɔ, akeni boombia nɛkɛ átaiɛ, nɛmɔ ádhidhɛ. »
31 Mmbe atoki na kobha, a gǔ á bakpa bhɔ bhu. Mmbe a gǎkɛ ka mokonda, an'ebhigɔ nde á ka mokonda. Aɔyɔnga bea batɔa ka mokonda. Mmbe atoki na kobha agǎkɛ gǔ á bakpa bhɔbhu. 32 Aomamea nyɔngɔ nde aɔni na ɔka i. Nna ndiu na nkpa nde aom'beekea. 33 Mmbe abeeki nyɔngɔ nde amamei, abeeki phɔtɔ gea, Mokonga ande ntɔa á doni. 34 Mmbe Mokonga anteki a tɔ ɔyɔnga nyɔngɔ á Mokonga. Nga, yɛ antumisi na Měma akɛ. 35 Eya, Mokonga ankondi Anakɛ, áobhisa kema bhui ka njaga akɛ. 36 Cɔ, mmbe am'beeki Anakɛ, a ye tɔ na enda á mɛyɔ. Mmbe an'ye, kábɛku na enda ndɔ, Mokonga gǎkɛ n'esuia gǔ akɛ.