Yéso agai ibo ka makana anjɛ
2
1 K'esa á ko isaɔ mbusa i, dábabhiki n'ɛkɛka ka Kána nji moci á ka Galiláia. Amakɛ na Yéso dá gǎkɛ oa. 2 Bâ phɔtɔ ɔmɔphana Yéso na bagoigi nɛkɛ k'ɛkɛka kau. 3 Cɔ, na bá phɔ́tɔ k'ɛkɛka, makana anjɛ áosia. Ka bondɔ, amakɛ na Yéso áongea: «Báká ye na makana anjɛ. » 4 Yéso â gǎkɛ onsikisia: « Ayi, nyɔngɔ sina nde ben'obɛ kau? Mbenɔ nɛmɔ kájumbɛ. » 5 Mpɔ, amakɛ áǒngodea babhɛdanigi-ɛkɛka: « Geani tɔ kema bhui nde anóngodeande. » 6 Cɔ, dábatú gǎkɛ oa na mbik'ibo ngia njaga (6) nnde báconji n'etae. BaYúdha dábatú ǒsokosa n'ibo á subi i ka nyɔngɔ á esomba á sokosa á bojede nɛbɔ. Mbik'ibo ndɔ dá gǎkɛ ɔtuma na chupa miamoci-nkama-bɔku (150). 7 Yéso áǒngodea babhɛdanigi: «Tumisani mbik'ibo ndɔ n'ibo. » Báotumisa u, pu! 8 Áǒngodea: «Dhogani ka u abhɔa kɛ̌kɛ nde, bógɛ ně mosá á mokô á ɛkɛka. » Báogea bo. 9 Bii mokô ɛ́kɛka akengi ibo ndɔ, něgai ka makana anjɛ. Yɛ, kaubhɛ gǎkɛ bii makana anjɛ ndɔ atoki. Babhɛdanigi dába gǎkɛ oúbha nga, bɔ baunge dábadhogi u. Yɛ, áɔmɔphana mǒko-ɛ́kɛka, 10 áongodea: «Bakpa bɔbhu bá phɔ́ kǒbopha batɔa-ɛkɛka makana, nnde aanja phɛ̂ mosá-mosá. Mbusa á noa i ásii, báǒbopha mokongo. Cɔ, obɛ obhisi gǎkɛ tɔ makana nde aanja phɛ̂ mbusa. »11 Nndɔ, dátú mphangiɔ á ketangaɔ á mosá-mosá ndea Yéso, nnde atɔtɔkɛani ka Kana á ka Galiláia. Yéso dáphangi ně bhase boombia nɛkɛ. Ka bondɔ, bagoigi nɛkɛ báom'beekea.
12 Mbusa á oa, Yéso áoga na Kapɛɛnaúmua, kimoci na amakɛ, bamunamakɛ, na bagoigi nɛkɛ. Báoika kó k'esa abhɔa.
Yéso ěbiigi basombisigi nkumba k'endu á Mokonga
13 Cɔ, bii esa á jaí á Pasáka dá ye tɔ bhíbhí, Yéso áoga na Yɛusalɛ́mab. 14 Áongia k'endu á Mokonga, áǒdhonda basombisigi bangɔmbɛ, bamɔgɔgɔ na bamboe. Â phɔtɔ ǒdhonda baanganisigi-bangɔa na báiki ka mɛja nɛbɔc.
15 Ka bondɔ, Yéso áɔbɔngisaga gbutu na ngoi. Áǒbeaga bakpa bɔbhu ka nsɛngɛ á endu ndea Mokonga, na bangɔmbɛ na bamɔgɔgɔ nɛbɔ. Áophanja ka odo bangɔa ndea baanganisigi-bangɔa, â phɔtɔ okpungbumisa mɛja nɛbɔ. 16 Aǒngodea basombisigi-bamboe gea: « Caa! ótokisani bamboe nde oani. » Â goto ǒgea: «Bókogaiɛmbɛ endu ndea Abhɛ k'endu á sombisaga á nkumba. » 17 Bagoigi nɛkɛ bâ ye tɔ okanisia nyɔngɔ nde bádundu subi á buku á mokonga be: « Mokonga ɔɔ! ekondi á k'endu nɛkɔ, ande bea nsa n'aótoboaga subi anid. »
18 Mpɔ, bakɔta á baYúdha báomúisia gea te: « O na mphangiɔ á ketangaɔ sina ka ubhisa asu gea, o na kɔkɔta á tɔtɔkisa á kema nde? » 19 Yéso áǒsikisia: « ngbɔani endu á Mokonga nde, nɛphɛkande u k'esa isaɔe. » 20 BaYúdha bâ gǎkɛ omúisia gea: «Dábaphɛki endu ndea Mokonga nde ka ba saga nkama gena na ngia á njaga (46). Cɔ, ɔɔtɔka n'omesi u k'esa isaɔ tɔ? » 21 Endu ndea Mokonga nde Yéso dáɔyɔnga nyɔngɔ i, dátú ndiu nyama akɛ. 22 Mbusa á jujuka á Yéso ka kukua, bagoigi nɛkɛ báokanisia gea dáyɔngi nyɔngɔ ndɔ. Báobeekea nyɔngɔ nde Yéso děngodi, n'inde bádundu ka phɔ akɛ subia buku á Mokonga.
Yéso aoúbha kema bhui á ka subi á měma á nkpa
23 Cɔ, ka matu ndɔ bii Yéso dátú na Yɛusalɛ́ma ka jaí á Pasáka, bakpa básii báom'beekea, ka nyɔngɔ á ɔna á ketangaɔ nde dáɔtɔtɔkisa. 24 Yéso dákábhisi gǎkɛ měma akɛ ka bɔ, ka nyɔngɔ nde dáedigimisi bɔbhu ánjá. 25 Nga, dákátú na siki á nkpa ka tɔ̌miaga akɛ nyɔngɔ ndea bakpa, bii ye sasa akɛ dáubhi ye měma abɔ.