Lajálɔ aku
11
1 Nkpa moci á ka Bhɛtanía ina akɛ Lajálɔ dátú osamba. Malía na aoakɛ Maatá dábaiki ka nji ndɔ. 2 (Malía ímbé, aámbé dánsi Mɔkɔta na nkɔki k'ecinji, áɔkɔmbɛa u na sekamɔ akɛ. Muna-amakɛ Lajálɔ aámbé dátú osamba.) 3 Baɔakɛ babɛ ndɔ báonteka nkpa kubii Yéso aɔ kangodeakɛ te: « Mɔkɔta, dhakɔ á ekondi aosamba. » 4 Bii Yéso aɔki mbino ndɔ, áogea: «Ngobho ndɔ kánkusɛku Lajálɔ. A tɔ ka phangia á boombia ndea Mokonga na dokomisa á Muna-Mokonga ka phɔa nyɔngɔ ndɔ. » 5 Yéso dáekondi: Maatá, na aoakɛ na Lajálɔ .6 Cɔ, mbenɔ nde dáɔki gea Lajálɔ aɔsamba, Yéso â goto oika k'esa ibɛ ka nji nde dátu kau. 7 Mpɔ, áǒngodea bagoigi nɛkɛ gea te: «Béjeni goto na Yudhɛ́a. »
8 Oa, bagoigi báongea: « Mphangigi, nna tɔ ka b'esa nde unge baYúdha bátúokaba moa akɔ n'ɛtɛ? Cɔ, o goto oja ko? »
9 Yéso áǒsikisia: « Esa moci nna na mbenɔ nkama na íbɛ? Aoba nkpa n'aotamba n'esa, kabɛtɛkanɛ ka nyɔngɔ nde, aɔɔna oanga á ka mokonda ndee. 10 Nkpa a gǎkɛ otamba kiipha, aɔbɛtɛkana, ka nyɔngɔ nde oanga nna subi akɛ. » 11 Mbusa á Yéso yɔnga á bó, áotutuisa gea: «Dhasu á ekondi a ka tɔ̌. Nege gǎkɛ onjujukisa. » 12 Bagoigi nɛkɛ báongea: « Mɔkɔta, aobá́ n'atú ka tɔ̌, aamande. » 13 Ande gea te, Yéso dáɔyɔnga nyɔngɔ á kukua ndea Lajálɔ. Bagoigi bâ ndiu okanisia te, a tɔ aɔyɔnga nyɔngɔ á tɔ̌.
14 Mpɔ, Yéso áǒngodea bhase gea te: « Lajálɔ aku. 15 Ne gǎkɛ na maseye ka nyɔngɔ anu nga, kétú bei mbenɔ á kukua akɛ. Ka bondɔ, bomobeekeande phɛ̂. Cɔ, bégɛni ye tɔ kubii aɔ. »
16 Mpɔ, Tomá, mmbɔ b'aɔmɔphana Mphase, áǒngodea bagoigi bunɛngbo te: «Besu, bégɛni phɔtɔ ka gea, bekuɛ na Mɔkɔta nɛsu.»
Yéso aǒjujukisa bakpa ka kukua na endisa abɔ
17 Yéso akidi ye, áondonda Lajáɔ n'agi esa gena subi á bhota. 18 Bhɛtanía dátú bhíbhí na Yɛusalɛ́ma, dangamana á bei dátú bea kilɔmɛtɛɛ isaɔ. 19 BaYúdha básii, dábabhiki mɔtɛ á Maatá na Malía k'aphe á oiɔ á munamabɔ.
20 Cɔ, bii Maatá dáɔki gea, Yéso abhiki, áoga om'bondeaga. Malía â gǎkɛ ojiga k'endu. 21 Maatá áongodea Yéso: «Mɔkɔta, atúoba n'odótú oani, ámbé muna ayi káku. 22 Cɔ, kɛ̌kɛnde ne gǎkɛ oúbha gea, kema bhui nde ɔmmɛmande Mokonga, Mokonga akophande.» 23 Yéso áongodea: «Munamakɔ ajujukande ka kukua.» 24 Maatá áongodea: «Neoúbha gea, ajujukande ka kukua, k'esa á sungiaga á mokonda, ka mbenɔ nde basí bajujukande ka kukua.» 25 Mpɔ, Yéso áongodea te: «Nende Jujuka ka kukua na enda. Mmbe amobeeki, aendande nanga ákua. 26 Nkpa bhuakɛ mmbe aoenda, n'amobeeki, kákuɛku tanda. Cɔ, óbeeki nndɔ?»
27 Maatá áongea: «Eya Mɔkɔta, Eme, nebeeki gea, onde Kiísito, Muna-Mokonga, mmbe abhikande ka mokonda.»
Yéso aogama
28 Mbusa á Maatá yɔnga bó, áoga ɔmɔphana aɔakɛ Malía, áongodea kɔsɔ-kɔsɔ gea: « Mphangigi akidi, aɔkɔɔphana. » 29 Bii Malía aɔki ye bó, áoma, áɔcɔcɔka kubii Yéso aɔ. 30 Oa, Yéso dátú phɔ́tɔ ka ngba, kubii Maatá dáge ombondeaga.
31 Bii Malía dábhutukani ye, baYúdha nde dábatú k'endu oa ka nyɔngɔ á oiɔ, báom'bea. Báokanisia gea, age ogama ka bhota. 32 Bii Malía dáju ye ɔma nde Yéso aɔ, áɔmɔ̌na, áogua k'ecinji akɛ, áongea te: « Mɔkɔta, atú oba n'otú oani, ámbé muna-ma kátóku. » 33 Bii, Yéso dámɔni Malía n'aogáma, baYúdha bunde dábabhiki kimoci n'abɔ na bá phɔtɔ ogama. Áoba na měma á oiɔ phɛ̂ na agatana ka měma. 34 Yéso áǒbúsia te: «Botómúmbi oa?» Báonsikisia te: « Mɔkɔta, bhika, ɔ́ɔnɛ. » 35 Yéso áogama.
36 Mpɔ, baYúdha báogea te: « Cɔ, ɔnani bii dánkondi Lajálɔ. » 37 Bakpa bunɛngbo sɔsɔbɛ abɔ, bâ gǎkɛ ogea te: « Yɛ imbe dákodi iso á keíme-íme, dákátɔki phɔ́ imisia gea Lajálɔ kakuɛ? »
Yéso anjujukisi Lajáɔ ka kukua
38 Cɔ, Yéso â goto oba na měma á oiɔ, áoga ka bhota. Bhota kau dátú okanga nnde dábadaki kubhu i na ɛtɛ angbóngbóa. 39 Yéso áogea te: «Cɔ, phuiani ɛtɛ.» Maatá, aoakɛ na mmbe aku, áongea: «Mɔkɔta, a ye tɔ kuumba. Nga, a ye esa gena bii bámuumbɛ.»
40 Yéso áongea: «Kétóogi aobá́ n'obeeki, ɔɔnande boombia ndea Mokonga?» 41 Mpɔ, bâ gǎkɛ otiba ɛtɛ. Yéso áɔɔnjia na kobha, áɔmɛma gea te: «Abhɛ, neosegi nga, ɔɔmɔ̌ka. 42 Eme, neoúbha gea, ɔɔmɔ̌ka esa bhui. Nɛyɔngi gǎkɛ bó, ka nyɔngɔ á bakpa nde bámotimbi, ka gea báubhɛ gea te, obɛ aámbé dómoteki.» 43 Mbusá á yɔnga akɛ bó, áɔyɔnga n'ɛsɔ akpɛ gea: «Lajálɔ ca! Juana!» 44 Ye nku, áojuana na bábam'boege na phaeka á bhɔngɔ k'ecinji na njaga, phɔtɔ na ka keongi akɛ. Mpɔ, Yéso áǒsosea: «Nkodagani, bón'deketɛ ágɛ nɛkɛ. »
Bakɔta á baYúdha báonca Yéso ka moakɛ
(ɔna phɔtɔ Mat 26.1-5; Malíkɔ 14.1-2; Lóka 22.1-2)
45 Cɔ, baYúdha básii sɔsɔbɛ á bunde dábabhiki mɔtɛ á Malía, dábam' beeki Yéso ka nyɔngɔ á ɔna kema nde dági. 46 Bunɛngbo bâ gǎkɛ oga ɔ̌tɔmia baPhaisáiɔ, nyɔngɔ á kema nde Yéso dági. 47 Mpɔ, bakɔta á batobei-phɛ́a, na baPhaisáiɔ, báodhondana ka ntua angbo á tena á nyɔgɔ báogea: «Bii mogaa nde aɔtɔtɔkisa ketangaɔ ásii bende, begeande bo? 48 Aoba n'eben'du tɔ bo, ambé bakpa bɔbhu, bám'beekeande. Mpɔ, baamɛ ndea baLɔ́ma, bábhikande kotukatuka endu ndea Mokonga nɛsu na ekuna nɛsu. »
49 Kabɔ moci gǎkɛ, ina akɛ Kayápha, mmbe dátú ntobei-phɛ́a angbóngbó ka saga ndɔ, áǒgea te: «Benu, bókóodigimisa ka kema! 50 Bókóodigimisa gea, á anja kabenu gea, nkpa moci ákuɛ ka nyɔngɔ á bakpa, kanga á tukatuka ekuna bhui.» 51 Dáká gǎkɛ ɔyɔnga bo ka kanisia akɛ sasa akɛ nga, bii dátú ntobei-phɛa angbóngbó ka saga ndɔ, dáɔɔtɔa nyɔngɔ gea, Yéso aámbé akuiaeka ekuna ndea baYúdha. 52 Nna tɔndɔ ka nyɔngɔ á ekuna, dátú phɔtɔ ka nyɔngɔ á dhondanisaga bana-Mokonga bɔbhu kimoci, bunde dábaphanjekani.
53 Cɔ, kpanga á esa ndɔ, bakɔta á baYúdha báobhisa moangɔ á kusa á Yéso. 54 Ka bondɔ unge, Yéso dáká ye otamba bhase sɔsɔbɛ á baYúdha. Â gǎkɛ oga na Ɛphalaímu, kenombe nde dátú bhíbhí á nkanda. Aoika kó na bagoigi nɛkɛ.
55 Bii jaí á Pasáka ndea baYúdha dátú bhíbhí, bakpa básii á ka nji danga-danga báotáia na Yɛusalɛ́ma k'aphe á sokosa á měma abɔ. 56 Dábaonkaba Yéso, báɔyɔngaga sɔsɔbɛ abɔ subi á endu ndea Mokonga be: «Kanisia anu a bo? Abhikande ka jaí nde?»
57 Oandɔ, bakɔta á batobei-phɛa, na baPhaisáiɔ, báǒsosea bakpa gea: «Kabɛ nkpa n'aúbhi bii Yéso aɔ, ásɔtɔ̌miɛ, ka gea bandhungɛ. »