Lóka 22

Bɔgɔmɛaga á moa Yéso

(Ɔna phɔtɔ Mat 26.1-5; Malíkɔ 14.1-2; Yoáni 11.45-53)

1 Cɔ, bhíbhí á jaí á mukati kanga cacu nndɔ báɔɔphana Pasáka, 2 bakɔta á batobei-phɛa ndea Mokonga na baphangigi-ɛɔphi, dábaɔbɔgɔmɛaga moa á Yéso, bâ ndiu obá na kɔbɔbɔkɔ á bakpa. 3 Bii Sɛtáni angi ka měma á Yúdha mmbɔ báɔmɔphana Isikaliɔ́ta, mmbe dátu ka bagoigi nkama na babɛ (12), 4 áoga ɔyɔngaga na bakɔta á batobei-phɛa ndea Mokonga na bakɔta á bǎmbi-endu á Mokonga k'ophangɔ á dhungisa á Yéso. 5 Báoba na maseye phɛ̂, báɔɔkana ka opha akɛ bangɔa. 6 Yúdha áobeekea, mpɔ áokpanga kába mbenɔ ánjá á dhungisa Yéso ka bɔsɔmɛa.

Bɔngisiaga á Pasáka

(Ɔna phɔtɔ Mat 26.17-25; Malíkɔ 14.12-21; Yoáni 13.21-30)

7 Ka jua esa á jaí á mukati kanga cacu bii atokeni phuia bamponjo á bamɔgɔgɔ ka phɛa á Pasáka, 8 Yéso áonteka Pɛ́tɛɛ na Yoáni áɔyɔnga gea: «Gani bɔɔmbɛ kasu eea á Pasáka beɛgɛ.» 9 Báomúisia: «Ɔma sina nde okondi gea bɛɔmbɛ u?» 10 Aǒsikisia te: «Mbenɔ nde bongiande ka kenombe, bɔmɔɔnande nkpa moci mmbe bodhondanande na yɛ n'akumbi mbhik'ibɔ. Bôm'bea k'endu nde angiande kau. 11 Bongodeande gǎkɛ mɛn'endu gea, Mɔkɔta akoúisi be: «Ɔma sina nde neeagande kimoci na bagoigi nɛmɔ eea á Pasáka?» 12 Na anɔɔnisande ɔma ndɔ angbo á k'ego, na bábɔngisigi. Kondɔ unge bɔ́ɔmbanɛgɛ. 13 Báoga odhonda kema bhui tɔ bíndɔ Yéso déngɔdi, mpɔ báɔɔmba eea á Pasáka.

Eea á Mɔkɔta

( Ɔna phɔtɔ Mat 26.26-30; Malíkɔ 14.22-26; 1Bakɔlítɔ 11.23-25)

14 Ka mbenɔ á eaga, Yéso áoika, bateki nɛkɛ na phɔtɔ kimoci na yɛ. 15 Áǒngodea gea: «Netokondi phɛ̂ neeɛgɛ Pasáka nde kimoci na benu mosá á tambaga ani. 16 Nenongodi bo nga, kéɛgɛku ye Pasáka na kabii kantíti i aúbhikanande bhase ka koboamɛ ndea Mokonga.»

17 Mpɔ Yéso áɔbhɛda caá áɔmɛma, áoyɔnga: « Bhɛdani u bókatisanɛgɛ sɔsɔbɛ anu. 18 Nenongodi bo kpanga á kɛ̌kɛ nde, kénoɛeka ye mbuka á mujabhibhu na kabii koboamɛ ndea Mokonga abhikaeka.»

19 Mpɔ áobhɛda mokati, áɔmɛma Mokonga, áobuna u. Aǒgabhea n'aɔyɔnga gea: «Nyama ani unge, nnde negabhi ka phɛa ka phɔa anu. Geani bo ka kanisiani.»

20 Â phɔtɔ ǒpha caá mbusa á eaga n'aɔyɔnga gea: «Caá nde ande ɔngana á kɛ̌kɛ, ka magiani nnde aduukani ka phɔanu.

21 Cɔ, ɔnani! Njaga á mmbe amɔtɔngi aotambua k'imoci n'eme gǔ á mɛja ndee. 22 Ande gea, eme Muna-Nkpa nege nɛmɔ bíndɔ Mokonga dáangi. Andiu ngɔmi ka nkpa nde amɔtɔngi.» 23 Mpɔ bagoigi báokpanga úsianaga sɔsɔbɛ abɔ: «Animbe ageande bo?»

Sani ka nyɔngɔ á kɔkɔta

24 Bii bagoigi bakpangi sana sɔsɔbɛ abɔ ka úbha ani mmbe aikande k'ɔma á kɔkɔta, 25 Yéso áǒngodea te: «Baamɛ á ka nji báɔ̌bhɛdanisaga bakpa nɛbɔ akpɛ. Bɔ, dába gǎkɛ okonda bakpa bɛ́bɔphanɛ: «Batɔa-egabhɔ». 26 Cɔ, ka phɔanu nna bo. Ambe mmbe ana kɔkɔta sɔsɔbɛ anu ábɛ ndiu bɛa miki, mmbe gǎkɛ aoanga áoba bɛa mbhɛdanigi. 27 Cɔ, sɔsɔbɛ abɔ kabɔ sina mmbe ana kɔkɔta, mmbe á ka mɛja na mmbe ande mbhɛdanigi? Cɔ, eme ne ka ɔlɔ anu ka bhɛdanɛaga anu. 28 Benu ndiu baunge botóphiphii ika kimoci n'eme ka tambaga nɛmɔ. 29 Eme gǎkɛ nenobhisii koboamɛ bíndɔ abhɛ amobhisii 30 Kagea, bóeɛgɛ na nɔa ka mɛja nɛmɔ subi á koboamɛ nɛmɔ, phɔtɔ boikande ka kankaanga á kɔkɔta ka tena nyɔngɔ ekuna nkama n'ibɛ (12) á baIsilaɛ́li.»

Onganɔ ndea Pɛ́tɛɛ

(Ɔna phɔtɔ mat 26.31-35; Malíkɔ 14.27-31; Yoáni 13.36-38)

31 Yéso áɔyɔnga gea: ‹‹Simɔ́ni, Simɔ́ni Sɛtáni anomɛmi gea, ánɔpɛcɛ sumbia bii bámɔ̂ɔpɛca mbo ka ungɔ. 32 Eme gǎkɛ nɛtɔ́mɛmi ka phɔa akɔ ka gea, beekea nɛkɔ kabungɛmbɛ. Na ka sikianaga akɔ, ambe ótetemisɛ měma á bamunamakɔ.» 33 Pɛ́tɛɛ áonsikisia: «Mɔkɔta! Kabɛ ka gǎ ka mɛkakɔ, kabɛ ka gǎ kua, nega tɔ kimoci n'ɔbɛ.» 34 Mpɔ Yéso áonsikisia Pɛ́tɛɛ: «Neongodi mosá á kɔkɔ ɔsa omonganande mɔngɔ isaɔ gea kômoúbha.» 35 Mpɔ, Yéso áǒbuisia bagoigi te: «Netonotekima kanga njombi á bangɔa, phɔtɔ kanga bonda na biato, botouki ka kema? » Baonsikisia te: «Áoboboa!» 36 Aǒngodea: «Cɔ, kɛ̌kɛ nde, mmbe a gǎkɛ na njombi á bangɔa, kabɛ bonda, ábhɛdɛ, mmbe gǎkɛ nna na píndí, ásombisɛ ngɔmbɛ nɛkɛ mpɔ, ásombɛ moci. 37 Nenongodi goto nndɔ nga, ambe átɔtɔkɛanɛ ka phɔani bíndɔ dábadundu, ‹Dábambisi ka mɔɔmba á batɔa-bojede.› Na nnde á ka phɔa ani atɔtɔkɛande.» 38 Báɔyɔnga: «Mɔkɔta píndí íbɛ unge.» Aǒngodea te: «Abɛ angaá.»

Ɛmɛmi ndea Yéso ka mamba á Mijɛitúni

(Ɔna phɔtɔ Mat 26.36-46; Malíkɔ14.32-42)

39 Mbusa á Yéso juana, áoga bíndɔ dáɛmbani ně ka mamba á Mijɛitúni, bagoigi báom'bea. 40 Aiye bii ajú kó áǒngodea: «Mɛmani ka gea bókoguɛmbɛ mbenɔ nde báonotombaga.» 41 Mpɔ yɛ áoketa mbamba, áɔsɛkɛda danga abhɔa, áogbuka muanku akɛ, áɔmɛma, 42 áɔyɔnga be: «Abhɛ, kabɛ n'okondi, ómophausa na caá ndee kabɛmbɛ ka mɔphɛ ani, ambe ndeakɔ ndiu unge átɔtɔkɛanɛ.[ 43 Mpɔ malaeka áotoka na kobha, áɔnsɛnɛkɛa áomopha bukpɛkpɛ. 44 Áoba na bɔmbɛ phɛ̂, áosuia mɛma, eungú áon'dɔka n'a bea ntɔngɛ á magia, áogua ka odo.] 45 Mbus'ɛmɛmi, áoma, áǒbea bagoigi, áǒdhonda na báde nga nyama abɔ dádhuuki na bɛi. 46 Mpɔ áǒngodea: «Bode ka nyɔngɔ éke? máni bɔ́mɛmɛ ka gea bókoguɛmbɛ mbenɔ nde báonotombaga.»

Yúdha andhungisi Yéso

(Ɔna phɔtɔ Mat 26.47-56; Malíkɔ 14.43-50; Yoáni 18.3-11)

47 N'aphɔtɔ kɔyɔnga, usɛsɛ á bakpa áɔsɛnɛka. Nsɔndɔi n'ande ka bagoigi nkama na babɛ (12) mmbe báɔɔmɔphana Yúdha, áɔsɛkɛda bhíbhí á Yéso, áomumbia. 48 Mpɔ Yéso áongodea: «Yúdha, omotɔngi eme Muna-Nkpa ka umbia ani!» 49 Bii bagoigi báɔni nyɔngɔ ndɔ dáɔnyɛ́nya báongodea Yéso: «Mɔkɔta, bémanɛ na píndí nɛsu?» 50 Kabɔ moci áontuma mbhɛdanigi á mɔkɔta á batobei-phɛa ndea Mokonga na tena kɛcuɛ akɛ á njaga á mǔku. 51 Mpɔ Yéso áɔyɔnga gea: «Ásungiɛ ɔa, deketani!» Áodhunga kɛcuɛ á mbhɛdanigi ndɔ áonamisa.

52 Mpɔ Yéso â goto ǒngodea bakɔta á batobei-phɛa ndea Mokonga, bakɔta á baambi-endu á Mokonga na bagbɛga á ka nji bunde dábabhiki ondhunga gea: «Bii bomobhikii na gbutu na píndí, bɔmɔɔni bɛa nkukuba? 53 Bii détu na benu esa bhui k'endu á Mokonga dóbokotuomodhunga. Cɔ, mbenɔ nde a ye tɔ nɛnu na bukpɛkpɛ á kaiphiɔ.»

Pɛ́tɛɛ angani Yéso mɔngɔ isaɔ

(Ɔna phɔtɔ Mat 26.57-58,69-75; malíkɔ 14.53-54,66-72; Yoáni 18.12-18, 25-27)

54 Mpɔ báondhunga Yéso báonga ně k'endu ndea mɔkɔta á batobei-phɛa angbóngbó. Pɛ́tɛɛ n'aobhika nɛkɛ mbusa danga. 55 Bii dábagongi nsa ka meme á ntanga, báoika kimoci, Pɛ́tɛɛ áoika sɔsɔbɛ abɔ. 56 Nke moci mbhɛdanigi áɔmɔɔna Pɛ́tɛɛ n'aiki k'oanga bhíbhí á nsa, áontumia n'iso. Mpɔ aɔyɔnga: «Mogaa nde atú phɔtɔ kimoci na Yéso.» 57 Pɛ́tɛɛ â ndiu ongana, áongodea nke gea: «Keomuúbha.» 58 Mbusa abhɔa, nkpa bangbo áɔmɔɔna áoyɔnga: «Ɔbɛ ɔphɔtɔ k'abɔ!» Pɛ́tɛɛ áonsikisia: «Kék'abɔ, ca!» 59 Bii anyɛ́nyi ye bɛa mbenɔ moci mbusa á oa, nkpa bǎngbo â goto osoea gea: «Ande doni gea mmbosi atú phɔtɔ kimoci na yɛ, ande ntɔa na Galiláia.» 60 Pɛ́tɛɛ áonsikisia: «Moko, keoúbha nyɔngɔ ndɔ.» N'aphɔtɔ ɔyɔnga, mɔngɔ ímoci kɔkɔ áɔɔsa.

61 Mpɔ Mɔkɔta áǒphaia áontumia Pɛ́tɛɛ n'iso, ɔa, Pɛ́tɛɛ áɔkanisia nyɔngɔ nde Mɔkɔta dángɔdi gea: «Mosá á kɔkɔ ɔ́sa, omonganande kesande mɔngɔ isaɔ.» 62 Pɛ́tɛɛ áojuana na nsɛngɛ áotobokɛa ngamɔ ko!

Nɛphɛa á Yéso na bɛta akɛ

(Ɔna phɔtɔ Mat 26.67-68; Malíkɔ 14.55-64; Yoáni 18.19-24)

63 Bakpa bunde dábandhungi Yéso dábaontɛbhɛaga na bɛta akɛ. 64 Báon'daka keongi na úisiakɛ Mɔtu-nyɔngɔ ca: «Ani mmbe akɔbɛti?» 65 Na báoyɔnga ka phɔakɛ nyɔngɔ nɛngbo á bhóma akɛ phɛ̂.

Yéso mosá á ntua á tena nyɔngɔ

66 Bii esa asɛ́ bagbɛga á ka nji, bakɔta á batobei-phɛa ndea Mokonga na baphangigi-ɛɔphi, báombhika na Yéso mosá á ntua nɛbɔ á tena nyɔngɔ. 67 Báomúisia gea te: «Aoba n'onde Masía, ósongodea.›› Aǒsikisia te: «Nanga nɛnɔtɔmia, bókómobeekeɛku. 68 Nanga nenoúisia gǎkɛ, bókómosikisiɛku tanda. 69 Cɔ, kpanga kɛ̌kɛ nde Muna-Nkpa aikande ka njaga á mǔku ndea Mokonga mɛnɛa bukpɛkpɛ.» 70 Bɔbhu bâ gǎkɛ ɔyɔnga: «Wákɛ tɔ Muna-Mokonga?» Áǒsikisia te, ‹‹Bɛnu baunge bɔyɔngi gea nende yɛ.» 71 Mpɔ báɔyɔnga gea: «Bii abó, békebɛku ye na siki á mmamei nga, bɛɔki sisasu nyɔngɔ nde atoki k'aphɛnɔkɔ akɛ.»