Lóka 21

Sadaka ndea nke á kekusa n'ana buyɛnɛ

( Ɔna phɔtɔ Malíkɔ 12.41-44)

1 Yéso áomesia mɔ̌ akɛ, áɔ̌bɔna bunde báomaka bangɔa nɛbɔ subi á sanduku á sadaka, bakpa ndɔ dábatu batɔi. 2 Â phɔtɔ ɔmɔ̌na nke á kekusa moci n'ana buyɛnɛ, nke ndɔ áomaka gbutuka ibɛ á baniki á bangɔa subi á sanduku ndɔ. 3 Mpɔ Yéso áogea te: «Nenongodi doni gea, nke á kekusa nde na buyɛnɛ nɛkɛ amaki kɔ̌nyɛ́nya bakpa bɔbhu. 4 Nga, bunɛngbo bámaki ka sadaka bangɔa nde a gǔ á bangɔa nɛbɔ nnde baɔbhɛdanaga ně. Cɔ, yɛ ka buyɛnɛ nɛkɛ amaki ndiu ka sadaka bangɔa nɛkɛ bhui á enda ně.

Yéso aɔtɔmia nyɔngɔ á ujukana á endu ndea Mokonga

( Ɔna phɔtɔ Mat 24.1-2; Malíkɔ 13.1-2)

5 Cɔ, bakpa buangbo dábaobhebha mɔphɛkɔ endu á Mokonga, báɔyɔnga gea: «Bágɛɛmisi ánja n'etae na nkumba nde dábáomopha Mokonga.» Mpɔ Yéso â gǎkɛ ɔyɔnga te, 6 «Kema nde bɔɔna nde, a n'esa nde bángbɔande u. Bakadeketɛku tanda etae moci gǔ a dhakɛ kanga ngbɔa i.»

Tambaga á mosá á sungiaga á mokonda

( Ɔna phɔtɔ Mat 24.3-14; Malíkɔ 13.3-13)

7 Mpɔ báomúisia Yéso te: «Mphangigi, cɔ, nyɔngɔ ndɔ atɔtɔkɛanande mbenɔ sina, na mphangiɔ sina nde aúbhisande gea kema ndɔ atɔtɔkɛanande?»

8 Yéso áǒsikisia te: «Ɛngɛphani! Nkpa kanodhemɛmbɛ. Nga, bakpa básii babhikande gǎkɛ k'ina ani na báɔyɔnga gea: «Cɔ, eme Kiísito aámbé!» «Mbenɔ a ye tɔ bhíbhí.» Nanga ába bo, bokǒbeɛmbɛ. 9 Mbenɔ nde bɔɔkande nyɔngɔ á emani danga-danga na oyombɔ á bakpa, bókobangɛmbɛ. Nga, akeni phɔ kema ndɔ átɔtɔkɛanɛ mosá. Nna gǎkɛ nndɔ unge ande sungiaga á mokonda.» 10 Yéso áotutuisa ngodea abɔ be: «Batɔa k'ekuna moci bámanande na batɔa k'ekuna nɛngbo, koboamɛ moci amanande na koboamɛ nɛngbo. 11 K'ɔma danga-danga abande na baningina akpɛ, na monganya, na kěta. Kema á bangisa, na mphangiɔ ángbongbo atokande phɔtɔ na kobha.

12 Cɔ, mosá indɔ bhui, bánodhungande gǎkɛ na tambisaga anu. Bánobhisande ka njaga á bateni-nyɔngɔ á k'endu á bɔphɛi na makea anu ka mekakɔ. Bánomamisande mosá á baamɛ na bakɔta á kenombe ka nyɔngɔ á ina ani. 13 K'aphe ndɔ ungɔ bɔ̌tɔmiande nyɔngɔ nɛmɔ. 14 Cɔ, úbhani ka měma anu gea, bokoianɛgɛmbɛ phɔ nyɔngɔ sinande bɔyɔngande ka phoanu. 15 Nga, eme sisani aámbé nenophande nyɔngɔ á kɔbɔngɛ nnde babibia anu bɔbhu bákasikiɛku ye kau. 16 Babhanu, bamanu, bamunamanu, babɔkɔti anu na badhanu, banɔtɔngande. Bɔ, békusande bakpa buangbo sɔsɔbɛ anu. 17 Bakpa bɔbhu banokangeande phɔtɔ ka nyɔngɔ á ina ani. 18 Nanga aba bó, nna tanda na ka sekamɔ anu moci nnde abungande. 19 Cɔ, bhisani měma anu, nga ka gea anu bó aunge boamisande měma anu.»

Ujukana á Yɛusalɛ́ma

(Ɔna phɔtɔ Matáiɔ 24.15-21; Malíkɔ 13.14-19)

20 Mbenɔ nde boye ɔɔna batɔa-emani danga-danga na bátimbi Yɛusalɛ́ma, úbhani gea te, ujukana i a ye tɔ bhíbhí. 21 Cɔ, bakpa nde babande ka mpɛphɛ-mpɛphɛ á Yudhɛ́a, báteɛ k'ɔma á mamba-mamba. Bakpa nde ba gǎkɛ subi á Yɛusalɛ́ma bájuanɛ. Bunde babande kósaa, bákangiɛmbɛ ye ka mosomba. 22 Nga, esa ndɔ abaeka esa nde Mokonga agisiande na tɔtɔkisa nyɔngɔ bhui nde asubi á buku á Mokonga. 23 Iyo! Abande ngomi ka bama-kaeme na bama-mbɛnjɛ k'esa ndɔ. Nga, nji ndɔ abande na tambaga ángbó ka nyɔngɔ nde Mokonga aphangiande bɛi ndɛakɛ ka batɔa ka nji ndɔ. 24 Bémoande buangbo na ngɔa, báǒga na buangbo ka kɔkɔbɛ ka nji bhui. Batɔa k'ekuna nɛngbo bátukatukande Yɛusalɛ́ma na ka bii mbenɔ á kɔkɔta ndea bɔ asungiagande.

Esa á ja á Muna-Nkpa

(Ɔna phɔtɔ Matáiɔ 24.29-31; Malíkɔ 13.24-27)

25 Mphangiɔ abande ka mani, songe na basɛɛngɔa. Cɔ, ka mokonda, bakpa bábande na tambaga. Báyayamande bii obenge aophuia eongo n'ana kɛtɛmbɔɛ. 26 Bukpɛkpɛ á bakpa asiande ka nyɔngɔ á kɔbɔbɔkɔ á kema ájede danga-danga nnde atɔtɔkɛanande ka mokonda nde baiki kau. Nga, kema bhui nnde ana bukpɛkpɛ na kobha, adengande. 27 Mpɔ, bámɔɔnande Muna-Nkpa n'abhiki k'egugu na bukpɛkpɛ na boombia ángbó. 28 Cɔ, kema ndɔ a ye okpanga tɔtɔkɛana, ikani ánjá, bómesiɛgɛ mɔ̌ anu. Nga, boamia nɛnu a ye tɔ bhíbhí.

Mphangiɔ á nsɔ́ɔ á kasa á bame.

( Ɔna phɔtɔ Mat 24.32-35; Malíkɔ 13.28-31)

29 Mbusa índɔ, Yéso áǒngodea bagoigi nɛkɛ mɛní ndee: «Ɔnjiani phɔ me bhui. 30 Mbenɔ nde bo ye kɔɔna nsɔ́ɔ á kasa i n'akpangi juana, ubhani sasanu gea matu ókame a si ye tɔ. 31 A phɔtɔ bó ka benu. Mbenɔ nde bɔɔna nyɔngɔ ndɔ n'atɔtɔkɛani, ubhani gea koboamɛ ndea Mokonga a ye tɔ bhíbhí.» 32 Nenongodi doni gea: « Batɔa k'ɛbɔkɔti á ka matu ndɔ bákákuɛku bɔbhu nyɔngɔ nde n'akatɔtɔkɛani.» 33 Mokonda na kobha anyɛ́nyande, nyɔngɔ nɛmɔ unge kányɛ́nyɛ ku tanda.

Kɔdani isɔ anu

34 «Ɛngɛphani! měma anu kadokomanɛmbɛ ka nyɔngɔ á eaga n'ɛbhɛdi á makana, phɔtɔ na mɔphɛ á enda. Boogea bó, mmbe esa ndɔ anosɛnɛkɛande kanga mosenda. 35 Nga, nyɔngɔ ndɔ ěimisande bakpa bɔbhu á ka mokonda bea mɛ̌kɔ. 36 Cɔ, bókodɛmbɛ. Mɛmani Mokonga ka mbenɔ bhui. Kabondɔ, bobande na bukpɛkpɛ á ooka nyɔngɔ bhui nde akidianande, mpɔ, bômama mosá ani eme Muna-Nkpa.»

37 Yéso dáogoisaga k'endu á Mokonga n'esa. Dá gǎkɛ ojuana kǐpha ka gǎ da gǔ á mamba á Mijɛitúni. 38 Bakpa bɔbhu dábaobhika mɔtɛa Yéso kam'bimba k'aphe á ɔka bɔphɛi nɛkɛ k'endu á Mokonga.