Lóka 20

Ianaga á cina á kɔkɔta ndea Yéso

( Ɔna phɔtɔ Mat 21.23-27; Malíkɔ 11.27-33)

1 Cɔ, esa moci Yéso dáǒgoisaga bakpa na tɔmia ábɔ Nyɔngɔ Ánjá sub'endu ndea Mokonga. Wa, bakɔta á batobei-phɛa ndea Mokonga, baphangigi-ɛɔphi na bakɔta á batɔa ka nji báobhika, 2 báomúisia: «Moko, ósóngodea phɔ kɔkɔta sina nde ɔɔtɔtɔkisa na nyɔngɔ ndɔ, na ani mmbe akophi kɔkɔta ndɔ?» 3 Mpɔ Yéso áǒsikisia gea: «Nebande phɔtɔ na muisiɔ moci ka benu. Cɔ ómóngodeani, 4 ‹Ani mmbe dámophi Yoáni kɔkɔta á batisa. Ande Mokonga, kabɛ n'ande bakpa?›»

5 Dábáokpanga ianaga sɔsɔbɛ abɔ na báɔyɔnga gea: «Aoba nebenkumi Mokonga, asoúsiande goto, ‹Dóbokobeeki nyɔngɔ ndea Yoáni ka bo?› 6 Be gǎkɛ ǒkumia bakpa, ambe bakpa bɔbhu básobeagande n'ɛtɛ ka gea bekuɛ. Nga, bábeeki doni gea Yoáni ande mɔtu-nyɔngɔ.» 7 Bâ ndiu onsikisia Yéso gea: Bakaoúbha cina á kɔkɔta ndea Yoáni. 8 Yéso â phɔtɔ ǒngodea gea: «Kenongodeɛku pɛ cina á kɔkɔta nde nɛɔtɔtɔkisa na nyɔngɔ ndee.»

Mɛní á bagubhi bájede

( Ɔna phɔtɔ Mat 21.33-46; Malíkɔ 12.1-12)

9 Mpɔ Yéso áokpanga ngodea á bakpa mɛní nde: «Nkpa moci dákoni ciko á mijabibo. Mbusa, áɔɔkana na bagubhi nde bábánde ɔbɔngisiaga ciko, nyɔngɔ á ophendɔ. Mɛnɛ á ciko áɔmɛa tamba, áoika kó matú enda. 10 Cɔ, ka mbenɔ á dungu, áonteka mbhɛdanigi nɛkɛ mɔtɛ á bagubhi ka gea bámophɛ mbuka á mijabibu ínɛkɛ. Bagubhi bâ gǎkɛ ɔm'bɛta, báonjisa njaga jǎi. 11 Mɛnɛ á ciko â goto onteka mbhɛdanigi bǎngbo, bâ goto tɔ ɔm'bɛta mmbɔ na kusa akɛ na soni, báonjisa njaga jǎi. 12 Áosuia goto teka mmbe ba ko basaɔ, báontuma mmbɔ na beaga akɛ. 13 Mpɔ mɛnɛ á ciko áɔyɔnga gea: «Negeande ye goto bo? Nentekande miki nɛmɔ mmbɔ nenkondi, kaasi mmbɔ aámbé bám'banga nde.» 14 Cɔ, bagubhi bamɔɔni ye miki ndɔ, báɔyɔngaga sɔsɔbɛ abɔ: «Eya! Mɛnɛ á botiko aámbɔ! Bémoɛni ka gea botiko ndɔ ábɛ asu!» 15 Báondunga, báonga ně bhǎ á ciko, kó báommoa.» Mpɔ Yéso áǒúisia: «Mɛnɛ á ciko ěgeande bagubhi ndɔ bo? 16 Abhikande, áǒmoa bagubhi ndɔ. Mbusa i, ěophande bakpa bunɛngbo ciko ndɔ.»

Bakpa báɔki ye bo, báɔyɔnga gea: «Kabɛmbɛ tanda bo.» 17 Mpɔ Yéso áɔ̌ɔnjia, jaa! Áǒúisia gea: «Bádundu subia buku á Mokonga be, ‹Etae nde baphɛki dábaye, aunge aye tɔ etae á kantíti ka mɔphɛkɔ›. Cɔ, kanisia nde ásubia á nyɔngɔ ndɔ a bo?  18 Nkpa bhuakɛ mmbe aoguia etae ndɔ, abunukande. Nkpa nde etae ndɔ agǎkɛ onguia, etae ndɔ ankpɔtande. »

19 Cɔ, ka mbenɔ ndɔ tɔ, baphangigi-ɛɔphi na bakɔta á batobei-phɛa ndea Mokonga báokaba dhunga á Yéso nga, dábaúbhi gea dáyɔngi mɛní ndɔ ka phɔa bɔ. Dábákandhungi gǎkɛ nga, dába na kɔbɔbɔkɔ á bakpa.

Tombaga á Yéso ka nyɔngɔ á phenda á manjanja ka moamɛ Kaisáa

( Ɔna phɔtɔ Mat 22.15-22; Malíkɔ 12.13-17)

20 Mpɔ báokpanga bɔgɔmɛaga á Yéso, báǒteka bakpa nde dábaǒdhemisaga gea bande batɔa-doni ka gea, Yéso átɛ ka mɛ̌kɔ nɛbɔ mbenɔ nde abande ɔyɔnga. Wa unge bántɔngande mɔtɛa mmbe a na kɔkɔta á nji bhubhui. 21 Batɔa bɔgɔmɛaga báomúisia Yéso, ‹‹Mphangigi, beubha nyɔngɔ nde ɔɔyɔnga n'inde oogoisaga ande doni. Kôtena nyɔngɔ ndea nkpa ka bea keongi akɛ. Ondiu ogoisaga aphe á Mokonga ka kodoni. 22 Cɔ, ósóngodea phɔ: Ɛɔphi nɛsu asososi phenda á manjanja á Kaisáa, mɔkɔta á baLɔ́ma, kabɛ na kasososi phenda i?›› 23 Bii Yéso dáubhi maibhe nɛbɔ, áǒgea, 24 «Ómophangiani phɔ ka bangɔa ndɔ moci.» Áǒúisia te: «Keongi nde na dundua nde ande á ani?» Báonsikisia gea: «Bhui atɔ á Kaisáa.» 25 Mpɔ Yéso áǒngodea gea: «Cɔ baya, mophani Kaisáa nkumba nɛkɛ, bómophɛ phɔtɔ Mokonga i nɛkɛ.» 26 Dábakatɔki gǎkɛ kɔda á Yéso ka mɛ̌kɔ nɛbɔ mosá á bakpa. Bâ ndiu oyayama ka nyɔngɔ nde Yéso désikisii, báɔkɔba, phiɔ!

Muusiɔ ka nyɔngɔ á jujuka ka kukua

( Ɔna phɔtɔ Mat 22.23-33; Malíkɔ 12.18-27)

27 Ka baSadhukáiɔ dábambikii Yéso. Bɔbhu banaobeekea nyɔgɔ á jujuka á bakpa ka kukua. dábabhiki omúisia Yéso gea, 28 «Mphangigi, Mósa dádundu kasu ɛɔphi be: Aoba mǒko n'aku, n'andeketi nke na káonji, munamakɛ na mǒko ndɔ aku angiiande nke á kekusa ka gea ám'bɔkɔtɛɛ mɔkɛnji á phɔmiakɛ baniki. 29 Cɔ, baganda dábabɔkɔtɛani ngia á njaga ibɛ (7) ka sɔphɔ nɛbɔ. Ange dámuki nke, áokua kanga bɔkɔta na nke ndɔ. 30 Moganda ba kobabɛ áomuka nke á kekusa. Mmbɔ â goto t'okua kanga bɔkɔta. 31 Mmbɔ ba kobasaɔ tɔ bo. Bɔbhu ngi a njaga ibɛ (7) báosia kanga deketa á miki tanda moci. 32 Ka sungiaga, nke ndɔ â phɔtɔ okua. 33 Cɔ, esa á jujuka ka kukua, kabɔ sina sɔsɔbɛ á bǒko ndɔ ande munya nke? Nga bɔbhu ngia a njaga á ibɛ (7) dábamuki tɔ ka yɛ.»

34 Mpɔ Yéso áǒsikisia te: «Bǒko á ka matu nde baunge báǒuka bake na bake bâ phɔtɔ ɔɔmana. 35 Bakpa nde bákeni jujuka ka kukua ka matu ndɔ aobhika, bǒko bakeukɛku ye bake na bake bákáɔmanɛku ye. 36 Bakatɔkɛku ye na báku nga, bande bea bamalaeka. Bande bana-Mokonga, bii bajujuki ka kukua. 37 Subia buku, ɔma nde Mósa adundu nyɔngɔ á esasa nde aǒtoboaga, dádundu phɔtɔ bhase gea bakpa nde baku, bájujukande ka kukua. Nga, aɔmɔphana Mɔkɔta: «Mokonga nde ba Abhalaámu, Mokonga nde ba Isáka na Mokonga ba Yakɔ́bɔ.» 38 Kanyɔngɔ indɔ unge Mokonga nna Mokonga á baku, a ndiu Mokonga á bunde báoenda. Nga mosá akɛ, bɔbhu ba tɔ oenda.» 39 Mpɔ ka baphangigi-ɛɔphi báɔyɔnga gea, ‹‹Mphangigi, ɔyɔngi tɔ ánjá.» 40 Nga, dábabangi ye úisiaga akɛ.

Kiísito na Dhaúdhi

( Ɔna phɔtɔ Mat 22.41-46; Malíkɔ 12.35-37)

41 Yéso â goto ǒngodea te, ‹‹ Báɔyɔnga gea Kiísito ande muna-Dhaúdhi ka bo? 42 Nga Dhaúdhi sasakɛ aámbé ayɔngi subi á buku nɛkɛ á ɛmbɔ gea, ‹Mɔkɔta Mokonga dángodi Mɔkɔta nɛmɔ: Ika ka njaga ani á mǔku, 43 na kabii něbhisande babibia nɛkɔ kusi écinji akɔ.›. 44 Dhaúdhi aɔmɔɔphana gǎkɛ Mɔkɔta. Cɔ, yɛ abande miki nɛkɛ bo?»

Óengani na baphangigi-ɛɔphi!

( Ɔna phɔtɔ Mat 23.1-36; Malíkɔ 12.38-40)

45 Bii bakpa bɔbhu dábaɔmɔɔka Yéso, yɛ áǒngodea bagoigi nɛkɛ gea, 46 «Óengani na baphangigi-ɛɔphi. Bakondi tamba na báɔligi ngɔmbɛ endǎndanda, na bakpa babɛǒsesea k'ɔma á madhondanɔ. Subi á endu á bɔphɛi, bakondi phɔtɔ ikidia kankaanga á mosá-mosá na ka jaí danga-danga báikɛ k'ɔma á kɔkɔta . 47 Bá gǎkɛ kǔuta bake á kekusa nkumba á k'éndu nɛbɔ, bá phɔtɔ ɔmɛma énda ka gea bakpa b'ɛbɔnɛ. Bundɔ unge bátenande nyɔngɔ nɛbɔ akpɛ phɛ̂.››