Boamia á Jakáiɔ ka měma
19
1 Yéso angi ye ka Yɛíkɔ, áɔɔtata ka kenombe. 2 Nkpa moci ina akɛ Jakáiɔ dáiki ko. Dátu mɔkɔta ndea baphendisigi-manjánjá, â phɔtɔ oba ntɔi. 3 Cɔ, dáokaba ámɔɔnɛ Yéso ande ani. Katɔkɛ gǎkɛ ka nyɔngɔ á usɛsɛ á bakpa nga, yɛ dátú ntɔa-angbinbgi. 4 Ka bondɔ, áoga mbangɔ mosá, áodapha ka me á mukuyu. Dági bo ka gea te, ámɔɔnɛ Yéso, nga anyɛ́nyande oa. 5 Yéso aju ye k'ɔma ndɔ, áomesia mɔ̌ akɛ, áɔmɔɔna Jakáiɔ, áongea: «Jakáiɔ! Kia mbangɔ! Neogea neikɛ mɔtɛkɔ k'esa nde!» 6 Jakáiɔ áokia mbangɔ, áonsesea na maseye. 7 Bakpa bɔbhu báɔni ye bó, báɔngɔngɔnaga, báogea: «Ai! age oika k'endu ndea ntɔa-bojede?»8 Ka bondɔ, Jakáiɔ áomama mosá á Mɔkɔta, áongodea be: «Cɔ, Mɔkɔta! kɛ̌kɛ nde, nebhǒsani nkumba nɛmɔ ka meme, néobopha batɔa-buyɛnɛ mo. Akoba na nɛbhɛdi nkumba á nkpa k'odhemayɔ, nensikisiande mɔngɔ gena.»a 9 Mpɔ, Yéso áongea: «K'esa nde, boamia angi k'endu nde nga, mmbe a phɔtɔ mosuko á Abhalaámu. 10 Nga, eme Muna-Nkpa, nebhiki k'aphe á kaba na amisa á bakpa nde dábabungigi.»
Mɛní á babhɛdanigi basaɔ
11 Bii bakpa dábátú ɔɔka nyɔngɔ ndɔ, Yéso áotútuisa na mɛní. Wa, dátú bhíbhí na Yɛusalɛ́ma, bakpa dábaokanisia gǎkɛ te, koboamɛ ndea Mokonga aobhika kɛ̌kɛ ndɔ. 12 Cɔ, mɛní kau unge: «Nkpa moci, k'ekombo á bakɔta, dáge ka nji á danga. Aogea, bámophɛ mɔtumbɔ á koboamɛ mpɔ ájɛ. 13 Mosá á gǎ akɛ, áɔ̌ɔphana ka babhɛdanigi nɛkɛ nkama, áɔbhɛda bangɔa á ɔlɔ nkama, áǒgabhea u moci-moci. Aǒgea, ‹Bhɛdanagani na bangɔa ndee, na ka bii nejakuma.› 14 Batɔa-koboamɛ nɛkɛ dábankangei gǎkɛ. Báǒteka bátɔnganisi-mbino mbusa akɛ, bágayɔngɛ te, ‹Békékondi mogaa ndɔ ábɛ moamɛ gǔ asu.› 15 Nanga bó, dábámophi motumbɔ a koboamɛ, áɔja. Aju ye, áɔ̌ɔphana babhɛdanigi ndɔ mɔci-mɔci, bundɔ déophi bangɔa, áubhɛ ɛtɔi angaani nde dábatɔi. 16 Mmbe ba mosá-mosá áobhika, áongea: «Mɔkɔta, ngɔa moci ndɔ otómopi, nɛtɔi goto na bangɔa nkama.» 17 Moamɛ áongea be: «Cɔ bosegi! Onde mbhɛdanigi anjánjá. Ka nyɔngɔ nde, onde ntɔa-doni ka amba a kema abhɔa, nekophi kɔkɔta á kenombe nkama.» 18 Mbusa, mmbe ba ko babɛ áobhika, áongea: «Mɔkɔta, ngɔa moci ndɔ otómopi, nɛtɔi goto na bangɔa bɔku.» 19 Moamɛ áongea: «Obɛ gǎkɛ nekophi kɔkɔta á kenombe bɔku.» 20 Mbusa, mbhɛdanigi bǎngbo áobhika, áongea: «Mɔkɔta, ngɔa nɛkɔ a ungee. Déném'boegé na bhɔngɔ, nɛ́ɔsɔmɛa. 21 Nga, déokobanga, ka nyɔngɔ nde, onde nkae. Ɔɔbhɛda kema, n'okóbhisi. Oodungua, n'okógubhi.» 22 Moamɛ áonsikisia: «Mbhɛdanigi ajede! Nyɔngɔ nde ɔyɔngi a unge neteni nyɔngɔ nɛkɔ ně. Dóúbhi gea te, nende nkae. Nɛɔbhɛda, nekébhisi. Neodungua, nekégubhi. 23 Cɔ, nyɔngɔ sina nde dókóbophi baambi-bangɔa ngɔa nɛmɔ? Mpɔ, ka ja ani, ně goto oboa ngɔa ndɔ na bátaisi nɛngbo gǔ i.» 24 Mpɔ, moamɛ ndɔ áǒsosea bakpa bunde dábatú oa: «Utani ngɔa á ɔlɔ nɛkɛ, bómophɛ mbhɛdanigi ndɔ, mmbɔ atɔi bangɔa nkama.» 25 Bakpa ndɔ báongea: «Mɔkɔta, yɛ a ye tɔ na bangɔa nkama.» 26 Moamɛ áǒsikisia: «Negie, nkpa nde a na kema, aámbé bámophande goto. Mmbe nna na kema, aámbé bámutande nǐndɔ ajigi ně. 27 Cɔ, babibia ani, bundɔ bánaokonda nébɛ moamɛ gǔ abɔ, obhikani ně koni, bôtenɛ mosá ani.»
Sɛsɛa á Yéso na maseye angbó phɛ̂ ka Yɛusalɛ́ma
28 Mbusa á Yéso tɔ̌miaga á mɛní ndɔ, áɔmɛɛa mosá ka taia na Yɛusalɛ́ma. 29 Bii aju ye bhíbhí á Bhɛtɛphágɛb na Bhɛtanía,c bhíbhí á mamba ndɔ báɔɔphana Mijɛitúni,d áǒteka ka bagoigi nɛkɛ babɛ mosá. 30 Aǒngodea: «Gǎni ka nji ndɔ a bhâ mpenga. Bo ye ojua ka ngba, bondhondande miki á mponda na bánkpaki, na kánkumbimbɛ mɔnɔ nkpa. Cɔ, nkodani, bómbhikɛ ně.» 31 Aoba nkpa n'anoúisi gea te: «Boonkoda ka bo?» Bóonsikisia gea te: «Mɔkɔta aámbé ammɛmi.» 32 Bateki báoga ondhonda miki á mponda bíndɔ Mɔkɔta děngɔndi. 33 Bii dábaonkoda, bamɛnakɛ báǔusia: «Ka nyɔngɔ eke, boonkoda miki á mponda ndee? » 34 Báǒsikisia te: «Mɔkɔta aámbé ammɛmi.» 35 Mpɔ, báombhika na miki á mponda ndɔ kubii Yéso aɔ. Báobhisa bhɔngɔ nɛbɔ gǔ á ngɔngɔ á mponda, báonkambisa Yésoe. 36 Mpɔ, Yéso áɔsɛkɛda. Bakpa báɔɔyia bhɔngɔ nɛbɔ k'aphe.f 37 Bii dá ye tɔ bhíbhí á dhidha mamba ndɔ Mijɛitúni, usɛsɛ á bagoigi báogua jaí. Báokpanga bhebha á Mokonga n'ɛsɔ akpɛ ka ketangaɔ nde dábaɔni. 38 Dábaɔyɔnga be: «Bosegi ka Moamɛ, mmbe aobhika k'ina á Mɔkɔta, bɔjɛjɛ ábɛ na kobha, boombia ábɛ ka Mokongag. 39 Ka baPhaisáiɔ bunde dábatu sɔsɔbɛ á usɛsɛ á bakpa, báongodea Yéso: «Mphangigi, óphekeaga bagoigi nɛkɔ!» 40 Mpɔ Yéso áǒsikisa gea: «Nenongodi, nanga bɔ báphɔnga, b'etae baphuia nde ɛsɔ akpɛ.»
Yéso aogamea Yeusalɛ́ma
41 Mbenɔ nde Yéso abhiimisi kenombe, áɔɔna, áogamea u, 42 n'aɔyɔnga be: «Atúoba ɔbɛ n'oúbhi k'esa nde aphe á bɔjɛjɛ, cɔ kěkɛ nde nyɔngɔ ndɔ aye tɔ á bɔsɔmɛa k'isɔ akɔ! 43 Nga, ka b'esa ndɔ aobhika k'ɔbɛ, babibia ndeakɔ báokombande na mɔphɛkɔ ka manisa akɔ, na phuumisaga akɔ ɔma bhui. 44 Bɔ, bákotukatukande na bakpa bɔbhu bunde báiki subiakɔ. Bákaodeketɛku tanda n'etae moci gǔ á dhakɛ, ka nyɔngɔ nde kótúúbhi mbenɔ nde Mokonga dábhiki okoénga.
Yéso ěbǐgi basombisigi nkumba sub'endu ndea Mokonga
45 Mpɔ Yéso áongia sub'endu ndea Mokonga, áǒbeaga basombisigi nkumba. 46 Na ngodea bɔ gea, «Bádundu subi á buku ndea Mokonga be, ‹Endu nɛmɔ abande endu á ɛmɛmih. › Cɔ, benu bô ndiu obhisa nɛnu ɔma á dhondanaga á bakukuba. i»