Mɛní á nke á kekusa na nteni-nyɔngɔ
18
1 Yéso děngodi bagoigi nɛkɛ mɛní ka ubhisa abɔ te, akeni bámɛmɛ Mokonga esa bhubhui kanga phuia á měma. 2 Mɛní kau ungee: «Nteni-nyɔngɔ moci dáiki ka kenombe moci. Dánaom'banga Mokonga, dá phɔtɔ ɔ̌bɛnjiaga bakpa. 3 Nke á kekusa moci dáiki phɔtɔ ka nji ndɔɔ. Nke ndɔ dáogaga mɔtɛ á nteni-nyɔngɔ. Áongea be: «Tena nyɔngɔ nɛmɔ na nkpa nde bemɔ́ɔ na yɛ ka nyɔngɔ.» 4 Cɔ, esa ásii aɔnyɛ́nya, nteni-nyɔngɔ n'aɔkpɛma. Mpɔ, áoianaga ka měma akɛ be: «Doni, kéom'banga Mokonga, ne phɔtɔ ɔ̌bɛnjiaga bakpa. 5 Nɛɛi gǎkɛ na nyɔngɔ ndea nke á kekusa ndee. Ka bondɔ, netenande nyɔngɔ ndɔ Kagea te, kabhikɛ ye k'aphe á bhóma á mɔ̌ ani na nyɔngɔ nɛkɛ.»6 Mpɔ, Mɔkɔta Yéso áogea: «Bɔtɔɔki phɔ nyɔngɔ ndɔ nteni-nyɔngɔ ajéde a tɔ yɔngi? 7 Ande gea te, Mokonga kátenɛku gǎkɛ nyɔngɔ ndea bakpa nɛkɛ, bundɔ ɛ̌sɔmbu, bii báogama mosá akɛ keiphe n'esa? Aiphiande ka enga abɔ? 8 Nenogie, atenande nyɔngɔ nɛbɔ mbangɔ. Eme Muna-Nkpa gǎkɛ, mbenɔ á ja ani ka mokonda, nědhondande batɔa beekea na bá phɔtɔ bei ?»
MPhaísaiɔ na mphendisigi-manjanja.
9 Yéso dáyɔngi mɛní nde ka bakpa bunde dábáogea bánde batɔa-doni na báǒtondea badhabɔ. Mɛní kau a ungee, 10 «Bakpa babɛ dábadaphi ka ngia k'endu á Mokonga k'aphe á mɛma á Mokonga. Moci dátu mPhaisáiɔ, moci gǎkɛ mphendisigi-manjanja. 11 MPhaisáiɔ áǒmesia, áɔmɛma Mokonga ka měma akɛ be: «Hoo Mokonga! Nekosikisii bosɛgi nga, ké bea bakpa buangbo bunde bande bakukuba, batɔa-kanga kodoni, batɔa-iɛbɛ. Nekosikisii phɔtɔ bosɛgi gea, ké bea mphendisigi-manjanja ndee. 12 Eme gǎkɛ, neogea esa ibɛ ka pɔsɔ moci kanga á eaga ka nyɔngɔ á mɛma akɔ. Ka phaeka phaeka nkama, ɛ́tɔi nɛmɔ bhui, neokopha phaeka mo.»
13 Mphendisigi-manjanja gǎkɛ, dáiki danga. Â tɔ obusuma, áɔ̌bɛtaga k'egogo na bɔmbɛ, áogea te: «Hoo Mokonga! Omokuia ngɔmi, nende ntɔa-bojede.»
14 Mpɔ, Yéso áǒgea: «Cɔ, negie, mphendisigi-manjanja dáji mɔtɛkɛ, na ye tɔ ntɔa-doni k'iso á Mokonga, nna mPhaisáiɔ. Nga, nkpa bhuakɛ mmbe aǒdokomisa, aámbé bán'dhidhisande. Nkpa nde a gǎkɛ ǒdhidhisa, aámbé bán'dokomisande.»
Yéso na baniki bábhɔbhɔbhɔa
15 Bakpa dábam'bhikii Yéso na baniki bábhɔbhɔbhɔa ka gea te ábhisɛ njaga gǔ abɔ. Bagoigi báɔni ye bó, báǒphekeaga bakpa ndɔɔ. 16 Yéso gǎkɛ, áɔ̌bɔphana baniki, mpɔ áǒgea bagoigi be: «Ódeketani baniki bábhɔbhɔbhɔa bábhikɛ mɔtɛmɔ, bókǒimisiɛmbɛ. Nga, koboamɛ ndea Mokonga a ka bakpa bunde bá bɛa baniki. 17 Eya, něnogie, nkpa kángiɛku ka koboamɛ ndea Mokonga, aobá́ na kábeeki nyɔngɔ i bea miki.
Kema nde akeni ka tɔa á enda á mɛyɔ
18 Mɔkɔta á baYúdha moci dámuisi Yéso áogea: «Mphangigi anjánjá, negeande bo ka gea, nebɛ na enda á mɛyɔ ?»
19 Yéso áongodea be: «Ka nyɔngɔ sina nde ɔɔmɔɔphana nkpa anjánjá ? Nna na nkpa nde a anjánjá, a tɔ Mokonga sasakɛ aámbé a anjánjá. 20 Oye tɔ oúbha ɛɔphi ndee: kotunganɛmbɛ, komoɛmbɛ nkpa, kuubɛmbɛ, kom'bétekeɛmbɛ nkpa na nyɔngɔ á mbɛa, n'dokomisa abhakɔ n'amakɔa.»
21 Nkpa ndɔ áogea be: «Dénekpangi amba á ɛɔphi ndɔ na ne phɔtɔ moganda.»
22 Yéso aɔki ye nyɔngɔ ndɔ, áogea: «Aojigii goto kema mo. Gǎ ósombisɛ nkumba nɛkɔ bhubhui, ógabheɛ batɔa-buyɛnɛ bangɔa i. Oye ogea bó, ôba na nkumba na kobha. Mbusa, ômobea.»
23 Nkpa ndɔ aɔki ye nyɔngɔ ndɔ, áoba na bɔmbɛ, nga dátú na nkumba ásii phɛ̂.
24 Bii Yéso dámɔ̌ni n'ana bɔmbɛ áogea: «A mɔɔtɔ akpɛ ka ntɔi ngia ka koboamɛ ndea Mokonga. 25 Eya, ǎkpɛ ka ngamia ngia ka kubhu á muuphé. Agoto akpɛ phɛ̂ ka ntɔi ngia ka koboamɛ ndea Mokonga.»
26 Bakpa nde dábaɔmɔ̌ka Yéso, báɔyɔnga be: « Ani mbe aɔtɔka n'aami ka měma?»
27 Yéso áǒgea: «Kema nde nkpa nna ɔtɔtɔkisa, Mokonga aámbé aɔtɔtɔkisa.»
28 Mbusa, Pɛ́tɛɛ áongodea Yéso: «Ɔna phɔ: besu bedeketi gǎkɛ kema nɛsu bhui, béokobea.»
29 Yéso áǒngodea gea: «Eya, něnogie: aobá nkpa n'adeketi mɔtɛkɛ, kabɛ nkakɛ, bamunamakɛ, babɔkɔti akɛ na bǎnakɛ, ka nyɔngɔ á koboamɛ ndea Mokonga, 30 atɔande kema ásii ka matu nde. Na ka matu ndɔ aobhika, atɔande phɔtɔ enda á mɛyɔ.»
Yéso áɔtu kukua akɛ na jujuka akɛ
31 Bii Yéso dédhondanisi bagoigi nkama na babɛ (12), áǒngodea: «Ɔkani phɔ! Beotáia na Yɛusalɛ́ma. Kó unge atɔtɔkɛanande nyɔngɔ bhubhui nde baɔtu-Nyɔngɔ dábadundu ka phɔani eme Muna-nkpa . 32 Ande gea te, bámobhisande ka njaga á bakpa bunde bána baYúdha, bámɔtɛbhɛagande, bamobhómande, bámosuiagande soki. 33 Bámobindaande na gbutu na kusa ani. Esa á ko isaɔ nejujukande ka kukua.»
34 Bagoigi gǎkɛ, bákaengikisɛ nyɔngɔ ndɔ. Nga, kantíti á nyɔngɔ ndɔ dáka bhase. Dábákádigimisi phɔtɔ nyɔngɔ nde Yéso dáɔyɔnga.
Boamia á keíme-íme
35 Mbenɔ nde Yéso dábhiimisi Yɛíkɔ, keíme-íme moci dáiki ka mpɛphɛ á aphe n'aɔmɛmaga. 36 Áɔ̌ɔka usɛsɛ á bakpa na báɔnyɛ́nya. Áǒúisia: «Kéma sina ndɔ ee?» 37 Bakpa báongodea: «Yéso ba Najalɛ́ti aámbé aɔnyɛ́nya.» 38 Mpɔ, keíme-íme áokoga: «Yéso muna-Dhaúdhi o! Ómokuia ngomi.» 39 Bakpa bunde dábaotamba mosá á Yéso báomphekeaga te ákɔbɛ. Â goto ókoga akpɛ phɛ̂: «Muna-Dhaúdhi o! Ómokuia ngomi.» 40 Wa ndɔ, Yéso áomama, áososea gea bámbhikɛ kakɛ na yɛ. Bii yɛ aju ye bhíbhí akɛ, Yéso áomúsia, 41 «Okondi néogeeɛ bo?» Keíme-íme áogea: «Mɔkɔta, nekondi nɛɔnaphɛ goto.» 42 Yéso áongodea: «Cɔ, ɔnapha goto! Beekea nɛkɔ akoamisi.» 43 Kɛ̌kɛ ndɔ tɔ, â goto ɔ̌ɔnapha. Áom'bea Yéso n'aombhebha Mokonga. Bii bakpa bɔbhu báoni ye bó, bâ phɔtɔ ómbhebha Mokonga.