Bojede na ima i
(Ɔna phɔtɔ Mat 18.6-7,21-22; Malík 9.42)
17
1 Yéso áǒngodea bagoigi nɛkɛ: «Abatɔ na kema nde aǒbotea bakpa ka gea bojede. Cɔ, ande ngomi ka nkpa nde abhisi kema á kau. 2 Ambe bám'bɔɛɛ n'ɛtɛ n'angbo ka kingo, bámmakɛ ka kibha á obenge dû ! Ka geea te, kangusɛmbɛ ka baniki nde moci.» 3 Ka bondɔ, ɛngɛphani!Aoba munamakɔ n'aogii bojede, nkeea. Aoba n'abeeki bojede nɛkɛ, íma bojede kau. 4 Aoba n'aogi ajede mɔngɔ ngia njaga ibɛ (7) k'esa moci, n'akosikiigi goto mɔngɔ ngia njaga ibɛ (7) geae, nebeeki bojede nɛmɔ, cɔ, ônimia u.
Bukpɛkpɛ á beekea á Mokonga
5 Bateki báongodea Mɔkɔta gea: «Yamea beekea nɛsu.» 6 Yɛ áǒsikisia te: «Atuoba beekea nɛnu na bɔbhɔbhɔa i na bea miki á mbuka, ámbe bɔɔtɔka na bongodi me á mukuyu nde, ‹‹Phuikana, ógɔ̂tɛɛ k'obenge.» Atógeande bíndɔ bonsosi.
7 Cɔ, ka benu sina sɔsɔbɛ anu, aobá́ n'ana mbhɛdanigi, kabɛ ngubhi, kabɛ mbondigi-etúge, mbenɔ nde aju ka toka akɛ na ciko, óongodea: «Kamisaga ógóeɛgɛ?» 8 Tanda phɔ. Ondiu ongodea: «Ɔ́mba kani eea, óbhikɛ n'ɔlanigi ánjá ka bhɛdaneaga ani na kabii neagande na noa. Mbusa, oeagande nɛkɔ na noa.» 9 Cɔ, ansegande mbhɛdanigi nɛkɛ, nga, agi kema nde atónsosi? Nna bo!. 10 A phɔtɔ bo ka benu. Mbenɔ nde bɔɔtɔtɔkisa kema nde bánososi, yɔngani tɔ be: «Bɛ tɔ babhɛdanigi. Nga, begi tɔ kema nde básososi.»
Yéso ěamisi batɔa-sǔ nkama
11 Yéso dátú otamba k'aphe á gǎ na Yɛusalɛ́ma. Aphe ndɔ dányɛ́nyi gǎkɛ sɔsɔbɛ á Samalía na Galiláia. 12 Mbenɔ nde dáongia ka nji moci, batɔa-sǔ nkama báobhika ondhonda. Báomama danga. 13 Báontobea: «Mɔkɔta Yéso! Osokuia ngomi.»
14 Yéso ɛ̌bɔni ye, áǒngodea: «Gǎni, bógǒphangisiɛ mɔtɛa batobei-phɛa ndea Mokonga.» Báoga. Na bá phɔtɔ k'aphe, sǔ nɛbɔ áotoka. 15 Moci sɔsɔbɛ abɔ, mbenɔ nde aɔni gea, dáami, áoja mbusa n'aombhebha Mokonga k'ɛsɔ ángbó. 16 Áobhika ogua k'ecinji á Yéso, endondo akɛ áogbondoa odo, aonsega. Nkpa ndɔ, dátú gǎkɛ moSamalía.
17 Mpɔ Yéso áogea: «Ai! Bundɔ bátóami bakatú nkama? Cɔ, bundɔ ngia njaga gena (9) ndɔ bá gǎkɛ oa? 18 Nna na ka bɔ mmbe akanisi já ká sega á Mokonga, tɔndɔ mɔkɛni nde?» 19 Mpɔ Yéso áongodea mɔkɛni ndɔ: «Ma! Ógɛ. Beekea nɛkɔ akoamisi.»
Kidia á Koboamɛ ndea Mokonga
20 BaPhaisáiɔ báomúisia Yéso: «Mbenɔ sina nde koboamɛ ndea Mokonga abhikande?» Yéso áǒsikisia te: «Koboamɛ ndea Mokonga nnaobhika bakpa na báɔɔna. 21 Bákáyɔngɛku, ‹Ɔna! A oani!›, kabɛ ‹A kósii!› Nga, úbhani gea te, koboamɛ ndea Mokonga a ye tɔ sɔsɔbɛ anu.»
Esa nde Muna-Nkpa ajande
22 Mpɔ, áǒngodea bagoigi nɛkɛ: «Mbenɔ moci ajuande, nnde bóbande na siki á ɔna eme Muna-Nkpa, nanga k'esa moci tɔ, bɔ́kɔ́mɔɔnɛku. 23 Bakpa bánɔtɔmiande: «Aámbɔ a kósii! Aámbé a oani!» Cɔ, bókogɛmbɛ. Bɔ́kɔcɔcɔkɛmbɛ kubei. 24 Nga, sumbii mbua aophenua na kobha, áɔbhɛnya nkɛkɛɔ bhubhui, bondɔ unge eme Muna-Nkpa nebande k'esa á ja ani. 25 Akeni phɔ átambɛgɛ ásii, batɔa k'ɛbɔkɔti nde bán'yɛ.
26 Kema nde dágeani ka saga ndea Nɔ́a, ageanande phɔtɔ bó k'esa á ja ani eme Muna-Nkpa. 27 Nga, ka saga ndea Nɔ́a, bakpa dábaoeaga, báonoa, báǒboaga bake, bake báɔɔmana na ka bii Nɔ́aa dáge okambea ka koko angbó. Mbusa, tuma íbo phɛ̂ áodaka odo bhui, bakpa ndɔ báotinda bɔbhu.
28 Abande phɔtɔ bea saga ndea Lɔ́ti. Bakpa dábaoeaga, báonoa, báosomba, báosombisa, báokona na báɔphɛka. 29 Esa ndɔ Lɔ́ti dátoki gǎkɛ ka Sɔdhɔ́mab, ɛɛmbɛ á nsa na mpusu n'áotoboaga bea nsa áogua ka nji ndɔ b'íbo á mbua, áǒtindisa bakpa ndɔ bɔbhu ko! 30 Abande phɔtɔ bó esa nde eme Muna-Nkpa nɛsɛnɛkande.
31 Esa ndɔ, nkpa nde abande bhakijɔ énduc nɛkɛ n'ana nkumba sub'éndu, kakiɛmbɛ ye ka boa i. A phɔtɔ bó ka mmbɔ abande ka ciko, kajɛmbɛ ye k'endu nɛkɛ.
32 Nkanisiani phɔ nka-Lɔ́tid! 33 Nkpa nde aokaba amba enda akɛ, abungisande. Nkpa nde abungisi gǎkɛ enda akɛ, aámbé aambande. 34 Nenoúbhisi gea te, kiipha á esa ndɔ, bakpa babɛ bábande k'eka mo. Bám'bhɛdande kabɔ moci, báondoa moci. 35 Bake babɛ bábande odhoa k'ɔma ímoci, bándungande kabɔ moci, báondoa moci. 36 [ Bǒko babɛ bábande ka ciko, bándungande kabɔ moci, báon'doa moci.] e
37 Bagoigi bâ goto omúisia: «Mɔkɔta, nyɔngɔ ndɔ ageanande oani?» Yéso áǒsikisia be: «Ɔma nde nyama aokua, bei tɔ unge bandia báodhondanaga.f»