Mɛní á nambi-nkumba n'ana maibhe-maibhe
16
1 Yéso â goto ǒngodea bagoigi nɛkɛ mɛní ndee: «Nkpa moci ntɔi dátú na nambi-nkumba nɛkɛ. Bakpa báobhika ɔntɔnga nambi-nkumba ndɔ mɔtɛakɛ gea te, ‹Nambi-nkumba nɛkɔ auji nkumba nɛkɔ.› 2 Ka bondɔ, ntɔi áɔmɔphana nambi-nkumba, áongodea be, ‹Nyɔngɔ sina nde bakpa báɔkɔtɔnga ajede ně ? Cɔ, ómoúbhisa nyɔngɔ á nkumba ndɔ ooamba. Nga, kpanga á k'esa nde, kóbɛku ye nambi-nkumba nɛmɔ.›3 Mbusa, nambi-nkumba áogea subi á měma akɛ be, ‹ Negeande bo ? Nga, mɔkɔta nɛmɔ amɔkpɔi kɔkɔta á amba nkumba nɛkɛ. Cɔ, kéna bukpɛkpɛ á gubha. Aoba na nɛɔmɛmaga, ámbe nekuande na soni. 4 Eya, neoúbha kema nde negeande bii mɔkɔta amotokisande k'ekuma, ka gea bakpa bámoseseɛ mɔtɛbɔ.›
5 Mpɔ, áɔ̌ɔphana bakpa bɔbhu bunde dábabhɛdi nkumba ndea mɔkɔta nɛkɛ kanga á phenda i. Báobhika moci moci. Áomúsia mmbɔ andhondi mosá, ‹Ojigi n'ophendɔ á nkumba ndea mɔkɔta nɛmɔ k'ungaani?›
6 Áonsikisia te, ‹Nejigi n'ekuu á gamba nkama ibɛ (20).› Nambi-nkumba áongea, ‹Cɔ, bhɛda baobá́-óphendɔ nɛkɔ, óikɛ ka odo, ókamisɛgɛ dundua nkama (10).›
7 Mpɔ, áongea ba ángbó, ‹Obɛ gǎkɛ, ophɛndande nɛkɔ kungaani?› Wa, mmbɔ áonsikisia te, ‹Nejigi na sake á mponga mia moci (100) .› Nambi-nkumba áongea, ‹Cɔ, bhɛda baobá́-óphendɔ nɛkɔ, óikɛ ka odo, ódunduɛ nkama ngia a njaga isaɔ (80). › 8 Mpɔ, mɔkɔta áobhebha kɔbɔngɛ ndea nambi-nkumba nanga bii dátú ntɔa-maibhe. Cɔ, batɔa ka matu nde bá na kɔbɔngɛ sɔsɔbɛ abɔ.
Nkpa nn'aɔtɔka n'ěbhɛdaneigi bakɔta babɛ mɔngɔ ímoci
9 Mpɔ, Yéso áɔsɛkisia be: «Nenogie, Gabhani nkumba nɛnu ódhemayɔ ka gea te, bókondisɛgɛ na badhanu. Nga, esa nɛngbo, ɛtɔi nɛnu asiande. Mpɔ bánoseseande k'ɔma á boiki á mɛyɔ.»
10 Nkpa nde ande ntɔa-doni mbenɔ nde aoamba kema abhɔa, abande phɔtɔ bó mbenɔ nde aoamba kema ánbgó. Nkpa nde nna ntɔa-kodoni mbenɔ nde aoamba kema abhɔa, abande phɔtɔ bó mbenɔ nde aoamba kema ánbgó. 11 A gǎkɛ oba na bókóambi na kodoni ɛtɔi ódhemayɔ, ani mmbe ánophande ɛtɔi á doni gea te bóambɛ ? 12 Aoba na bókóambi phɔtɔ na kodoni nkumba ndea bangɛ́, ani mmbe ánophande nkumba ínɛnu?
13 Nna na mbhɛdanigi nde aɔtɔka n'ěbhɛdaneigi bakɔta babɛ. Ambe ankangeande moci, áonkonda bǎ ngbo. Ambe adakateanande na moci, áɔmbɛnjiaga bǎ ngbo. Eya bɔ́kɔ́ɔtɔka na bɔmbhɛdaneigi Mokonga na bhɛdaneaga phɔtɔ Ɛtɔi.
Ɛɔphi na Koboamɛ ndea Mokonga
14 Wa ndɔ, baPhaisáiɔ báɔntɛbhɛaga Yéso ka nyɔngɔ ndɔ bhui nga, dábaokondaga bangɔa. 15 Ka bondɔ, Yéso áǒngodea be: «Bǒphanisia k'iso á bakpa gea te, bonde batɔa-doni. Mokonga aámmbé a gǎkɛ oúbha měma anu. Kema nde bakpa báodokomisa, a unge Mokonga aɔɔna n'ajɔɔkani.
16 Matu á ɛɔphi ndea Mósa na buku á baɔtu-nyɔngɔ dáge osungiaga ka saga ndea Yoáni-M'batisi. Kpangea esa ndɔ unge Mbino Anja á koboamɛ ndea Mokonga aubhikani, mpɔ nkpa bhuakɛ a tɔ ǒkukumisa ka gea ángiɛ kau. 17 Kobha na mokonda anyɛ́nyande kanga ngǎka. nna ndiu tanda na mici á dundua na ábhɔa á ɛɔphi nde anyɛ́nyande bó.»
18 Aoba mǒko n'an'ye nkakɛ, áomuka nke bangbó, ande ntɔa-iɛbɛ. Aoba mǒko n'amuki nke nde munyakɛ an'ye, ande phɔtɔ ntɔa-iɛbɛ.
Ntɔi na Lajáɔ
19 Ntɔi moci dáɔɔlaga bhɔngɔ aphoo-phoo n'ésombi i n'akpɛ phɛ̂. Dâ phɔtɔ oenda esa bhubhui anjá na eaga eea nde aotena soki. 20 Ntɔa-buyɛnɛ moci ina akɛ Lajáɔ, dáoikaga ka odo mosá á kǐo á endu ndea ntɔi ndɔɔ. Nyama akɛ bhui dátú n'aphɛphɔa. 21 Dátú na siki á eea, nde dáoguaga kusi á mɛja ndea ntɔi, bambɔa dába ndiu obhika odiaga aphɛphɔa akɛ.
22 Esa imoci, ntɔa-buyɛnɛ ndɔ dáku. Bamalaeka báombhisa ka kɛbhɛ á Abhalaámu. Ntɔi ndɔ â phɔtɔ okua, báomǔmba. 23 Bii dáotambaga ka nji á basí, áomesia iso akɛ, áɔmɔ̌na Abhalaámu danga, Lajáɔ n'aiki ka kɛbhɛ akɛ. 24 Áontobea Abhalaámu be: «Abhɛ o! Ómokuia ngomi. Nteka k'ani Lajáɔ, áubhɛ sese á miki á njaga akɛ k'ibo, ádhɛkisɛ edaka ani. Eme aámbé neotambaga k'ɛɛmbɛ á nsa ndee.»
25 Abhalaámu â ndiu ongodea te: «Miki amɔ, kanisia gea te, dɔ́tɔi kema ánjanja ka enda akɔ, Lajáɔ â gǎkɛ ɔtɔa kema ajede-jede. Kɛ̌kɛ nde gǎkɛ, aphɔngi tɔ oani phio! Obɛ aámbé o ndiu ká tambaga. 26 Goto, mininga ángbó a sɔsɔbɛ asu na benu. Ka bondɔ unge, bakpa nde bákondi toka oani, bágɛ motɛ anu, bánaɔtɔka. Nna phɔtɔ na nkpa nde áɔtɔka toka ko, áojua koni.»
27 Ntɔi â goto ongodea: «Abhɛ, kadenge-denge, nteka Lajáɔ k'endu ndea abhɛ. 28 Nga, ne na bamunayi bɔku, ágɛ ɛngɛphisɛ bákajuembɛ phɔtɔ k'ɔma á tambaga ndee.»
29 Abhalaámu áonsikisia: «Bamunamakɔ bá na Mósa na baɔtu-nyɔngɔ ko. Cɔ, ambe bɛ́bɔkɛ.»