Mɔgɔgɔ nde dábungigi aɔnɛkani
15
1 Baphendisigi-manjanja na batɔa-bojede básii, dábaombhimisiaga Yéso ka ɔka nyɔngɔ nɛkɛ. 2 BaPhaisáiɔ na baphangigi-ɛɔphi bâ gǎkɛ ɔngɔngɔnaga sɔsɔbɛ abɔ. Báogea: «Mogaa nde aǒsesea batɔa-bojede. A phɔtɔ oeaga na bɔ!»3 Mpɔ, Yéso áǒngodea mɛní ndee, 4 «Ka benu sina, aobá mɔgɔgɔ n'ambungii nanga ába n'abɔ mia moci (100) , nn'aɔtɔka n'ědeketi bundɔ bájigi ka mbunja ka nkabɔ akɛ na kabii amɔnande? 5 A ye ɔmɔ̌na, áoba na maseye, áonkumba k'ɛkɔta akɛ, 6 áonsikianaga ně mɔtɛkɛ. Mpɔ, áɔ̌ɔphana badhakɛ na bamasambé akɛ, áǒgea be: «Beguɛni jaí nga, nɛmɔ̌ni mɔgɔgɔ nɛmɔ, mmbɔ atóbungigi.» 7 Nenógie, bondɔ unge abande maseye angbó na kobha, aobá́ ntɔa-bojede moci n'ékěti, kɔnyɛ́nya bakpa nkama ngia njaga gena na ngia njaga gena (99) bunde báka na siki á kětia tambea abɔ.»
Mɛní á ngɔa moci n'abungi
8 «Cɔ, aobá́ nke moci n'a na gbutuka á bangɔaa nkama, moci n'abungi, atoboande ɔbhɛa, áophua endu ka kaba i bokɛ bokɛ na ka bii aɔnakuma. 9 A ye ɔɔna, áɔ̌ɔphana badhakɛ na bamasambé á akɛ, áǒgea: beguɛni jaí. Nga, nɛɔni ngɔa ndɔ atómobungii. 10 Nenógie, bondɔ unge bamalaeka ndea Mokonga báguande jaí ka nyɔngɔ á ntɔa-bojede moci n'akěti tambea akɛ.»
Mɛní á baganda babɛ
11 Yéso â goto ogea: «Nkpa moci dátú na baganda babɛ. 12 Mmbe miki áongodea abhakɛ, ‹Abhɛ, ómopa kebu ínɛmɔ.› Abhabɔ áǒgabhea ɛtɔi nɛkɛ.
13 Mbusa á esa abhɔa, mmbɔ miki áoboaga nkumba nɛkɛ bhui, áoga ně ka nji á danga. Kó, áobungisa nkumba ndɔ bhui jǎi-jǎi. 14 Mbusa á gɔba á nkumba ndɔ bhui, monganya áogua ka nji ndɔ. Miki áoba na buyɛnɛ. 15 Áoga okaba ekuma mɔtɛa á nkpa moci á ka nji ndɔ. Nkpa ndɔ áonteka ka ciko, k'aphe á isa á bangɛa nɛkɛ. 16 Yɛ, â ye tɔ na siki á ea á tɔnɛ nnde bangɛa dábatú oea. Kabɛ na nkpa nde dáomopha kema.
17 Mpɔ, áokpanga ianaga sasakɛ, áogea, ‹Babhɛdanigi ndea abhɛ, báotua eea na báɔɔna. Eme gǎkɛ, na neokua na monganya. 18 Cɔ, nɛmɛande, néoga ondhonda abhɛ, néon'dengemisa be, ‹Abhɛ, déngii Mokonga ájede, nê phɔtɔ ogea bojede mosá akɔ. 19 Kekeni ye bámɔɔphanɛ anakɔ, ómobhisa ye tɔ bea ka babhɛdanigi nɛkɔ.›
20 Wa, áɔmɛa, áoga mɔtɛa á abhakɛ. N'aphɔ́tɔ danga, abhakɛ áɔmɔɔna, áonkuia ngomi phɛ̂, áoga mbangɔ, áonkotoa, áomumbiaga. 21 Anakɛ áongodea, ‹Abhɛ, déngii Mokonga ájede, nê phɔtɔ ogea bojede mosá akɔ. Kekení ye bámɔɔphanɛ anakɔ.›
22 Mpɔ, abhakɛ áǒngodea babhɛdanigi nɛkɛ gea, ‹Kamisagani! Bɔ́gɔ̌bhɛdɛ bhɔngɔ ánjá phɛ̂, bɔmɔlisɛ. M'makeani phɔtɔ mbanga ka miki á njaga, na biato k'ecinji. 23 Mbhikani na mponjo á ngɔmbɛ nde anɔní, bóntenɛ, beɛgɛni ánjá na gua á jaí. 24 Nga, miki nɛmɔ atóku mɔnɔ, ajujuki gǎkɛ. Dábungigi mɔnɔ, nɛmɔ̌ni gǎkɛ. › Mpɔ, báokpanga gua á jaí.
25 Ka mbenɔ ndɔ, miki imbɔ phomi dátú ka ciko. Ká ja akɛ, bii ábhiimisi endu, áɔɔka embɔ na m'bina. 26 Ka bondɔ, áɔmɔphana ka babhɛdanigi moci. Aomúsia kantíti á eongo ndɔɔ. 27 Mbhɛdanigi áonsikisia, ‹Mɔtɔ akɔ akidi. Abhakɔ anteni mponjo á ngɔmbɛ nde anɔni. Nga, anakɛ akidi ka bɔjɛjɛ.›
28 Miki imbɔ phomi áɔbɛa, áoya ngia ka jaí. Ka bondɔ, abhakɛ áojuana, áon'dengemisaga, ángiɛ. 29 Miki áonsikisia, ‹O abhɛ! Ka basaga b'ásii nnde nɛɔkɔbhɛdaneaga; ketingimbɛ mɔnɔ tanda ɛsɔ akɔ. Cɔ, kómopimbɛ mɔnɔ tanda miki á mɛmɛ, gea neguɛ jaí na badhani. 30 Cɔ, bii anakɔ ajue, mmbɔ auji ɛtɔi nɛkɔ bhui ka nyɔngɔ ótungɔ, yɛ aámbɔ ontenei mponjo á ngɔmbɛ nde anɔni!›