Yéso mosá á Pilátɔ
(Ɔna phɔtɔ Mat 27.1-2,11-14; Malíkɔ 15.1-5; Jean 18.28-38)
23
1 Mpɔ, bakpa ndɔ báɔmɛɛa bɔbhu, báonga na Yéso mosá á Pilátɔ. 2 Bii bánjuɛ ně kó, báokpanga tɔnga akɛ, báogea te: «Betóndhondi mɔgaa nde n'aǒdhema batɔa k'ekuna nɛsu, ka gea te bákaphendɛmbɛ manjanja mɔtɛa Kaisáa, goto agi te ande Moamɛ Masía. » 3 Pilátɔ áomúsia te: « Obɛ onde Moamɛ á baYúdha? » Yéso áɔnsikisia: « Oyé n'ɔyɔngi. » 4 Mpɔ, Pilátɔ áǒngodea bakɔta á batobei-phɛa ndea Mokonga na usɛsɛ á bakpa gea: « Ketandaɔɔna bojede ka phɔa nkpa ndee. » 5 Bâ ndiu osoea na yɔnga te: « Yɛ aeyombokisi bakpa na goisaga nɛkɛ. Atókpangi na Galiláia, áɔtɔmba Yudhɛ́a bhui na abhiki ojua ɔani. »Yéso mosá á Ɛlɔ́dhɛ
6 Cɔ, mbusa á Pilátɔ ɔka nyɔngɔ ndɔ, áomúsia ka úbha mmbe Yéso ande ntɔa na Galiláia. 7 Bii dáúbhi gea dátú kusi á kɔkɔta ndea Ɛlɔ́dhɛ, áonteka Yéso mɔtɛa Ɛlɔ́dhɛ nga dátú phɔtɔ na Yɛusalɛ́ma ka b'esa ndɔ. 8 Mbenɔ nde Ɛlɔ́dhɛ amɔɔni Yéso, áoba na maseye phɛ̂. Nga, dányɛ́nyi mbenɔ énda n'ana mɔphɛ á ɔna akɛa. Bii dáɔɔka mbinɔ akɛ, áobá na nsebeɔ gea te, Yéso antɔtɔkisiande ketangaɔ. 9 Mpɔ Ɛlɔ́dhɛ áomúsiaga Yéso, Yéso kansikisiɛ gǎkɛ tanda ka nyɔngɔ. 10 Mpɔ, bakɔta á batobei-phɛa ndea Mokonga, baphangigi-ɛɔphi bunde dábatú ɔa, báɔntɔnga akpɛ. 11 Wa, Ɛlɔ́dhɛ kimoci na batoa-émani nɛkɛ báontondea Yéso na tɛba akɛ, báɔmɔ̌lisa ngɔmbɛ ánjá phɛ̂ na jisa akɛ goto mɔtɛa Pilátɔ. 12 Esa ndɔ Ɛlɔ́dhɛ na Pilátɔ báɔɔngana nga, dábatú na k'obibiá mosá.
13 Bii Pilátɔ ědhondanisi bakɔta á batobei-phɛa ndea Mokonga, bagbɛga na bakpa, 14 mpɔ áǒngodea te: «Cɔ, bɔɔna, ne ye muisigi nkpa nde mosá anu mmbe bótomobhikii na yɛ, bô gea te' aeyombokisi bakpa. Eme gǎkɛ kɛɔni tanda nyɔngɔ ájede nde bɔntɔngi kau. 15 Ɛlɔ́dhɛ phɔtɔ káɔni kau ka bondɔ unge anjisi goto mɔtɛasu, ande gea yɛ, kági ka kema nde akeni ákuiɛ u. 16 Nem'bindisande ndiu tɔ, mpɔ néondeketa. » [ 17 Ka jaí á Pasáka bhui, Pilátɔ dáonjuanisa kabɔ ntɔa mɛkakɔ mocib.] 18 Mpɔ báokoga kimoci gea: « Ambe Yéso ákuɛ, ónjuanisɛ ndiu kasu Bhalábha. » 19 Dábamaki Bhalábha ka mekakɔ ka nyɔngɔ á oyombɔ nde dátú ka kenombe na moa á bakpa. 20 Pilátɔ â goto kǒuisia nga, dáogea ánsagɛ Yéso. 21 Bâ gǎkɛ okoga te: «Nkɔkɛagani e! Nkɔkɛagani yɛ ka me á nkpatɔ. » 22 Mpɔ Pilátɔ áǒuisia mɔngɔ á ko isaɔ gea: « Bojede sina nkpa nde agi? Nga, kɛɔni ka nyɔngɔ ájede nde akeni ákuiɛ u. Kabondɔ ne ye om'bindisa, nen'deketande. 23 Bɔ, gǎkɛ bâ tɔ osuia koga gea te bánkɔkɛɛgɛ Yéso ka me á nkpatɔ. Nkogɔ nɛbɔ áɔgɔnana. 24 Mpɔ Pilátɔ áotena nyɔngɔ ndɔ gea te, a beeki ɛmɛmi nɛbɔ. 25 Áonjuanisa nkpa nde dábaɔmɛma ánjuanisɛ, mmbe dábamaki ka mekakɔ ka nyɔngɔ á oyombɔ na moa á bakpa. Â ndiu onsaga Yéso bángeɛ bíndɔ dábaokonda.
Kɔkɛa á Yéso ka me á nkpatɔ
(Ɔna phɔtɔ Mat 27.32-44; Malíkɔ 15.21-32; Yoáni 19.17-27)
26 Bii dábaonga na Yéso, báondhonda Simɔ́ni ntɔa na Kuɛ́nɛ n'aotoka na ciko, báonkpoka na me á nkpatɔ ka gea á kumbɛ u mbusa á Yéso. 27 Usɛsɛ á bakpa n'aom'bea, phɔtɔ na bake báogama na tabɔkanaga ka nyɔngɔ á Yéso. 28 Mpɔ Yéso áǒphaia nci nde bake baɔ, na ngodea bɔ gea: « Baseka á ka Yɛusalɛ́ma bókogamɛmbɛ ka phɔani, ógameani ndiu bɛnu sisanu na baniki nɛnu! 29 Ka nyɔngɔ nde ka b'esa ndɔ aobhika, bɔɔnande bii bakpa báyɔngande gea: Maseye ka bangomba bunde bakaonjimbɛ mɔnɔ na ungisa! » 30 Â goto ɔyɔnga, bakpa bákpangande ngodea á mamba gea: « Ósoguia! » Na ngodea etondoo: « Ɔsɔ́sɔmɛac! » 31 Nga, kabɛ na bagi bende kaphɔa á me á dhɛkad, cɔ abáeka bo kaphɔa me á kɔ̌mɔkaka?
32 Mpɔ bâ phɔtɔ kǒga na buangbo batɔa-jede babɛ ka moa á bɔ kimoci na Yéso. 33 Bii dábajú k'ɔma ndɔ dábaɔɔphana « Gangata », ɔa, báonkɔkɛa Yéso ka me á nkpatɔ kimoci na batɔa-jede babɛe. Moci báonkɔkɛa nci á njaga á mǔku á Yéso, bǎngbo gǎkɛ áobá nci á njaga á nkei akɛ. [ 34 Mpɔ Yéso áɔyɔnga gea: « Abhɛ íma bojede nɛbɔ nga, bákaoúbha kema nde báogea. »]f Wa, báogabhisana ngɔmbɛ nɛkɛ mbusa á bɛta bana-mɛlɔɛ kaug. 35 Bakpa báoika ɔa ka ɛnjia akɛ, bakɔta dábaɔntɛbhɛah na yɔnga te: «Cɔ, bii yɛ atoamisi bakpa buangbo, ambe éamisɛ pɛ yɛ sisakɛ, kabɛ n'ande Masía mmbe Mokonga dánsɔmbu! ›› 36 Batɔa-emani bâ phɔtɔ k'ɔntɛbhɛa na sɛkɛda bhíbhí ka opha akɛ makana n'ǎngaingaii, báɔyɔnga gea, 37 ‹‹ Aoba n'onde moamɛ ndea baYúdha, óamisa phɔ sisakɔ. » 38 Mpɔ báodundua k'obáɔ gǔ á mɔ̌ akɛ be: «Mmbe ande Moamɛ ndea baYúdha. »
39 Wa, ka batɔa-jede bunde dáběkɔkɛigi na yɛ áombhóma Yéso te: « Kóma gǎkɛ Masía? Eamisa sisakɔ na amisa asu phɔtɔ! » 40 Mmbɔ bǎngbo â ndiu komphenea na yɔnga te: « Ca! kóma kom'banga Mokonga, ɔbɛ ímbɔ báɔkɔkɛigi phɔtɔ bɛa yɛ? 41 Ka phɔasu ábɛ bo nga betɔi nnde aengemeani na tambɛa asu, yɛ gǎkɛ, kagi tanda ka bojede. » 42 Mpɔ áongodea Yéso te: « Ómokanisiambɛ ka koboamɛ nɛkɔ mbenɔ nde obhikaeka. »
43 Mpɔ Yéso áonsikisia te: « Eya, neongodi doni gea, kesande obande kimoci n'eme subi á Paladhísɔj. ››
Kukua á Yéso
(Ɔna phɔtɔ Mat 27.45-56; Malíkɔ 15.33-41; Yoáni 19.28-30)
44 Nanga dátú ye tɔ bhíbhí á kantende (12h) kaiphiɔ áɔɛmba odo bhui na ka bii dájú ka akpaala (15h). 45 Mani áɔimika. Ngɔmbɛ á sub'endu á Mokongak áobhomoka ka meme. 46 Mpɔ Yéso áokoga k'ɛsɔ akpɛ te, ‹‹ Cɔ Abhɛ! nesikisi měma ani ka njaga akɔl. » Ka yɔnga akɛ nndɔ, áɔdɔɛa. 47 Mbenɔ nde mɔkɔta á batɔa-emani dáɔni nnde dányɛ́nyi, áombhebha Mokonga na yɔnga te: « Eya! nkpa nde atú ntɔa-doni. »
48 Cɔ, ka ɔna nnde dányɛ́nyi, bakpa bɔbhu bunde dábaontêa báoga na báɔ̌bɛta égogo na ngini. 49 Bakpa bɔbhu bunde dábaomuubha Yéso na bake bunde dábaom'bea ka toka na Galiláia, báɔɛnjia nnde dáɔnyɛ́nya na báiki danga.
Úmbá á Yéso
(Ɔna phɔtɔ Mat 27.57-61; Malíkɔ 15.42-47; Yoáni 19.38-42)
50-51 Cɔ, mǒko moci ina akɛ Yɔsɛ́phu, dátú ntɔa Alimatɛ́am, nji á baYúdha. Dátu ntɔa-doni na měma ánjá, dâ phɔtɔ obondea koboamɛ ndea Mokonga. Dátu ka batɔa-ntua á tena nyɔngɔ, dákábeekeani gǎkɛ n'abɔ ka mɔangɔ ndɔ. 52 Áoga mɔtɛa Pilátɔ k'aphe á mɛma mǒnda á Yéso. 53 Mpɔ áodhidhisa mǒnda ka me á nkpatɔ, áɔkombea u na sanda na úmbá i subi á bhota nde dábatongi bea kubhu ókanga, nde dábakamúumbimbɛ mɔnɔ nkpa subi i. 54 Dátú esa á ko bɔku bhíbhí á s'esa á sabato.